Tzaj kꞌakꞌan tcꞌuꞌj David tiꞌj Saúl tuꞌn miꞌn tcub tbyoꞌn
24
Tej tul meltzꞌaj Saúl t-xilenxi tcolin tuꞌn toc lpeꞌ cyiꞌj aj Filistey tuꞌn tcub cyiꞌj tuꞌn, pon tkanil tucꞌil ka atzun taꞌtok David tuj tzkij txꞌotxꞌ En-gadi. 2 Jawtzun t-scꞌoꞌn Saúl ox mil xinak cyxol aj Israel ex xiꞌ jyolte David, atzun e jeꞌx ke t-soldad cywiꞌ ke nmak pic jatum ateꞌ ke chip te tjakꞌ cꞌul. 3 Tuj be kꞌiꞌntok tuꞌn Saúl lu jun tpeꞌn ẍneꞌl tcub, ex nikayin ttxlaj attok jun toyꞌ pic jatum tewan tib David cyucꞌix ke xinak ateꞌ tucꞌil. Ocx Saúl tuj toyꞌ pic lu tuꞌn ttxaꞌn. 4 Xitzun cymaꞌn ke xinak te David, akeju ateꞌtok tucꞌil:—Matzun ma japun ju yol tzaj tmaꞌn Kman teya chi cyjaꞌ: Cxel nkꞌoꞌne aj kꞌoj tiꞌja tuj tkꞌaba, binchama nok alcye taja tuꞌn tbant tiꞌj, chi Kman, che chi.
Jawtzun weꞌ David ex chebaxix el tkesin jun piẍ ttxaꞌn t-ẍjoꞌw Saúl, 5 pero tej tbant jlu tuꞌn, tzaj tbis tuꞌnju otok tzꞌel tkesin jun piẍ ttxaꞌn t-ẍjoꞌw Saúl, 6 ex xi tmaꞌn cye ke xinak ateꞌ tucꞌil:
—Miwt takꞌ Kman ambil weye tuꞌn toc nkꞌoꞌne nkꞌabe tiꞌj npatrone aju rey, porque rey te, ex ax Kman o jaw scꞌonte te tuꞌn toc te rey, chi David.
7 Cyjaꞌtzun e mayet ke xinak tuꞌn David, akeju ateꞌtok tucꞌil, ex mintiꞌ xi tkꞌoꞌn ambil cye tuꞌn cyoc tzokpaj tiꞌj Saúl. Etztzun Saúl tuj toyꞌ pic ex xi tiꞌntl tbe. 8 Pero tzaj lpeꞌ David tiꞌj ex xi schꞌin tiꞌj cyjaꞌ:
—Tat Rey, Tat Rey.
Ajtztzun tqueꞌyin Saúl tiꞌjxi, atzunte David cub ẍmejeꞌ ex pon tacl tibaj twitz max twitz txꞌotxꞌ te jun techal te nimbil, 9 ex tma:
—Aya Tat Rey ¿tikuꞌn in xi tnimana cyyol xjal, akeju in che kꞌmante teya ka in chin jyone tumel tuꞌn tbant jun mya baꞌn tiꞌja wuꞌne? 10 Pero aya Tat Rey matzun tila tuꞌn twitza, masque ate Kman xcub kꞌonte teya tuj nkꞌabe tuj toyꞌ pic, pero mintiꞌ xwajbeye tuꞌn tcub nbyoꞌne, nok oꞌcx cucx ma cyaj ankꞌina wuꞌne ex nchiye tuj nximbetze: Mlay tzꞌoc nkꞌoꞌne nkꞌabe tiꞌj, porque reyte, ex tuꞌn Kman jaw t-scꞌoꞌn.
11 Aya Tat Rey, queꞌyintza aju kꞌiꞌn tuj nkꞌabe, jun piẍ ttxaꞌn t-ẍjoꞌwa ma tzꞌel nkesine, ex tiltzun cabalxwitlo xcuba wuꞌne. Tuꞌntzun jlu jacu tzꞌel tnicꞌa tiꞌj, misicyer chꞌin in chin ximane tuꞌn nbinchanteye jun mya baꞌn tiꞌja, mintiꞌ ma jaw wiꞌn wibe tuꞌn nkꞌojine tiꞌja, ex mintiꞌ wile ma nbinchaye twitza; atzun teya, Tat Rey, in jyoꞌna wiꞌje tuꞌn ncub tbyoꞌna. 12 Awt Kman txi binchante kiꞌj kcabil ex awt Kman kꞌonte t-xel teya, Tat Rey, tiꞌj ju ma tbinchaya wiꞌje, atzun weye mlay tzꞌoc nkꞌoꞌne nkꞌabe tiꞌja. 13 At jun tal twitz yol in cymaꞌn ojtxi xjal cyjaꞌ: Oꞌcx ke xjal mya baꞌn in che ximan tiꞌj tuꞌn cybinchante jun mya baꞌn, atzun weye mlay tzꞌoc nkꞌoꞌne nkꞌabe tiꞌja, Tat Rey. 14 ¿Al setz lpeꞌya aya Rey cye aj Israel? ¿Al lepchoꞌca tuꞌn tcub tiꞌj tuꞌna? Wiꞌje tzaj lpeꞌya, ic ntene tuj twitza ic tzaꞌn jun cyimni txꞌyan ex ka ic tzaꞌn jun cyꞌak. 15 Cyjaꞌtzun, awt Kman tzꞌoc te jwes ex awt txi binchante kiꞌj kcabil, ex awt Kman baj xpichꞌunte wile ex awt kꞌmante ka mintiꞌ wile, ex awt colin wiꞌje tuj tkꞌaba Tat Rey, chi David.
16 Tejtzun tbaj tmaꞌn David ke yol lu, tma Saúl:
—¿Apetzuna ncyꞌajale David in yolina wucꞌile?
—Ax toc mas baꞌn teya tmod nwitze, ma tbinchaya baꞌn weye te t-xel ju mya baꞌn ma bant tiꞌja wuꞌne. 18 Ma tzaj tyecꞌuna jaꞌlo ka at tbis tcꞌuꞌja tuꞌn tbinchanteya baꞌn weye, porque otok chin cub kꞌoꞌne tuj tkꞌaba tuꞌn Kman, pero mintiꞌ ẍin cub tbyoꞌna. 19 Ax toc oc toc noj jun xjal tiꞌj aj kꞌoj tiꞌj, mintiꞌ in xi ttzokpiꞌn tuꞌn miꞌn tcub tbyoꞌn, cyjaꞌtzun awt Kman kꞌonte t-xel teya tiꞌj ju baꞌn ma tbinchaya weye jaꞌlo. 20 Jaꞌlo ma tzꞌel nnicꞌe tiꞌj ka aya cꞌoquel te rey, ex oc toca te rey cyibaj aj Israel segurxix ctel tcawbila. 21 Kꞌmantza jun yol weye axix toc twitz Kman, ka miꞌn che cub tbyoꞌna ke wiyjile ex miꞌn cub tyupina nbiye cyxol wermaniye, chi Saúl.
22 Xitzun tmaꞌn David jun yol axix toc te Saúl, ex te tibajxi jlu ajtz Saúl tuꞌn tul tja, ax icx te David cyucꞌix ke xjal ucꞌin tuꞌn e jeꞌx tuꞌn cypon tuj lugar te cycolbil cyib.