—¿Baꞌnpe tuꞌn nxiꞌye kꞌojlel cyiꞌj aj Filistey?

Atzunte Kman tzaj ttzakꞌweꞌn:

—Baꞌn tuꞌn t-xiꞌya porque cbel cyiꞌj tuꞌna tuꞌn cyclet ke xjal ateꞌ tuj tnam Keila.

3 Pero ke xinak ateꞌ tucꞌil David xi cymaꞌn te:

—Nokpe in ko xob tzalu tuj Judá, pyortzun ka ma koꞌx tuj Keila kꞌojlel cyiꞌj ke soldad aj Filistey.

4 Xitzun tkanintl David juntl maj te Kman, atzunte Kman tzaj ttzakꞌweꞌn:

—Kꞌoncuya be ex txiꞌya tuj tnam Keila, porque che xel nkꞌoꞌne aj Filistey tuj tkꞌaba tuꞌn tcub cyiꞌj tuꞌna.

5 Xiꞌtzun David cyucꞌix ke xinak ateꞌ tucꞌil, tuꞌn cypon tuj tnam Keila; atzun e oc tzokpaj cyiꞌj aj Filistey ex cub cyiꞌj cyuꞌn, ex e oc te cyajwil ke alumaj. Cyjaꞌtzun tten e clet ke xjal ateꞌ tuj tnam Keila tuꞌn David.

6 Tucꞌixtok Abiatar aju tcyꞌajal Ahimelec otok pon ok tucꞌil David tuj Keila, ex kꞌiꞌn jun tcapiẍay pal tuꞌn.

7 Tej t-xi kꞌmaꞌn te Saúl ka atok taꞌ David tuj tnam Keila, cub t-ximan cyjaꞌ: Ax Dios ma tzaj kꞌonte te tuj nkꞌabe tuꞌn tcub tiꞌj wuꞌne, porque tuꞌnx ma tzꞌocx tkꞌon tib tuj jun tnam at tlamel ex at pasador tiꞌj, chi Saúl.

8 Te tibajxi e tzaj ttxcoꞌn Saúl cycyakil ke t-soldad tuꞌn cyxiꞌ tuj tnam Keila, ex tuꞌn tbaj cytxolban cyib tiꞌjele tnam tuꞌntzun ttzyet David cyuꞌn cyucꞌix ke xinak ateꞌ tucꞌil. 9 Pero tej tbinte David ka cyjaꞌtok toc tzokpaj Saúl tiꞌj, xi tmaꞌn te pal Abiatar tuꞌn ttzaj tiꞌn aju capiẍay in ajben cyuꞌn pal, tuꞌntzun toc ten kanilte te Kman alcye tuꞌn tbant tuꞌn. 10 Tmatzun David:

—Aya Kman Dios aju Cydios aj Israel, akine tmajena, baꞌn wuꞌne taj Saúl tuꞌn ttzaj tzalu tuj Keila tuꞌn tbaj t-xitun tnam nok tuꞌn nlaje. 11 ¿Axpe toc tzul Saúl jyolte weye ic tzaꞌn o nbiye? ¿Chin xelpe kꞌoꞌne cyuꞌn ke xjal aj Keila tuj tkꞌab? Aya Kman Dios aju Cydios aj Israel, in chin cubsane twitza tuꞌn ttzaj tmaꞌna weye, akine tmajena.

Atzunte Kman tzaj ttzakꞌweꞌn:

—Ax toc tzul Saúl.

12 Xitzun tkanin David:

—¿Ko xelpe kꞌoꞌne tuj tkꞌab Saúl cyuꞌn ke xjal tuj Keila, akine cyucꞌix ke xinak ateꞌ wucꞌile?

Atzunte Kman tzaj ttzakꞌweꞌn:

—Che xel kꞌoꞌne cyuꞌn tuj tkꞌab Saúl.

13 Icꞌtzun David tuj tnam Keila cyucꞌix ke xinak ateꞌ tucꞌil, balo at kak syent cybaj, ex nok in che betjeꞌ cyuj ke lugar. Tejtzun tbinte Saúl ka otok tzicꞌ ok David tuj tnam Keila, ya mintiꞌ xiꞌ jyolte te.

14 Axtzun cyaj ten David najal tuj junjun lugar te tcolbil tib cywi witz tuj Zif tuj lugar mintiꞌ cynajbil xjal tuj, ex masque tcyakil kꞌij in jyontok Saúl tiꞌj David, mintiꞌ takꞌ Dios ambil tuꞌn tcnet tuꞌn. 15 Tejtzun tel tnicꞌ David tiꞌj ka otok tzꞌetz Saúl jyolte te tuꞌn tcub tbyoꞌn, ax cyaj ten tuj lugar Hores tuj Zif, tuj lugar mintiꞌ cynajbil xjal tuj. 16 At jun kꞌij xiꞌ Jonatán aju tcyꞌajal Saúl queꞌyilte David tuj lugar Hores, tuꞌn t-xi tcyuwsaꞌn te tuꞌn oꞌcx tuꞌn toc keꞌ tcꞌuꞌj tiꞌj Dios. 17 Ex xi tmaꞌn te:

—Miꞌn xoba, porque mlay cneta tuꞌn nmane Saúl. Cpol jun kꞌij aya cꞌoquel te rey cyxol aj Israel, atzun weye chin oquele te jun xjal mas maꞌ toclen ttxlaja. A jlu ya baꞌn tuꞌn nmane.

18 Cyajtzun bant tiꞌj jun cyyol cycabil, ex a Dios oc cykꞌoꞌn te testiw tiꞌj cyyol. Te tibajxi ajtz meltzꞌaj Jonatán, atzunte David ax cyaj ten tuj lugar Hores. 19 Pero ke xjal najl tuj tnam Zif e jeꞌx tuj tnam Gabaa kꞌmalte te Saúl:

—Lu David in ewan tuj ktxꞌotxꞌe, tuj junjun lugar te tcolbil tib at twi witz Haquila tuj lugar Hores, aju tcub tuj tnayaj kꞌij tuj lugar mintiꞌ cynajbil xjal tuj. 20 Cyjaꞌtzun, ka taja Tat Rey, baꞌn tuꞌn t-xiꞌya, ex jacu txi kkꞌoꞌne tuj tkꞌaba.

21 Atzunte Saúl tzaj ttzakꞌweꞌn:

—Awt Dios cyꞌiwlante cyeye, tuꞌnju ma tzaj kꞌakꞌan cycꞌuꞌje wiꞌje. 22 Jaꞌlo chin cubsale cyeye tuꞌn cyxiꞌye jyolte te jatum taꞌ ex jatum in tewan tib, ex alcye o lonte te ma chixin, porque biꞌn wuꞌne jawni twitz tuꞌn t-sbun. 23 Cheba cyqueꞌyinxe cycyakil lugar jatum nnoꞌcx tewan tib, ex cyajtz meltzꞌaje wucꞌile kꞌmalte jun tkanil cabalxix tuꞌntzun nxiꞌye cyucꞌile. Katzun ax toc max taꞌ tuj cytxꞌotxꞌe, cxel njyoꞌne cyxol cycyakil tiyjil Judá, chi Saúl.

24 E ajtzun meltzꞌaj ke aj Zif tuꞌn cypon tuj cytanmi, ex te tibajxi xi lpeꞌ Saúl cyiꞌj. Atzunte David cyucꞌix ke xinak tucꞌil otok che pon tuj lugar Maón tbi, aju lugar mintiꞌ cynajbil xjal tuj, aju tcub tuj chkꞌajlaj tuj tnayaj kꞌij te tzkij txꞌotxꞌ. 25 Atzunte Saúl cyucꞌix mastl xjal tucꞌil cub be cyuꞌn tuꞌn tjyet David cyuꞌn. Tej tpon tkanil tucꞌil David tiꞌj jlu, cuꞌx naj cyxol ke nmak pic cycub tuj lugar Maón tbi, aju lugar mintiꞌ cynajbil xjal tuj. Tejtzun tbinte Saúl, xiꞌ tuj lugar Maón tuꞌn toc lpeꞌ tiꞌj David tuꞌn tcub tbyoꞌn. 26 Ate Saúl cyucꞌix ke xinak ateꞌ tucꞌil in che bettok tiꞌj jun pacꞌ witz, atzunte David ex ke tucꞌil tiꞌj juntl pacꞌ witz in che kelan wen tuꞌn cyel ok twitz Saúl. Tej otok baj cytxolban cyib ke t-soldad Saúl tiꞌj David ex cyiꞌj keju ateꞌtok tucꞌil, ex chꞌixtok cytzyet cyuꞌn, 27 pon jun xjal kꞌolte jun tkanil tucꞌil Saúl ex tma:

—Jurat naj taj meltzꞌaja Tat Rey, porque ma che ocx aj Filistey kꞌojlel tuj ktxꞌotxꞌ.

28 Xitzun tcolin Saúl tuꞌn toc lpeꞌ tiꞌj David, ex xiꞌ tuꞌn toc tzokpaj cyiꞌj aj Filistey. Cyjaꞌtzun aju lugar lu oc tbi: Aju matij pic jatum o tzokpaj. 29 Tbajlenxitzun jlu xiꞌ David najal tuj lugar te tcolbil tib tuj lugar En-gadi.