3 Xiꞌtzun David tuj lugar Mizpa tbi tuj cytxꞌotxꞌ aj Moab, ex xi tmaꞌn te cyrey aj Moab cyjaꞌ:

—In chin cubsane teya tuꞌn tcyaj ten nmane ex ntxuꞌye tzalu cyucꞌile max ocxi nbinteye aju cbantel tuꞌn Dios wiꞌje.

4 Cyjaꞌtzun tten xi tiꞌn David ke tman tucꞌil rey tuj Moab, ex ax e cyaj ten tucꞌil tuj tcyakil tyemp tej tten David tuj lugar te tcolbil tib. 5 Xitzun tmaꞌn Gad aju t-sanjel Dios, te David:

—Miꞌn ax cyaj tena tuj lugar te tcolbil tiba. Kꞌoncuya be ex txiꞌya tuj cytxꞌotxꞌ aj Judá.

Xiꞌtzun David ex pon tuj chcꞌul Haret tbi.

6 Atzunte Saúl attok tuj tnam Gabaa, ex kꞌukltok twi witz, t-xeꞌ jun wiꞌ tzeꞌ tamarisco tbi, tzyuꞌn tlans tuꞌn ex txolin tiꞌjele cyuꞌn keju at cyoclen ttxlaj. Tejtzun tbinte Saúl ka otok ilwaj David cyuꞌn xjal, cyucꞌix keju xinak ateꞌ tucꞌil, 7 xi tmaꞌn cye keju at cyoclen ttxlaj ateꞌ tiꞌjele:

—Akeye aj Benjamín chin cybintze: ¿Tzulpetzun tkꞌoꞌn tcyꞌajal Isaí cytxꞌotxꞌe ex tkan cy-uvaye? ¿Che oquelpetzun kꞌoꞌne tuꞌn te nejenel cyxol ke t-soldad? 8 Cycyakil keye ma che oc meltzꞌaje wiꞌje, porque mi jun cyeye ma tzaj kꞌmante weye ka o cyaj bant tiꞌj jun tyol ncyꞌajale tucꞌil tcyꞌajal Isaí; mi jun cyeye in baj tcꞌuꞌj wiꞌje, ex mi jun cyeye o tzaj kꞌmante weye ka tucꞌix ncyꞌajale in onin te nmajene David tuꞌn toc te aj kꞌoj wiꞌje, ex tuꞌn tbaj tchmoꞌn ke xinak tuj ewaj tuꞌn cyoc tzokpaj wiꞌje, ic tzaꞌn in tbinchaꞌn jaꞌlo.

9 Atzunte Doeg aju aj Edom ex nejenel cye ke tmajen Saúl, xi ttzakꞌweꞌn:

—O Wile aju tcyꞌajal Isaí tej t-xiꞌ aj tuj tnam Nob tuꞌn tyolin tucꞌil Ahimelec aju tcyꞌajal Ahitob. 10 Atzunte Ahimelec oc ten kanil te Kman alcye tuꞌn tbant tuꞌn David, ex xi tkꞌoꞌn twa tucꞌix t-spad Goliat aju aj Filistey, chi Doeg.

11 Xiꞌtzun txocbil tiꞌj pal Ahimelec tuꞌn rey, ex cyiꞌj cycyakil ke pal tuj tnam Nob akeju at cyxilen tucꞌil Ahimelec. Tejtzun cypon cycyakil twitz rey, 12 xi tmaꞌn Saúl te Ahimelec:

—Chin tbintza aya tcyꞌajal Ahitob.

—Lu kine lu ajbel teya Tat Rey, chi Ahimelec xi ttzakꞌweꞌn.

13 Xitzun tkanin Saúl te:

—¿Tikuꞌn ma tzꞌoc meltzꞌaja wiꞌje tucꞌix tcyꞌajal Isaí? Aya xi kꞌonte pan te twa David tucꞌix spad, ex oc tena kanil te Dios tiꞌj tuꞌn toc te aj kꞌoj wiꞌje, ex tuꞌn tbaj tchmoꞌn ke xinak tuj ewaj tuꞌn cyoc tzokpaj wiꞌje, ic tzaꞌn in tbinchaꞌn jaꞌlo, chi Saúl.

14 Atzunte Ahimelec xi ttzakꞌweꞌn te rey:

—¿Alcye jun cyxol keju at cyoclen ttxlaja tzꞌaklxix ic tzaꞌn te David, ex tjiꞌya jlu Tat Rey, ax icx nejenel cye ke soldad cwentil teya ex in jaw nimsaꞌn tuj tjaya? 15 Baka ma jaꞌlo in xi nkanine te Dios tiꞌj David alcye tuꞌn tbant tuꞌn. Mya icju. Cyjaꞌtzun miꞌn chin oc tkꞌoꞌna tuj xtis nok tuꞌn tlaj jlu, Tat Rey, mi keju at nxilene cyucꞌil, porque mintiꞌ chꞌin biꞌn wuꞌne tiꞌj jlu, chi Ahimelec.

16 Atzunte rey tma:

—Ax toc, aya Ahimelec cnajela cyucꞌix mastl xjal at t-xilena cyucꞌil.

17 Xitzun tmaꞌn rey cye soldad cwentil te:

—Cybyoncuya ke pal te Kman porque cyucꞌix ke jlu onil te David, ex mintiꞌ tzaj cymaꞌn weye tej cyjaꞌtok tel ok David, chi Saúl.

Pero akeju soldad cwentil te rey mintiꞌ oc cykꞌoꞌn cykꞌab cyiꞌj ke pal te Kman. 18 Cyjaꞌtzun xi tmaꞌn rey te Doeg aju aj Edom:

—Che tbyoncuya.

Octzun tzokpaj Doeg cyiꞌj ke pal ex e cub tbyoꞌn 85 pal toc cycapiẍay tbanilxix. 19 Te tibajxi ocx tuj tnam Nob aju cytanmi ke pal, ex e cub tbyoꞌn tuꞌn t-spad cycyakil ke xinak, ke xuꞌj, ex cycyakil ke cꞌwaꞌl cyucꞌix keju cucx cychꞌuꞌn. Ax icx e cub tbyoꞌn ke wacẍ, ke bur ex ke ẍneꞌl. 20 Pero attok jun tcyꞌajal Ahimelec aju tcyꞌajal Ahitob, Abiatar tbi, o colpaj ex mintiꞌ cub, cyjaꞌtzun xi ok max jatum taꞌtok David. 21 Xitzun tmaꞌn te David ka otok che cub tbyoꞌn Saúl ke pal te Kman. 22 Atzunte David xi ttzakꞌweꞌn:

—Tej twile Doeg aju aj Edom tuj tnam Nob, biꞌx in pone tiꞌj ka tuꞌn t-xi tmaꞌn Doeg te Saúl ka atzun atintoke tuj tnam Nob. Akine at wile tuꞌnju ma che cyim cycyakil keju at t-xilen tmana cyucꞌil. 23 Pero ax tencja wucꞌile ex miꞌn xoba, porque axju xjal taj tuꞌn tcub byoꞌna tuꞌn, ax tajbil tuꞌn ncub byoꞌne tuꞌn, cyjaꞌtzun mintiꞌ xobajil oc ttena wucꞌile, chi David.