—¿Tikuꞌn saja tjunala ex mi aꞌl jun tucꞌila ucꞌin?

2 Atzunte David xi ttzakꞌweꞌn:

—Ate rey ma tzaj tmaꞌn jun mandar weye ex ma tzaj tmaꞌn tuꞌn mi aꞌl jun tuꞌn tbinte tikuꞌn ẍin tzaj samaꞌne tuꞌn, ex alcye mandar kꞌiꞌn wuꞌne. Atzun ke xinak ateꞌ tjakꞌ ncawbile ma cyaj nmaꞌne cye alcye lugar tuꞌn ncꞌulbante wibe cyucꞌil. 3 Atzun jaꞌlo: ¿ti chꞌin nicꞌbebl at tucꞌila? Kꞌontza jweꞌ pan weye ex ka nok alcye at tucꞌila.

4 Atzunte pal xi ttzakꞌweꞌn:

—Mintiꞌ pan at wucꞌile aju nok elaj pan; at pan, pero cyꞌiwlaꞌmaj, jacu txi nkꞌoꞌne teya ka ikan tiꞌj cyuꞌn ke xinak ateꞌ tucꞌila.

5 Atzunte David xi tmaꞌn jun yol te cyuwsabl:

—Ic tzaꞌn in ko etze tuj kbeye syempr ikan tiꞌj kuꞌne masque nok chꞌin t-xilen ju kbeye, pero akeju xinak ateꞌ wucꞌile syempr ikan tiꞌj cyuꞌn, pyortzun tej xko etze jaꞌlo.

6 Xitzun tkꞌoꞌn pal ke pan cyꞌiwlaꞌmaj porque mintiꞌtok juntl pan at tucꞌil, nok oꞌcx ju pan cyꞌiwlaꞌmaj te Kman at, ex ax kꞌij lu tej cyjaw kꞌiꞌn pan tibaj altar tuꞌn tcub kꞌoꞌn mastl acꞌaj pan te t-xel.

7 Attok jun tmajen Saúl otok cyaj ten tuj tja Dios tuj kꞌij lu, Doeg tbi, aj Edom te ex nejenel cye ke tpastor Saúl. 8 Xitzun tmaꞌn David te Ahimelec:

—¿Atpe jun lans ex ka jun spad at tucꞌila? Porque tej saj tkꞌoꞌn rey aju orden weye, mintiꞌ xtakꞌ ambil tuꞌn ttzaj wiꞌne nspadiye ex ke mastl macbil in che ajben wuꞌne.

9 Atzunte pal xi ttzakꞌweꞌn:

—Ax taꞌ t-spad Goliat wucꞌile, aju aj Filistey cub tiꞌj tuꞌna tuj chkꞌajlaj Ela tbi. Atzun tcub tiꞌjxi capiẍay in ajben cyuꞌn pal, tocx tuj jun piẍ xbalun. Ka taja, baꞌn tuꞌn t-xi tiꞌna, porque oꞌcxcu jlu at wucꞌile ex mintiꞌ mastl.

Xitzun tmaꞌn David te pal:

—Balo mintiꞌ juntl mas baꞌn twitz jlu. Kꞌontza, cxel wiꞌne.

10 Texju kꞌij lu xi tlajoꞌn David tbe tuꞌn tel ok twitz Saúl, ex pon max tucꞌil Aquis aju rey tuj tnam Gat. 11 Atzun keju at cyoclen ttxlaj Aquis xi cymaꞌn te:

—¿Myapetzun a David jlu aju rey tuj txꞌotxꞌ ma chixin? ¿Myapetzun tiꞌj in cymaꞌntok xjal tej matok in che bitzan ex in che bixan, ka jun mil xjal otok cub tuꞌn Saúl atzunte David otok che cub laj mil tuꞌn?

12 Tej tbinte David ke yol lu, tzaj t-xobil twitz Aquis aju rey tuj tnam Gat. 13 Cyjaꞌtzun cywitzx ke jlu chꞌexpet tmod ex oc tkꞌon tib ic tzaꞌn jun loc, ex oc ten scatil twitz tlamel ja ex cuꞌtz bekin taꞌl ttziꞌ tuj txmaltziꞌ. 14 Xitzun tmaꞌn Aquis cye keju at cyoclen ttxlaj:

—¿Mintiꞌpe soc cyqueꞌyine ka loc ju xinak lu? ¿Ti tiltzun saj cyiꞌne wucꞌile? 15 ¿Baka mintiꞌ loc at tzalu, tuꞌnju ma tzaj cyiꞌne juntl loc tuj njaye tuꞌntzun toc nqueꞌyine ju tloc-yil?