—¿Titzun ma nbinchaye? ¿Alcye il ma bant wuꞌne? ¿Alcye wile ma nbinchaye twitz tmana tuꞌnju in jyonxix wiꞌje tuꞌn ncub tbyoꞌn?

2 Atzunte Jonatán xi ttzakꞌweꞌn:

—¿Tikuꞌn in ximana tiꞌj icju? Mlayx cub byoꞌna tuꞌn, porque ka at jun in cub t-ximan nmane il tiꞌj in tzaj tmaꞌn weye masque maꞌ t-xilen ex masque chꞌin, pero mlay tbincha ka naꞌnxtok ttzaj tmaꞌn weye. ¿Tzaꞌntzun tten tuꞌn tcub ewan jlu nwitze tuꞌn nmane? Mlay bant icju, chi Jonatán.

3 Atzunte David xi tmaꞌn:

—Ya baꞌn tuꞌn tmana ka baꞌn kten tucꞌila, ex milo taj tuꞌn tbinteya, porque ka ma tbiya jaculo tzaj tbisa. Pero twitz Kman Dios ex twitza cxel nmaꞌne jun nyole axix toc, ka nok chꞌintl taj tuꞌn ncub byoꞌne tuꞌn, chi David.

4 Xitzun tkanin Jonatán te David:

—¿Alcye onbil taja tuꞌn nbinchanteye teya?

5 Atzunte David xi ttzakꞌweꞌn:

—Bintza: Nchiꞌj icꞌset ninkꞌij tiꞌj juntl acꞌaj xjaw ma tzaj queꞌyin, ex il tiꞌj tuꞌn ncub keꞌye waꞌl tucꞌil rey. Pero kꞌontza permis weye tuꞌn t-xi wewan wibe tuj cojbil te cabe kꞌij, ex max tuꞌn t-xi nyecꞌun wibe caꞌjxi te kale. 6 Katzun ma chin tzaj kanine tuꞌn tmana, bix txi tmaꞌna te: Ma tzaj tkanin David permis weye tuꞌn t-xiꞌ tuj Belén aju ttanmi, porque cycyakil keju at cyxilen tucꞌil che icꞌsal ninkꞌij ma chixin, ex cxel cykꞌoꞌn chojbil te Kman ic tzaꞌn in bant cyuꞌn tcyakil abkꞌi, chicuya txi tmaꞌna te. 7 Baꞌn ka chi, miꞌntzun chin bisune, katzun ma jaw kꞌojl, atzun cꞌelel tnicꞌa tiꞌj tmana ka ma cub t-ximan tuꞌn ncub byoꞌne tuꞌn. 8 Cyjaꞌtzun binchama xtalbil lu weye, porque baꞌn tuꞌna akine ajbel teya ex twitz Kman o cyaj bant tiꞌj jun kyol. Katzun akine at wile, mejor chin tbyoncuya. Mya il tiꞌj tuꞌn nxi tiꞌna twitz tmana, chi David.

9 Atzunte Jonatán xi ttzakꞌweꞌn:

—Miꞌn ximana tiꞌj icju. Ka ma nbiye jun yol ka in ximan nmane tuꞌn tbinchante jun mya baꞌn tiꞌja, cxel nmaꞌne teya.

10 Xitzun tkanin David te Jonatán:

—¿Alcye cpol kꞌmalte tkanil weye ka mya tuj txꞌuꞌjbil ctzajel ttzakꞌweꞌn tmana?

11 Atzunte Jonatán xi ttzakꞌweꞌn:

—Koꞌ wucꞌile tuj cojbil.

E jeꞌxtzun cycabil tuj cojbil, 12 ex atzun xi tmaꞌn Jonatán te David:

—Cxel nmaꞌne teya jun nyole axix toc twitz Kman aju Kdios aj Israel koꞌ; nchiꞌj ex ka caꞌj, ax or lu oc tbiya wuꞌne aju t-ximbetz nmane. Ka baꞌn t-ximbetz tiꞌja cxeltzun nsamaꞌne tkanil tucꞌila; 13 katzun at jun t-ximbetz mya baꞌn tiꞌja ex ka miꞌn ma pon tkanil wuꞌne tucꞌila, awttzun Kman tzaj kꞌonte ncastiwoye cyuwxix tuꞌn tlaj jlu, ex tuꞌn tlaj mintiꞌ otok chin onine tiꞌja tuꞌn ttzokpaja tuj cheba; awttzun Kman onin teya ic tzaꞌn o tzꞌonin tiꞌj nmane. 14 Atzun jaꞌlo, acux itzꞌ kine, binchama xtalbil weye ic tzaꞌnx ju xtalbil in tcꞌmoꞌna te Kman. Ex katzun otok chin cyime, 15-16 cuchiwt cucx tuꞌn tten tcꞌujlalila cyiꞌj keju ateꞌ tuj njaye. Che ocxwit ke aj kꞌoj tiꞌja tuj malbil tuꞌn Kman tiꞌj cybinchben, ex awt Kman cub yupan cye te jumajx, chi Jonatán. Cyjaꞌtzun tten cyaj bant tiꞌj jun tyol Jonatán tucꞌil David, 17 ex tuꞌnju at nimxix tcꞌujlalil Jonatán tiꞌj David, xi tmaꞌn juntl maj te tuꞌn ttzaj tmaꞌn jun yol axix toc, porque cꞌujlaꞌntok David tuꞌn ic tzaꞌnx in tcꞌujlan tib. 18 Ax icx xi tmaꞌntl Jonatán te:

—Nchiꞌj icꞌset ninkꞌij tiꞌj juntl acꞌaj xjaw ma tzaj queꞌyin, ex tuꞌnju mi aꞌl cbel keꞌ tuj tkꞌukbila, atzun cꞌelel nicꞌbaj tiꞌja ka mi aꞌla. 19 Pero tuj toxin kꞌij juratx cuꞌtz naja tuꞌn tula tuj lugar jatum xi tewan tiba ic tzaꞌn baj jun maj, ex bix cub tena ttxlaj abj Ezel tbi. 20 Cxel nxoꞌne ox plech tumlal abj lu, mer ic tzaꞌn at jun in chin xoꞌne tiꞌj, 21 ex cxel nmaꞌne te nmajene tuꞌn t-xiꞌ jyol cye ke plech. Ka ma txi nmaꞌne te: Akeju plech ateꞌ tajtz tiꞌjtziya, kꞌintza ke, ka nchiye, baꞌntzun tuꞌn tetza ex tuꞌn ttzaja tuj tzalajbil, porque mintiꞌ jun tiꞌxti cbajel tiꞌja. Twitz Kman in xi ncyuwsaꞌne jlu teya. 22 Katzun ma txi nmaꞌne te nmajene: Ke plech ma che cub ma tiꞌjxiya, ka nchiye, biꞌxtzun cub be tuꞌna porque atzun taj Kman tuꞌn ticꞌa. 23 Atzun tiꞌj ju yol ma cyaj bant tiꞌj kuꞌn, ate Kman cꞌoquel te testiw kiꞌj te jumajx, chi Jonatán.

24 Xiꞌtzun David ewal tib tuj cojbil. Ex tej tul canun tnejel kꞌij ninkꞌij, cub keꞌ rey tiꞌj mes tuꞌn twaꞌn. 25 Atzun cub keꞌ tuj lugar twitz tcajonil ja ic tzaꞌnxix in bant tuꞌn, atzunte Jonatán cub keꞌ tiꞌj juntl pacꞌ ttxaꞌn mes twitz rey, ex atzunte Abner cub keꞌ ttxlaj Saúl. Atzun tuj tkꞌukbil David mintiꞌ xjal cub keꞌ. 26 Tuj kꞌij lu misicyer jun yol tma Saúl, porque cub t-ximan ka otok tzicꞌ David tibaj tley Moisés ex naꞌnxtok t-xi tbinchan tib. 27 Pero tuj tcabin kꞌij ninkꞌij, mintiꞌx pon David tuꞌn tcub keꞌ tuj tkꞌukbil. Xitzun tkanin Saúl te Jonatán aju tcyꞌajal:

—¿Tikuꞌn mintiꞌ ul tcyꞌajal Isaí waꞌl ew ax icx jaꞌlo?

28 Atzunte Jonatán xi ttzakꞌweꞌn:

—Tzaj tkanin David tuꞌn t-xi nkꞌoꞌne permis te tuꞌn txiꞌ tuj Belén, porque il tiꞌj, 29 ex tma cyjaꞌ: Kꞌontza permis weye tuꞌn nxiꞌye, porque keju at nxilene cyucꞌil in che icꞌsan ninkꞌij tuj ktanmiye, ex ma tzul tkanil tuꞌn jun ntzique tuꞌn nxiꞌye; cyjaꞌtzun binchama xtalbil, kꞌontza permis weye tuꞌn nxiꞌye visitaril cye ke wermaniye, chi David. Cyjaꞌtzun mi aꞌl ma tzul tuꞌn twaꞌn tucꞌila Tat Rey, chi Jonatán.

30 Tzajtzun tkꞌoj Saúl tiꞌj Jonatán ex xi tmaꞌn te:

—Aya Jonatán tal jun xuꞌj mya baꞌn. Baka mintiꞌ baꞌn wuꞌne ka jumajx ma tzꞌoc tamiwin tiba tucꞌil tcꞌwaꞌl Isaí tuꞌn tel tchꞌixwiya ex tuꞌn tel tchꞌixwi ttxuꞌya. 31 Porque ka cucx tten tcꞌwaꞌl Isaí tzalu twitz txꞌotxꞌ mya segur ctela, ax icx ju toclena te rey. Cyjaꞌtzun, samanxa ke xjal jyolte te ex cyiꞌntze tzalu wucꞌile, porque il tiꞌj tuꞌn tcyim, chi Saúl.

32 Atzunte Jonatán xi tkanin te Saúl aju tman:

—¿Tikuꞌn il tiꞌj tuꞌn tcyim? ¿Ti ma tbincha?

33 Jawtzun tiꞌn Saúl ju tlans tuꞌn toc t-xayuꞌn tiꞌj Jonatán.

Atzun el tnicꞌ Jonatán tiꞌj ka otok cub t-ximan tman tuꞌn tcub David tuꞌn. 34 Jawtzun weꞌ Jonatán tiꞌj mes in kꞌojl wen ex mintiꞌ o waꞌn tiꞌj wabj tuj tcabin kꞌij te ninkꞌij, porque otok tzaj nim tbis tiꞌj David, tuꞌnju otok tzꞌoc icꞌleꞌn tuꞌn tman. 35 Tujtzun juntl kꞌij te prim, xiꞌ Jonatán ma tuj cojbil tuj or banimaj tiꞌj tucꞌil David, tucꞌix jun cuꞌxun xiꞌ tucꞌil, 36 ex xi tmaꞌn te:

—Txi kelina jyol cye ke plech oc t-xi nxoꞌne.

Xitzun kelan ju cuꞌxun ex oc ten Jonatán xoꞌlte jun plech tuꞌntzun tcub tzꞌak najchak twitz ju cuꞌxun. 37 Tej tpon cuꞌxun tuj lugar jatum otok cub tzꞌak plech, xi schꞌin Jonatán tiꞌj:

—Aju plech mas lekꞌch ma cub tzꞌak tiꞌjxiya.

38 Xi schꞌin juntl maj tiꞌj tmajen:

—Tzꞌoc tililx tkana, kelinxa, miꞌn cub weꞌya.

Jawtzun tiꞌn cuꞌxun ke plech ex ul tiꞌn tucꞌil tpatrón, 39 pero mintiꞌ el tnicꞌ tiꞌj jlu, porque oꞌcx te Jonatán ex David otok bant tiꞌj techal lu cyuꞌn. 40 Xitzun tkꞌoꞌn Jonatán ke tubl te cuꞌxun ex xi tmaꞌn te tuꞌn taj tiꞌn ma tuj tnam.

41 Tejtzun tajtz cuꞌxun, jaw weꞌ David tiꞌjxi ju byuj abj ex cub ẍmejeꞌ ox maj twitz Jonatán ex max pon tacl tibaj twitz twitz txꞌotxꞌ. Eltzun cytzꞌuban cywitz ex e oc ten okꞌel cycabil, pero mas nim o tzꞌokꞌ te David. 42 Te mancbil xi tmaꞌn Jonatán te David:

—Kꞌoncuya be, miꞌn bisuna, porque aju kyol o bant tiꞌj kuꞌn kcabil, a Kman o tzꞌoc te testiw tiꞌj, ex o txi kkanin te tuꞌn tten kxol te jumajx ex tuꞌn tten cymojbabl cyib ke tiyjila cyucꞌil keju weye wiyjil, chi Jonatán.

Cubtzun be tuꞌn David, atzunte Jonatán ajtz tuꞌn tul tuj tnam.