—Taj nmane Saúl tuꞌn tcub byoꞌna tuꞌn. Cyjaꞌtzun ten tcwenta tiꞌja; te prim nchiꞌj bix txi tewan tiba tuj jun lugar jatum mlay cneta. 3 Chin xeꞌle junx tucꞌil nmane tuj cojbil jatum taꞌya. Chin yolile twitz nmane tiꞌja, aver chi toc tuꞌn, ex cxel nmaꞌne teya alcye ctzajel tmaꞌn weye, chi Jonatán te David.

4 Octzun ten Jonatán yolil tucꞌil Saúl tiꞌj David ex xi tmaꞌn te:

—Aya Tat Rey, mya tuj tumel tuꞌn tbinchanteya jun mya baꞌn tiꞌj David aju tmajena, porque misicyer jun mya baꞌn ma tbincha tiꞌja, nokpe jun baꞌn ma tbincha cywiꞌ ke puy. 5 porque o takꞌ tib tuꞌn tkꞌojin tucꞌil aj Filistey ex o cub tuꞌn, cyjaꞌtzun e clet cycyakil aj Israel tuꞌn Kman. O tila jlu Tat Rey, ex nimxix o tzalaja tiꞌj. ¿Tikuꞌntzun taja tuꞌn tcyim jun xjal mintiꞌ til ex tuꞌn tcub tbyoꞌna David nokx gan?

6 Tej tbinte Saúl tyol Jonatán tma:

—Cxel nmaꞌne jun yol axix toc twitz Kman; miꞌn cub nbyoꞌne David.

7 Tzajtzun txcoꞌn David tuꞌn Jonatán ex xi ttxꞌolbaꞌn tcyakilju yol otok tma Saúl te. Te tibajxi xi kꞌiꞌn David tuꞌn Jonatán twitz Saúl, ex axtzun cyaj tentl David te ajbel te ic tzaꞌnx tej tten nej.

8 Tzyet juntl maj kꞌoj ex xiꞌtl David tuꞌn tkꞌojin cyiꞌj aj Filistey, cub cyiꞌj tuꞌn ex nimxix e cub tbyoꞌn, cyjaꞌtzun tten e bjeꞌl ok. 9 Atzunte Saúl tzyet juntl maj tuꞌn juꞌẍ samaꞌn tuꞌn Kman, tej kꞌukltok tuj tja tucꞌix tlans tuj tkꞌab. Matok in kꞌoꞌn David chnab 10 tej t-xi t-xayuꞌn Saúl tlans tiꞌj David twitz tcajonil ja. Pero cub jokpaj David ex aju tlans Saúl biꞌx xi xuyl tuj tcajonil ja.

Texju konicꞌan lu ex ok David tuj tja Saúl ex o clet. 11 Xitzun tkꞌoꞌn naj Saúl orden cye ke tmajen tuꞌn cyxiꞌ ma tja David, tuꞌn cycub ten cwentil tiꞌj ex tuꞌn tcub cybyoꞌn te prim tuj juntl kꞌij. Pero ate Mical aju t-xuꞌjil David o kꞌonte tkanil ex xi tmaꞌn te:

—Ka miꞌn ma tcol tiba tuj konicꞌan jaꞌlo, ax toc cymela prim nchiꞌj.

12 Cuꞌtztzun kꞌoꞌn David tiꞌj sakbak ttziꞌ jun ventan tuꞌn Mical ex cyjaꞌtzun o colpaj. 13 Te tibajxi tzaj tiꞌn Mical jun tilbilal ex jax tkꞌoꞌn twi twatbil David, cub tmukꞌan tibaj tuꞌn jun xbalun, ex jax tkꞌoꞌn jun piẍ ttzꞌumal chip tucꞌix ttzmal tiꞌj twiꞌ. 14 Tejtzun cypon t-samaꞌn Saúl ke tmajen tuꞌn ttzyet David cyuꞌn, xi tmaꞌn Mical cye ka yabtok taꞌ. 15 Atzunte Saúl xi tmaꞌntl cye tmajen tuꞌn cyxiꞌ juntl maj ex tuꞌn ttzyet cyuꞌn:

—Masque yab David, pero cyiꞌn etze ex cyiꞌntze tzalu tuꞌn tcub nbyoꞌne, chi Saúl xi tmaꞌn cye.

16 E ocxtzun ke tmajen Saúl tuj tja David, pero oꞌcx ju tilbilal cnet cyuꞌn tucꞌix ju ttzmal chip tjax tuj twiꞌ. 17 Xitzun tmaꞌn Saúl te Mical:

—¿Tikuꞌn ma chin cub t-sbuꞌna tuꞌn jlu ex ma tzꞌex ttzokpiꞌna aju aj kꞌoj wiꞌje?

Atzunte Mical xi ttzakꞌweꞌn:

—Porque ma tma jun yol weye cyjaꞌ: Ka miꞌn ma chin ex ttzokpiꞌna, cbel nbyoꞌne, chi Mical.

18 Cyjaꞌtzun tten el ok David ex o colpaj. Xiꞌtzun David tucꞌil Samuel max tuj tnam Ramá, ex xi ttxꞌolbaꞌn tcyakilju otok baj tiꞌj tuꞌn Saúl. Te tibajxi e jeꞌx najal tucꞌix Samuel tuj lugar Naiot. 19 Tej tbinte Saúl ka atzun taꞌtok David tuj lugar Naiot, aju taꞌ tuj tcwent tnam Ramá, 20 e jeꞌx t-samaꞌn ke tmajen tuꞌn ttzyet David cyuꞌn.

Tejtzun cypon ke tmajen Saúl tuj lugar lu, o cyil lu jun cꞌloj t-sanjel Dios in che yolin tiꞌj yol in tzaj tmaꞌn Dios cye, ex a Samuel toc te nejenel cye. Cubtzun ten T-xew Dios cyibaj ke tmajen Saúl ex e oc ten yolil tiꞌj yol in tzaj tmaꞌn Dios cye.

21 Tejtzun tbinte Saúl jlu, xi t-samaꞌn juntl cꞌloj tmajen, pero ax icx cye e oc ten yolil tiꞌj yol in tzaj tmaꞌn Dios cye. Tuj toxin maj xi t-samaꞌntl Saúl juntl cꞌloj tmajen, pero ax icx cye e oc ten yolil tiꞌj yol in tzaj tmaꞌn Dios cye. 22 Xiꞌtzun Saúl twitzelcu tuj tnam Ramá, ex tej tpon jatum taꞌ jun nintz xoch tuj lugar Secú tbi, xi tkanin jatum taꞌtok Samuel ex David, ex tzaj kꞌmaꞌn te ka atzun ateꞌ tuj lugar Naiot aju taꞌ tuj tcwent tnam Ramá. 23 Entons xiꞌ Saúl tuj lugar lu. Pero ax icx te cub ten T-xew Dios tibaj, ex oc ten yolil tiꞌj yol in tzaj tmaꞌn Dios te tej in bettok, max tejxi tpon tuj lugar Naiot aju taꞌ tuj tcwent tnam Ramá. 24 Ex mya nok oꞌcx oc ten yolil tiꞌj yol in tzaj tmaꞌn Dios te, ax icx el tiꞌn t-xbalun ex cucx skitl tiꞌj twitz txꞌotxꞌ twitz Samuel tuj enter kꞌij ex enter konicꞌan. Atzun tzajni jlet ju tal twitz yol lu: ¿Maj tucꞌix Saúl toc te t-sanjel Dios?