Oc tamiwin tib Jonatán tucꞌil David
18
Tej tbaj yolin David tucꞌil Saúl, oc tamiwin tib Jonatán tucꞌil David ex o tcꞌujlaxix wen ic tzaꞌn in tcꞌujlan tib. 2 Tuj kꞌij lu ax cyaj tiꞌn Saúl David tucꞌil tuꞌn tajben te, ex mintiꞌ aj ttzokpiꞌn tuꞌn taj tja tman. 3 Cyaj bant tiꞌj jun cyyol Jonatán tucꞌil David tuꞌn toc cyamiwin cyib, porque o ten nimxix tcꞌujlalil Jonatán tiꞌj David, ic tzaꞌn in tcꞌujlan tib. 4 Ax icx el tiꞌn t-ẍjoꞌw, tucꞌix t-xbalun tocsaꞌn, tucꞌix t-spad, tucꞌix xobl tplech, ex aju cꞌalbil tcꞌuꞌj tocsaꞌn, ex xi tkꞌoꞌn te David.5 Nimxix tnabl David o ten oc in bant tcyakilju in xi kꞌmaꞌn te tuꞌn Saúl tuꞌn tbinchante, ex tuꞌntzun jlu oc kꞌoꞌn tuꞌn Saúl te jun nejenel cye soldad. Baꞌn ela tmod David tuj cywitz ke soldad, ax icx tuj cywitz ke xjal maꞌ cyoclen ateꞌ ttxlaj Saúl.
Tzaj tloꞌch tcꞌuꞌj Saúl tiꞌj David
6 Tej cyul meltzꞌaj ke soldad tcublenxi byoꞌn aj Filistey tuꞌn David, e jeꞌtz ke xuꞌj cyuj cycyakil tnam cye aj Israel canul tiꞌj rey Saúl, in che bitzan ex in che bixan tuꞌn nim tzalajbil, ex in che kꞌajtzaꞌntok tiꞌj jun wik tal tampor cyucꞌix ke tal arpa ox cywitz. 7 Tej in che bitzantok ke xuꞌj ex in che bixantok in xi cymaꞌn cyjaꞌ:
Jun mil xinak ma cub tbyoꞌn Saúl, atzunte David laj mil ma cub tbyoꞌn.
8 A jlu mya baꞌn eꞌla tnaꞌn Saúl; tzaj tkꞌoj wen ex xi tmaꞌn cyjaꞌ:
—In cymaꞌn xjal ka laj mil xinak ma cub tuꞌn David, atzun weye nok jun milx. Ya nok tuꞌn tocca kꞌoꞌn David te rey.
9 Atxixtzun tuj kꞌij lu, oc in xi tqueꞌyin Saúl tiꞌj David, in kꞌojl twitz wen.
10 Tujtzun juntl kꞌij tzyet Saúl tuꞌn jun juꞌẍ tzaj t-samaꞌn Dios, ex oc Saúl ic tzaꞌn jun loc tujx tja.
In chimbantok David tiꞌj arpa ic tzaꞌnx tmod, atzunte Saúl kꞌiꞌn tlans tuj tkꞌab. 11 Minaben jatz tiꞌn Saúl tlans ex aju t-ximbetz atzun, tuꞌn toc t-xayuꞌn tiꞌj David ax twitz tcajonil ja. Cab maj tbincha icju, pero ate David cub jokpaj naj ex o clet.
12 In xobtok Saúl twitz David, porque ate Kman attok tucꞌil David, atzunte Saúl otok tzꞌel tpaꞌn tib Kman tiꞌj. 13 Cyjaꞌtzun el tiꞌn Saúl toclen David ttxlaj ex oc tkꞌoꞌn te nejenel cyxol jun mil soldad, tuꞌn tcub nej cywitz oc cyex kꞌojlel ex oc cyul meltzꞌaj, nok tuꞌn miꞌn ttentl David ttxlaj. 14 Tuꞌnju ate Kman at tucꞌil David, cyjaꞌtzun puro baꞌn eꞌla tcyakilju o tbincha, 15 ex cyjaꞌtzun tzaj nim t-xobil Saúl twitz tej tqueꞌyinte baꞌn nneꞌl takꞌunben. 16 Pero cycyakil aj Israel ex aj Judá nimxix in che tzalaj tiꞌj David, porque in cub nej cywitz oc cyxiꞌ kꞌojlel ex oc in che ul meltzꞌaj.
17 At jun kꞌij xi tmaꞌn Saúl te David:
—Cxel nkꞌoꞌne nmeꞌjele Merab aju tzicbaj tuꞌn toc te t-xuꞌjila, pero waje tuꞌn toca te jun soldad cyuw tcꞌuꞌj tuj kꞌoj, tuꞌn tkꞌojina tuj kꞌoj tuꞌn Kman, chi Saúl.
Xi tmaꞌn Saúl jlu porque cub t-ximan ka mya il tiꞌj ax tuꞌn tcub byonte te David, nok oꞌcx tuꞌn tcub byoꞌn cyuꞌn aj Filistey; 18 atzunte David xi ttzakꞌweꞌn:
—Mya maꞌ woclene cyxol aj Israel ex mi keju at nxilene cyucꞌil. ¿Tzaꞌntzun tten tuꞌn woque te tjiꞌ rey?
19 Masque icju, pero tej tpon tajlal xjaw tuꞌn t-xi tkꞌoꞌn Saúl tmeꞌjel te David tuꞌn toc te t-xuꞌjil, ya mya te xi tkꞌoꞌn, nok oꞌcx xi tkꞌoꞌn te juntl xjal Adriel tbi, aju aj Mehola. 20 Atzunte Mical aju juntl tmeꞌjel Saúl otok t-xoꞌ tgan tiꞌj David. Tejtzun t-xi kꞌmaꞌn jlu te Saúl, nim o tzalaj tej tbinte, 21 ex cub t-ximan tuꞌn t-xi tkꞌoꞌn tmeꞌjel lu te David tuꞌn toc te t-xuꞌjil; atzun t-ximbetz ka nok tuꞌnju xuꞌj lu tuꞌn tcub tzꞌak tuj cykꞌab aj Filistey. Xitzun tmaꞌn Saúl te David tcabmajiꞌn:
—Bay, matzun cꞌoquela te njiꞌye jaꞌlo.
22 Xitzun tmaꞌn Saúl cye keju in che ajben te:
—Che yoline tucꞌil David tuj ewaj ex cymanxe te cyjaꞌ: Nimxix in tzalaj rey tiꞌja, ex cycyakil xjal maꞌ cyoclen ateꞌ ttxlaj rey ax icx in che tzalaj tiꞌja, cyjaꞌtzun baꞌn tuꞌn toca te tjiꞌ rey, che chicuye.
23 E jeꞌxtzun ke ajbel te Saúl kꞌmalte tcyakil jlu te David, atzunte tzaj ttzakꞌweꞌn:
—¿Che chipetzune ka nok elaj tuꞌn toc jun xjal te tjiꞌ rey? Ic tzaꞌn kine meba xjal kine ex mya maꞌ woclene.
24 E pontzun ke ajbel te Saúl tucꞌil ex xi cymaꞌn te aju otok tma David. 25 Atzunte Saúl xi ttzakꞌweꞌn cye:
—Cymanxe te David: Mintiꞌ in chin kanine tiꞌj pwak ic tzaꞌnx in bant oc in xi kꞌoꞌn t-xuꞌjil jun xinak, nok oꞌcx wajbile tuꞌn ttzaj tkꞌoꞌn David jun syent ttzꞌumal cytzꞌaꞌlbil aj Filistey te t-xel pwak, tuꞌntzun t-xelin wuꞌne aju ma cybincha aj kꞌoj wiꞌje, chi Saúl. O tma jlu porque atzun t-ximbetz ka tuꞌn tcub tzꞌak David tuj cykꞌab aj Filistey.
26 Xitzun cymaꞌn ke ajbel te Saúl ju yol lu te David, ex baꞌn eꞌla tuj twitz David aju otok tkana rey te tuꞌntzun toc te tjiꞌ.
Naꞌnxtok tjapun tyemp banimaj tiꞌj, 27 e baj tchmoꞌn David ke soldad, cub be cyuꞌn ex e cub cybyoꞌn cabe syent aj Filistey; xitzun tiꞌn ke ttzꞌumal cytzꞌaꞌlbil aj Filistey, ex xi tkꞌoꞌn te rey tuꞌntzun toc David te tjiꞌ rey. Tej cyxi tkꞌoꞌn David te, tzajtzun tkꞌoꞌn Saúl Mical aju tmeꞌjel te tuꞌn toc te t-xuꞌjil.
28 Pero tej tel tnicꞌ Saúl tiꞌj ka ate Kman in onin tiꞌj David, ex o cꞌujlanjtz wen tuꞌn Mical aju tmeꞌjel, 29 tzaj mas t-xobil twitz ic tzaꞌn nej, ex tuꞌn jlu oc Saúl te aj kꞌoj tiꞌj David te jumajx. 30 Tcyakil maj oc in che tzaj ke nejenel cye soldad aj Filistey kꞌojlel cyiꞌj aj Israel, ate David in camban mas cywitz cycyakil xjal maꞌ cyoclen ateꞌ ttxlaj Saúl, ex cyjaꞌtzun o nimanjtzxix David cyuꞌn xjal.