Ke tiyjil Esaú
36
Atzun txꞌolbabl jlu cyiꞌj tiyjil Esaú, aju Edom juntl tbi.2 Mojeꞌ Esaú cyucꞌil cabe xuꞌj aj Canaán, atzun ke jlu: Ada aju tmeꞌjel Elón aju aj Hetey, tucꞌix Aholibama aju tmeꞌjel Aná, ex tal tchman Zibeón aju aj Hevey. 3 Ax icx mojeꞌ tucꞌil Basemat aju tmeꞌjel Ismael ex tanb Nebaiot. 4 Elifaz tbi tcyꞌajal Esaú tzaj tiꞌj Ada, Reuel tbi tcyꞌajal tzaj tiꞌj Basemat, 5 ex ke tcyꞌajal e tzaj tiꞌj Aholibama, atzun ke jlu: Jeús, Jaalam ex Coré. Atzun ke tcyꞌajal Esaú jlu e ul itzꞌj tej najltok tuj txꞌotxꞌ Canaán.
6 E icꞌtzun tiꞌn Esaú ke t-xuꞌjil, ke tcyꞌajal ex ke tmeꞌjel, cyucꞌix cycyakil ke xjal najltok tucꞌil, ex xiꞌ tuj juntl txꞌotxꞌ tuꞌn tlakꞌeꞌ najchak tiꞌj Jacob aju titzꞌin. E jeꞌx tiꞌn cycyakil talun tucꞌix tcyakilju otok cnet tuꞌn tuj Canaán. 7 Tuꞌnju otok cnet nimxix kꞌinumabl cyuꞌn cycabil, mintiꞌ tumel tuꞌn cycub ten najal junx; ax icx aju txꞌotxꞌ jatum najltok ke mlaytok canun tuꞌn cywaꞌn cyalun. 8 Cyjaꞌtzun ul Esaú najal tuj tiwitz txꞌotxꞌ Seir. Edom juntl tbi Esaú.
9 Atzun txꞌolbabl jlu cyiꞌj tiyjil Esaú, aju cyxeꞌchel aj Edom akeju e najan tuj tiwitz txꞌotxꞌ Seir. 10 Atzun cybi tcyꞌajal Esaú jlu: Elifaz tal Ada, ex Reuel tal Basemat. 11 Ke tcyꞌajal Elifaz, atzun ke jlu: Temán, Omar, Zefo, Gatam ex Cenaz. 12 Attok juntl t-xuꞌjil Elifaz, Timna tbi. Ul itzꞌj jun tcyꞌajal tiꞌj xuꞌj lu, Amalec tbi. Atzun ke tiyjil Ada jlu, aju t-xuꞌjil Esaú. 13 Ke tcyꞌajal Reuel, atzun ke jlu: Nahat, Zera, Sama ex Miza. Atzun ke tiyjil Basemat jlu, aju juntl t-xuꞌjil Esaú. 14 Aholibama tbi juntl t-xuꞌjil Esaú, atzun ke tal jlu: Jeús, Jaalam ex Coré. Ate xuꞌj lu tmeꞌjel Aná ex tal tchman Zibeón.
15 Atzun ke nejenel cyxol ke tiyjil Esaú. Cyxol ke tcyꞌajal Elifaz aju tnejel tcyꞌajal Esaú, atzun ke nejenel jlu: Temán, Omar, Zefo, Cenaz, 16 Coré, Gatam ex Amalec. Atzun ke nejenel cyxol ke tiyjil Elifaz tuj txꞌotxꞌ Edom, ex ake jlu tiyjil Ada. 17 Cyxol ke tcyꞌajal Reuel aju tcyꞌajal Esaú, atzun ke nejenel jlu: Nahat, Zera, Sama ex Miza. Atzun ke nejenel cyxol ke tiyjil Reuel tuj txꞌotxꞌ Edom, ex ake jlu tiyjil Basemat aju t-xuꞌjil Esaú. 18 Cyxol ke tal Aholibama aju t-xuꞌjil Esaú, atzun ke nejenel jlu: Jeús, Jaalam ex Coré. Ake nejenel lu e ul itzꞌj tiꞌj Aholibama, aju t-xuꞌjil Esaú ex tmeꞌjel Aná. 19 Atzun ke jlu tiyjil Esaú, ex nejenel ke cyxol ke tiyjil. Edom juntl tbi Esaú.
Ke tiyjil Seir
20 Ke tcyꞌajal Seir aju aj Horey, akeju najltok tuj txꞌotxꞌ lu, atzun ke jlu: Lotán, Sobal, Zibeón, Aná, 21 Disón, Ezer ex Disán. Atzun ke nejenel cyxol ke aj Horey, akeju tiyjil Seir ex atzun najl ke tuj txꞌotxꞌ Edom. 22 Ke tcyꞌajal Lotán, atzun ke jlu: Hori ex Hemam. Timna tbi tanb Lotán. 23 Ke tcyꞌajal Sobal, atzun ke jlu: Alván, Manahat, Ebal, Sefo ex Onam. 24 Ke tcyꞌajal Zibeón, atzun ke jlu: Aja ex Aná. Ate Aná oc noj tiꞌj jun twiꞌ aꞌ tuj tzkij txꞌotxꞌ tej in pastorintok ke tbur Zibeón aju tman. 25 Ke tcꞌwaꞌl Aná, atzun ke jlu: Disón tbi tcyꞌajal ex Aholibama tbi tmeꞌjel. 26 Ke tcyꞌajal Disón, atzun ke jlu: Hemdán, Esbán, Itrán ex Querán. 27 Ke tcyꞌajal Ezer, atzun ke jlu: Bilhán, Zaaván ex Acán. 28 Ke tcyꞌajal Disán, atzun ke jlu: Uz ex Arán.
29 Ke nejenel cyxol ke aj Horey, atzun ke jlu: Lotán, Sobal, Zibeón, Aná, 30 Disón, Ezer ex Disán. Atzun ke nejenel cyxol junjun cꞌloj aj Horey tuj txꞌotxꞌ Seir.
Ke cyrey aj Edom
31 Ke rey e cawin tuj txꞌotxꞌ Edom tej naꞌnxtok toc cyrey ke aj Israel, atzun ke jlu: 32 Bela aju tcyꞌajal Beor o cawin tuj Edom, ex Dinaba tbi ttanmi. 33 Tej tcyim Bela o cawin Jobab te t-xel, aju tcyꞌajal Zera aju aj Bosra. 34 Tej tcyim Jobab o cawin Husam te t-xel, tzajnitok tuj txꞌotxꞌ Temán. 35 Tej tcyim Husam o cawin Hadad te t-xel, aju tcyꞌajal Bedad. Ate Hadad o cub tiꞌj Madián tuꞌn tuj kꞌoj tuj txꞌotxꞌ Moab. Avit tbi ttanmi. 36 Tej tcyim Hadad o cawin Samla te t-xel, aju aj Masreca. 37 Tej tcyim Samla o cawin Saúl te t-xel, aju aj Rehobot; aju tnam lu tcubtok ttxlaj nima. 38 Tej tcyim Saúl o cawin Baal-hanán te t-xel, aju tcyꞌajal Acbor. 39 Tej tcyim Baal-hanán aju tcyꞌajal Acbor, o cawin Hadar te t-xel, ex Pau tbi ttanmi. Mehetabel tbi t-xuꞌjil Hadar, aju tal Matred ex tal tchman Mezaab.