Tej otok japun José twiꞌ wuklaj abkꞌi in pastorintok ẍneꞌl junx cyucꞌil ke ttzic, akeju tal Bilha ex ke tal Zilpa ke t-xuꞌjil tman. Cocꞌx xi tmaꞌn José te tman aju mya baꞌn in cybinchaꞌntok ke ttzic.

3 Mas o cꞌujlanjtz José tuꞌn Israel cywitz ke txkantl tcyꞌajal, tuꞌnju ul itzꞌj cuꞌxun lu tuj ttijil, ex o bant jun t-ẍjoꞌw tbanilxix tuꞌn. 4 Tejtzun tel cynicꞌ ke ttzic José tiꞌj, mas cꞌujlaꞌntok José tuꞌn cyman, el cyicꞌun ex mintiꞌ e yolin te tuj cheba.

5 At jun maj oc jun twitzicꞌ José ex xi tmaꞌn cye ttzic. Atzun cye, mas el icꞌun José cyuꞌn. 6 Xi tmaꞌn cye cyjaꞌ:

—Cybintze aju nwitzicꞌe o tzꞌoc: 7 Lu ko in ko cꞌaloꞌntok junjun cheꞌl triw tuj cojbil. Aju weye cheꞌl ntriw jaw weꞌ tuꞌnx tib ex ax cyaj weꞌ. Atzun cyeye cheꞌl cytriw baj cytxolban cyib tiꞌjele weye, ex e cub mocꞌeꞌ twitz weye, chi José.

8 Xitzun cytzakꞌweꞌn ke ttzic cyjaꞌ:

—¿Maj cꞌoquela te kreye ex ccawila kibaje? Che chi.

Mas el icꞌun José cyuꞌn tuꞌn cylaj twitzicꞌ ex ke tyol.

9 Te tibajxi oc juntl twitzicꞌ José, ax icx xi ttxꞌolbaꞌn cye ttzic ex xi tmaꞌn cye cyjaꞌ:

—Cybintze juntl nwitzicꞌe o tzꞌoc: Lu kꞌij tucꞌix xjaw ex junlaj cheꞌw in che cub mocꞌeꞌtok nwitze, chi José.

10 Ax icx xi ttxꞌolbaꞌn José te tman ic tzaꞌnx otok baj ttxꞌolbaꞌn cye terman. Bajtzun cawin tuꞌn tman ex xi tmaꞌn tman te cyjaꞌ:

—¿Ti t-xilen twitzicꞌa lu? ¿Chin belpetzun mocꞌeꞌye twitza ex tuꞌn tpon tacl tibaj nwitze twitz txꞌotxꞌ junx tucꞌil ttxuꞌya ex cyucꞌix ke termaniya? Chi tman.

11 Ke ttzic José tzaj tloꞌch cycꞌuꞌj tiꞌj, atzunte tman oc ten ximal tiꞌj jlu.

12 At jun kꞌij e jeꞌx ttzic José pastoril ke t-ẍneꞌl cyman max tuj Siquem. 13 Xitzun tmaꞌn Israel te José cyjaꞌ:

—In che cwentin ke ttzica ke ẍneꞌl max tuj Siquem. Tzaja, ex cxeꞌl nsamaꞌne cyucꞌil, chi Israel.

—Lu kine lu, chi José.

14 Xi tmaꞌn Israel te cyjaꞌ:

—Txiꞌya queꞌyilte tzaꞌn ateꞌ ke ttzica ex ke ẍneꞌl, ex kꞌintza tkanil wucꞌile, chi Israel.

Tej t-xi t-samaꞌn, atzun najltok tuj chkꞌajlaj Hebrón. Pontzun José tuj Siquem. 15 Acux in betjeꞌtok tuj cojbil, oc noj jun xjal tiꞌj ex xi tkanin xjal te cyjaꞌ:

—¿Ti in tjyoꞌna tzalu? Chi xjal.

16 Xi ttzakꞌweꞌn José cyjaꞌ:

—In chin jyone cyiꞌj ke ntzique. Binchama xtalbil kꞌmantza jatum in che pastorin ẍneꞌl, chi José. 17 Xi tmaꞌn xjal te cyjaꞌ:

—O che icꞌ tzalu. O nbiye cyyol cyjaꞌ: Koꞌke tuj Dotán, che chi, chi xjal.

Xiꞌtzun José queꞌyilte cye ttzic, ex e cnet tuꞌn max tuj Dotán. 18 Ilwaj José cyuꞌn najchak, cyjaꞌ ttzaj. Tej naꞌnxtok tcanun José cyucꞌil, bant tiꞌj cyuꞌn tuꞌn tcub cybyoꞌn. 19 Cymatzun cyxolx cyjaꞌ:

—Cyqueꞌyinxe, lu witzcyꞌal tzul. 20 Cytzaje, e tcub kbyon, e tcuꞌx kxoꞌn tuj jul, ex jacu txi kmaꞌn te kman cyjaꞌ: Jun txcup mya baꞌn ma cub byonte te, ko chi cxel kmaꞌn. Kilaꞌtzun ka che japunel ke twitzicꞌ, che chi.

21 Tejtzun tbinte Rubén jlu, oc ten colol tiꞌj José ex tma cye titzꞌin cyjaꞌ:

—Miꞌn cub kbyoꞌn. 22 Miꞌn tzꞌel cyiꞌne tchcꞌel. Cykꞌon cuꞌxe tuj jul lu, aju at tuj tzkij txꞌotxꞌ, ex miꞌn tzꞌoc cykꞌoꞌn cykꞌabe tiꞌj tuꞌn tcub cybyoꞌne, chi Rubén.

Tma Rubén icju tuꞌnju tajbiltok tuꞌn tclet José ex tuꞌn taj t-samaꞌn tucꞌil tman. 23 Tejtzun tpon canun José cyucꞌil ttzic, tzyet cyuꞌn ex el cyiꞌn t-ẍjoꞌw tbanil, aju toctok tiꞌj. 24 Xitzun cyiꞌn ex cuꞌx cykꞌoꞌn tuj jul. Aju jul lu mintiꞌtok tuj ex tzkijtok tuj.

25 E cubtzun keꞌ waꞌl, ex xi cyqueꞌyin cyjaꞌtok cytzaj txkan xjal aj Ismael, tzajni ke max tuj Galaad, kꞌiꞌntok perjum, bálsamo ex ttxcꞌomil tzeꞌ mirra, cyuꞌn cychej camey; cyjaꞌtok cyxiꞌ tuꞌn cypon tuj Ejipt. 26 Tmatzun Judá cye terman:

—¿Ti oc kcambaꞌ ka ma cub kbyoꞌn kitzꞌin ex tuꞌn tcub kewan ka kuꞌn cub kbyoꞌn? 27 Mas baꞌn tuꞌn t-xi kcꞌayin cye aj Ismael, twitz tuꞌn tcub kbyoꞌn, tuꞌnju ax kitzꞌin ex ax kchibjal, chi Judá.

Baꞌn eꞌla jlu tuj cywitz ke terman, 28 ex tej cyul canun ke comersyant aj Madián, akeju aj Ismael juntl cybi, jatz kꞌiꞌn José cyuꞌn terman tuj jul, xi cycꞌayin cye, ex o cycꞌam winkin sak pwak twiꞌ. Xitzun kꞌiꞌn José tuj Ejipt.

29 Tej tul meltzꞌaj Rubén, cuꞌx tqueꞌyin tuj jul, ex mi aꞌltok te José tuj. Eltzun t-sbitꞌun t-xbalun tuꞌn tbis. 30 Aj meltzꞌaj jatum ateꞌtok ke titzꞌin ex xi tmaꞌn cye cyjaꞌ: Mi aꞌl cuꞌxun tuj jul. Atzun weye ¿jatum chin xeꞌle jaꞌlo? Chi Rubén.

31 Tzajtzun cyiꞌn aju t-ẍjoꞌw José, cub cybyoꞌn jun tal chip, ex cuꞌx cymuꞌn ẍjoꞌw tuj tchcꞌel. 32 Xi cyiꞌn ẍjoꞌw tucꞌil cyman ex xi cymaꞌn te cyjaꞌ:

—O ko oc noje tiꞌj jlu. Queꞌyin oca ka a t-ẍjoꞌw tcyꞌajala ex ka mya a, che chi.

33 Eltzun tnicꞌ Jacob tiꞌj ex tma cyjaꞌ:

—Ax toc te ncyꞌajale José ẍjoꞌw lu. Atlo jun txcup o baj chyoꞌnte te ex o baj tpaẍuꞌn, chi Jacob.

34 Eltzun t-sbitꞌun Jacob t-xbalun, oc tkꞌoꞌn t-xbalun chꞌiꞌx twitz te jun techal tiꞌj tbis, ex o bisun nim kꞌij tiꞌj tcyꞌajal. 35 Cycyakil ke tcyꞌajal ex ke tmeꞌjel e oc ten kꞌukbalte tcꞌuꞌj, atzun te mintiꞌ o cub tuj twitz tuꞌn tkꞌukbanjtz tcꞌuꞌj; nok oꞌcx oc ten okꞌel tiꞌj tcyꞌajal ex in tmaꞌntok cyjaꞌ: Cucx chin bisule tiꞌj ncyꞌajale, ex max cxel ncoline ocxi npone tucꞌil cyxol cyimni, chi Jacob.

36 Xitzun kꞌiꞌn José tuj Ejipt cyuꞌn aj Madián, ex xi cycꞌayin ma chixin te Potifar. Ate xjal lu ajbeltok te Faraón ex nejeneltok cye soldad cwentil te.