6 Tzaj tiꞌn Judá t-xuꞌjil Er aju tnejel tcyꞌajal. Ate xuꞌj lu, Tamar tbi. 7 Ate Er, aju tnejel tcyꞌajal Judá, mya baꞌntok tbinchben tuj twitz Kman ex o cyim naj tuꞌn. 8 Xitzun tmaꞌn Judá te Onán cyjaꞌ: Mojeꞌcuya tucꞌil t-xuꞌjil ktzan ttzica, tuꞌntzun tjapun tuꞌna aju ley kꞌmamaj tuꞌn Dios, porque t-xnaꞌna, ex tuꞌn tjaw jlet tiyjil tuꞌna, chi Judá. 9 Oc tcub tan Onán tucꞌil t-xuꞌjil ktzan ttzic, cub tkoꞌn tiyaj twitz txꞌotxꞌ tuꞌntzun miꞌn ttzaj tiyjil ktzan ttzic tuꞌn, tuꞌnju baꞌntok tuꞌn mya te ke cꞌwaꞌl attok cyulel itzꞌj. 10 Mya baꞌn eꞌla tuj twitz Kman aju in tbinchaꞌntok Onán. Ax icx te o cyim naj tuꞌn Kman. 11 Xitzun tmaꞌn Judá te Tamar aju tlib cyjaꞌ: Tena te meba xuꞌj tja tmana ocxi tchꞌiy Sela aju ncyꞌajale, chi Judá te Tamar, tuꞌnju cub t-ximan Judá cyjaꞌ: Mya yajcu icx te jacu cyim te ic tzaꞌnx ke ttzic, chi. Xiꞌtzun Tamar tja tman.

12 El nim kꞌij ex cyim t-xuꞌjil Judá, aju tmeꞌjel Súa. Tejtzun tel tbis Judá, jax jatum ateꞌtok ke kꞌil cytzmal t-ẍneꞌl, max tuj tnam Timnat. Xiꞌ Hira aju aj Adulam tucꞌil, aju tamiw. 13 Pon tkanil tucꞌil Tamar cyjaꞌ: Lu tliba ma jax max Timnat tuꞌn tel cytzmal t-ẍneꞌl. 14 Eltzun tiꞌn Tamar t-xbalun te mebyil, oc tmaksiꞌn twitz tuꞌn jun xbalun xaxj tuꞌn miꞌn tel nicꞌbaj tiꞌj, ex cub keꞌ ttxaꞌn tnam Enaim, aju tcub tuj tbeyil Timnat. O tbincha icju tuꞌnju o til otok chꞌiy Sela ex naꞌnxtok t-xi kꞌoꞌn tuꞌn toc te tchmil.

15 Tejtzun tqueꞌyinte Judá xuꞌj lu, cub t-ximan ka jawni twitz cyucꞌil xinak, tuꞌnju otok tzꞌoc tmaksiꞌn twitz. 16 Xitzun lakꞌeꞌ ttxlaj xuꞌj ex mintiꞌ el tnicꞌ tiꞌj atok tlib. Xi tmaꞌn Judá te cyjaꞌ:

—¿Mlaype cub tuj twitza tuꞌn ncub tane tucꞌila? Chi Judá.

—¿Titzun ctzajel tkꞌoꞌna weye tiꞌj tcublen tana wucꞌile? Chi xuꞌj.

17 —Ctzajel nsamaꞌne jun tal tchipa cyxol ke walune, chi Judá.

—Baꞌn, pero kꞌontza jun tiꞌxti teya te jun tzuybil, ex cꞌajel nkꞌoꞌne ocxi tul t-samaꞌna tal nchipe, chi xuꞌj.

18 —¿Titzun taja tuꞌn t-xi nkꞌoꞌne teya? Chi Judá xi tkanin.

Xi ttzakꞌweꞌn xuꞌj:

—Kꞌontza t-seya tucꞌix takꞌal, tucꞌix tcyꞌakoꞌcha tzyuꞌn tuꞌna, chi xuꞌj.

Xitzun tkꞌoꞌn Judá te xuꞌj, cub tan tucꞌil, ex oc ten tal.

19 Tbajlenxi jlu ajtzun Tamar, el tiꞌn aju xbalun toctok twitz, ex oc tkꞌoꞌn juntl maj t-xbalun te mebyil.

20 Xitzun t-samaꞌn Judá tal chip. Ate aj Adulam aju tamiw xi kꞌinte te tuꞌn tpon tucꞌil xuꞌj, tuꞌntzun cyajtz tkꞌoꞌn ke tzuybil; pero mintiꞌ cnet xuꞌj tuꞌn. 21 Xi tkanin cye xjal tuj lugar lu:

—¿Jatum taꞌ aju xuꞌj aj Enaim jawni twitz cyucꞌil xinak, aju in tentok ttzi be? Chi tamiw Judá.

—Tzalu mintiꞌ jun xuꞌj jawni twitz cyucꞌil xinak, che chi xjal.

22 Ajtzun meltzꞌaj tuꞌn tpon tucꞌil Judá ex xi tmaꞌn te cyjaꞌ:

—Mintiꞌ ma cnet xuꞌj wuꞌne, ax icx ma tzaj cymaꞌn ke xjal tuj lugar ma chixin: Tzalu mintiꞌ jun xuꞌj jawni twitz cyucꞌil xinak, che chi, chi tamiw Judá.

23 Xitzun tmaꞌn Judá te:

—E cycyaj ten ke tzuybil tucꞌil, tuꞌntzun miꞌn cyxmayin xjal kiꞌj; matzun tila ma txi nsamaꞌne tal chip te, ex mintiꞌ ma cnet xuꞌj tuꞌna, chi Judá.

24 Tbajlenxi ox xjaw, e ul xjal kꞌmalte te Judá cyjaꞌ:

—O yaẍin Tamar aju tliba cyucꞌil xinak, ex o tzꞌoc ten tal, che chi.

Tmatzun Judá cyjaꞌ:

—Cyiꞌmetze ex cypatun cube.

25 Tejtzun tetz kꞌiꞌn Tamar cyuꞌn xjal, xi t-samaꞌn tkanil te tlib:

—O tzꞌoc ten wale tuꞌn cyajaw ke jlu. Queꞌyin oca al e ke jlu, aju sey tucꞌix takꞌal, tucꞌix cyꞌakoꞌch, chi Tamar. 26 Tejtzun tel tnicꞌ Judá cyiꞌj, tma cyjaꞌ:

—Ax toc mas tzꞌakl xuꞌj lu nwitze, tuꞌnju mintiꞌ jaw nmojbaꞌne tucꞌil Sela aju ncyꞌajale, chi Judá.

Mintiꞌtl cub tan tucꞌil.

27 Tej tpon tkꞌijlalil tuꞌn tul itzꞌj tal Tamar, yoꞌẍ ke tal e ul itzꞌj. 28 Tej cyjaꞌtok cyul itzꞌj, etz tkꞌoꞌn tkꞌab jun tal neꞌ. Octzun tcꞌaloꞌn betxꞌlon jun piẍ nokꞌ cyak queꞌyin tiꞌj tkꞌab ex tma: Ate jlu ma tzꞌitzꞌj nej.

29 Aj tiꞌn tal neꞌ tkꞌab, ex a juntl ul itzꞌj nej. Tmatzun betxꞌlon cyjaꞌ: Tzaꞌn tten xjaket be tuꞌna, chi betxꞌlon. Tuꞌntzun jlu, Fares tbi oc kꞌoꞌn.

30 Ultzun itzꞌj juntl, aju otok tzꞌoc cꞌaloꞌn tkꞌab tuꞌn nokꞌ cyak queꞌyin, ex Zara tbi oc kꞌoꞌn.