José ex aju t-xuꞌjil Potifar
39
Tponlen kꞌiꞌn José max tuj Ejipt cyuꞌn aj Ismael, xi cycꞌayin te Potifar aju aj Ejipt. Ate xjal lu ajbeltok te Faraón ex nejeneltok cye soldad cwentil te. 2 Atzunte Kman attok tucꞌil José, ex baꞌn eꞌla tkꞌij tuj tja tpatrón aju aj Ejipt. 3 El tnicꞌ tpatrón tiꞌj attok Kman tucꞌil, ex tcyakilju in tbinchaꞌntok, baꞌntok nneꞌla. 4 Cyjaꞌtzun tten o tzalaj Potifar tiꞌj José, oc tkꞌoꞌn te ajbel te ex te tmayordom tuj tja, ex xi tkꞌoꞌn toclen tiꞌj tcyakilju attok tucꞌil. 5 Tej tcyaj tkꞌoꞌn Potifar tcyakil akꞌuntl ex tcyakilju attok te tuj tcwent José, o cub tcyꞌiwlan Kman nok tuꞌn tlaj José, ex tcꞌam t-xtalbil Kman tuj tja ex tiꞌj ttxꞌotxꞌ. 6 Cyaj tkꞌoꞌn tuj tcwent José tcyakilju attok te. Tuꞌntzun jlu mintiꞌtl o bisun Potifar tiꞌj takꞌun, nok oꞌcx tiꞌj twa.Tbanilxix queꞌyin twitz José, ax icx t-ximlal. 7 Tejtzun tel kꞌij, aju t-xuꞌjil Potifar oc tkꞌoꞌn twitz tiꞌj José, ex xi tmaꞌn te cyjaꞌ:
—Tancuya wucꞌile, chi xuꞌj.
8 Atzunte José mintiꞌ o tajbe, ex xi tmaꞌn te t-xuꞌjil tpatrón cyjaꞌ:
—Bintza, mintiꞌ in baj tcꞌuꞌj npatrone wiꞌje tiꞌj tcyakilju at tuj tja ex o tzaj tkꞌoꞌn tuj ncwente tcyakilju at te. 9 Tuj ja lu mi aꞌl juntl mas maꞌ toclen nwitze, ex mintiꞌ in cub t-xcꞌayin jun tiꞌxti weye, nok oꞌcx aya tuꞌnju aya t-xuꞌjil. ¿Tzaꞌntzun tten tuꞌn nbinchanteye matij il lu ex tuꞌn nbinchanteye il twitz Dios? Chi José.
10 Cycyakil kꞌij in xi tmaꞌntok te José tuꞌn tcub tan tucꞌil ex tuꞌn tcub ten ttxlaj. Atzunte José mintiꞌ xi tkꞌoꞌn ambil te. 11 At jun kꞌij ocx José tuj ja tuꞌn tbant takꞌun, ex mi aꞌltok jun xjal at tuj ja. 12 Tzyet José tiꞌj t-xbalun tuꞌn xuꞌj ex xi tmaꞌn te cyjaꞌ:
—Tancuya wucꞌile, chi xuꞌj.
Atzunte José etz ojkelan, ex ax cyaj ten t-xbalun tuj tkꞌab xuꞌj. 13 Tejtzun tlonte xuꞌj otok tzꞌetz ok José ex ax cyaj ten t-xbalun tuj tkꞌab, 14 e tzaj ttxcoꞌn ke majen ateꞌtok tuj tja ex xi tmaꞌn cye cyjaꞌ:
—Cybintze, tzaj tiꞌn nchmile jun aj Hebrey tuꞌn t-xmayin kiꞌj. Soctz wiꞌje tuꞌn tcub tan wucꞌile; atzun weye ẍin jaw schꞌine cyuw wen. 15 Tejtzun ẍin jaw schꞌine, sex ok, ex ax xcyaj tzꞌak t-xbalun wucꞌile, chi xuꞌj.
16 Cub tkꞌoꞌn t-xbalun José ttxlaj tejxi tpon tchmil. 17 Tej tpon tchmil ax yol xi tmaꞌn te, ex chi cyjaꞌ: Aju majen aj Hebrey tzaj tiꞌna, soctz wiꞌje tuꞌn tcub tan wucꞌile. 18 Tejtzun ẍin jaw schꞌine sex ok, ex ax xcyaj tzꞌak t-xbalun wucꞌile. 19 Cyjaꞌtzun ma tbincha tmajena wiꞌje, chi xuꞌj te tchmil.
Tejtzun tbinte tpatrón José tcyakilju otok tzaj tmaꞌn t-xuꞌjil, tzaj nimxix tkꞌoj. 20 Tzajtzun tzyuꞌn José tuꞌn tpatrón ex ocx tkꞌoꞌn tuj tjayil tzeꞌ jatum ateꞌtok ke pres otok che ocx tkꞌoꞌn rey. Axtzun cyaj ten tuj pres. 21 Atzunte Kman attok tucꞌil José, tzaj kꞌakꞌan tcꞌuꞌj tiꞌj, ex o tzꞌonin tiꞌj tuꞌn tel baꞌn tuj twitz nejenel cyibaj ke pres. 22 Cycyakil ke pres ateꞌtok tuj tjayil tzeꞌ lu, e cyaj tkꞌoꞌn nejenel tuj tcwent José, ex ate José o kꞌmante tcyakil akꞌuntl in banttok cyxol. 23 Mintiꞌtltok tbis nejenel tiꞌj tuꞌn tbaj tqueꞌyin aju attok tuj tcwent José, tuꞌnju attok Kman tucꞌil José ex o tzꞌonin tiꞌj, cyjaꞌtzun, tcyakil aju in bant tuꞌn baꞌn nneꞌla.