5 At jun akꞌbil cycabil pres lu, aju kꞌol tcꞌa rey ex aju binchal pan, oc jun cywitzicꞌ ex attok t-xilen teyle te junjun witzicꞌ. 6 Tejtzun tpon José queꞌyilte cye te prim, o til in che bisuntok. 7 Xitzun tkanin José cye keju ajbel te Faraón, akeju ateꞌtok tucꞌil tuj pres max tuj tja tpatrón:

—¿Tikuꞌn bis taꞌ cywitze jaꞌlo? Chi José.

8 Xitzun cytzakꞌweꞌn te cyjaꞌ:

—At jun kwitzicꞌe soc mayꞌ, ex mi aꞌl jun chicꞌbalte keye ti t-xilen, che chi.

Xitzun tmaꞌn José cye cyjaꞌ:

—¿Myapetzun a Dios in tzaj chicꞌbante cyxilen witzicꞌ? Cytxꞌolbantze weye tzaꞌn tten cywitzicꞌe soc, chi José.

9 Atzunte nejenel cye kꞌol tcꞌa rey xi ttxꞌolbaꞌn twitzicꞌ te José, ex xi tmaꞌn te cyjaꞌ:

—Tuj nwitzicꞌe xwile jun wiꞌ tkan uva tcubtok nwitze, 10 ex attok ox tkꞌab. Jurat ẍe tzaj t-xul, ẍe japun t-xmacal, ex sul cykꞌij twitz. 11 Kꞌiꞌntok wuꞌne tuj nkꞌabe aju tcꞌabl Faraón. Ẍe tzajtzun wiꞌne ke uva, xcuꞌx nyatzꞌoꞌne cyaꞌl tuj tcꞌabl Faraón ex xi nkꞌoꞌne tuj tkꞌab, chi nejenel cye kꞌol tcꞌa rey.

12 Xitzun tmaꞌn José te cyjaꞌ:

—Aju t-xilen twitzicꞌa, atzun jlu: Ke ox tkꞌab uva, atzun in cymaꞌn cyiꞌj ox kꞌij. 13 Oc cybaj ox kꞌij, cꞌelex kꞌiꞌna tuꞌn Faraón tuj pres, cꞌoquel kꞌoꞌna juntl maj tiꞌj takꞌuna ex cxel tkꞌoꞌna tcꞌa ic tzaꞌn nej. 14 Octzun texa tzalu, bix chin tzaj tnaꞌna, bix tzaj kꞌakꞌan tcꞌuꞌja wiꞌje, bix yolina wiꞌje twitz Faraón ex bix chin ex tiꞌna tzalu, 15 tuꞌnju nok o chin tzaj elkꞌaꞌne tuj cytxꞌotxꞌ aj Hebrey, ax icx nokx gan in octz kꞌoꞌne tuj pres, porque mintiꞌ jun il o bant wuꞌne tzalu, chi José.

16 Tej tbinte nejenel cye binchal pan tbaniltok tbinx t-xilen witzicꞌ otok txi tchicꞌbaꞌn José, xi tmaꞌn te José cyjaꞌ:

—Ax icx weye soc nwitzcyꞌaꞌne, xwile tjaxtok ox chiꞌl tuj nwiꞌye ex tcuꞌxtok sak pan cyuj. 17 Aju chiꞌl tjaxtok tibajxi, nojnitok tuꞌn tcyakil wik pan in xi twaꞌn Faraón; atzun ke chyuꞌj in che waꞌntok tiꞌj pan tcuꞌx tuj chiꞌl tjaxtok tuj nwiꞌye, chi nejenel cye binchal pan.

18 Xitzun ttzakꞌweꞌn José te cyjaꞌ:

—Aju t-xilen teya twitzicꞌ, atzun jlu: Ke ox chiꞌl, atzun in cymaꞌn cyiꞌj ox kꞌij. 19 Oc cybaj ox kꞌij, cꞌelel kꞌiꞌn twiꞌya tuꞌn Faraón, cjawil yobina tiꞌj jun tzeꞌ ex cxel chyoꞌn tchibjala cyuꞌn chyuꞌj.

20 Tujtzun toxin kꞌij japun tabkꞌiyil Faraón, ex cub ticꞌsaꞌn jun ninkꞌij junx cyucꞌil ke aj sanjelal ateꞌtok ttxlaj. Cywitz cycyakil xjal otok che tzaj txcoꞌn tuj icꞌsabl kꞌij, xi tmaꞌn tuꞌn tetz kꞌiꞌn tuj pres aju nejenel cye kꞌol tcꞌa, tucꞌix nejenel cye binchal pan. 21 Xi tkꞌoꞌn Faraón juntl maj takꞌun nejenel cye kꞌol tcꞌa, ex oc ten kꞌol tcꞌa Faraón ic tzaꞌnx nej; 22 atzunte nejenel cye binchal pan, jaw tyoban ic tzaꞌnx otok txi tchicꞌbaꞌn José. 23 Mintiꞌ tzaj naꞌn José tuꞌn nejenel cye kꞌol cꞌabj, nok oꞌcx icꞌ tnaꞌnjtz tuꞌn.