Cub cyꞌiwlaꞌn Jacob tuꞌn Dios tuj Betel
35
Tzaj tmaꞌn Dios te Jacob cyjaꞌ: Weꞌctza ex tjaxa najal tuj Betel. Binchan jawa jun altar nwitze ma chixin, akine Dios aju cub tyecꞌun tib twitza tej tel oka twitz ttzica Esaú, chi Dios. 2 Xitzun tmaꞌn Jacob cye cycyakil keju ateꞌtok tuj tja ex cye cycyakil keju ateꞌtok tucꞌil, chi cyjaꞌ: Cyiꞌmetze cycyakil tilbilal nnoꞌc cydiosine, akeju e tzaj cyiꞌne tuj junxitl txꞌotxꞌ, che chine tuj aꞌ, ex cychꞌexpun ele cyxbalune. 3 Koꞌke tuj Betel. Atzun cjawil nbinchaꞌne jun altar twitz Dios, aju o tzꞌonin wiꞌje tej atintoke tuj xobajil, ex o bet wucꞌile nok jatumchak o chin bete, chi Jacob.4 E jeꞌxtzun cykꞌoꞌn te Jacob cycyakil ke tilbilal nnoꞌc cydiosin, akeju otok tzaj cyiꞌn tuj junxitl txꞌotxꞌ, cyucꞌix ke tuj ẍcyinbaj. E cuꞌx tmakuꞌn Jacob tjakꞌ jun wiꞌ tzeꞌ cꞌol nikayintok ttxlaj tnam Siquem. 5 Tej cyicꞌ tuj lugar lu, tzaj tkꞌoꞌn Dios nim t-xobil cyiꞌj xjal ateꞌtok cyuj mastl tnam cyiꞌjele, ex mintiꞌ e joꞌc lpeꞌ kꞌojlel cyiꞌj ke tcyꞌajal Jacob.
6 Ul Jacob tuj tnam Luz, cyucꞌix cycyakil ke xjal ucꞌintok tuꞌn, ex Betel juntl tbi tnam lu, atzun taꞌ tuj Canaán. 7 Jawtzun tbinchaꞌn jun altar, El-Betel tbi lugar lu oc tkꞌoꞌn, tuꞌnju atzun cub tyecꞌun tib Dios twitz tej tel ok twitz ttzic. 8 Atzun cyim Débora, aju xuꞌj otok tzꞌoc cwentin te Rebeca, ex cuꞌx makuꞌn tjakꞌ jun wiꞌ tzeꞌ cꞌol tjakꞌ tnam Betel. Alón-bacut tbi lugar lu oc tkꞌoꞌn Jacob.
9 Tajtzlenxi Jacob tuj Padan-aram cub tyecꞌun tib Dios twitz juntl maj, ex cub tcyꞌiwlaꞌn. 10 Tzaj tmaꞌn te cyjaꞌ:
Jacob tbiya, atzun jaꞌlo miꞌn tzꞌoc kꞌmaꞌntl tbiya Jacob. Texju jaꞌlo Israel tbiya cꞌoquel, chi Dios, ex Israel tbi Jacob oc tkꞌoꞌn.
11 Tmatl Dios te cyjaꞌ:
Akine Dios aju at tipumal tuꞌn tbant tcyakil tuꞌn. Chmet-x nim tbaja ex chmet-x nim tiyjila. Tiꞌja cꞌelel jun nasyon ex nimcu tnam, ex cyxol ke tiyjila che elel jlet ke rey.
12 Aju txꞌotxꞌ o txi nkꞌoꞌne te Abraham ex te Isaac, axju cxel nkꞌoꞌne teya, ex te tibajxi cxel nkꞌoꞌne cye tiyjila, chi Dios.
13 Icꞌtzun Dios tuj lugar jatum otok yolin tucꞌil Jacob. 14 Tzaj tiꞌn Jacob jun abj, jaw twalbaꞌn te jun techal jatum cub ten Dios yolil tucꞌil, cub tkoꞌn aseyt ex taꞌl twitz uva tibaj, te jun akꞌbil chjonte te Dios, 15 ex Betel tbi lugar lu oc tkꞌoꞌn, jatum otok yolin Dios tucꞌil.
Tej tcyim Raquel
16 Te tibajxitzun e icꞌ tuj Betel. Tej chꞌixtok cyul tuj Efrata ul itzꞌj juntl tal Raquel, ex pen el cꞌwaꞌl tiꞌj. 17 Tej toctok tuj cꞌixcꞌoj mas cyuwxix, xi tmaꞌn betxꞌlon te cyjaꞌ: Miꞌn xoba. Xinak juntl tala ma tzul itzꞌj, chi betxꞌlon.
18 Chꞌixtok tcyim Raquel ex tej chꞌixtok tjaw baj t-xew, Benoni tbi tal neꞌ oc tkꞌoꞌn; atzunte Jacob aju tman neꞌ, Benjamín tbi oc tkꞌoꞌn.
19 Cyjaꞌtzun tten cyim Raquel ex cuꞌx makuꞌn ttxlaj be aju in pon tuj Efrata, aju Belén tbi toc jaꞌlo. 20 Jaw twalbaꞌn Jacob jun abj te jun techal tibaj tmukbil Raquel. Atzunju techal lu in tyecꞌun jatum cuꞌx makuꞌn Raquel, ex ax taꞌ jaꞌlo.
21 Icꞌtzuntl Israel ex o tentl max tiꞌjxi Migdal-edar. 22 Tej najltok Israel tuj txꞌotxꞌ lu, at jun maj xiꞌ Rubén ex cub tan tucꞌil Bilha aju t-xuꞌjil tman. O tbi Israel jlu.
Ke tcyꞌajal Jacob
Cablaj cybet tcyꞌajal Jacob. 23 Ke tcyꞌajal e tzaj tiꞌj Lea, atzun ke jlu: Rubén aju tnejel tcyꞌajal Jacob, tucꞌix Simeón, Leví, Judá, Isacar ex Zabulón. 24 Ke tcyꞌajal e tzaj tiꞌj Raquel, atzun ke jlu: José ex Benjamín. 25 Ke tcyꞌajal e tzaj tiꞌj Bilha aju tmajen Raquel, atzun ke jlu: Dan ex Neftalí. 26 Ke tcyꞌajal e tzaj tiꞌj Zilpa aju tmajen Lea, atzun ke jlu: Gad ex Aser. Cycyakil ke jlu tcyꞌajal Jacob ke, akeju e ul itzꞌj tuj Padan-aram.
Tej tcyim Isaac
27 Ul Jacob queꞌyilte Isaac aju tman tuj tnam Mamre, ex ax juntl tbi tnam lu Arba ex ka Hebrón. Atzun otok ankꞌin Abraham tucꞌix Isaac. 28 O ankꞌin Isaac tuꞌn tcyakil, 180 abkꞌi. 29 Tej otok tijin Isaac wen jaw baj t-xew, cyim ex pon cyucꞌil ktzan t-xeꞌchel. Ocxtzun makuꞌn tuꞌn Esaú ex Jacob akeju tcyꞌajal.