5 O tbi Jacob otok cub tan Siquem tucꞌil Dina aju tmeꞌjel, ex lajwers otok tzꞌoc ten tiꞌj. Tuꞌnju ateꞌtok ke tcyꞌajal Jacob tuj cojbil cyucꞌil ke talun, mintiꞌ o kꞌajt, maxitzun xi tmaꞌn cye tejxi cyul meltzꞌaj. 6 Xiꞌ Hamor aju tman Siquem, tucꞌil Jacob tuꞌn tyolin tucꞌil.

7 Tej cyul meltzꞌaj ke tcyꞌajal Jacob tuj cojbil o cybi aju otok baj. Tzajtzun nim cybis ex nim cykꞌoj, tuꞌnju otok tbincha Siquem jun il matij cyxol aj Israel; otok cub tan Siquem tucꞌil tmeꞌjel Jacob, aju mya baꞌntok tuꞌn tbinchanjtz. 8 Oc ten Hamor yolil cyucꞌil tcyꞌajal Jacob, ex chi cyjaꞌ:

—Aju ncyꞌajale Siquem o t-xoꞌ tgan tiꞌj cyanbe. Cybinchame xtalbil, cykꞌontze tuꞌn toc te t-xuꞌjil. 9 E cyoque at kxilen cyucꞌile. Cykꞌontze cymeꞌjele keye, ex cyiꞌnxe ke keye kmeꞌjel. 10 Ax che tene kucꞌile. Lu txꞌotxꞌ tcub cywitze. Che ankꞌine twitz, cybetin baje twitz, ex cylakꞌom cytxꞌotxꞌe, chi Hamor.

11 Xi tmaꞌn Siquem te tman Dina ex cye t-xiban:

—In chin cubsane cywitze tuꞌn cybinchanteye xtalbil weye. Jacu txi nkꞌoꞌne nok alcye ma tzaj cykanine weye. 12 Cykanintze nok jteꞌx twi kꞌapoj ex nok nicꞌpunx oyaj; jacu txi nkꞌoꞌne. Nok oꞌcx cykꞌontze kꞌapoj tuꞌn toc te nxuꞌjile, chi Siquem.

13 Xi cytzakꞌweꞌn ke tcyꞌajal Jacob te Siquem ex te Hamor aju tman cyucꞌil yol te sbubl, tuꞌnju lajwers otok tzꞌoc ten Siquem tiꞌj Dina, 14 ex xi cymaꞌn cye cyjaꞌ:

—Mlay txi kkꞌoꞌne kanbe te jun xinak mya sircunsidarimaj, tuꞌnju icꞌbilxix jlu kxole. 15 Ka ma che sircunsidarinjtz cycyakil ke xinak cyxole ic tzaꞌn keye, jacutzun cub tuj kwitze icju. 16 Jacutzun txi kkꞌoꞌne kmeꞌjele te cyxuꞌjile ex jacu che jaw kxuꞌjlaꞌne cymeꞌjele, jacu ko ankꞌin junx, ex junx cꞌloj xjal ko oquel. 17 Katzun miꞌn ma txi cynimane aju ma txi kmaꞌne cyeye tuꞌn cysircunsidarinjtze, ko icꞌeltzune tzalu, ex cxel kiꞌne kanbe kucꞌile, che chi.

18 Cub tuj twitz Hamor tucꞌix Siquem aju tcyꞌajal tcyakilju tzaj kꞌmaꞌn cye. 19 Jurat naj baj t-sircunsidarin tib cuꞌxun Siquem, tuꞌnju otok t-xoꞌ tgan tiꞌj tmeꞌjel Jacob. Ate Siquem mas xoꞌn cyxol txkantl terman. 20 Xiꞌtzun Hamor tucꞌix Siquem ttzi tlamel tnam ex xi cymaꞌn cyjaꞌ cye cycyakil xinak aj tnam: 21 Ke xinak lu ma che oc te kamiw. Ax che ankꞌil kxol, ax che betel kxol, ex at nim txꞌotxꞌ jatum tuꞌn cyten tuj. Jacu ko mojeꞌ cyucꞌil ke cymeꞌjel; ax icx cye, jacu che mojeꞌ cyucꞌil ke kmeꞌjel. 22 Ka kaj tuꞌn koc te junx tnam cyucꞌil ex tuꞌn cyankꞌin kucꞌil, il tiꞌj tuꞌn t-xi kniman aju in cymaꞌn, atzun jlu: Tuꞌn cysircunsidarinjtz cycyakil xinak ateꞌ kxol, ic tzaꞌnx cye in cybinchaꞌn. 23 Tcyakilju at cye, cyucꞌix ke cyalun che oquel te ke. Nok oꞌcx kbincham aju in cymaꞌn, ex che ankꞌiltzun kxol, chi Hamor.

24 Cycyakil ke xinak najltok tuj tnam xi cyniman tyol Hamor ex tyol tcyꞌajal aju Siquem tbi, ex e baj sircunsidarin cycyakil. 25 Tuj toxin kꞌij, tej cynaꞌnte nimxix taꞌw sircunsisyón, e pon cabe tcyꞌajal Jacob tuj tnam, akeju t-xiban Dina, ate Simeón ex Leví; kꞌiꞌntok cyspad, ex cub cybyoꞌn cycyakil xinak. Mintiꞌtok ximan cyuꞌn ka cyjaꞌtok cypon ke t-xiban Dina kꞌojlel cyiꞌj. 26 Tuꞌn spad cub byoꞌn Hamor cyuꞌn, tucꞌix Siquem aju tcyꞌajal. Jurat naj etz cyiꞌn Dina tuj tja Siquem ex cub be cyuꞌn. 27 E ultzun txkantl tcyꞌajal Jacob tuj tnam, e icꞌ bet cyxol ke xinak otok che cub byoꞌn, ex xi cyiꞌn tcyakilju attok tuj tnam, tuꞌnju otok binchanjtz il tiꞌj cyanb. 28 Xi cyiꞌn ke ẍneꞌl, ke wacẍ, ke bur ex tcyakilju attok tuj tnam ex tuj cojbil, 29 tucꞌix tcyakil cykꞌinumabl, ex xi cyiꞌn cycyakil ke cꞌwaꞌl ex ke xuꞌj, ex xi cyelkꞌaꞌn tcyakilju attok tuj cyja xjal. 30 Xitzun tmaꞌn Jacob te Simeón ex te Leví cyjaꞌ:

—Ma tzaj cyiꞌne jun xobajil wibaje, ex chin elel icꞌune cyuꞌn ke xjal ateꞌ tuj txꞌotxꞌ lu, ke aj Canaán ex ke aj Ferezey. Cjawil cychmon cyib wiꞌje, che kꞌojlel wiꞌje, ex chin bel byoꞌne cyuꞌn cyucꞌix keju ateꞌ tuj njaye, tuꞌnju nicꞌxi xjal ateꞌ wucꞌile, chi Jacob.

31 Xitzun cytzakꞌweꞌn:

—¿Baꞌnpetzun ma tbincha xjal lu tiꞌj kanbe, ma tzꞌoc tkꞌoꞌn ic tzaꞌn jun xuꞌj jawni twitz cyucꞌil xinak?