Cub tnajsaꞌn Esaú til Jacob
33
Tejtzun tqueꞌyinte Jacob cyjaꞌtok ttzaj Esaú tucꞌix cyaje syent xinak tucꞌil, e baj tpaꞌn ke cꞌwaꞌl t-xol Lea ex Raquel ex cyxol ke cabe majen xuꞌj; 2 e cub tnejsaꞌn Jacob ke cabe majen xuꞌj cyucꞌil ke cyal, lepchix Lea cyucꞌil ke tal, ex mancbil xiꞌ Raquel tucꞌil José. 3 Cubtzun nej Jacob cywitz, ex wuk maj cub ẍmejeꞌ ex pon tacl tibaj twitz twitz txꞌotxꞌ, tejxi tul canun twitz ttzic. 4 Xitzun kelan Esaú tucꞌil, tzaj tchleꞌn, xi pakeꞌ tibaj tkul, ex el ttzꞌuban twitz. E jawtzun okꞌ cycabil. 5 E xitzun tqueꞌyin Esaú ke xuꞌj cyucꞌix ke cyal, ex xi tkanin cyjaꞌ:—Yajtzun ke jlu, ¿alcye ke? Chi Esaú.
—Atzun ke ncꞌwaꞌle o che tzaj tkꞌoꞌn Dios, akine ajbel teya, chi Jacob xi ttzakꞌweꞌn.
6 E ultzun lakꞌeꞌ ke majen xuꞌj cyucꞌix cyal ex e cub mocꞌeꞌ twitz txꞌotxꞌ. 7 Ax icx ul lakꞌeꞌ Lea cyucꞌix ke tal ex e cub mocꞌeꞌ. Te mancbil ul José tucꞌix Raquel; ax icx e cub mocꞌeꞌ. 8 Ax icx xi tkanin Esaú:
—¿Alcye t-ximbetza cyiꞌj junjun byuj alumaj ma che oc ncꞌulbaꞌne? Chi Esaú.
—Waje tuꞌn tcꞌmonteya tuꞌn ncambanteye xtalbil teya, chi Jacob xi ttzakꞌweꞌn.
9 —Miꞌn, witzꞌin. Ax at nim weye. E tten te teya aju teya, chi Esaú.
10 Xi tmaꞌntl Jacob cyjaꞌ:
—Miꞌn, najsama. Ka ax toc ma ncambaye t-xtalbila, cꞌmomxa aju oyaj lu tuꞌnju ma wile twitza; a jlu mer ic tzaꞌn acu Dios ma wile, ex baꞌn ma chin cꞌmete tuꞌna. 11 In chin cubsane twitza cꞌmomxa aju oyaj ma tzaj wiꞌne teya, porque o chin tzaj xtaline tuꞌn Dios ex mintiꞌ jun atx taj weye.
Tuꞌnju cucx t-xi tmaꞌn Jacob icju, cub tuj twitz Esaú tuꞌn t-xi tcꞌmoꞌn aju oyaj, 12 ex xi tmaꞌn Esaú cyjaꞌ:
—Ko icꞌ tzalu. Jacu chin cub neje twitza.
13 Xi tmaꞌn Jacob cyjaꞌ:
—Tat, baꞌn tuꞌna, neꞌx ke tal cꞌwaꞌl, ax icx ucꞌin ke ẍneꞌl wuꞌne ex ke wacẍ cꞌitzke cub cyal. Katzun ma che sict, tujlo junx kꞌij jacu che cyim cycyakil ẍneꞌl. 14 Mas baꞌn tuꞌn t-xi neja nwitze, akine tmajena; atzun weye, cheba chin xeꞌle, ic tzaꞌnx che bet ke alumaj akeju nejni nwitze, ex ic tzaꞌnx che bet ke tal ncꞌwaꞌle, ocxi npon canune tucꞌila tuj Seir, chi Jacob.
15 Xi tmaꞌn Esaú cyjaꞌ:
—Baꞌn. Jacu che cyaj nkꞌoꞌne junjun xinak tucꞌila, akeju ucꞌin wuꞌne, chi Esaú.
Xi tmaꞌn Jacob:
—¿Ti cyajben ke jlu? Oꞌcx wajbile tuꞌn ncambanteye t-xtalbila, chi Jacob.
16 Tujxtzun kꞌij lu aj meltzꞌaj Esaú tuꞌn tpon tuj Seir. 17 Atzunte Jacob cyjaꞌ ttzaj tuꞌn tul tuj Sucot. Atzun jaw tbinchaꞌn tja ex ke cyja talun. Tuꞌntzun jlu Sucot tbi lugar lu oc tkꞌoꞌn.
18 Baꞌn ul Jacob tuj tnam Siquem tuj txꞌotxꞌ Canaán, tej tajtz meltzꞌaj tuj Padan-aram, ex atzun cub ten twitz tnam. 19 Tuꞌn jun syent sak pwak o tlokꞌ jun piẍ txꞌotxꞌ cye tcꞌwaꞌl Hamor aju tman Siquem. Atzun cub tkꞌoꞌn Jacob tja, xbalun ja. 20 Ax icx jaw tbinchaꞌn jun altar, ex El-Elohe-Israel tbi oc tkꞌoꞌn.