3 E tzaj t-samaꞌn Jacob sanjel tucꞌil Esaú aju ttzic, tuꞌn cyul tuj txꞌotxꞌ Seir, ex Edom juntl tbi toc, 4 ex tzaj tmaꞌn cye cyjaꞌ: Atzun jlu cxel cymaꞌne te tat Esaú aju ntzique: Atzun jlu in tmaꞌn Jacob aju ajbel teya: Tej wetze tuj njaye, atzun o chin tene tja Labán, 5 ex ateꞌ nwacẍe, nburre, nẍneꞌle, nmajene xinak ex nmajene xuꞌj. Atzun tkanil in xi nsamaꞌne teya, tat. In chin ayone tuꞌn ncambanteye t-xtalbila, che chicuye, chi Jacob cye sanjel.

6 E ajtztzun meltzꞌaj ke sanjel ex xi cymaꞌn te Jacob cyjaꞌ: Ma koꞌx aje tucꞌil Esaú aju ttzica. Twitzelcu tzul canul tiꞌja, ex ucꞌin cyaje syent xjal tuꞌn, che chi.

7 Tzajtzun nimxix t-xobil Jacob ex nim t-ximbetz. E cub tpaꞌn ke xjal ateꞌtok tucꞌil, cyucꞌix ke t-ẍneꞌl, ke twacẍ, ex ke tchej camey; te cabe cꞌloj e jeꞌl tuꞌn. 8 Porque cub t-ximan cyjaꞌ: Ka ma tzaj Esaú kꞌojlel tiꞌj jun cꞌloj, atzunte juntl cꞌloj jacu tzokpaj. 9 Octzun ten naꞌl Dios ex tma: Nman, aju Tdios nchmane Abraham ex Tdios nmane Isaac, aya o tzaj kꞌmante weye cyjaꞌ: Taj meltzꞌaja tuj ttxꞌotxꞌa ex cyucꞌil ke xjal at t-xilena cyucꞌil, ex baꞌn cꞌelel tbeya wuꞌne, chiya. 10 Mintiꞌ woclene tiꞌj t-xtalbila ex tkꞌakꞌbil tcꞌuꞌja tzaj tkꞌoꞌna weye. Tej wicꞌe tuj nima Jordán mintiꞌtok kꞌiꞌn wuꞌne, nok oꞌcx ncyꞌakoꞌche. Atzun jaꞌlo ma bant cabe cꞌloj nbete. 11 Binchama xtalbil, chin tcloma tuj tkꞌab ntzique Esaú, porque in chin xobe twitz. Mya yajcu tzul kꞌojlel wiꞌje, ex jacu che cub tbyoꞌn ke xuꞌj ex ke cꞌwaꞌl. 12 O tzaj tmaꞌna weye cyjaꞌ: Chin onile tiꞌja tuꞌn tankꞌina baꞌn, ic che oquel tiyjila ic tzaꞌn ttxa tzꞌaꞌn ttzi mar, ex mlay bant cyajlanjtz tuꞌnju nim cyajlal, chiya, chi Jacob.

13 Axtzun o tan Jacob tuj akꞌbil lu, ex cyxol tcyakilju attok te, e jaw tjyoꞌn oyaj tuꞌn cyxi tkꞌoꞌn te Esaú aju ttzic. 14 Jaw tjyoꞌn cab syent ttxu chip ex winkin tman chip, cab syent ttxu ẍneꞌl ex winkin tman ẍneꞌl, 15 ax icx 30 ttxu chej camey cyucꞌix ke cyal cꞌitzꞌketok che cub, 40 vac, laj tal tor, winkin ttxu bur ex laj tman bur. 16 Ex e jeꞌx tkꞌoꞌn tuj cycwent ke tmajen teyle te junjun cꞌloj alumaj, ex xi tmaꞌn cye cyjaꞌ: Che nejcuye nwitze, ex cykꞌoncje pabl tib cyxol teyle te junjun cꞌloj.

17 Xi tmaꞌn teju xi t-samaꞌn nej: Ka ma tzꞌoc tcꞌulban tiba tucꞌil Esaú aju ntzique, ex ka ma tzaj tkanin teya cyjaꞌ: ¿Alcye tpatrona? ¿Jatum ma txiꞌya? ¿Al-e ke alumaj kꞌiꞌn tuꞌna? ka chi, 18 kꞌmanxtzuna te cyjaꞌ: Tat Esaú, a jlu jun oyaj ma tzaj samaꞌn teya tuꞌn Jacob aju tmajena, ex lu te lepchix ttzaj kiꞌje, chicuya.

19 Ax icx te tcabin, te toxin ex cye cycyakil keju lepchtok ke cyiꞌj ke alumaj, xi tmaꞌn cye cyjaꞌ: Icxtzun tten cxel cymaꞌne te Esaú oc toc cycꞌulban cyibe tucꞌil. 20 Ax icx cxel cymaꞌne te cyjaꞌ: Ax icx te Jacob aju tmajena, lu te lepchix ttzaj kiꞌje, che chicuye, chi Jacob.

Tuꞌnju tma Jacob cyjaꞌ: Cchewixtel tkꞌoj Esaú wiꞌje tuꞌnju oyaj in xi nsamaꞌne, ex lepchix nxiꞌye tuꞌn twile twitz. Kapelo jacu chin cꞌmete tuꞌn icju, chi Jacob. 21 Xitzun t-samaꞌn oyaj nej. Atzunte ax cyaj tan tuj campament tuj akꞌbil lu.

22 Tujx akꞌbil lu jaw weꞌ Jacob, e tzaj tiꞌn ke cabe t-xuꞌjil, ke cabe tmajen xuꞌj ex ke junlaj tcyꞌajal, ex e jicꞌx tiꞌn tuj jun xajbil aꞌ tuj nima Jaboc, 23 junx tucꞌil tcyakilju attok te. 24 Cyjaꞌtzun cyaj ten Jacob tjunal te, ex o maꞌlin jun xinak tucꞌil tejxi kskix. 25 Tejtzun tnaꞌnte xinak, lu mintiꞌx tuꞌn t-xcyeꞌ tiꞌj Jacob, octzun tbajuꞌn twi t-xix, ex biꞌx etz kꞌulpaj t-xix Jacob tuꞌn, acux cucxtok tmaꞌlin tucꞌil. 26 Xitzun tmaꞌn xinak te Jacob cyjaꞌ:

—Chin ttzokpintza, tuꞌnju chꞌix kskix, chi xinak.

—Ka miꞌn ma chin cub tcyꞌiwlaꞌna, mlay txi ntzokpiꞌne, chi Jacob te.

27 —¿Titzun tbiya? Chi xinak.

—Jacob nbiye, chi xi tmaꞌn.

28 Xitzun tmaꞌn xinak te cyjaꞌ:

—Miꞌn tzꞌoc kꞌmaꞌntl tbiya Jacob, Israel tbiya cꞌoquel, tuꞌnju ma maꞌlina tucꞌil Dios ex cyucꞌil xjal ex ma cub cyiꞌj tuꞌna, chi xinak.

29 —Ax icx teya, kꞌmantza weye ti tbiya, chi Jacob.

Xitzun ttzakꞌweꞌn xinak:

—¿Tikuꞌn in tzaj tkanina nbiye? Chi xinak.

Axtzun cub cyꞌiwlaꞌn Jacob tuꞌn. 30 Octzun tkꞌoꞌn Jacob tbi lugar lu Peniel, tuꞌnju tma: Ma wile acu Dios ex itzꞌx kine.

31 Matoktzun in bet tetz Jacob tuj Peniel tej tkoptzꞌaj kꞌij, otok tzꞌetz kꞌulpaj t-xix ex in coxintok tel. 32 Tuꞌntzun jlu, atxixtzun mintiꞌ in xi cychyoꞌn ke tiyjil Israel aju tbotxꞌil twi xixbaj, tuꞌn tlaj twiꞌ t-xix Jacob o cyꞌixbisanjtz.