4 Xi txocbaj Raquel ex Lea tuꞌn Jacob, tuꞌn cyul tuj cojbil jatum taꞌtok Jacob cyucꞌil ke t-ẍneꞌl, 5 ex xi tmaꞌn cye cyjaꞌ: Ma tzꞌel nnicꞌe tiꞌj, mintiꞌxix in tzalaj cymane wiꞌje ic tzaꞌn nej; atzunte Dios, aju Tdios nmane, cucx at wucꞌile. 6 Baꞌn cyuꞌne, o chin akꞌnane tucꞌil cymane tuꞌn tcyakil wipune, 7 atzunte cymane, o chin cub t-sbuꞌn, ex laj maj o chꞌexpaj twi ncꞌuꞌje tuꞌn, pero mintiꞌ xi tkꞌoꞌn Dios ambil te tuꞌn tbinchante mya baꞌn wiꞌje. 8 Ka in tzaj tmaꞌntok cyjaꞌ: Cchjetel twi tcꞌuꞌja wuꞌne cyuꞌn ke alumaj pint cyiꞌj ka chi, octzun tcub cyal alumaj, cub cyal pint cyiꞌj; ex ka in tzaj tmaꞌntok cyjaꞌ: Cchjetel twi tcꞌuꞌja wuꞌne cyuꞌn ke alumaj at tbeyil cytzmal, ka chi, octzun tcub cyal, cycyakil cub cyal at tbeyil cytzmal. 9 Cyjaꞌtzun e jeꞌl tiꞌn Dios cycyakil ke talun cymane, ex e tzaj tkꞌoꞌn weye.

10 At jun kꞌij, tej tpon cysakch alumaj, oc jun nwitzicꞌe, ex o wile ke ttxu chip in che sakchantok cyuꞌn tman chip at tbeyil cytzmal ex ke pint cyiꞌj. 11 Tzaj tmaꞌn t-anjel Dios weye tuj witzicꞌ:

—Jacob, chi anjel.

—Lu kine lu, nchiye xi ntzakꞌweꞌne.

12 Tzaj tmaꞌn weye:

—Queꞌyinxa ex oc tilaꞌya, cycyakil ke tman chip at tbeyil cytzmal ex pint cyiꞌj in che sakchan ke ttxu chip cyuꞌn, porque ma tzꞌoc nkꞌoꞌne cwent tiꞌj tcyakilju o tbincha Labán tiꞌja. 13 Akine aju Dios cub tyecꞌun tib twitza tuj Betel, jatum cub tkoꞌna aseyt tibaj abj ex tzaj ttziyana jun tyola weye. Jaꞌlo, weꞌctza, texa tzalu ex taja tuj txꞌotxꞌ jatum itzꞌja, chi Dios.

14 Xi ttzakꞌweꞌn Raquel ex Lea cyjaꞌ: ¿Atpetzun koclene ex ka ketzbile tuj tja kmane? 15 ¿Myapetzun ic tzaꞌn stranjer xjal koꞌye tuꞌn? O ko etz cꞌayine tuꞌn, ax icx o txi tcꞌaꞌchin tcꞌuꞌj tuꞌn chojbil keye cyaj tkꞌoꞌna tej tmojeꞌya kucꞌile. 16 Ax toc, tcyakil kꞌinumabl o tzꞌel tiꞌn Dios te kmane, keye jlu ex cye kale. Tuꞌntzun jlu binchama tcyakilju ma tzaj tmaꞌn Dios teya, che chi.

17 E jax tkꞌoꞌn Jacob ke tcꞌwaꞌl ex ke t-xuꞌjil cyibaj chej camey, 18 tzaj tiꞌn tcyakilju attok te, cub be tuꞌn cyucꞌix cycyakil ke alumaj, akeju otok che tcamba tuꞌn takꞌunben tuj Padan-aram, ex ajtz tuꞌn tul juntl maj tuj Canaán jatum najltok Isaac aju tman. 19 Atzunte Labán otok txiꞌ matzol ttzmal t-ẍneꞌl. Icꞌ telkꞌaꞌn Raquel ke sant ateꞌtok tuj tja tman. 20 Cub sbuꞌn Labán aju aj Aramey tuꞌn Jacob, tuꞌnju mintiꞌ xi tmaꞌn ka tuꞌn tetz. 21 Etz ok Jacob tucꞌix tcyakilju attok te. Jurat naj icꞌtz jlajtzi nima Éufrates ex tzaj bet tuꞌn tul cywiꞌ ke witz tuj Galaad.

22 Tujxi toxin kꞌij, tbi Labán otok tzꞌetz ok Jacob. 23 Ke xjal attok cyxilen tucꞌil Labán e tzaj tiꞌn te tucꞌil tuꞌn tul canun tiꞌj Jacob, ex tujxi twukin kꞌij tbe ul cnet tuꞌn cywiꞌ ke witz tuj Galaad. 24 Cub tyecꞌun tib Dios twitz Labán aju aj Aramey tuj witzicꞌ te konicꞌan, ex tzaj tmaꞌn te cyjaꞌ: Ten tcwenta tiꞌja. Miꞌn txi yolina te Jacob tuj txꞌuꞌjbil, chi Dios. 25 Atzun ul cnet Jacob tuꞌn Labán cywiꞌ ke witz tuj Galaad, jatum otok cub tkꞌoꞌn Jacob tja, xbalun ja. Ax cub tkꞌoꞌn te Labán tja, cyucꞌix ke xjal at t-xilen cyucꞌil. 26 Xitzun tmaꞌn Labán te Jacob cyjaꞌ:

—¿Ti ma tbinchaya? ¿Tikuꞌn ma chin cub t-sbuꞌna? Ma che tzaj tiꞌna ke nmeꞌjele mer ic tzaꞌn ke xjal in che tzyet tuj kꞌoj ex in cheꞌx kꞌiꞌn pres. 27 ¿Tikuꞌn ma chin cub t-sbuꞌna, ex ma tzꞌetza tuj ewaj? ¿Tikuꞌn miꞌn ma tzaj tmaꞌna weye tuꞌn tbaj nkꞌolbeꞌne tucꞌil tzalajbil, tucꞌil bitz ex tucꞌil tkꞌajkꞌajel tanpor ex arpa? 28 Misicyer ma tzaj tkꞌoꞌna ambil tuꞌn tel ntzꞌubane cywitz ke nmeꞌjele ex ke tal nchmane. Ma tbinchaya jlu mer ic tzaꞌn jun xjal mintiꞌ tnabl. 29 At wipumale tuꞌn nbinchanteye jun mya baꞌn cyiꞌje; atzunte Tdios tmana saj tmaꞌn weye konicꞌan mayꞌ cyjaꞌ: Ten tcwenta tiꞌja. Miꞌn txi yolina te Jacob tuj txꞌuꞌjbil, chi Dios. 30 Ka tajbilxixa tuꞌn tajtza tja tmana ex tuꞌntzun jlu sajtza, pero ¿tikuꞌn setz telkꞌaꞌna ke nsante?

31 Xitzun ttzakꞌweꞌn Jacob te Labán cyjaꞌ:

—Tuꞌnju tzaj nxobile twitza. Cub nximane, yaka nneꞌlcu t-xcꞌayina ke tmeꞌjela nwitze, nchiye. 32 Katzun at jun kxole tzalu ma che el cnet ke t-santa tiꞌj, baꞌn tuꞌn tcyim. Ke xjal at kxilen cyucꞌil jacu che oc testiw. Kꞌmantza weye ka at jun tiꞌxti teya wucꞌile, ex kꞌinxa, chi Jacob.

Mintiꞌtok baꞌn tuꞌn Jacob ka atok Raquel otok tzꞌetz elkꞌante ke sant.

33 Ocxtzun Labán tuj tja Jacob, aju xbalun ja, ex tuj tja Lea, ax icx ocx tuj cyja ke cabe majen xuꞌj, pero mintiꞌ e cnet ke sant tuꞌn. Tej tetz tuj tja Lea, ocx tuj tja Raquel. 34 Atzunte Raquel otok che tzaj tiꞌn ke sant ex otok che ocx tkꞌoꞌn tjakꞌ tarquiy jun chej camey ex cub keꞌ tibaj. Baj tjyoꞌn Labán tuj tcyakil ja, pero mintiꞌ e cnet tuꞌn. 35 Xitzun tmaꞌn Raquel te tman: Tat, miꞌn tzaj tkꞌoja wiꞌje. Mlay bant tuꞌn njaw weꞌye twitza tuꞌnju yab kine tuꞌn ẍwoꞌj, chi Raquel. E bajtzun tjyoꞌn Labán ke sant ex mintiꞌx e cnet tuꞌn. 36 Tzajtzun tkꞌoj Jacob ex xi yolin cyuwxix te Labán, ex xi tmaꞌn te cyjaꞌ:

—¿Titzun ma nbinchaye? ¿Alcye il ma bant wuꞌne tuꞌnju ma tzaj lpeꞌya wiꞌje? 37 Ma baj tjyoꞌna t-xol tcyakilju at weye. ¿Alcyetzun tiꞌxti teya ma cnet tuꞌna? Kꞌon cuba tzalu cywitz ke t-xjalila ex cywitz ke weye, tuꞌntzun cymante alcye at til. 38 Tuj winkin abkꞌi o chin akꞌnane tucꞌila, mi jun t-ẍneꞌla nok o tzꞌel tal, mi ke ttxuꞌ tchipa, ex mi jun tman t-ẍneꞌla o txi nchyoꞌne; 39 mintiꞌ ul wiꞌne tucꞌila jun taluna otok cub byoꞌn tuꞌn txcup, nok oꞌcx o txi nchjoꞌne aju otok naj; ka kꞌijl ex ka konicꞌan oc t-xi elkꞌaꞌn jun alumaj, nok oꞌcx oc tel tkanina twiꞌ wiꞌje. 40 Kꞌijl, nok chꞌixmi o chin cyime tuꞌn taꞌw cyak; atzun konicꞌan, nok chꞌixmi o chin cyime tuꞌn taꞌw cheꞌw, ex mintiꞌ ocx watl tuj nwitze. 41 Winkin abkꞌi o chin tene tjaya. Cyajlaj abkꞌi o chin akꞌnane tucꞌila cyiꞌj cabe tmeꞌjela, kak abkꞌi o chin akꞌnane cyiꞌj ke taluna, ex o baj tchꞌexpuꞌna laj maj twi ncꞌuꞌje. 42 Nokwit mi aꞌltok Dios wucꞌile, aju Tdios nchmane Abraham ex aju Dios o cꞌulun nmane Isaac twitz, ax toc owtlo chin etz tlajoꞌna mintiꞌ jun tiꞌxti kꞌiꞌn wuꞌne. Pero ma til Dios aju nbise ex wakꞌunbene tucꞌila. Tuꞌntzun jlu, soc mayoꞌna tuꞌn konicꞌan mayꞌ.

43 Xi ttzakꞌweꞌn Labán te Jacob cyjaꞌ:

—Ke xuꞌj lu nmeꞌjele ke; ke cꞌwaꞌl lu tal nchmane ke; ex ke ẍneꞌl ax weye ke. Tcyakilju nnoꞌc tqueꞌyina lu weye. ¿Titzun baꞌn tbant wuꞌne cyiꞌj ke nmeꞌjele ex cyiꞌj ke cyal o che ul itzꞌj? 44 Jaꞌlo e tcyaj bant tiꞌj jun yol kxol, tuꞌntzun tajben te jun testiw kxol kcabil, chi Labán.

45 Jawtzun tiꞌn Jacob jun abj, cub twalbaꞌn te jun techal, 46 ex xi tmaꞌn cye xjal attok cyxilen tucꞌil: Cychmontze abj, chi Jacob. Cycyakiltzun e oc ten chmol abj tuꞌn tbant jun byuj cyuꞌn. Atzun e cub ten waꞌl ttxlaj byuj abj otok baj cybuyin. 47 Octzun tkꞌoꞌn Labán tbi lugar lu tuj tex tyol, Jegar Sahaduta; atzunte Jacob oc tkꞌoꞌn juntl tbi tuj tex tyol, Galaad. 48 Tmatzun Labán: Aju byuj abj lu, atzunju cꞌoquel te testiw kxol kcabil, chi Labán. Tuꞌntzun jlu, Galaad tbi oc kꞌoꞌn, 49 ex Mispa juntl tbi oc, tuꞌnju o tma Labán cyjaꞌ: Awt Kman cꞌoquel ten xkꞌukil ke kcabil oc tbaj kpaꞌn kib jun tiꞌj juntl, chi Labán. 50 Ka ma che cub tyajlaꞌna ke nmeꞌjele ex ka ma mojeꞌya cyucꞌil txkantl xuꞌj, masque mintiꞌ jun testiw kxol, pero axte Dios testiw kiꞌj.

51 Ax icx xi tmaꞌntl Labán te Jacob: Lu byuj abj lu, ex lu techal lu, akeju ma che cub nkꞌoꞌne kxol kcabil. 52 Aju byuj abj ex aju techal lu che ajbel tuꞌn miꞌn wocxe tujxi tmojona binchalte jun mya baꞌn tiꞌja, ax icx teya, tuꞌn miꞌn toctza tujxi nmojone binchalte jun mya baꞌn wiꞌje. 53 Aju Tdios tchmana Abraham, ex aju Tdios nchmane Nacor, awttzun binchante kiꞌj, chi Labán.

Xitzun tmaꞌn Jacob jun yol axix toc twitz Dios, aju o cꞌulun Isaac twitz. 54 Cubtzun tbyoꞌn Jacob alumaj te jun oyaj te Dios twi witz lu, ex e tzaj ttxcoꞌn ke xjal attok cyxilen tucꞌil tuꞌn cywaꞌn junx. Cycyakiltzun e waꞌn, ex ax e cub tan twi witz tuj konicꞌan lu.

55 Te prim te juntl kꞌij jaw weꞌ Labán ex el ttzꞌuban cywitz ke tal tchman, ax icx cye tmeꞌjel; ex te tibajxi e cub tcyꞌiwlaꞌn ex aj meltzꞌaj tuꞌn tpon tuj ttanmi.