Ke tiyjil Abraham tiꞌj tcab t-xuꞌjil, Cetura tbi
25
Mojeꞌ Abraham tucꞌil juntl t-xuꞌjil, Cetura tbi. 2 Ke tcyꞌajal Abraham e ul itzꞌj tiꞌj xuꞌj lu, atzun ke jlu: Zimram, Jocsán, Medán, Madián, Isbac ex Súa. 3 Ate Jocsán tman Seba ex Dedán. Ke tiyjil Dedán, atzun ke jlu: ke aj Asurey, ke aj Letusey ex ke aj Leumey. 4 Ke tcyꞌajal Madián, atzun ke jlu: Efa, Efer, Hanoc, Abida ex Elda. Cycyakil ke jlu tiyjil Cetura ke. 5 Ate Isaac oc te tajwil tcyakil tkꞌinumabl Abraham. 6 Atzun cye tcyꞌajal Abraham e ul itzꞌj cyiꞌj cabetl xuꞌj, xi tkꞌoꞌn oyaj cye, ex tej itzꞌxtok biꞌx e jeꞌl tpaꞌn tiꞌj Isaac aju tcyꞌajal, ex e jeꞌx t-samaꞌn tuꞌn cyxiꞌ najal tuj tjawitz kꞌij.Cyim Abraham ex ocx makuꞌn
7 O ten Abraham twitz txꞌotxꞌ 175 abkꞌi tuꞌn tcyakil. 8 Otok tijin Abraham wen tej tcyim ex otok ten nim abkꞌi twitz txꞌotxꞌ. Cyjaꞌtzun tten o pon cyucꞌil ke t-xeꞌchel. 9 Ocxtzun makuꞌn tuꞌn Isaac ex Ismael akeju tcyꞌajal tuj toyꞌ pic tuj Macpela, tocx tiꞌjxi Mamre tuj tjawitz kꞌij, tuj ttxꞌotxꞌ Efrón aju tcyꞌajal Zohar aju aj Hetey. 10 Atzun txꞌotxꞌ lu aju lakꞌet tuꞌn Abraham cye aj Hetey. Ax ocx makut Abraham junx tucꞌil Sara aju ktzan t-xuꞌjil. 11 Tcyimlenxi Abraham, cub cyꞌiwlaꞌn Isaac tuꞌn Dios. Atzun cyaj ten Isaac najal ttzi xoch toc tbi: Xoch te Dios itzꞌ ex in chin til.
Ke tiyjil Ismael
12 Atzun txꞌolbabl lu cyiꞌj tiyjil Ismael aju tcyꞌajal Abraham ex tal Agar, aju tmajen Sara ex aj Ejipt. 13 Ke tcyꞌajal Ismael, atzun ke jlu: Nebaiot aju tnejel tcyꞌajal, Cedar, Adbeel, Mibsam, 14 Misma, Duma, Massa, 15 Hadar, Tema, Jetur, Nafis ex Cedema. 16 Atzun cybi ke cablaj tcyꞌajal Ismael, teyle te junjun oc te nejenel cyxol ke t-xjalil ex teyle te junjun oc tbi tiꞌj ttxꞌotxꞌ ex tiꞌj tnajbil.
17 Otok japun Ismael twiꞌ 137 abkꞌi tej tcyim ex pon cyucꞌil ktzan t-xeꞌchel. 18 Ke tiyjil Ismael e ul najal tuj txꞌotxꞌ t-xol Havila ex Shur, a tcub jlu twitz Ejipt tumlal cyjaꞌ ktzaj tuj Asiria. Atzun e najan cywitz cyerman.
Tej tul itzꞌj Jacob ex Esaú
19 Atzun txꞌolbabl lu cyiꞌj tiyjil Isaac aju tcyꞌajal Abraham. 20 Otok japun Isaac twiꞌ 40 abkꞌi tej tmojeꞌ tucꞌil Rebeca aju tmeꞌjel Betuel ex tanb Labán, ake jlu aj Aramey, najltok ke tuj Padan-aram. 21 O cubsan Isaac twitz Kman tiꞌj t-xuꞌjil tuꞌnju mibantok alin. O tbi Kman aju tnaꞌj Dios, ex oc ten tal Rebeca. 22 Oc kꞌoj cyuꞌn tal cꞌwaꞌl yoꞌẍ tuj talbil cytxuꞌ, ex tma Rebeca: Ka cucx cxeꞌl jlu icju, ¿ti til tuꞌn wankꞌintle? Chi Rebeca. Xiꞌ bilte te Kman. 23 Tzajtzun ttzakꞌweꞌn Kman te cyjaꞌ:
Cabe nasyon ateꞌ tuj talbila; cabe tnam cꞌelel cypaꞌn cyib jun tiꞌj juntl ax tuj talbila naꞌnx cyul itzꞌj. Jun tnam cꞌoquel mas tipun twitz juntl, ex aju tzicbaj cꞌoquel te tmajen tzꞌinbaj.
24 Pon kꞌij tuꞌn tul itzꞌj tal Rebeca, ex yoꞌẍ ke tal e ul itzꞌj. 25 Aju tnejel ul itzꞌj, cyaknin queꞌyin, tcyakil tiꞌj nojnitok tuꞌn xyaꞌn, ex Esaú tbi oc kꞌoꞌn. 26 Ul naj itzꞌj titzꞌin, tzyuꞌn t-xe t-suꞌẍ Esaú tuꞌn tkꞌab, ex Jacob tbi oc kꞌoꞌn. Otok japun Isaac twiꞌ 60 abkꞌi tej cyul itzꞌj tal Rebeca.
Xi tcꞌayin Esaú aju toclen te tnejel cꞌwaꞌlbaj
27 E chꞌiy ke cꞌwaꞌl. Ate Esaú oc te jun mejor cambal ex attok tgan tuꞌn tten tuj cojbil; atzunte Jacob jun xinak mibantok labt ex attok tgan tuꞌn tcyaj ten ja. 28 O cꞌujlanjtz Esaú tuꞌn Isaac tuꞌnju in chyoꞌntok Isaac tiꞌj chibj in cub tubantok Esaú tuj cojbil; atzunte Rebeca o cꞌujlanjtz Jacob tuꞌn.
29 At jun kꞌij in binchantok Jacob chibj tej tul Esaú tuj cojbil, otok sict wen. 30 Xi tmaꞌn Esaú te Jacob cyjaꞌ:
—Chin cubsale twitza, kꞌontza nchiꞌye tiꞌj ju in ttzkꞌajsaꞌna, aju cyaknin queꞌyin, tuꞌnju chꞌix ncyime tuꞌn weꞌyaj, chi Esaú.
Tuꞌntzun jlu, Edom tbi Esaú oc.
31 Xi ttzakꞌweꞌn Jacob:
—Cꞌayintza weye jaꞌlo aju toclena te tnejel cꞌwaꞌlbaj.
32 Xitzun tmaꞌn Esaú te cyjaꞌ:
—Chꞌix ncyime ex ¿ti til weye aju woclene te tnejel cꞌwaꞌlbaj? Chi Esaú.
33 Xi tmaꞌn Jacob te:
—Kꞌmantza jaꞌlo jun tyola axix toc twitz Dios.