—Kꞌoꞌnctz tkꞌaba tjakꞌ ncuxe, 3 ex kꞌmantza jun yol axix toc twitz Kman aju Dios at tuj cyaꞌj ex at twitz txꞌotxꞌ, tuꞌn miꞌn tkꞌonteya ambil te Isaac aju ncyꞌajale tuꞌn tmojeꞌ tucꞌil jun xuꞌj tzalu tuj txꞌotxꞌ Canaán jatum najl kine, 4 nok oꞌcx cxeꞌla tuj txꞌotxꞌ jatum tzajni kine ex cyxol ke xjal at nxilene cyucꞌil, ex ctzajeltzun tiꞌna jun xuꞌj te t-xuꞌjil Isaac aju ncyꞌajale, chi Abraham.

5 Xitzun ttzakꞌweꞌn majen cyjaꞌ:

—¿Yajtzun ka tcꞌiꞌ kꞌapoj tuꞌn ttzaj wucꞌile? ¿Cxeꞌlpetzun wiꞌne tcyꞌajala tuj txꞌotxꞌ jatum etza? Chi majen.

6 Xitzun tmaꞌn Abraham te cyjaꞌ:

—Miꞌn. Miꞌn txi tiꞌna ncyꞌajale ma chixin. 7 Ate Kman, aju Dios at tuj cyaꞌj, aju etz kꞌinte weye tuj tja nmane ex tuj cytxꞌotxꞌ ke xjal at nxilene cyucꞌil, o tzaj ttziyan weye, chi cyjaꞌ: Ctzajel nkꞌoꞌne txꞌotxꞌ lu cye tiyjila; ex tzul t-samaꞌn t-anjel tuꞌn t-xiꞌ nej twitza tuꞌn ttzaj tiꞌna jun t-xuꞌjil ncyꞌajale ma chixin. 8 Katzun tcꞌiꞌ xuꞌj tuꞌn ttzaj tucꞌila, myatzun aya at til, tuꞌnju otok japun tuꞌna aju otok txi ttziyana, pero miꞌn txi tiꞌna ncyaꞌjale ma chixin, chi Abraham.

9 Ocxtzun tkꞌoꞌn majen tkꞌab tjakꞌ tcux Abraham aju tpatrón, ex xi ttziyan tuꞌn tjapun tuꞌn ic tzaꞌn otok tma Abraham. 10 Jawtzun t-scꞌoꞌn tcyakil wik oyaj tbanilxix tiꞌj tcyakilju attok te Abraham, xi tiꞌn laj chej camey, ex pon tuj ttanmi Nacor tuj txꞌotxꞌ Mesopotamia. 11 E ojlantzun ke chej camey tuꞌn majen ttzi jun xoch tiꞌjtzi tnam, te kale tuj or oc in che ul ke xuꞌj kꞌil aꞌ. 12 Octzun ten majen naꞌl Dios ex tma cyjaꞌ: Nman Dios, aya Tdios npatrone Abraham, chin tonintza tuꞌn tel baꞌn tcyakil, ex binchama xtalbil te npatrone Abraham. 13 Atine ttzi xoch lu, ex ke kꞌapoj te tnam lu, atzun in che ul kꞌil aꞌ. 14 Aju kꞌapoj cxel nmaꞌne te cyjaꞌ: Chin cubsale twitza, pichꞌbantza twi t-ẍokꞌa tuꞌn ncꞌane aꞌ, ex ka ma tzaj ttzakꞌweꞌn weye cyjaꞌ: Cꞌana aꞌ, ax icx cxel nkꞌoꞌne cycꞌa tcheja camey, ka chi, awttzun kꞌapoj lu aju scꞌoꞌmaj tuꞌna tuꞌn toc te t-xuꞌjil Isaac aju tmajena. Cyjaꞌtzun cꞌelel nnicꞌe tiꞌj ka otok tbinchaya xtalbil te npatrone, chi majen.

15 Naꞌnxtok tbaj naꞌn Dios tej tul Rebeca, tjax t-ẍokꞌ twi t-semil. Ate Rebeca tmeꞌjel Betuel, atzunte Betuel tal Milca ex tcyꞌajal Nacor. Ate Nacor terman Abraham. 16 Ate kꞌapoj lu tbanilxix queꞌyin ex naꞌnxtok tlonte xinak. Cuꞌx ttzi xoch, cuꞌx tnojsaꞌn t-ẍokꞌ ex cyjaꞌtok taj meltzꞌaj, 17 xiꞌtzun kelan majen tiꞌj, ex xi tmaꞌn te cyjaꞌ:

—Chin cubsale twitza, kꞌontza chꞌin ncꞌaye aꞌ tcuꞌx tuj t-ẍokꞌa, chi majen.

18 Xi ttzakꞌweꞌn kꞌapoj:

—Cꞌana aꞌ tat, chi.

Cubtzun tiꞌn naj kꞌapoj t-ẍokꞌ, o ttzuy tuꞌn tkꞌab, ex xi tkꞌoꞌn tcꞌa majen. 19 Tejtzun tbaj cꞌan majen, xi tmaꞌn kꞌapoj te cyjaꞌ:

—Ax icx cjawitz wiꞌne aꞌ te cycꞌa tcheja camey ocxi cynoj, chi kꞌapoj.

20 Cyajtzun tkoꞌn naj tuj cycꞌabl alumaj aju aꞌ tcuꞌxtok tuj t-ẍokꞌ, xi kelan, ex elaꞌ maj bant tkan kꞌil aꞌ ttzi xoch tuꞌn cycꞌan cycyakil ke chej camey. 21 In queꞌyintok majen tiꞌj kꞌapoj, ex mintiꞌ o kꞌajt, tuꞌn tel tnicꞌ tiꞌj ka otok tzaj onin tuꞌn Kman tuj tbe ex ka miꞌn. 22 Tejtzun cybaj cꞌan ke chej camey, xi tkꞌoꞌn majen jun argoy te txin, kꞌan pwak ttxꞌotxꞌil, chꞌixmi mij mey ons talil. Ax icx xi tkꞌoꞌn cabe tkul kꞌabaj, kꞌan pwak cytxꞌotxꞌil, ex cyaje ons talil junjun. 23 Xitzun tkanin te kꞌapoj cyjaꞌ:

—¿Alcye tmana? Najsama, ¿atpe posad max tja tmana tuꞌn kcyaj tene tuj konicꞌan jaꞌlo? Chi majen.

24 Xi ttzakꞌweꞌn kꞌapoj:

—Tmeꞌjel Betuel kine, aju tal Milca ex tcyꞌajal Nacor. 25 Ax icx at ttxa triw ex nim cywa chej, ex at posad kjaye tuꞌn cycyaj tene tuj konicꞌan jaꞌlo, chi kꞌapoj.

26 Cubtzun mocꞌeꞌ majen, oc ten cꞌulul te Kman, 27 ex tma cyjaꞌ:

—Nimanxwit tbi Kman aju Tdios npatrone Abraham. Cucx tzaj tkꞌoꞌn t-xtalbil te npatrone, ex ma japun tyol aju tzaj ttziyan te; ex ma chin tzaj t-ẍakluꞌn tuꞌn wule cyja t-xjalil npatrone, chi majen.

28 Xitzun kelan Rebeca max tja kꞌmalte te ttxuꞌ tiꞌj tcyakilju otok baj. 29 Attok jun t-xiban Rebeca, Labán tbi. Atzunte jlu xi kelan lolte tmajen Abraham max ttzi xoch, 30 tuꞌnju otok tzꞌoc tqueꞌyin Labán aju oyaj ex ke tkul kꞌabaj tcubtok tkul tkꞌab tanb ex otok tbi aju in tmaꞌntok tanb tiꞌj tcyakilju yol otok tma xinak te; ultzun lakꞌeꞌ Labán tiꞌj tmajen Abraham axtok taꞌ ttzi xoch cyucꞌil ke chej camey. 31 Xitzun tmaꞌn Labán cyjaꞌ:

—Tzaja, aya cyꞌiwlaꞌn tuꞌn Kman. ¿Tikuꞌn cyjel tena tzalu? Ma bant tten ja wuꞌne jatum tuꞌn ttena, ex at posad cye tcheja, chi Labán.

32 Xiꞌtzun majen max tja Labán. El tiꞌn Labán cyikatz ke chej camey, ex xi tkꞌoꞌn cywa tucꞌix ttxa triw; ax icx tzaj tiꞌn aꞌ tuꞌn tel txꞌjet cyiꞌj tkan majen, cyucꞌix cykan ke tucꞌil. 33 Cubtzun kꞌoꞌn wabj cywitz tuꞌn cywaꞌn, atzunte majen xi tmaꞌn cyjaꞌ:

—Mlay chin waꞌne ka naꞌnxtok t-xi nmaꞌne nsanjelale.

Xitzun ttzakꞌweꞌn Labán:

—Yolina, chi Labán.

34 Tmatzun majen cyjaꞌ:

—Majen kine te Abraham. 35 Tcub nim tcyꞌiwbil Kman tibaj npatrone, ex o tzꞌoc kꞌinun tuꞌn: o che tzaj kꞌoꞌn t-ẍneꞌl cyucꞌix twacẍ, sak pwak tucꞌix kꞌan pwak, tmajen xinak ex tmajen xuꞌj, tchej camey ex tbur. 36 Tej otok tijin Sara aju t-xuꞌjil npatrone, ul itzꞌj jun tal tcyꞌajal npatrone, ex tetzun kꞌa lu o txi tkꞌoꞌn tcyakil tkꞌinumabl. 37 Tzaj tmaꞌn npatrone weye tuꞌn t-xi nmaꞌne jun yol axix toc twitz Kman Dios, ex tma cyjaꞌ: Miꞌn takꞌa ambil te ncyꞌajale tuꞌn tmojeꞌ tucꞌil jun xuꞌj aj Canaán jatum najl kine jaꞌlo. 38 Txiꞌya cyxol ke wermaniye ex jyoꞌmetza jun t-xuꞌjil ncyꞌajale cyxol keju at nxilene cyucꞌil, chi weye. 39 Xitzun nmaꞌne te cyjaꞌ: Tat, ¿yajtzun ka tcꞌiꞌ kꞌapoj tuꞌn ttzaj wucꞌile? Nchiye. 40 Tzajtzun ttzakꞌweꞌn npatrone: Ate Kman aju in chin bete twitz, ctzajel t-samaꞌn t-anjel tucꞌila, ex baꞌn cꞌelel tbeya tuꞌn. Ctzajel tiꞌna t-xuꞌjil ncyꞌajale cyxol keju at nxilene cyucꞌil ex cyxol ke wermaniye. 41 Octzun tpona cyxol ke xjal at nxilene cyucꞌil, katzun miꞌn saj cykꞌoꞌn kꞌapoj tuꞌn ttzaj tucꞌila, mintiꞌtzun tila tiꞌj yol ma tzaj ttziyana weye, chi npatrone Abraham. 42 Cyjaꞌtzun tten, ẍin ule ttzi xoch, ẍin oc tene naꞌl Dios ex xi nmaꞌne te cyjaꞌ: Kman, aya Tdios npatrone Abraham, ka oc tbinchaya tuꞌn wele baꞌn tuj nsanjelale lu, 43 oc tul kꞌapoj kꞌil aꞌ ttzi xoch lu jatum atine, ex oc t-xi nmaꞌne te: Chin cubsale twitza, kꞌontza chꞌin ncꞌaye aꞌ tuj t-ẍokꞌa, nchiloye te, 44 ex ka ma tzaj ttzakꞌweꞌn weye cyjaꞌ: Cꞌana aꞌ, ex cjawitz wiꞌne aꞌ te cycꞌa tcheja camey, ka chi, awttzun kꞌapoj lu aju scꞌoꞌmaj tuꞌna, Nman, tuꞌn toc te t-xuꞌjil tcyꞌajal npatrone, nchiye. 45 Naꞌnxtok nbaj naꞌne Dios tuj wanmiye tej cyjaꞌ t-xiꞌ Rebeca tucꞌil t-ẍokꞌ tjax twi t-semil. Tejtzun xpon ttzi xoch, xi nmaꞌne te cyjaꞌ: Chin cubsale twitza, kꞌontza chꞌin ncꞌaye aꞌ. 46 Xcubtzun tiꞌn naj t-ẍokꞌ ex xtma weye cyjaꞌ: Cꞌana aꞌ, ax icx cxel nkꞌoꞌne cycꞌa tcheja camey, chi Rebeca. Ẍin cꞌane aꞌ, ax icx xi tkꞌoꞌn cycꞌa ncheje camey. 47 Xitzun nkanine te cyjaꞌ: ¿Alcye tmana? Atzun te saj ttzakꞌweꞌn: Tmeꞌjel Betuel kine, aju tcyꞌajal Nacor ex tal Milca, chi txin. Soctzun nkꞌoꞌne jun argoy tiꞌj ttxaꞌn, ex cabe tkul kꞌabaj soc nkꞌoꞌne tiꞌj tkꞌab. 48 Ẍin cubtzun mocꞌeꞌye, ẍin oc tene cꞌulul twitz Kman, ex xjaw nnimsaꞌne tbi Kman aju Tdios npatrone Abraham, aju Dios otok ẍaklunte weye tuj jun be tuj tumelxix, tuꞌn t-xi wiꞌne tmeꞌjel terman npatrone, tuꞌntzun toc te t-xuꞌjil tcyꞌajal. 49 Jaꞌlotzun, cymantze weye ka oc cybinchaye xtalbil te npatrone ex axix toc cyuꞌne, ex katzun miꞌn, cymantze weye, jacutzun wile alcye cbantel wuꞌne, chi majen.

50 Xitzun ttzakꞌweꞌn Labán ex Betuel cyjaꞌ:

—Tcyakil jlu tucꞌil Kman ma tzaj, ex mlay bant tuꞌn t-xi kmaꞌne teya oc, ex ka miꞌn. 51 Lu Rebeca lu, kꞌinxa ex txiꞌya. E toc te t-xuꞌjil tcyꞌajal tpatrona ic tzaꞌnx ma tma Kman, che chi.

52 Tejtzun tbinte tmajen Abraham ke yol lu, cub ẍmejeꞌ twitz Kman, pon tacl tibaj twitz max twitz txꞌotxꞌ. 53 Jatztzun tiꞌn majen ke oyaj kꞌan pwak ex sak pwak cytxꞌotxꞌil, cyucꞌix xbalun, ex xi tkꞌoꞌn te Rebeca. Ax icx xi tkꞌoꞌn ke oyaj tbanilxix te t-xiban ex te ttxuꞌ. 54 Tbajlenxitzun tcyakil jlu, oc ten majen waꞌl ex cꞌal cyucꞌix ke tucꞌil, ex axtzun e cyaj ten te konicꞌan. Te prim tuj juntl kꞌij tej cyjaw weꞌ, tma majen cyjaꞌ:

—Cykꞌontze ambil weye tuꞌn waj meltzꞌaje tja npatrone.

55 Xitzun ttzakꞌweꞌn t-xiban Rebeca ex ttxuꞌ cyjaꞌ:

—E tcyaj ten laj kꞌij kꞌapoj kucꞌile, ex ka mastl, ex baꞌntzun tajxi tucꞌila.

56 Atzunte majen xi tmaꞌn:

—Miꞌn chin cub cytzyuntle. Ma tzꞌonin Kman weye ex baꞌn ma tzꞌel nbeye. Tuꞌntzun jlu, cykꞌontze ambil weye tuꞌn waje tja npatrone, chi majen.

57 Xitzun cytzakꞌweꞌn:

—Ktxcontz kꞌapoj, ex kkaninx te chi toc tuꞌn.

58 Txquettzun Rebeca cyuꞌn, ex xi cykanin te cyjaꞌ:

—¿Cxeꞌlpeya tucꞌil xinak lu? Che chi.

Xi ttzakꞌweꞌn Rebeca:

—Oc. Chin xeꞌle, chi.

59 Xitzun cykꞌoꞌn ambil tuꞌn t-xiꞌ Rebeca tucꞌix ju xuꞌj cwentil te, tucꞌix tmajen Abraham ex ke tucꞌil. 60 Cubtzun cyꞌiwlaꞌn Rebeca cyuꞌn ex cyma cyjaꞌ:

61 E jaxtzun Rebeca cyucꞌix ke tmajen xuꞌj cyibaj chej camey, ex e oc lpeꞌ tiꞌj tmajen Abraham. Cyjaꞌtzun tten xiꞌ Rebeca tucꞌil tmajen Abraham, ex cub be cyuꞌn.

62 Otok tzꞌajtz Isaac ttzi xoch Beer-lahai-roi, tuꞌnju atzun najltok tuj txꞌotxꞌ Néguev. 63 Otok tzꞌetz Isaac naꞌl Dios tuj cojbil te kale, jaw tqueꞌyin ex o til cyjaꞌ cytzaj lakꞌeꞌ junjun chej camey. 64 Ax icx te Rebeca xi tqueꞌyin, ex o ilwaj Isaac tuꞌn. Tejtzun tlonte, cuꞌtz tibaj chej camey. 65 Xi tkanin te majen:

—¿Alcye xinak in bet ttzaj ma chixin? Xitzun ttzakꞌweꞌn majen:

—Atzun npatroneju.

Tzajtzun tiꞌn t-xmuj Rebeca, ex oc tmaksiꞌn twitz tuꞌn.

66 Xi ttxꞌolbaꞌn majen te Isaac tcyakilju otok tbincha. 67 Xitzun kꞌiꞌn Rebeca tuꞌn Isaac tuj tja Sara aju ktzan ttxuꞌ, ex mojeꞌ Isaac tucꞌil. Nim o cꞌujlanjtz Rebeca tuꞌn Isaac. Cyjaꞌtzun tten o keꞌ tcꞌuꞌj Isaac tiꞌj tcyimlen ktzan ttxuꞌ.