Cyim Sara ex ocx makuꞌn
23
O ten Sara 127 abkꞌi, 2 ex cyim tuj Quiriat-arba (aju ax juntl tbi Hebrón) tuj cytxꞌotxꞌ aj Canaán. Oc ten Abraham okꞌel tiꞌj Sara tej tcyim, ex cyaj ten tuj bis. 3 Jawtzun weꞌ Abraham jatum tcubsaꞌn t-ximlal Sara, ex xi tmaꞌn cye aj Hetey cyjaꞌ:4 —Stranjer ex betin xjal kine cyxole. Cycꞌayintze jun piẍ txꞌotxꞌ te nmukbile. Atzun cꞌoquex makut ncyimniye, chi Abraham.
5 Xitzun cytzakꞌweꞌn ke aj Hetey te Abraham cyjaꞌ:
6 —Tat, ko tbintza. Aya jun nejenel kxole tuꞌn Dios. Makuꞌncxa tcyimniya tuj kmukbile mas tbanil. Mi aꞌl jun keye jacu cub t-xcꞌayin tmukbil tuꞌn tcuꞌx maket tcyimniya.
7 Jawtzun weꞌ Abraham ex cub mocꞌeꞌ cywitz aj Hetey, akeju najl tuj txꞌotxꞌ lu, 8 ex xi tmaꞌn cyjaꞌ:
—Ka ax toc cyajbile tuꞌn tocx nmakuꞌne ncyimniye tzalu, cybinchame xtalbil tuꞌn cyyoline wiꞌje twitz Efrón aju tcyꞌajal Zohar, 9 tuꞌn ttzaj tcꞌayin aju toyꞌ pic at tuj Macpela, aju tcub ttzi ttxꞌotxꞌ. Jacu txi nchjoꞌne cabal twiꞌ toyꞌ pic, ex cyjaꞌtzun jacu chin oque tajwil mukbil cyxole, chi Abraham.
10 Kꞌukltok Efrón cyxol aj Hetey, ex in che bintok aj Hetey ex cycyakil ke xjal in che ocxtok ttzi tpwertil tnam tej t-xi ttzakꞌweꞌn Efrón te Abraham cyjaꞌ:
11 —Miꞌn, tat. Chin tbintza. Jacu txi nkꞌoꞌne txꞌotxꞌ teya, tucꞌix toyꞌ pic tcub tuj. Jacu txi nkꞌoꞌne teya cywitz cycyakil nxjalile. Makuꞌncx tcyimniya, chi Efrón.
12 Atzunte Abraham cub mocꞌeꞌ juntl maj cywitz xjal, akeju najl tuj txꞌotxꞌ lu, 13 ex xi ttzakꞌweꞌn te Efrón cywitz xjal cyjaꞌ:
—Chin tbintza. Chin cubsale twitza tuꞌn t-xi tcꞌmoꞌna twi txꞌotxꞌ. Jacutzun tzꞌocx nmakuꞌne ncyimniye tuj, chi Abraham.
14 Xi ttzakꞌweꞌn Efrón te Abraham cyjaꞌ:
15 —Chin tbintza tat: cyaje syent tajlal sak pwak twi txꞌotxꞌ. ¿Nimpetzun jlu te ke? Makuꞌncx tcyimniya, chi Efrón.
16 Cubtzun tuj twitz Abraham aju twi txꞌotxꞌ tma Efrón. Cywitz aj Hetey jaw tmaloꞌn Abraham aju cyaje syent tajlal sak pwak ex xi tkꞌoꞌn te Efrón, cabalxix talil. 17 Cyjaꞌtzun o baj tiꞌj ttxꞌotxꞌ Efrón tuj Macpela, aju tocx tiꞌjxi Mamre tuj tjawitz kꞌij, tucꞌix toyꞌ pic ex cycyakil tzeꞌ ateꞌtok tuj txꞌotxꞌ; 18 oc Abraham tajwil txꞌotxꞌ lu cywitz ke aj Hetey ex cycyakil ke xjal in che ocxtok ttzi tpwertil tnam.
19 Tbajlenxi tcyakil jlu, xiꞌtzun Abraham makulte ktzan Sara aju t-xuꞌjil. Ocx tmakuꞌn tuj toyꞌ pic tcub tuj Macpela, tocx tiꞌjxi Mamre (aju ax juntl tbi Hebrón), tuj cytxꞌotxꞌ ke aj Canaán. 20 Octzun Abraham tajwil txꞌotxꞌ tucꞌix toyꞌ pic tcub tuj. Xi cꞌayin jlu cyuꞌn aj Hetey tuꞌn tocx makut cyimni tuj.