—Abraham, chi Dios.

—Lu kine lu, chi Abraham xi ttzakꞌweꞌn.

2 Xitzun tmaꞌn Dios te Abraham cyjaꞌ:

—Kꞌinxa Isaac, aju oꞌcxcu jun tcyꞌajala ex aju cꞌujlaꞌnxix tuꞌna, ex txiꞌya tuj txꞌotxꞌ Moriah. Patun cuba Isaac te jun oyaj weye twiꞌ jun witz cxel nyecꞌune teya, chi Dios.

3 Te juntl kꞌij te prim wen, jaw weꞌ Abraham, oc tkꞌoꞌn tarquiy tbur, cub ttxꞌemin siꞌ tuꞌn tcub patit oyaj, ex xi tiꞌn cabe tmajen tucꞌil, tucꞌix Isaac aju tcyꞌajal. Tzyettzun tbe tuꞌn tpon jatum tzaj tmaꞌn Dios te. 4 Tuj toxin kꞌij tbe, najchak xi tqueꞌyin Abraham aju lugar. 5 Xitzun tmaꞌn Abraham cye cabe tmajen:

—Che tencje tzalu tucꞌil bur. Atzun weye tucꞌix kꞌa ma koꞌxe ma chixin tuꞌn kcꞌulune te Dios, ex ko ul meltzꞌaje cyucꞌile.

6 Jawtzun tiꞌn Abraham siꞌ tuꞌn tcub patit oyaj ex jax tkꞌoꞌn twi t-semil Isaac aju tcyꞌajal, atzun te xi tiꞌn cchil tucꞌix kꞌakꞌ. E jeꞌxtzun cycabil junx. 7 —Tat, chi Isaac xi tmaꞌn te Abraham aju tman.

—¿Ti taja ncyꞌajal? Chi Abraham xi ttzakꞌweꞌn.

Xitzun tmaꞌn Isaac cyjaꞌ:

—Lu siꞌ lu, tucꞌix kꞌakꞌ. ¿Jatumtzun taꞌ tal ẍneꞌl tuꞌn tcub patit te oyaj?

8 Xi ttzakꞌweꞌn Abraham:

—Ncyꞌajal, ate Dios ctzajel kꞌonte tal ẍneꞌl tuꞌn tcub patit, chi Abraham.

E jeꞌx bet chꞌintl cycabil. 9 Tej cycanun tuj lugar otok tma Dios, jaw tbinchaꞌn Abraham jun altar ex cub tbinchaꞌn siꞌ tibaj. Cub tcꞌaloꞌn Abraham aju tcyꞌajal, ex cub tkꞌoꞌn tibaj siꞌ aju tcubtok tibaj altar. 10 Tzaj ttzyuꞌn Abraham cchil tuꞌn tcub tbyoꞌn tcyꞌajal. 11 Tzajtzun kꞌajt t-anjel Kman max twitz cyaꞌj ex tzaj tmaꞌn cyjaꞌ:

—Abraham, Abraham, chi anjel.

—Lu kine lu, chi Abraham, xi ttzakꞌweꞌn.

12 Tzajtzun tmaꞌn anjel te Abraham:

—Miꞌn cub tbyoꞌna tal kꞌa porque ma wile in xoba twitz Dios ex in nimana te, ex mintiꞌ xcub t-xcꞌayina tuꞌn ttzaj tkꞌoꞌna oꞌcxcu jun tcꞌwaꞌla. 13 Jawtzun tqueꞌyin Abraham ex o til jun ẍneꞌl tajtz ttzal tiꞌj, otok che ocx kꞌetj tcach cyxol tkꞌab tzeꞌ, xiꞌ ex tzaj tiꞌn. Cub tpatun te oyaj te t-xel Isaac aju tcyꞌajal. 14 Octzun tkꞌoꞌn Abraham tbi lugar lu: Ate Kman in tzaj kꞌonte. Cyjaꞌtzun cucx tyolinjtz jaꞌlo: Twi witz te Kman ctzajel kꞌoꞌn, che chi xjal.

15 Max twitz cyaꞌj tzaj kꞌajt t-anjel Kman tcabin maj, 16 ex tma: Chi Kman cyjaꞌ: Wuꞌnx wibe ma txi nmaꞌne jun yol axix toc. Tuꞌnju ma tbinchaya icju ex mintiꞌ xcub t-xcꞌayina tuꞌn ttzaj tkꞌoꞌna tcyꞌajala, aju oꞌcxcu jun, 17 ax toc cbel ncyꞌiwlaꞌna nimxix. Cchmetelxix tiyjila wuꞌne ic tzaꞌn cyajlal ke cheꞌw twitz cyaꞌj, ex ic tzaꞌn ttxa tzꞌaꞌn ttzi mar. Cꞌelel cyetzan tiyjila cytanmi ke aj kꞌoj cyiꞌj, 18 ex cycyakil ke nasyon twitz txꞌotxꞌ che bel cyꞌiwlaꞌn tuꞌn tiyjila, tuꞌnju ma txi tnimana nyole, chi Kman, chi anjel.

19 Ajtztzun meltzꞌaj Abraham twi witz tuꞌn tcubil jatum otok che cyaj ten ke tmajen. Tzyet cybe junx cycyakil tuꞌn cyul tuj Beerseba. Axtzun cyaj ten Abraham najal.

20 Tbajlenxi jlu o tcꞌam Abraham aju tkanil lu: O che ul itzꞌj tal Milca, t-xuꞌjil Nacor aju termaniya. 21 Uz tbi aju tnejel tcyꞌajal, Buz tbi juntl, ex Kemuel tbi juntl, aju tman Aram. 22 E ul itzꞌj txkantl tcyꞌajal Nacor, atzun ke jlu: Quesed, Hazo, Pildas, Jidlaf ex Betuel. 23 Ate Betuel tman Rebeca. Atzun ke wajxak tal Milca jlu, akeju tcyꞌajal Nacor aju terman Abraham. 24 Ax icx e ul itzꞌj tcyꞌajal Nacor tiꞌj tcabin t-xuꞌjil, aju Reúma tbi, atzun ke jlu: Teba, Gaham, Tahas ex Maaca.