Tej tul itzꞌj Isaac
21
Tzajtzun queꞌyin Sara tuꞌn Kman, ex japun tyol Kman ic tzaꞌn otok tzaj ttziyan te. 2 Octzun ten tal Sara ex ul itzꞌj jun tal, te Abraham tcyꞌajal, tej otok tijin Abraham. Ul itzꞌj tuj tkꞌijlalil otok tma Dios te. 3 Isaac tbi cꞌwaꞌl oc tkꞌoꞌn Abraham, aju ul itzꞌj tiꞌj Sara. 4 Baj t-sircunsidarin Abraham aju tcyꞌajal Isaac tbi, tej otok bant wajxak kꞌij tul-len itzꞌj, ic tzaꞌnx otok tma Dios te. 5 Otok tzꞌel Abraham twiꞌ jun syent abkꞌi tej tul itzꞌj Isaac aju tcyꞌajal. 6 Tmatzun Sara cyjaꞌ: Ma chin jaw tzeꞌne tuꞌn Dios, ex alcyexju oc tbiꞌ tiꞌj jlu, ctzeꞌl junx wucꞌile. 7 Tmatl cyjaꞌ: ¿Atpe jun o kꞌmante te Abraham ka attok t-xiyil nkꞌoꞌne cychꞌuꞌ cꞌwaꞌl? Atzun jaꞌlo ma tzul itzꞌj jun tcyꞌajal Abraham wiꞌje ex ya ma tijin Abraham, chi Sara.Etz lajoꞌn Agar tucꞌix Ismael tuj tja Abraham
8 Chꞌiytzun Isaac ex el kꞌiꞌn tiꞌj tchꞌuꞌ. Aju kꞌij tej tel kꞌiꞌn tiꞌj tchꞌuꞌ oc jun nintz waꞌn tuꞌn Abraham. 9 O til Sara in xmayintok Ismael tiꞌj Isaac. Ate Ismael tcyꞌajal Abraham ex tal Agar aju aj Ejipt. 10 Xitzun tmaꞌn Sara te Abraham cyjaꞌ: Lajon exa Agar aju majen, tucꞌix tal. Aju tal majen xuꞌj lu mintiꞌ toclen tiꞌj etzbil junx tucꞌil wale Isaac, chi Sara. 11 Tzaj nim tbis Abraham tuꞌnju yol tzaj tmaꞌn Sara te, porque in yolintok tiꞌj Ismael aju tcyꞌajal. 12 Tzajtzun tmaꞌn Dios te Abraham cyjaꞌ: Miꞌn bisuna tiꞌj kꞌa mi tiꞌj tmajena xuꞌj. Nimanxa tcyakilju in tmaꞌn Sara teya, porque oꞌcx ke tcꞌwaꞌl Isaac che oquel te tiyjila. 13 Ax icx tiꞌj tal tmajena xuꞌj cꞌelel itzꞌj jun nasyon wuꞌne, tuꞌnju ax tcꞌwaꞌla jlu, chi Dios.
14 Tuj juntl kꞌij te prim wen, xi tkꞌoꞌn Abraham pan te Agar tucꞌix jun bols tzꞌuꞌm nojni tuꞌn aꞌ, jaw tkꞌoꞌn tcyakil jlu ttzal tiꞌj Agar, xi tkꞌoꞌn aju kꞌa tuj tcwent ex baj cykꞌolben cyib. Extzun Agar tucꞌix Ismael ex o betjeꞌ tuj tzkij txꞌotxꞌ Beerseba. 15 Tejtzun tcub baj aꞌ tuj bols tzꞌuꞌm, cyaj tkꞌoꞌn Agar aju kꞌa tjakꞌ jun wiꞌ tzeꞌ, 16 ex xiꞌ kebel najchak chꞌin, ic tzaꞌn jatum in pon tzꞌak plech, tuꞌnju miꞌn tajbiltok tuꞌn tqueꞌyinte oc tcyim kꞌa. Tejtzun tcub keꞌ Agar, oc ten okꞌel. 17 Tbitzun Dios tkꞌajkꞌajel twi kꞌa in okꞌtok. Tzaj kꞌajt t-anjel Dios max twitz cyaꞌj ex tzaj tmaꞌn te Agar cyjaꞌ: Agar, ¿alcye ma tzaj tiꞌja? Miꞌn xoba, porque ma tbi Dios aju tkꞌajkꞌajel twi kꞌa max jatum tcubsaꞌn. 18 Weꞌctza. Lachꞌoꞌn jawa kꞌa, ex tzyuma tuꞌn tkꞌaba, porque tiꞌj kꞌa lu cbantel jun nintz nasyon wuꞌne.
19 Tzajtzun tyecꞌun Dios jun xoch te Agar. Xiꞌ Agar nojsalte bols tzꞌuꞌm tuꞌn aꞌ ex xi tkꞌoꞌn tcꞌa kꞌa. 20 O ten Dios tucꞌil kꞌa. O najan tuj tzkij txꞌotxꞌ, o chꞌiy ex oc te jun xoꞌl plech. 21 O najan tuj tzkij txꞌotxꞌ Parán ex o mojeꞌ tucꞌil jun xuꞌj aj Ejipt, aju tzaj tiꞌn ttxuꞌ.
Bant tiꞌj jun yol tuꞌn Abraham ex Abimelec
22 Tujx tkꞌijlalil lu, xiꞌ Abimelec yolil tucꞌil Abraham, tucꞌix te Ficol xiꞌ tucꞌil, aju nejenel cye t-soldad. Xi tmaꞌn Abimelec te Abraham cyjaꞌ:
—Ate Dios at tucꞌila tuj tcyakilju in bant tuꞌna. 23 Jaꞌlotzun, ax tzalu kꞌmantza jun yol axix toc twitz Dios, ka mlay tbinchaya mya baꞌn wiꞌje, mi cyiꞌj ke ncꞌwaꞌle, mi cyiꞌj ke wiyjile; nok oꞌcx tuꞌn tbinchanteya baꞌn wiꞌje, ax icx cyiꞌj ke xjal ateꞌ tuj txꞌotxꞌ lu jatum najliya jaꞌlo, ic tzaꞌn weye o nbinchaye baꞌn tiꞌja.
24 Xi ttzakꞌweꞌn Abraham cyjaꞌ:
—Cxel nmaꞌne jun yol axix toc twitz Dios.
25 Xi tmaꞌn Abraham jun yol te Abimelec tiꞌj jun xoch otok tzꞌel cyetzan ke tmajen Abimelec. 26 Xitzun ttzakꞌweꞌn Abimelec cyjaꞌ:
—Mintiꞌ baꞌn wuꞌne alcye o binchante jlu ex mintiꞌ o tzaj tmaꞌna jlu weye. Matzun jaꞌlo ma nbiye tiꞌj jlu.
27 Tzajtzun tiꞌn Abraham ke ẍneꞌl ex wacẍ, ex e jeꞌx tkꞌoꞌn te Abimelec. Atzun kꞌij cyaj bant tiꞌj jun cyyol cycabil. 28 E jeꞌl tpaꞌn Abraham wuk ttxu ẍneꞌl cyiꞌj ke txkantl talun. 29 Xitzun tkanin Abimelec te cyjaꞌ:
—¿Ti cyajben ke wuk ẍneꞌl ma che el tpaꞌna?
30 Xi ttzakꞌweꞌn Abraham cyjaꞌ:
—Akeju wuk ttxu ẍneꞌl lu, che xel nkꞌoꞌne teya tuꞌn cyajben te jun yecꞌbil, wuꞌne bant xoch lu, chi Abraham. 31 Tuꞌntzun jlu, Beerseba tbi lugar lu oc kꞌoꞌn, porque atzun cyaj bant tiꞌj jun yol cyuꞌn cycabil.
32 Cyjaꞌtzun cyaj bant tiꞌj jun yol cyuꞌn tuj Beerseba. Ajtzun meltzꞌaj Abimelec tucꞌix Ficol, aju nejenel cye t-soldad, ex e jeꞌx tuj cytxꞌotxꞌ aj Filistey. 33 Cuꞌx tawaꞌn Abraham jun wiꞌ tzeꞌ tamarisco tuj Beerseba. Atzun o cubsan Abraham twitz Kman aju Dios te jumajx. 34 O ten Abraham nim kꞌij tuj cytxꞌotxꞌ aj Filistey.