Abraham ex Abimelec
20
Icꞌtzun Abraham tuj lugar jatum najltok ex pon tuj txꞌotxꞌ Néguev, cub ten najal t-xol Cades ex Shur, ex mya nim kꞌij o najan tuj tnam Gerar. 2 Tej tten Abraham tuj tnam lu, xi tmaꞌn cye xjal tiꞌj Sara aju t-xuꞌjil: Wanbe aju xuꞌj lu, chi Abraham. Aju rey Abimelec tuj Gerar xi t-samaꞌn ke xjal kꞌilte Sara tuꞌn toc te t-xuꞌjil; 3 pero te konicꞌan oc jun twitzicꞌ Abimelec ex tma Dios te cyjaꞌ:—Cymela tuꞌn tlaj aju xuꞌj ma tzaj tiꞌna; ate xuꞌj lu at tchmil, chi Dios.
4 Atzunte Abimelec naꞌnxtok tcub tan tucꞌil Sara. Xitzun ttzakꞌweꞌn cyjaꞌ:
—Tat, ¿Maj chin bel tbyoꞌna cyucꞌix ke nxjalile ex mintiꞌ kile? 5 Axte kꞌmante weye: Wanbe aju xuꞌj lu, chi, ax icx te xuꞌj tyol: Aju xinak lu, nxibane, chi. Nok yalnix tiꞌj nnable ex mintiꞌ wile tiꞌj jlu, chi Abimelec.
6 Tmatzun Dios te tuj witzicꞌ cyjaꞌ:
—Baꞌn wuꞌne ma tbinchaya jlu nok yalnix tiꞌj tnabla. Tuꞌntzun jlu mintiꞌ xi ntzokpiꞌne tuꞌn tcub tmojban tiba tucꞌil, tuꞌntzun miꞌn tbinchana il nwitze. 7 Atzun jaꞌlo, kꞌoꞌn aja xuꞌj lu te tchmil, tuꞌnju ate xinak lu jun nsanjele, ex cnaꞌl Dios tiꞌja tuꞌn tankꞌina; katzun miꞌn tzꞌaj tkꞌoꞌna, ax toc cymela cyucꞌix keju ateꞌ tuj tjaya, chi Dios.
8 Te prim te juntl kꞌij, jaw weꞌ Abimelec, e tzaj ttxcoꞌn cycyakil ke tmajen ex xi ttxꞌolbaꞌn tcyakil twitzicꞌ cye. Tejtzun cybinte ke xinak aju twitzicꞌ, tzaj nim cyxobil. 9 Tzajtzun txcoꞌn Abraham tuꞌn Abimelec ex xi tmaꞌn te cyjaꞌ:
—¿Ti o tbinchaya kiꞌje? ¿Alcye il o nbinchaye twitza tuꞌnju ma tzaj tiꞌna jun matij il wibaje ex cyibaj ke xjal ateꞌ tuj ncawbile? O tbinchaya jun mya baꞌn wiꞌje, aju mya kꞌoꞌn tuꞌn tbinchanteya. 10 Ax icx xi tmaꞌn Abimelec te Abraham cyjaꞌ: ¿Ti in ximantoka tiꞌj tej tbinchanteya tcyakil jlu? Chi Abimelec.
11 Xitzun ttzakꞌweꞌn Abraham cyjaꞌ:
—Tuj nnable mintiꞌ tchiylal Dios tuj lugar lu, ex jaculo chin cub byoꞌne tuꞌn tlaj nxuꞌjile. 12 Ex ax toc, wanbe tzꞌeꞌla xuꞌj lu tuꞌnju junx kmane, oꞌcx ktxuꞌye part, ex in mojeꞌye tucꞌil. 13 Tej toc tkꞌoꞌn Dios kine te betin xjal najchak tiꞌj tja nmane, xi nmaꞌne te nxuꞌjile cyjaꞌ: Atzun xtalbil lu oc tbinchaya wiꞌje nok alcyex lugar oc kpon, cxel tmaꞌna cye xjal wiꞌje cyjaꞌ: Nxibane jlu, chicuya, chi Abraham.
14 Tzajtzun tiꞌn Abimelec ke ẍneꞌl, wacẍ, majen xinak ex majen xuꞌj, ex e jeꞌx tkꞌoꞌn te Abraham. Ax icx aj tkꞌoꞌn t-xuꞌjil aju Sara tbi, 15 ex tma Abimelec te Abraham cyjaꞌ:
—Queꞌyinxa, lu ntxꞌotxꞌe tcub twitza. Najana jatum baꞌn tuj twitza.
16 Ax icx tma Abimelec te Sara cyjaꞌ:
—Ma txi nkꞌoꞌne jun mil tajlal sak pwak te t-xibana. Atzun jlu cꞌajbel tuꞌn ticꞌ tnaꞌnjtz aju mya baꞌn o binchanjtz cywitz cycyakil keju ateꞌ tucꞌila. Mi aꞌl jun c-yolil mya baꞌn tiꞌja, chi Abimelec.