—Chin cubsale cywitze, Tat, cyxiꞌye tuj njaye, akine cymajene, ex cycyaj tene tuj akꞌbil lu. Atzun baꞌn tel cytxꞌjoꞌne cykane, ex nchiꞌjxi te prim baꞌn ttzyetl cybeye, chi Lot cye.

Atzun cye anjel cyma:

—Miꞌn. Ax cꞌelex akꞌbil keye tuj cay, che chi anjel.

3 Atzunte Lot cubsanxix cywitz, ex cubtzun tuj cywitz tuꞌn cyxiꞌ max tja. Tejtzun cypon tja Lot, oc ten Lot binchalte cywa, tbincha pan mintiꞌ t-samel tuj, ex e waꞌn.

4 Naꞌnxtok cycub tan, baj cytxolban cyib cycyakil ke xinak aj Sodoma tiꞌjele tja Lot, tzaꞌnx ke cuꞌxun ax icx ke tij xjal, 5 ex e oc ten schꞌil tiꞌj Lot in cymaꞌntok cyjaꞌ:

—¿Jatum ateꞌ ke xinak ẍe ul tjaya te konicꞌan jaꞌlo? Kꞌiꞌmetza ke. Kajbile tuꞌn kcub tane cyucꞌil, che chi ke xinak aj Sodoma.

6 Etztzun Lot yolil cyucꞌil, cyaj tlamoꞌn ja, 7 ex xi tmaꞌn cye:

—Akeye wamiw, chin cubsale cywitze, miꞌn cybinchaye mya baꞌn lu. 8 At cabe nmeꞌjele naꞌnx cylonte xinak; che eletz wiꞌne tuꞌntzun cybinchanteye alcye cyajbile cyiꞌj. Oꞌcx miꞌn cybinchaye mya baꞌn cyiꞌj ke xinak lu. Atzun til ma che ul wucꞌile tuj njaye, chi Lot.

9 Tzajtzun cytzakꞌweꞌn xjal:

—Lakꞌebila. Aya jun stranjer xjal ma tzula najal tzalu ex jaꞌlo tajbila tuꞌn tcawina kibaje. Oc kbinchaye mas mya baꞌn tiꞌja cywitz ke cabe xjal ateꞌcx tuj tjaya, che chi.

E pon tilj tiꞌj Lot ex e pon lakꞌeꞌ tuꞌn tocx cypaꞌn tlamel ja. 10 Etztzun cynukpiꞌn cykꞌab ke xinak ateꞌcxtok tuj tja Lot, ocx cyiꞌn tuj ja ex jurat naj etz cylamoꞌn tlamel ja. 11 Atzun ke xjal ateꞌtok ttzi ja, biꞌx cub moẍix cywitz cyuꞌn ke xinak, tzaꞌnx ke cuꞌxun ax icx ke tij xjal, ex e tacpajeꞌ; cyjaꞌtzun tten, mintiꞌtl cnet ttzi ja cyuꞌn. 12 Tzajtzun cymaꞌn ke xinak te Lot cyjaꞌ:

—¿Atpe mastl xjal tucꞌila tzalu? Ke tjiꞌya, ke tcyꞌajala, ke tmeꞌjela, ex tcyakilju at teya tuj tnam lu, kꞌiꞌmexa ke tzalu, 13 porque cbel kxitune tnam lu. O japun tucꞌil Kman nimxix tkanil cyil xjal tuj. Tuꞌntzun jlu ma ko tzaj samaꞌne xitul te.

14 Etztzun Lot kꞌmalte cye tjiꞌ, akeju otok bant tiꞌj tuꞌn cymojeꞌ cyucꞌil tmeꞌjel, ex xi tmaꞌn cye cyjaꞌ:

—Chuxkeye ex cyexe tzalu, porque cbel t-xitun Kman aju tnam lu, chi Lot.

Atzun cye tjiꞌ oc cykꞌoꞌn ka nok in laꞌjintok Lot.

15 Tej tcub kꞌij, xi cymaꞌn anjel te Lot cyjaꞌ:

—Chuxa, weꞌctza, kꞌiꞌmexa t-xuꞌjila tzalu cyucꞌix ke cabe tmeꞌjela, ka miꞌn taja tuꞌn tnaja oc tcub tcastiw tnam lu kuꞌne. 16 Mintiꞌx bant naj tten Lot. Tuꞌntzun jlu, lachꞌoꞌn etz cyuꞌn ke xinak, tucꞌix t-xuꞌjil ex ke cabe tmeꞌjel, tuꞌnju tzaj kꞌakꞌan tcꞌuꞌj Kman tiꞌj. E jeꞌtz kꞌiꞌn tuꞌn cyetz tiꞌjxi tnam tuꞌntzun cyclet. 17 Tejtzun cyetz tiꞌjxi tnam, tzajtzun tmaꞌn jun cyxol keju cabe xinak cyjaꞌ:

—Tel oka tuꞌntzun tcleta. Miꞌn tzꞌajtz tqueꞌyina tiꞌjtza ex miꞌn cub weꞌya tuj tcyakil chkꞌajlaj lu. Txiꞌya cywi witz tuꞌntzun miꞌn tnaja, chi xinak.

18 Xitzun tmaꞌn Lot cye cyjaꞌ:

—Miꞌn. Chin cubsale cywitze tat. 19 Ma cybinchaye nim xtalbil weye tuꞌnju ma chin colpete cyuꞌne. Mlay chinxe cywi witz, tuꞌnju mya yajcu jacu ncꞌulbaꞌye jun tiꞌxti mya baꞌn tuj be, ex axlo jacu chin cyime. 20 Cyqueꞌyinxe tal tnam nikayin taꞌ ma chixin. Jacu chinx oke tuj. Cykꞌoꞌntze ambil weye tuꞌn nxiꞌye, tuꞌntzun nclete tuj. ¿Myapelo ax toc chꞌin tal tnam lu? Chi Lot.

21 Tzajtzun ttzakꞌweꞌn xinak te cyjaꞌ:

—Ax icx baꞌn ma tzꞌeꞌla tuj nwitze aju tcubsbila tiꞌj jlu, ex miꞌn cub nxitune aju tnam ma tmaya, 22 pero jurat-x naj txiꞌya clol tiba ma chixin. Mintiꞌ cbantel wuꞌne acux naꞌnxtok tpona ma chixin, chi xinak.

23 Otok jawil kꞌij tej tpon Lot tuj Zoar. 24 Atzunte Kman tzaj tchitun kꞌakꞌ ex azufre cyibaj tnam Sodoma ex Gomorra. Tzaj jlu twitz cyaꞌj tucꞌil Kman. 25 E cub t-xitun, tucꞌix tcyakil chkꞌajlaj, cyucꞌix cycyakil keju najl cyuj tnam, tucꞌix tcyakilju in chꞌiytok twitz txꞌotxꞌ. 26 Atzunte t-xuꞌjil Lot lepchoꞌctok tiꞌj, ajtz tqueꞌyin tiꞌjtzi. Axtzun cyaj weꞌ, ex baj noj tiꞌj tuꞌn atzꞌan.

27 Tuj juntl kꞌij te prim, xiꞌ Abraham jatum cub ten yolil tucꞌil Kman. 28 Xi tqueꞌyin tumlal Sodoma ex Gomorra, ex tuj tcyakil chkꞌajlaj o til in jawtok sib, mer ic tzaꞌn sib in jaw tuj jun jorni. 29 Cyjaꞌtzun, tej tcub t-xitun Dios ke tnam tuj chkꞌajlaj, ul Abraham tuj t-ximbetz, ex etz tiꞌn Lot tuj xitbil cye tnam jatum otok najan.

30 Jax Lot najal tuj tiwitz txꞌotxꞌ, ex e jax tiꞌn ke cabe tmeꞌjel tucꞌil, porque tzaj t-xobil tiꞌj tuꞌn tcyaj ten tuj Zoar. Atzun najan cyucꞌil ke cabe tmeꞌjel tuj jun toyꞌ pic. 31 Xitzun tmaꞌn tzicbaj te tzꞌinbaj cyjaꞌ: Ma tijin kman, ex tuj tcyakil txꞌotxꞌ lu mi aꞌl jun xinak tuꞌn tmojeꞌ kucꞌil, ic tzaꞌn in bant cyuꞌn xjal. 32 Tuꞌntzun jlu, kkꞌoꞌnc vin te kman tuꞌn tchyoꞌn twiꞌ, ex e kcub tan tucꞌil tuꞌntzun ttzaj tcꞌwaꞌl kiꞌj, chi tzicbaj. 33 Axtzun konicꞌan oc cykꞌoꞌn vin te cyman, ex cub tan tzicbaj ttxlaj tman. Atzunte mambaj misicyer o tnaꞌ tej tcub tan tmeꞌjel ttxlaj, mi tej tjaw weꞌ.

34 Te juntl kꞌij xi tmaꞌn tzicbaj te tzꞌinbaj cyjaꞌ: Konicꞌan mayꞌ ma chin cub tane tucꞌil tat. Ax icx kkꞌoꞌnc vin te tuj konicꞌan jaꞌlo, jacutzun cub tan teya tucꞌil tuꞌntzun ttzaj tcꞌwaꞌl kiꞌj, chi tzicbaj. 35 Axtzun konicꞌan oc cykꞌoꞌn vin te cyman, ex cub tan tzꞌinbaj ttxlaj tman. Atzunte Lot misicyer o tnaꞌ tej tcub tan tmeꞌjel ttxlaj, mi tej tjaw weꞌ. 36 Cyjaꞌtzun tten oc ten cyal ke cabe tmeꞌjel Lot tuꞌnx Lot. 37 Ultzun itzꞌj tal tzicbaj, Moab tbi oc, aju cyxeꞌchel ke aj Moab, akeju ateꞌx jaꞌlo. 38 Ax icx te tzꞌinbaj ul itzꞌj tal, Ben-ammí tbi oc, aju cyxeꞌchel ke aj Amón, akeju ateꞌx jaꞌlo.