—Tat, ka ma cnet xtalbil wuꞌne tuj twitza, chin cubsale twitza, miꞌn tzꞌaj naja tuj njaye, akine tmajena. 4 E ttzaj kꞌit chꞌin aꞌ tuꞌn tel txꞌjet cyiꞌj cykane, ex che ojlane tjakꞌ t-xlecumal tzeꞌ lu. 5 Ctzajel wiꞌne chꞌin cywaye tuꞌntzun toctl cyipune, ex tbajlenxi cywaye, jacutzun tzyettl cybeye. Atzun til ma che ule wucꞌile, akine cymajene, chi Abraham.

Tzaj cytzakꞌweꞌn ke xinak:

—Binchama ic tzaꞌn ma tmaya, che chi.

6 Ocxtzun naj Abraham tuj tja ex xi tmaꞌn te Sara:

—Jurat-x kꞌintza ox malbil arin aju tbanil, xyokꞌin baja, ex binchama junjun pan, chi Abraham.

7 Jurat naj xi ojkelan Abraham jatum ateꞌtok twacẍ, etz tjyoꞌn aju tal wacẍ mas tbanil ex xi tkꞌoꞌn te jun tmajen. Atzunte jlu, jurat naj baj tbinchaꞌn. 8 Ax icx tzaj tiꞌn Abraham cyes ex lech tucꞌix chibj otok tzkꞌaj, ex cub tkꞌoꞌn cywitz. Ax o cub weꞌ cytxlaj tej in che waꞌntok tjakꞌ tzeꞌ.

9 Tzajtzun cykanin te cyjaꞌ:

—¿Jatum taꞌ Sara aju t-xuꞌjila? Atzun te xi ttzakꞌweꞌn cye:

—Max taꞌ tuj ja.

10 Tmatzun jun cyxol ke ox xinak cyjaꞌ:

—Tuj juntl abkꞌi chin ultle tucꞌila, ex tzul itzꞌj jun tal Sara aju t-xuꞌjila, chi xinak.

Atzunte Sara in bintok tiꞌj yol, tajsaꞌntok tiꞌjxi Abraham ttzi ja. 11 Otok che tijin Abraham tucꞌix Sara ex otok weꞌ ttxjon Sara ic tzaꞌnx in baj cyiꞌj xuꞌj teyle junjun xjaw. 12 Tuꞌntzun jlu xi ttzeꞌn Sara tuj tanmi ex cub t-ximan cyjaꞌ: ¿Axpelo toc tzul itzꞌj jun wale, porque ma chin tijine ax icx te nchmile ma tijin? 13 Tmatzun Kman te Abraham:

—¿Tikuꞌn ma jaw tzeꞌn Sara ex ma tma cyjaꞌ: ¿Axpelo toc tzul itzꞌj jun wale ex ma chin tijine? Chi. 14 ¿Atpelo jun tiꞌxti cyuw mlay bant wuꞌne? Tuj tkꞌijlalil banimaj tiꞌj chin ultle tucꞌila ex tzul itzꞌj jun tal Sara, chi Kman.

15 Tzaj t-xobil Sara ex cub tewan.

—Mintiꞌwe ma chin jaw tzeꞌn, chi Sara.

Tzajtzun ttzakꞌweꞌn Kman te cyjaꞌ:

—Miꞌn. Baꞌn wuꞌne ma jaw tzeꞌna, chi Kman.

16 E jawtzun weꞌ ke xinak, tzyet cybe ex xi cyqueꞌyin tumlal tnam Sodoma. Xi bet chꞌin Abraham cyucꞌil tuꞌn cybaj cykꞌolben cyib. 17 Tmatzun Kman: ¿Cbelpelo wewane twitz Abraham aju cbantel wuꞌne? 18 Ax toc cꞌoquel Abraham te jun nintz nasyon ex nim tipun, ex tiꞌj che bel ncyꞌiwlaꞌne cycyakil xjal twitz txꞌotxꞌ. 19 O jaw nscꞌoꞌne tuꞌn t-xi tmaꞌn cye tcꞌwaꞌl ex cye tiyjil tuꞌn tcub cybiꞌn ke nxnakꞌtzbile, ex tuꞌn cybinchante aju baꞌn ex tzꞌaklxix, tuꞌntzun tjapun wuꞌne tcyakilju o txi ntziyane te, chi Kman. 20 Tzajtzun tmaꞌn Kman te cyjaꞌ:

—Ma nbiye tkanil tiꞌj tcyakil mya baꞌn in cybinchaꞌn ke aj Sodoma ex ke aj Gomorra, ex cyjaꞌ tchꞌiy nimxix cyil. 21 Tuꞌntzun jlu chin belexe queꞌyilte jaꞌlo, ex oc wilaꞌye ka ax toc o chmet mya baꞌn ic tzaꞌn o nbiye, ex ka miꞌn. Atzun cꞌelel nnicꞌe tiꞌj, chi Kman.

22 Cubtzun be cyuꞌn ke cabe xinak tuꞌn cypon tuj Sodoma, atzunte Abraham ax cyaj weꞌ twitz Kman. 23 Xi lakꞌeꞌ chꞌintl Abraham ttxlaj ex xi tmaꞌn te cyjaꞌ:

—¿Che najelpe ke xjal tzꞌaklxix tuꞌna junx cyucꞌil ke binchal mya baꞌn? 24 ¿Yajtzun ka ma cnet 50 xjal tzꞌaklxix tuj tnam? ¿Cnajelpe tnam tuꞌna? ¿Mlaype cub tnajsaꞌna til tuꞌn tcꞌujlalila cyiꞌj 50? 25 Mya tuj tumel tuꞌn cycub tbyoꞌna ke xjal tzꞌaklxix junx cyucꞌil ke binchal mya baꞌn, ex tuꞌn tbinchanteya cyiꞌj ke tzꞌaklxix ic tzaꞌnx cyiꞌj binchal mya baꞌn. Miꞌn tbinchaya icju. Aya jwes cyibaj cycyakil xjal twitz txꞌotxꞌ, ¿mlaype tbinchaya aju tzꞌaklxix? Chi Abraham.

26 Tzajtzun ttzakꞌweꞌn Kman te cyjaꞌ:

—Ka ma cnet 50 xjal tzꞌaklxix wuꞌne tuj Sodoma, cbel nnajsaꞌne cyil cycyakil keju najl ma chixin tuꞌn ncꞌujlalile cyiꞌj 50.

27 Xitzun tmaꞌn Abraham juntl maj:

—Nman, najsama tuꞌnju nnoꞌcx nkꞌon wibe tuꞌn nyoline tucꞌila icju, masque weye tkukil txꞌotxꞌ kine. 28 Balo atx jweꞌtl tuꞌn ttzꞌaket 50 xjal tzꞌaklxix. ¿Cbelpe t-xituna tcyakil tnam tuꞌnju jweꞌtl mintiꞌ ma tzꞌaket?

Tzajtzun ttzakꞌweꞌntl Kman:

—Mlay cub nxitune tnam ka ma cnet 45 xjal tzꞌaklxix wuꞌne.

29 Xitzun tmaꞌn Abraham juntl maj:

—¿Yajtzun ka ma cnet nok 40 xjal tzꞌaklxix ma chixin?

Tzajtzun ttzakꞌweꞌntl Kman:

—Mlay cub nxitune, tuꞌn ncꞌujlalile cyiꞌj 40.

30 Xitzun tmaꞌn Abraham juntl maj:

—Nman, chin cubsale twitza, miꞌn jaw kꞌojla wiꞌje ka cucx in chin yoline. ¿Yajtzun ka ma cnet nok 30 xjal tzꞌaklxix ma chixin?

Tzajtzun ttzakꞌweꞌntl Kman:

—Mlay cub nxitune ka ma cnet 30 xjal tzꞌaklxix wuꞌne.

31 Xitzun tmaꞌn Abraham juntl maj:

—Nman, najsama tuꞌnju nnoꞌcx nkꞌon wibe tuꞌn nyoline tucꞌila icju. ¿Yajtzun ka ma cnet nok winkin xjal tzꞌaklxix ma chixin?

Tzajtzun ttzakꞌweꞌntl Kman:

—Mlay cub nxitune, tuꞌn ncꞌujlalile cyiꞌj winkin.

32 Xitzun tmaꞌn Abraham juntl maj:

—Nman, chin cubsale twitza, miꞌn jaw kꞌojla wiꞌje ka ma chin yoline oꞌcx juntl maj. ¿Yajtzun ka ma cnet nok laj xjal tzꞌaklxix ma chixin?

Tzajtzun ttzakꞌweꞌntl Kman:

—Mlay cub nxitune, tuꞌn ncꞌujlalile cyiꞌj laj.

33 Icꞌtzun Kman tuj lugar tej tbaj yolin tucꞌil Abraham; atzunte Abraham aj meltzꞌaj tuj tja.