3 Cubtzun ẍmejeꞌ Abram ex pon tacl tibaj twitz max twitz txꞌotxꞌ. Cucx o yolin Dios tucꞌil, chi cyjaꞌ: 4 Aju yol cyjel bant tiꞌj wuꞌne tucꞌila, atzun jlu: Cꞌoquela te cyman nimcu nasyon. 5 Miꞌn tzꞌoctl tbiya Abram. Texju jaꞌlo, Abraham tbiya cꞌoquel, tuꞌnju ma tzꞌoc nkꞌoꞌne te cyman nimcu nasyon. 6 Che chmetel nimxix cyajlal tiyjila wuꞌne; tiꞌj tiyjila che elel jlet rey ex ke nasyon. 7 Te jumajx cyjel bant tiꞌj nyole tucꞌila ex cyucꞌil tiyjila che ul itzꞌj te tibajxi, ex te jumajx ax kine Tdiosa ex Cydios tiyjila. 8 Tcyakil txꞌotxꞌ Canaán jatum najla jaꞌlo ic tzaꞌn betin xjal cxel nkꞌoꞌne teya ex cye tiyjila tuꞌn toc te cyetzbile te jumajx, ex chin oquele te Cydios.

9 Ax icx tmatl Dios te Abraham cyjaꞌ: Aju yol cyjel bant tiꞌj wuꞌne tucꞌila, japunxtzun tuꞌna ex cyuꞌn ke tiyjila che ul itzꞌj te tibajxi. 10 Aju yol cyjel bant tiꞌj wuꞌne cyucꞌile ex aju il tiꞌj cjapunel cyuꞌn cycyakil tiyjila che ul itzꞌj te tibajxi, atzun jlu: Cycyakil xinak ateꞌ cyxole il tiꞌj tuꞌn cysircunsidarinjtz. 11 Cꞌeleltzun cykesine ttzꞌumal twi cytzꞌaꞌlbile, cꞌajbeltzun te jun techal tiꞌj yol otok cyaj bant tiꞌj wuꞌne cyucꞌile. 12 Wajxak kꞌij tul-len itzꞌj teyle te junjun kꞌa cyxole ex cyxol ke tiyjila che ul itzꞌj te tibajxi, cbajel cysircunsidarine, tzaꞌnx ke kꞌa che ul itzꞌj tuj cycwente, ax icx ke majen lakꞌoꞌn tuꞌn pwak cyucꞌil stranjer xjal, akeju mya t-xjalila. 13 Tzaꞌnx keju che ul itzꞌj tuj cycwente, ax icx keju lakꞌoꞌn tuꞌn cypwake, che bajel cysircunsidarine. Atzun jun techal tiꞌj cychibjale tiꞌj ju yol te jumajx xcyaj bant tiꞌj wuꞌne cyucꞌile. 14 Atzun teju xinak mintiꞌ ma sircunsidarinjtz, biꞌx cꞌelex lajet tuꞌntzun miꞌn ttentl cyxol t-xjalil, tuꞌnju otok tzicꞌ tibaj nyole aju otok cyaj bant tiꞌj.

15 Ax icx tmatl Dios te Abraham cyjaꞌ: Aju t-xuꞌjila miꞌn tzꞌoc tkꞌoꞌntla tbi Sarai. Texju jaꞌlo Sara tbi cꞌoquel. 16 Cbel ncyꞌiwlaꞌne Sara ex tzul itzꞌj jun tcyꞌajala tiꞌj. Ax toc cbel ncyꞌiwlaꞌne. Ate xuꞌj lu cꞌoquel te cytxuꞌ nimcu nasyon, ex cyiꞌj tiyjil che elel jlet rey cyibaj tnam, chi Dios.

17 Cubtzun ẍmejeꞌ Abraham, pon tacl tibaj twitz max twitz txꞌotxꞌ, jaw tzeꞌn, ex cub t-ximan tuj tanmi cyjaꞌ: ¿Jacupe tzaj tcꞌwaꞌl jun xinak otok tzꞌel twiꞌ jun syent abkꞌi? ¿Jacupe tzaj jun tal Sara o tzꞌel twiꞌ 90 abkꞌi? 18 Xitzun tmaꞌn Abraham te Dios cyjaꞌ:

—Cuchiwt tzꞌankꞌin Ismael tjakꞌ t-xtalbila.

19 Tzajtzun ttzakꞌweꞌn Dios te cyjaꞌ:

—Ax toc tzul itzꞌj jun tcyꞌajala tiꞌj Sara aju t-xuꞌjila, ex Isaac tbi cꞌoquel tkꞌoꞌna. Te jumajx cyjel bant tiꞌj nyole tucꞌil ex cyucꞌil ke tiyjil che ul itzꞌj te tibajxi. 20 Ax icx ma nbiye tkanbetza tiꞌj Ismael. Cbel ncyꞌiwlaꞌne, che chmetel ke tcꞌwaꞌl wuꞌne ex che chmetel nim cyajlal tiyjil. Che ulel itzꞌj cablaj tcꞌwaꞌl Ismael, che oquel jlu te nejenel nim cyoclen, ex cbantel jun matij nasyon wuꞌne cyiꞌj tiyjil. 21 Atzun cyjel bant tiꞌj nyole tucꞌil Isaac, aju ctzajel talin Sara tuj tkꞌijlalil lu tuj juntl abkꞌi, chi Dios te Abraham. 22 Bajtzun yolin Dios tucꞌil Abraham, eltzun tpaꞌn tib tiꞌj.

23 Axtzun kꞌij lu baj t-sircunsidarin Abraham aju tcyꞌajal Ismael tbi, ex cycyakil ke majen otok che ul itzꞌj tuj tcwent ex keju otok che tlokꞌ tuꞌn tpwak; cycyakil xinak najltok tuj tja e baj t-sircunsidarin ic tzaꞌnx otok tma Dios te. 24 Otok japun Abraham twiꞌ 99 abkꞌi tej tel tkesin ttzꞌumal twi ttzꞌaꞌlbil. 25 Atzunte Ismael aju tcyꞌajal otok japun twiꞌ oxlaj abkꞌi. 26 Ax kꞌij sircunsidarinjtz Abraham tucꞌix Ismael aju tcyꞌajal, 27 cyucꞌix cycyakil ke xinak ateꞌtok tuj tcwent, tzaꞌnx ke majen e ul itzꞌj tuj tcwent, ax icx keju otok che lakꞌet tuꞌn tuꞌn tpwak cyucꞌil stranjer xjal.