Tej tul itzꞌj Ismael tal Agar
16
Mibantok alin Sarai aju t-xuꞌjil Abram, ex attok jun tmajen, jun xuꞌj aj Ejipt Agar tbi. 2 Xitzun tmaꞌn Sarai te Abram: Baꞌn wuꞌne, tuꞌn Kman miban chin aline. Chin cubsale twitza tcub mojeꞌya tucꞌil nmajene xuꞌj, kape jacu che tzaj wale tiꞌj, chi Sarai.Xitzun tniman Abram tyol Sarai aju t-xuꞌjil. 3 Tzajtzun tiꞌn Sarai aju tmajen xuꞌj, aju aj Ejipt, Agar tbi, ex xi tkꞌoꞌn te Abram tuꞌn tjaw t-xuꞌjlaꞌn. Otok bant laj abkꞌi tcublen ten Abram najal tuj txꞌotxꞌ Canaán. 4 Cubtzun tan Abram tucꞌil Agar ex oc ten tal Agar. Tejtzun tnaꞌnte Agar otok tzꞌoc ten tal, oc ten icꞌul tiꞌj Sarai aju tpatrón. 5 Tmatzun Sarai te Abram cyjaꞌ:
—Tuꞌn tlaja ma chin el icꞌune tuꞌn Agar. Ax kine inx kꞌonte nmajene teya tuꞌn toc te t-xuꞌjila, tejtzun ma til ma tzꞌoc ten tal, ma chin el icꞌune tuꞌn. E tmante Kman alcye at til, ka akine ex ka aya, chi Sarai.
6 Xitzun ttzakꞌweꞌn Abram te cyjaꞌ:
—Tuj tcwenta taꞌ tmajena. Binchama tiꞌj alcye baꞌn tuj twitza, chi Abram.
Octzun ten Sarai yajlal te Agar. Tuꞌntzun jlu el ok Agar. 7 Oc noj aju t-anjel Kman tiꞌj tuj tzkij txꞌotxꞌ, nikayin jatum nneꞌtz jlet jun aꞌ tuj tbeyil Shur. 8 Xitzun tkanin anjel te:
—Aya Agar tmajen Sarai: ¿Jatum saja, ex jatum ma txiꞌya?
Ajtzun ttzakꞌweꞌn Agar:
—Ma chin el oke twitz npatrone Sarai.
9 Xitzun tmaꞌn t-anjel Kman te:
—Taj meltzꞌaja tucꞌil tpatrona ex nimanxa tuj tcyakil.
10 Xi tmaꞌntl t-anjel Kman te cyjaꞌ:
Cchmetel nimxix tiyjila wuꞌne, ex mi aꞌl jun cbantel tajlante cye.
11 O tzꞌoc ten tala ex tzul itzꞌj jun tala xinak. Ismael tbi cꞌoquel tkꞌoꞌna tuꞌnju o tbi Kman aju yajbil teya.
12 Ate jlu cꞌoquel te jun xinak txꞌuꞌj twiꞌ; ckꞌojlel cyiꞌj cycyakil xjal, ex che kꞌojlel cycyakil xjal tiꞌj, ex part cnajal cyiꞌj cycyakil terman, chi Dios.
13 Octzun tkꞌoꞌn Agar tbi Kman aju in yolintok tucꞌil: Aya Dios in chin tqueꞌyin, porque tma: Ma wile tzalu aju in queꞌyinte weye. 14 Tuꞌntzun jlu oc tkꞌoꞌn tbi xoch lu: Beer-lahai-roi. Aju xoch lu, atzun tcub t-xol Cades ex Bered.