—Miꞌn xoba Abram. Akine colol teya, ex nimxix chojbil teya oc tcꞌmaꞌya wuꞌne.

2 Xitzun ttzakꞌweꞌn Abram cyjaꞌ:

—Nman Dios, ¿Ti tajben weye tuꞌn ttzaj tkꞌoꞌna jun chojbil weye ex mintiꞌ jun ncꞌwaꞌle at? Ex aju nmajene Eliezer aju aj Damasco, atzun cꞌelel etzante tcyakilju at weye. 3 Xi tmaꞌntl Abram cyjaꞌ:

—Queꞌyintza, naꞌnx ttzaj tkꞌoꞌna jun ncꞌwaꞌle, ex alo jun majen ul itzꞌj tuj njaye cꞌoquel te etzal.

4 Tzajtzun ttzakꞌweꞌn Kman te cyjaꞌ:

—Mya ate Eliezer cꞌoquel tajwil aju at teya. Ax jun tcyꞌajala cꞌoquel te etzal, chi Kman. 5 Etztzun tiꞌn Kman Abram ttxaꞌn peꞌn ex tzaj tmaꞌn te cyjaꞌ:

—Queꞌyinxa twitz cyaꞌj ex ajlanxa ke cheꞌw, ka jacu bant cyajlet tuꞌna.

Tzaj tmaꞌntl te cyjaꞌ:

—Cyjaꞌtzun cꞌoquel cyajlal tiyjila, chi Kman.

6 Xi tocslaꞌn Abram tyol Kman, ex cyjaꞌtzun oc kꞌoꞌm te tzꞌaklxix tuꞌn, 7 ex tmatl Kman te cyjaꞌ:

—Akine Tmana, aju etz kꞌinte teya tuj tnam Ur cyxol aj Caldey, tuꞌn t-xi nkꞌoꞌne aju txꞌotxꞌ lu te tetzbila.

8 Xitzun ttzakꞌweꞌn Abram cyjaꞌ:

—Nman Dios, ¿tzaꞌn tten tuꞌn tel nnicꞌe tiꞌj ka chin oquele tajwil?

9 Tmatl Kman te cyjaꞌ:

—Kꞌintza jun tal vac, jun ttxu chip ex jun tman ẍneꞌl, te ox abkꞌi teyle junjun, tucꞌix jun ẍpoꞌk ex jun tal paloma, chi Kman te.

10 Tzajtzun tiꞌn Abram tcyakil jlu, cub tkesin cymij ke alumaj, atzun ke chyuꞌj mintiꞌ cub tkesin cymij, ex cub tkꞌoꞌn mij jun pacꞌ ex mij juntl pacꞌ. 11 E ul cꞌutz cyiꞌj ke alumaj otok che cub byoꞌn, atzunte Abram in che el tlajoꞌntok. 12 Tej toc kax, tzaj nimxix watl tiꞌj Abram, ex tzaj nim t-xobil tuꞌnju nim klolj cub ten tiꞌjele. 13 Tmatzun Kman te Abram cyjaꞌ: Tzꞌelx tnicꞌa tiꞌj, ke tiyjila che ul itzꞌj te tibajxi, che oquel te stranjer xjal tuj juntl nasyon, che oquel te majen xjal ex che bajel yajlaꞌn cyuꞌn tuj cyaje syent abkꞌi. 14 Atzunju nasyon jatum che oquel tiyjila te majen, cbel tcastiw wuꞌne, ex te yajxi che eletz tiyjila tucꞌil nim kꞌinumabl. 15 Atzun teya, tuj txubtxaj cymela ex cpola tucꞌil ktzan t-xeꞌchela otok tijina oc tcyima, ex cbelex makuꞌna. 16 Tbajlenxi cyaje syent abkꞌi, che ajetz meltzꞌaj ke tiyjila tuꞌn cyul juntl maj tzalu, porque naꞌnx tchmet cyil ke aj Amorrey, chi Kman.

17 Texlenxi kꞌij, tej otok tzꞌoc klolj, o ilwaj jun cꞌil in kusintok kꞌakꞌ tuj ex jun ttxan tzaj in cꞌanttok ex in bettok cyicꞌ cyxol ke alumaj kesimaj. 18 Axtzun kꞌij lu cyaj bant tiꞌj jun yol tuꞌn Kman tucꞌil Abram, ex tma Kman te cyjaꞌ: Aju txꞌotxꞌ lu cxel nkꞌoꞌne cye tiyjila che ul itzꞌj te tibajxi, max ctzajel keꞌ tmojonil ttzi nima Ejipt ex cpol baj max ttzi nima Éufrates. 19 Aju txꞌotxꞌ lu cye aj Ceney, aj Cenezey, aj Cadmoney, 20 aj Hetey, aj Ferezey, aj Refaim, 21 aj Amorrey, aj Canaán, aj Gergesey ex aj Jebusey.