Colpet Lot tuꞌn Abram
14
Tuj tkꞌijlalil lu toctok Amrafel te rey tuj Sinar, atzunte Arioc toctok te rey tuj Elasar, atzunte Quedorlaomer toctok te rey tuj Elam ex atzunte Tidal toctok te rey tuj Goim. 2 Ake jlu e kꞌojin tiꞌj Bera rey te tnam Sodoma, tiꞌj Birsa rey te tnam Gomorra, tiꞌj Sinab rey te tnam Adma, tiꞌj Semeber rey te tnam Zeboim ex tiꞌj rey te tnam Bela (aju ax juntl tbi Zoar). 3 Akeju jweꞌ rey lu oc cychmon cyib cyucꞌix ke cysoldad tuj chkꞌajlaj Sidim, jatum taꞌ mar at nim atzꞌan tuj. 4 Ate rey Quedorlaomer otok cawin cablaj abkꞌi cyibaj, pero tuj toxlajin abkꞌi jaw cyiꞌn cyib tuꞌn cykꞌojin tiꞌj. 5 Tuj juntl abkꞌi tzaj Quedorlaomer cyucꞌix ke txkantl rey mojl cyyol tucꞌil. Cub cyiꞌj aj Refaim cyuꞌn tuj Astarot Karnaim, cub cyiꞌj aj Zuzim cyuꞌn tuj Ham, cub cyiꞌj aj Emim cyuꞌn tuj Save-quiriataim, 6 ex cub cyiꞌj aj Horey cyuꞌn tuj tiwitz txꞌotxꞌ Seir, ul baj max tuj chkꞌajlaj Parán aju tcub ttxaꞌn tzkij txꞌotxꞌ. 7 Ajtzun meltzꞌaj Quedorlaomer cyucꞌix ke tucꞌil, ex e pon tuj En-mispat, ex ax juntl tbi Cades. Tcyakil baj naj cyuꞌn tuj cytxꞌotxꞌ aj Amalec, ax icx cybincha cyiꞌj aj Amorrey, akeju najltok tuj Hazezon-tamar.8 Ultzun rey te Sodoma tuj chkꞌajlaj Sidim, tucꞌix rey te Gomorra, rey te Adma, rey te Zeboim ex rey te Bela (aju ax juntl tbi Zoar), ex atzun tzyet kꞌoj cyuꞌn. 9 E kꞌojin keju jweꞌ rey cyiꞌj ke cyaje rey lu: Quedorlaomer rey te Elam, Tidal rey te Goim, Amrafel rey te Sinar ex Arioc rey te Elasar. 10 Tejtzun tel ok rey te Sodoma tucꞌix rey te Gomorra, e cuꞌx tzꞌak junjun cyuj ke jul nojni tuꞌn aspalt, akeju ateꞌtok tuj tcyakil chkꞌajlaj Sidim. Atzun ke txkantl e jax ok twi witz.
11 Keju e camban xi cyiꞌn tcyakil cywa ex tcyakil cykꞌinumabl aj Sodoma ex aj Gomorra, ex e icꞌtzun. 12 Tucꞌix Lot xi cyiꞌn pres, aju tcyꞌajal terman Abram, tuꞌnju najltok tuj Sodoma, ax icx xi cyiꞌn tcyakilju attok te. 13 Jun xinak otok tzokpaj tuj kꞌoj, ul kꞌmalte te Abram aju aj Hebrey tiꞌj tcyakilju otok baj. Atzun najltok Abram cyjakꞌ ke tzeꞌ cꞌol tuj ttxꞌotxꞌ Mamre aju aj Amorrey. Ate Mamre terman Escol ex Aner. Ake jlu mojl cyyol tucꞌil Abram.
14 Tejtzun tbinte Abram otok tzꞌocx presin tcyꞌajal terman, e baj tchmoꞌn ke tmajen akeju ax e itzꞌj tuj tcwent. Tuꞌn tcyakil 318 cybet ke tmajen, ex cycyakil ke jlu e jeꞌx lpeꞌ cyiꞌj ke rey tejxi cypon tuj tnam Dan. 15 Te konicꞌan oc tzokpaj Abram cyucꞌix ke t-xjalil kꞌojlel cyiꞌj ke rey; cub cyiꞌj tuꞌn ex oc lpeꞌ cyiꞌj tejxi cypon tuj Hoba, aju tcub tuj tumlal tbankꞌab kꞌij te tnam Damasco. 16 El tiꞌn tcyakil kꞌinumabl otok txi cyiꞌn ke rey. Tucꞌix Lot colpet tuꞌn, aju tcyꞌajal terman. El tiꞌn cye rey tcyakil tkꞌinumabl Lot. Ax icx ke xuꞌj ex ke txkantl xjal e colpet tuꞌn.
Cub cyꞌiwlaꞌn Abram tuꞌn Melquisedec
17 Tej tajtz Abram tcublenxi tiꞌj Quedorlaomer tuꞌn, cyucꞌix ke rey ateꞌtok tucꞌil, etztzun rey te Sodoma cꞌmolte Abram tuj chkꞌajlaj Save (aju ax juntl tbi Tchkꞌajlaj Rey). 18 Ate Melquisedec rey te Salem ex pal te Dios, aju Dios Maꞌxix Toclen, ul tiꞌn pan ex taꞌl twitz uva. 19 Cub cyꞌiwlaꞌn Abram tuꞌn, chi cyjaꞌ:
Cyꞌiwlaꞌnxwit Abram tuꞌn Dios, aju Dios Maꞌxix Toclen, aju binchante cyaꞌj ex txꞌotxꞌ;
20 ex nimanxwit Dios, aju Dios Maꞌxix Toclen, aju tzaj kꞌonte ke aj kꞌoj tiꞌja tuj tkꞌaba, chi Melquisedec.
Ex xi tkꞌoꞌn Abram te Melquisedec tlajiꞌn tiꞌj tcyakilju otok tzꞌel tiꞌn cye rey. 21 Aju rey te Sodoma tzaj tmaꞌn te Abram cyjaꞌ:
—Kꞌontza ke xjal weye, atzun teya, kꞌincja ke kꞌinumabl.
22 Atzunte Abram xi ttzakꞌweꞌn cyjaꞌ:
—O txi ntziyane te Nmane, aju Dios Maꞌxix Toclen, aju binchante cyaꞌj ex txꞌotxꞌ: 23 Mlay txi wiꞌne jun nokꞌ, mi jun takꞌal xjab ex mi jun tiꞌxti teya, tuꞌntzun miꞌn tmanteya cyjaꞌ: Wuꞌne o tzꞌoc Abram kꞌinun. 24 Nok oꞌcx oc ncꞌmaye aju baj cywaꞌn ke majen. Ex ke xinak ẍeꞌx aj wucꞌile: Aner, Escol ex Mamre, baꞌn tuꞌn cycꞌmonte aju at cyoclen tiꞌj.