El cypaꞌn cyib Abram tucꞌil Lot
13
Etztzun Abram tuj Ejipt tuꞌn tul tuj txꞌotxꞌ Néguev tucꞌix t-xuꞌjil ex tcyakilju attok te. Tucꞌix Lot etz tucꞌil. 2 Attok nimxix tkꞌinumabl Abram, nim talun, nim sak pwak ex nim kꞌan pwak. 3 Chebale ajtz tuj Néguev tuꞌn tul max tuj tnam Betel, ex tuꞌn tultl jatum otok cub tkꞌoꞌn tja, xbalun ja, t-xol tnam Betel tucꞌil Hai, 4 jatum otok cub tbinchaꞌn jun altar, ex atzun tzaj tnaꞌn tbi Kman.5 Ax icx te Lot, aju in bettok tucꞌil Abram, ateꞌtok t-ẍneꞌl, twacẍ ex ke xjal ax najl tucꞌil; 6 atzunju lugar jatum o che ten mintiꞌ canun tuꞌn cycꞌaꞌchit cycyakil ke cyalun, tuꞌnju nimxix. Mintiꞌ tumel tuꞌn cyankꞌin junx. 7 Tzaj kꞌoj cyxol ke cwentil talun Abram ex ke cwentil talun Lot. Ax icx ax najltok ke aj Canaán ex ke aj Ferezey tuj lugar lu. 8 Tmatzun Abram te Lot cyjaꞌ: Mya baꞌn tuꞌn tten kꞌoj kxol, mi cyxol ke cwentil walune ex ke cwentil taluna, tuꞌnju kerman kib. 9 Jaꞌlotzun chin cubsale twitza, paꞌmil tiba wiꞌje. Lu tcyakil txꞌotxꞌ tcub twitza. Ka ma txiꞌya tuj nayaj, jacu chinx weye tuj bankꞌabaj; katzun ma txiꞌya tuj bankꞌabaj, jacu chinx weye tuj nayaj.
10 Xitzun tqueꞌyin Lot tcyakil chkꞌajlaj ttzi aꞌ Jordán. Aju txꞌotxꞌ lu attok nim aꞌ tuj te aꞌlbil txꞌotxꞌ ex tbanilxixtok queꞌyin, ponin baj max tiꞌj tnam Zoar, ic tzaꞌnju tawal Kman, ex mer ic queꞌyin ic tzaꞌn txꞌotxꞌ Ejipt. A jlu o baj tej naꞌnxtok cycub t-xitun Kman ke tnam Sodoma ex Gomorra. 11 Jawtzun t-scꞌoꞌn Lot tcyakil chkꞌajlaj ttzi aꞌ Jordán, ex cyjaꞌ xiꞌ tuj tjawitz kꞌij. Cyjaꞌtzun el cypaꞌn cyib Abram tucꞌil Lot. 12 Cyajtzun ten Abram tuj txꞌotxꞌ Canaán, atzunte Lot xiꞌ najal cyxol ke tnam ateꞌtok tuj chkꞌajlaj, nikayin tiꞌj tnam Sodoma. 13 Cycyakil xjal tuj Sodoma puro mya baꞌn ke ex aj ilxix ke twitz Kman.
14 Tel-lenxi tpaꞌn tib Lot, tma Kman te Abram cyjaꞌ: Ax jatum taꞌya, queꞌyinxa jawni ex cubni, ocni ex elni; 15 tcyakil txꞌotxꞌ in tila cxel nkꞌoꞌne teya ex cye tiyjila te jumajx. 16 Ic che oquel ke tiyjila wuꞌne ic tzaꞌn tajlal tkukil txꞌotxꞌ. Ka at jun xjal jacu bant tajlante tkukil txꞌotxꞌ, ax icx cbantel tajlante cyiꞌj tiyjila. 17 Weꞌctza ex beta twitz txꞌotxꞌ lu. Betinxa tuj tnukbil ax icx tcyakil twitz, porque teya cxel nkꞌoꞌne.
18 Icꞌtzun tlakꞌbaꞌn Abram tja, xbalun ja, ex xiꞌ najal cyjakꞌ ke tzeꞌ cꞌol tuj ttxꞌotxꞌ Mamre, nikayin tiꞌj tnam Hebrón. Atzun jaw tbinchaꞌn jun altar te cꞌulbil te Kman.