Txocbil te Abram tuꞌn Dios
12
Tma Kman te Abram cyjaꞌ: Tetz tuj ttanmiya, cyxol ke t-xjalila ex tuj tja tmana, ex txiꞌya tuj txꞌotxꞌ cxel nyecꞌune teya. 2 Tiꞌja cbel nbinchaꞌne jun nasyon maꞌxix, cbel nkꞌoꞌne ncyꞌiwbile tibaja, cjawil nnimsaꞌne tbiya, ex cꞌoquela te jun cyꞌiwbil cye mastl xjal. 3 Che bel ncyꞌiwlaꞌne keju che bel cyꞌiwlante teya, ex ctzajel nkꞌoꞌne mya baꞌn cyibaj keju che tzajel kaninte mya baꞌn tibaja; ex nok tiꞌja che cyꞌiwlanjtzel cycyakil xjal twitz txꞌotxꞌ, chi Kman.4 Etztzun Abram tuj tnam Harán ic tzaꞌnx otok tma Kman te; ex tucꞌix Lot etz tucꞌil. Otok japun Abram twiꞌ 75 abkꞌi tej tetz tuj tnam Harán. 5 Tzaj tiꞌn Sarai tucꞌil, aju t-xuꞌjil, tucꞌix Lot aju tcyꞌajal terman, ex xi cyiꞌn tcyakil cykꞌinumabl aju otok cnet cyuꞌn, cyucꞌix ke cymajen akeju otok che cnet tuj tnam Harán. Cubtzun be cyuꞌn tuꞌn cyul tuj txꞌotxꞌ Canaán, ex tuj txꞌotxꞌ Canaán e ul. 6 Tzajtzun bet Abram tuj txꞌotxꞌ lu ex ul tuj Siquem, canun t-xeꞌ jun wiꞌ tzeꞌ cꞌol tuj lugar More. Tuj tkꞌijlalil lu atzun najltok ke aj Canaán. 7 Atzun cub tyecꞌun tib Kman twitz Abram ex xi tmaꞌn te cyjaꞌ: Atzun txꞌotxꞌ lu cxel nkꞌoꞌne cye tiyjila, chi Kman.
Tujtzun lugar lu jaw tbinchaꞌn Abram jun altar twitz Kman aju cub tyecꞌun tib twitz.
8 Icꞌtzun tuj lugar lu tuꞌn tul twiꞌ jun witz ttxlaj tnam Betel tuj tjawitz kꞌij. Atzun cub tkꞌoꞌn tja, xbalun ja, t-xol cabe tnam; atzun tcub tnam Betel tuj telex kꞌij, atzunte tnam Hai tcub tuj tjawitz kꞌij. Tujtzun lugar lu jaw tbinchaꞌn Abram juntl altar tuꞌn tcꞌulun te Dios, ex o cubsan twitz Kman. 9 Tzajtzun bet Abram tuj lugar lu tuꞌn tul tuj txꞌotxꞌ Néguev.
Pon Abram tuj Ejipt
10 Tujtzun tkꞌijlalil lu tzaj nim weꞌyaj tuj txꞌotxꞌ Canaán. Xiꞌtzun Abram tuj Ejipt tuꞌn tnajan nicꞌxi kꞌij ma chixin, tuꞌnju nimxix weꞌyaj tzaj jatum najltok. 11 Tejtzun chꞌixtok tpon tuj Ejipt xi tmaꞌn te Sarai aju t-xuꞌjil: Baꞌn wuꞌne tbanilxix queꞌyina, 12 ex oc toc queꞌyina cyuꞌn ke aj Ejipt oclo cymaꞌ: T-xuꞌjil xinak lu aju xuꞌj lu, che chilo. Oclo chin bel byoꞌne cyuꞌn, atzun teya mlay cub byoꞌna cyuꞌn. 13 Tuꞌntzun jlu, binchama xtalbil, bix txi tmaꞌna: Tanb xjal lu kine, chicuya, tuꞌntzun ntene baꞌn ex tuꞌn miꞌn ncub byoꞌne tuꞌn tlaja.
14 Tejtzun tpon Abram tuj Ejipt, oc cyqueꞌyin ke aj Ejipt tbanilxix queꞌyin t-xuꞌjil. 15 Ax icx oc cyqueꞌyin ke aj sanjelal ateꞌc ttxlaj Faraón. E jeꞌxtzun kꞌmalte te: Tbanilxix queꞌyin xuꞌj lu, che chi. Xitzun cyiꞌn tuj tja Faraón.
16 Tuꞌn tlaj Sarai tbincha Faraón nimxix xtalbil te Abram, ex xi tkꞌoꞌn ke ẍneꞌl te, cyucꞌix wacẍ, bur, chej camey, majen xinak ex majen xuꞌj. 17 Pero tuꞌn tlaj Sarai cub tcastiw Faraón tuꞌn Kman, ex cyucꞌix keju ateꞌtok tuj tja, tzaj nimxix yabil cyiꞌj. 18 Tzajtzun ttxcoꞌn Faraón Abram ex xi tmaꞌn te cyjaꞌ: ¿Tikuꞌn ma tbinchaya jlu wiꞌje? ¿Tikuꞌn mi tzaj tmaꞌna weye ka t-xuꞌjila aju xuꞌj lu? 19 ¿Tikuꞌn o tmaya ka tanba xuꞌj lu? Cyjaꞌtzun tzaj wiꞌne tuꞌn toc te nxuꞌjile. Jaꞌlotzun, lu t-xuꞌjila lu. Kꞌinxa ex txiꞌya, chi Faraón. 20 Xitzun tmaꞌn Faraón cye t-xjalil tuꞌn tex cyiꞌn Abram tuj Ejipt junx tucꞌil t-xuꞌjil ex tcyakilju attok te.