Aju ja maꞌxix twaꞌl tuj Babel
11
Tuj tkꞌijlalil ojtxi junx yol baꞌn cyuꞌn cycyakil xjal twitz txꞌotxꞌ. 2 Tej cyetz xjal tuj tjawitz kꞌij o cnet jun chkꞌajlaj cyuꞌn tuj txꞌotxꞌ Sinar, ex axtzun e najan. 3 E octzun ten yolil cyxolx ex cyma cyjaꞌ: Koꞌ, kbinchan cub lagriy, ex kkꞌoꞌncx tuj kꞌakꞌ tuꞌn ttzkꞌajset, che chi. Ajbentzun lagriy te t-xel abj, atzun aspalt ajben cyuꞌn te t-xel mescla. 4 Cymatltzun cyjaꞌ: Kbinchan jaw jun tnam ex jun ja maꞌxix twaꞌl ex japun pon twaꞌl max twitz cyaꞌj, tuꞌn tcyaj jun nabl ke, ex tuꞌn miꞌn kel sputj twitz txꞌotxꞌ, che chi.5 Cuꞌtztzun Kman queꞌyilte aju tnam ex aju ja maꞌxix twaꞌl in banttok cyuꞌn ke xjal. 6 Tmatzun cyjaꞌ: Lu ke xjal lu junx cytanmi, ax icx junx yol baꞌn cyuꞌn; ma tzyet akꞌuntl lu cyuꞌn ex mlay che mayet tiꞌj ju in cub cyximan tuꞌn cybinchante. 7 Jaꞌlotzun koꞌ, ko cuꞌx tzpet-salte cyyol tuꞌntzun miꞌn tel tnicꞌ jun tiꞌj tyol juntl, chi Kman.
8 Ictzun tten e el t-sputun Kman ke xjal tuj tcyakil twitz txꞌotxꞌ, ex cyaj cycolin akꞌuntl tiꞌj tnam. 9 Tuꞌntzun jlu, Babel tbi tnam oc, tuꞌnju atzun cub ttzpet-saꞌn Kman cyyol cycyakil xjal. Tujtzun tnam lu e jeꞌl t-sputun tuj tcyakil twitz txꞌotxꞌ.
Ke tiyjil Sem
10 Atzun txꞌolbabl jlu cyiꞌj tiyjil Sem.
Otok japun Sem twiꞌ jun syent abkꞌi tej tul itzꞌj Arfaxad aju tcyꞌajal, cabe abkꞌi ticꞌlen kꞌekab. 11 Titzꞌjlenxi Arfaxad, ankꞌintl Sem jweꞌ syenttl abkꞌi, ex tzajtzun mastl tcyꞌajal ex tmeꞌjel.
12 Otok japun Arfaxad twiꞌ 35 abkꞌi tej tul itzꞌj Sala aju tcyꞌajal. 13 Titzꞌjlenxi Sala, ankꞌintl Arfaxad 403 abkꞌi, ex tzajtzun mastl tcyꞌajal ex tmeꞌjel.
14 Otok japun Sala twiꞌ 30 abkꞌi tej tul itzꞌj Heber aju tcyꞌajal. 15 Titzꞌjlenxi Heber, ankꞌintl Sala 403 abkꞌi, ex tzajtzun mastl tcyꞌajal ex tmeꞌjel.
16 Otok japun Heber twiꞌ 34 abkꞌi tej tul itzꞌj Peleg aju tcyꞌajal. 17 Titzꞌjlenxi Peleg, ankꞌintl Heber 430 abkꞌi, ex tzajtzun mastl tcyꞌajal ex tmeꞌjel. 18 Otok japun Peleg twiꞌ 30 abkꞌi tej tul itzꞌj Reu aju tcyꞌajal. 19 Titzꞌjlenxi Reu, ankꞌintl Peleg 209 abkꞌi, ex tzajtzun mastl tcyꞌajal ex tmeꞌjel.
20 Otok japun Reu twiꞌ 32 abkꞌi tej tul itzꞌj Serug aju tcyꞌajal. 21 Titzꞌjlenxi Serug, ankꞌintl Reu 207 abkꞌi, ex tzajtzun mastl tcyꞌajal ex tmeꞌjel.
22 Otok japun Serug twiꞌ 30 abkꞌi tej tul itzꞌj Nacor aju tcyꞌajal. 23 Titzꞌjlenxi Nacor, ankꞌintl Serug cab syenttl abkꞌi, ex tzajtzun mastl tcyꞌajal ex tmeꞌjel.
24 Otok japun Nacor twiꞌ 29 abkꞌi tej tul itzꞌj Taré aju tcyꞌajal. 25 Titzꞌjlenxi Taré, ankꞌintl Nacor 119 abkꞌi, ex tzajtzun mastl tcyꞌajal ex tmeꞌjel. 26 Otok japun Taré twiꞌ 70 abkꞌi tej tul itzꞌj Abram, Nacor ex Harán, akeju tcyꞌajal.
Ke tiyjil Taré
27 Atzun txꞌolbabl jlu cyiꞌj ke tiyjil Taré.
Ate Taré tman Abram, Nacor ex Harán, ex ate Harán tman Lot. 28 Nej cyim Harán twitz tman tujx txꞌotxꞌ jatum ul itzꞌj, tuj tnam Ur cyxol ke aj Caldey.
29 Mojeꞌtzun Abram tucꞌil Sarai, atzun te Nacor mojeꞌ tucꞌil Milca aju tmeꞌjel Harán ex tanb Isca. 30 Mintiꞌtok tal Sarai tuꞌnju mibantok alin.