Laꞌ lac bej pensalin Jesús
12
Ujtyel c subeñetla chaꞌan an cabʌl lac yumob ti ñoj oniyix tsaꞌ bʌ i wen chꞌujbiyob Dios. Maꞌan tiꞌ saj cʌyʌyob Dios chaꞌan ti caj i wocol. Cheꞌ bajcheꞌ añoꞌ bʌ ti lac joytyʌlel yubil tsaꞌ bʌ i pʌsꞌonla bajcheꞌ tiꞌ chꞌujbiyob Dios. Jin chaꞌan yom mi lac waꞌ cʌyeꞌ chʌ bʌ yes yom i mʌctyʌbeñonla lac chaꞌlen wen bʌ, yicꞌot yom mi lac cʌyeꞌ lac mul muꞌ bʌ i mʌctyʌbeñonla lac meleꞌ bajcheꞌ yom Dios. Laꞌ lac wen chaꞌlen wersa chaꞌan machic saj lujbꞌaconla lac chꞌujbin Dios ti jumpꞌej lac pusicꞌal. 2 Laꞌ lac bej pensalin Jesús cheꞌ bajcheꞌ chʌncox laj qꞌueleꞌ yubil como jiñʌch jini tsaꞌ bʌ tyejchi ti lac pusicꞌal jini muꞌ bʌ lac chꞌujbin. Mi bej aqꞌueñonla lac chꞌujbin ti tsꞌʌcʌl. Maꞌan chʌ bʌ ti saj alʌ cheꞌ ñac tiꞌ ñusʌ wocol yaꞌ ti cruz aunque yoque quisintic ti yubi. Como tiꞌ bej pensali i tijicñʌyel muꞌ bʌ i yubiñob cheꞌ miꞌ chꞌujbin Dios cabʌl quixtyañujob. Wale yaꞌ buchul tiꞌ ñoj Dios am bʌ ti cꞌotyajax bʌ i buchlib.
3 Ñaꞌtyanla bajcheꞌ tiꞌ ñusʌ i michꞌqꞌuelol Jesús ti caj xmulilob. Cheꞌ mi laꞌ pensalin bajcheꞌ tiꞌ ñusʌ Jesús mi mejlel i ñuc isʌbeñetla laꞌ pusicꞌal chaꞌan maꞌix mi laꞌ lujbꞌan laꞌ chaꞌlen wen bʌ, chaꞌan maꞌix mi laꞌ cʌy laꞌ bʌ.
4 Como jatyetla max tyo ti laꞌ beque laꞌ chꞌichꞌel chaꞌan bajcheꞌ ti laꞌ cuchu i michꞌqꞌueletla simaroñoꞌ bʌ quixtyañujob.
5 ¿Tsaꞌix ba ñajayi ti laꞌ pusicꞌal bajcheꞌ miꞌ ñuc isʌbeñetla laꞌ pusicꞌal Dios chaꞌan i yalobiletla? Chʌꞌʌch mi yʌleꞌ bajcheꞌ jini ti Tsꞌijbubil bʌ i Tꞌan Dios:
Calobil, chꞌʌmʌ ti a wenta a tyoj isʌntyel ti lac Yum.
Mach a ñoj pensalin cheꞌ miꞌ tiqꞌuet lac Yum.
6 Como lac Yum miꞌ tyoj isan majchical jach miꞌ pꞌuntyan.
Mi yʌqꞌuen i ñusan wocol ti pejtyelel muꞌ bʌ i pʌyeꞌ chaꞌan i yalobilob.
Chʌꞌʌch tsꞌijbubil.
7 Ñusan ti wen cheꞌ mi yʌqꞌueñetla laꞌ ñusan wocol Dios chaꞌan laꞌ tyoj isʌntyel. Como Dios miꞌ tyoj isañonla cheꞌ bajcheꞌ juntiquil tyatyʌl miꞌ tyoj isan i yalobil. Como maꞌan alʌl machꞌʌ baꞌan miꞌ tyoj isʌntyel ti i tyat.
8 Pero mi maꞌix miꞌ tyoj isañet bajcheꞌ i tyʌlel miꞌ tyoj isañonla ti lac pejtyelel, tsiquil cheꞌ jini, mach yoque yalobiletla. Yañʌch bʌ laꞌ tyat.
9 Cheꞌ jeꞌel, lac tyat wʌꞌ ti mulawil, cheꞌ ñac tiꞌ tyoj isʌyonla ti laj qꞌuele ti ñuc. Más tyo yom mi la cʌcꞌ lac bʌ chaꞌan i tyoj isañonla lac Tyat am bʌ ti panchan chaꞌan más wen mi la cajñel wʌꞌ ti mulawil.
10 Como cheꞌ ñac añon tyo la tiꞌ tyojel lac tyat wʌꞌ ti mulawil jini tiꞌ tyoj isʌyonla bajcheꞌ wen ti yubi tiꞌ pusicꞌal. Pero Dios miꞌ tyoj isañonla bajcheꞌ yom chaꞌan lac wenlel chaꞌan mi lac wenꞌan cheꞌ bajcheꞌ chꞌujul Dios.
11 Melelʌch, mach poj tijicña mi yubin jini chʌncol bʌ i yubin i tyoj isʌntyel. Poj chꞌʌjyem mi yubin. Pero cheꞌ tyoj isʌbilix, ñʌchꞌʌlix i pusicꞌal. Más tyoj mi yajñel.
Bʌqꞌuentic mi lac ñusan lac pʌyol ti Dios
12 Jatyet chꞌʌjyemet bʌ la, muqꞌuet bʌ la ti cabʌl pensal, xucꞌchocon laꞌ pusicꞌal ti Dios chaꞌan laꞌ cucheꞌ ti wen jini wocol chʌncol bʌ a ñusan.
13 Beleꞌ chaꞌlenla wen bʌ. Mach a lolon pʌsꞌen jini max tyo bʌ yoque xucꞌul bʌ hermañujob i chaꞌlen machꞌʌ tyoj bʌ i chaꞌlibal ame i cʌyeꞌ Dios. Pero xucꞌchocon laꞌ pusicꞌal ti Dios.
14 Bej chaꞌlenla wersa chaꞌan mi laꞌ wajñel ti ñʌchꞌʌl laꞌ wicꞌot ti pejtyelel yaño bʌ. Ajñenla ti i sʌc isʌntyel laꞌ pusicꞌal como machꞌan mi quejel i qꞌuel lac Yum jini machꞌʌ baꞌan sʌc i pusicꞌal.
15 Wen qꞌuele laꞌ bʌ chaꞌan maꞌan majch miꞌ lolon ñusan jini wen bʌ yom bʌ i yʌqꞌueñonla Dios. Qꞌuele laꞌ bʌ ame mi tyejchel laꞌ michꞌlel ti laꞌ pusicꞌal muꞌ bʌ i yʌqꞌueñob i venenojlel yubil jini yañoꞌ bʌ.
16 Qꞌuele laꞌ bʌ chaꞌan maꞌan majch miꞌ chaꞌlen i tsuculel o mi maꞌan miꞌ qꞌuel ti ñuc Dios, cheꞌ bajcheꞌ tiꞌ chaꞌle Esaú. I tyʌlel an chʌ bʌ yes mi yʌqꞌuentyel ti i tyat chaꞌan ti caj ascuñʌl jini Esaú. Pero tiꞌ chombe i yijtsꞌin i wentyʌlel ti pejtyelel jini muꞌ bʌ quejel i yʌqꞌuentyel chaꞌan ti junsujtyel jach bʌ i bʌl i ñʌcꞌ.
17 Laꞌ wujil isujm cheꞌ wiꞌil tyo yom i chꞌʌmeꞌ i yutslel i tꞌan i tyat i tyʌlel mi yʌqꞌuentyel ascuñʌl bʌ ti i tyat. Pero aunque tiꞌ chaꞌle uqꞌuel Esaú chaꞌan yom i wersa chꞌʌmeꞌ maꞌan tiꞌ jacꞌʌ i tyat. Maꞌix ti mejli i chꞌʌmeꞌ como maꞌan bajcheꞌ chꞌujbi i chaꞌ qꞌuextyan i tꞌan i tyat.
18 Como jini tsaꞌ bʌ laꞌ chꞌujbi mach jinic muꞌ bʌ lac tyʌleꞌ muꞌ bʌ laj qꞌueleꞌ. Mach lajal cheꞌ bajcheꞌ yorojlel ti aqꞌuentiyob ti Dios jini mandar tyac lac yumob ti ñoj oniyix. Como ti cꞌotiyob yaꞌ ti wits muꞌ ti wen lejmel ti cꞌajc yicꞌot bʌbʌqꞌuen icꞌjowan bʌ pañimil yicꞌot yoque toñel bʌ icꞌ.
19 Como jatyetla maꞌan ti laꞌ wubi i tꞌan trompeta yicꞌot maꞌan ti laꞌ wubi cheꞌ ñac Dios tiꞌ pejcʌyob. Jini tsaꞌ bʌ yubiyob, mach cujch jini tꞌan tyac ti yubiyob. Tiꞌ cꞌajtiyob ti wocol tꞌan chaꞌan maꞌan mi bej pejcʌntyelob.
20 Tiꞌ wen chaꞌleyob bʌqꞌuen cheꞌ ñac ti yubi bajcheꞌ ti xijqꞌuiyob ti Dios. Mach cujch ti yubiyob como Dios tiꞌ xiqꞌuiyob chaꞌan mi jinic animal chꞌujbi i cꞌotyel ti jini wits. Mi ti cꞌoti mi quejel i wersa tsʌnsʌntyel ti tyun o mi ti machit.
21 Chaꞌan ti caj yoque bʌbʌqꞌuen ti yilʌyob jini wits yicꞌot ti pejtyelel tsaꞌ bʌ i yilʌ lac yumob ti ñoj oniyix, jinic tyo Moisés jeꞌel ti yʌlʌ: Wen mucꞌon ti bʌqꞌuen. Tsitsilñayon ti bʌqꞌuen. Cheꞌ ti yʌlʌ Moisés.
22 Jatyetla, maꞌan baꞌ bʌ ora tiꞌ xiqꞌuiyetla Dios laꞌ lʌqꞌueꞌ jumpꞌej wits muꞌ bʌ ti wen lejmel bajcheꞌ tiꞌ xiqꞌui i chaꞌlen lac yumob ti ñoj oniyix. Pero chaꞌan chʌncol laꞌ wen chꞌujbiben Jesucristo, chʌncox laꞌ lʌcꞌ yubil jini wits Sión bʌ i cꞌabaꞌ baꞌ mi yajñel jini cuxul bʌ Dios, yaꞌ ti mali lum yaꞌ ti panchan Jerusalén bʌ i cꞌabaꞌ. Yaꞌan jeꞌel ñoj yonlel chaꞌan mach chꞌujbi tsicol jini ajtroñelob i chaꞌan Dios chꞌoyol bʌ ti panchan.
23 Yaꞌ chʌncox la cochel yaꞌ ti panchan jeꞌel la quicꞌot ti pejtyelel i yalobilob Dios tsꞌijbubiloꞌ bʌ i cꞌabaꞌ yaꞌ ti panchan. Mi quejel lac motin lʌqꞌueꞌ Dios jiñʌch jini ñoj ñuc bʌ baꞌ mi quejel lac meleꞌ lac bʌ yicꞌot ti pejtyelel tsaꞌ bʌ qꞌuejliyob ti wen ti Dios. Yaꞌ luꞌ muchꞌquibilob tiꞌ tijicñʌyel i pusicꞌal chaꞌan miꞌ subob i ñuclel Dios.
24 Yicꞌot yaꞌ mi lac lʌqꞌueꞌ Jesús jini la cajcotyaya tsaꞌ bʌ i melbeyonla tsijiꞌ bʌ trato bʌ tꞌan yicꞌot Dios. Yicꞌot yaꞌ mi lac lʌqꞌueꞌ yubil jini i chꞌichꞌel Jesús tsaꞌ bʌ i beque chaꞌañonla. Tiꞌ beque i chꞌichꞌel Jesús chaꞌan i ñusʌbeñonla lac mul. Tiꞌ bejqui i chꞌichꞌel Abel ti ñoj oniyix pero jini tsaꞌ bʌ i beque ti aqꞌuenti i xotꞌeꞌ i mul.
25 Qꞌuele laꞌ bʌ chaꞌan mi laꞌ wen ñʌchꞌtyan i tꞌan Dios cheꞌ miꞌ pejcañonla. Como mi maꞌix ti mejli i putsꞌtyan xotꞌmulil jini tsaꞌ bʌ i ñusʌbe i tꞌan cheꞌ ñac ti subentiyob ti i piꞌʌl bʌ quixtyañu wʌꞌ ti mulawil, ¿bajcheꞌ chꞌujbi lac putsꞌtyan xotꞌmulil joñonla maꞌ wʌl mi ti lac ñusʌbe i tꞌan cheꞌ ti subentiyonla ti jini am bʌ ti panchan?
26 Cheꞌ ñac tiꞌ pejcʌ Dios lac yumob ti ñoj oniyix chaꞌan i yʌqꞌueñob mandar tyac, ti nijcʌyi mulawil ti i tꞌan. Pero wale Dios ti yʌcꞌʌ i tꞌan. Ti yʌlʌ: Yambʌ junyajlel mi quejel c nijcan mulawil. Pero mach jinic jach mulawil conto yicꞌot ti chan jeꞌel yaꞌ baꞌan uw yicꞌot ecꞌ yicꞌot qꞌuin.
27 Cheꞌ ñac ti yʌlʌ: Yambʌ junyajlel, cheꞌen, yom i yʌqꞌueñonla lac ñaꞌtyan chaꞌan Dios mi quejel i chaꞌ nijcan ti pejtyelel i melbal jini yujil bʌ nijcʌyel. Jini jach mi quejel i jalejel jini mach bʌ yujil nijcʌyel.
28 Jini cꞌotyajax bʌ lac lumal chʌncol bʌ i yʌqꞌueñonla Dios yaꞌ ti panchan yicꞌot, mach saj yujil nijcʌyel. Jin chaꞌan laꞌ lac suben Dios wocox i yʌlʌ. Laꞌ laj qꞌuel ti ñuc. Laꞌ lac chꞌujutisan bajcheꞌ miꞌ mulan i pusicꞌal Dios.
29 Como lac Dios cheꞌ bajcheꞌ colem cꞌajc yubil como mi quejel i yʌqꞌueñob i xotꞌeꞌ i mul majchical jach mach bʌ wen miꞌ chaꞌlen.