2 Chaꞌan tiꞌ chꞌujbiyob Dios, lac yumob ti ñoj oniyix ti qꞌuejliyob ti wen ti Dios.

3 Chaꞌan ti lac chꞌujbi Dios, mi lac ñaꞌtyan chaꞌan maꞌan chʌ bʌ tiꞌ cꞌʌñʌ Dios i meleꞌ mulawil. Tiꞌ tꞌan jach ti mejli. Maꞌan ti saj cꞌʌñʌ chʌ bʌ jach tsiquil bʌ chaꞌan i meleꞌ ti pejtyelel chʌ bʌ jach mejlem.

4 Chaꞌan tiꞌ chꞌujbi Dios, Abel ti yʌqꞌue Dios i majtyan tsaꞌ bʌ i más mulʌ Dios cheꞌ bajcheꞌ tiꞌ mulʌ i majtyan tsaꞌ bʌ aqꞌuenti ti Caín. Jin chaꞌan Dios tiꞌ qꞌuele ti tyoj jini Abel, Dios tiꞌ chꞌʌmbe i majtyan. Wale iliyi aunque sajtyemix jini Abel chʌncox i cʌntisañonla yubil chaꞌan ti caj bajcheꞌ tiꞌ chꞌujbi Dios.

5 Chaꞌan tiꞌ chꞌujbi Dios, maꞌan ti sajti Enoc. Ti pʌjyi letsel ti panchan cheꞌ cuxul tyo. Maꞌan chaꞌ tsiquil wʌꞌ ti mulawil como ti pʌjyi letsel ti panchan ti Dios. Mi yʌleꞌ ti yambʌ jun ti Tsꞌijbubil bʌ i Tꞌan Dios chaꞌan cheꞌ ñac max tyo ti pʌjyi letsel Enoc yaꞌ ti panchan i tyʌlel ti ajni ti chʌ bʌ tiꞌ mulʌ Dios.

6 Pero mach chꞌujbi la cajñel bajcheꞌ miꞌ mulan Dios cheꞌ maꞌix mi lac chꞌujbin cheꞌ mi quejel i chaꞌlen Dios bajcheꞌ ti yʌlʌ. Como jini muꞌ bʌ i lʌqꞌueꞌ Dios ti oración wersa yom i chꞌujbin mi an Dios. Miꞌ chꞌujbin jeꞌel chaꞌan Dios mi yʌqꞌuen i tyojol i wentyʌlel jini muꞌ bʌ i sajcan Dios.

7 Noé tiꞌ chꞌujbi Dios. Cheꞌ ñac Dios tiꞌ wʌ sube chʌ bʌ yes mi quejel i yujtyel cheꞌ max tyo baꞌan tsiquil mi quejel yujtyel, Noé tiꞌ chꞌujbibe i tꞌan. Tiꞌ mele colem bʌ barco chaꞌan mi yochel ti barco i yijñam i yalobilob aunque max tyo saj tsiquil mi quejel i tyʌlel butꞌ jaꞌ. Maꞌan chʌ bʌ ti tyumbentiyob. Chaꞌan chʌꞌʌch tiꞌ chꞌujbi Dios, Noé tiꞌ tsictisʌ chaꞌan machꞌan tiꞌ chꞌujbi Dios yañoꞌ bʌ. Ti luꞌ sajtiyob ti butꞌ jaꞌ. Pero chaꞌan Noé tiꞌ chꞌujbi Dios ti qꞌuejli ti wen ti Dios.

8 Abraham tiꞌ chꞌujbi Dios. Jin chaꞌan cheꞌ ñac Dios tiꞌ xiqꞌui i cʌyeꞌ i lumal chaꞌan mi majlel ti yambʌ lum muꞌ tyo bʌ quejel i yʌqꞌuentyel ti Dios, tiꞌ waꞌ chꞌujbibe i tꞌan Dios. Ti loqꞌui majlel aunque maꞌan tiꞌ ñaꞌtyʌ baꞌ mi quejel i majlel.

9 Chaꞌan tiꞌ chꞌujbi Dios jini Abraham tiꞌ chumle yaꞌ ti jini lum tsaꞌ bʌ i wʌ alʌ Dios mi quejel i yʌqꞌuentyel. Cheꞌ bajcheꞌ mi i lumal yambʌ quixtyañu tiꞌ chaꞌle Abraham. Ti chumle ti pisil jach bʌ otyot cheꞌ bajcheꞌ ñumel jach mucꞌ bʌ quixtyañu. Chʌꞌʌch tiꞌ chaꞌle Isaac yicꞌot Jacob jeꞌel aunque Dios ti wʌ aqꞌueyob i tꞌan chaꞌan lajal cheꞌ bajcheꞌ Abraham i chaꞌañobʌch jini lum.

10 Chʌꞌʌch tiꞌ ñusʌ qꞌuin Abraham chaꞌan chʌncol i bej pijtyan chaꞌan Dios miꞌ pʌsꞌen jini tsijiꞌ bʌ mali lum machꞌʌ baꞌan mi jilel tsaꞌ bʌ i mele Dios bajcheꞌ tiꞌ pensali tiꞌ bajñel i pusicꞌal i meleꞌ.

11 Jini Sara, i yijñam Abraham, tiꞌ chꞌujbi Dios jeꞌel. Jin chaꞌan, aunque wen ñejepꞌix jini Sara, Dios tiꞌ cotyʌ chaꞌan ti mejli i cʌñʌtyan i yalobil. Tiꞌ chꞌocʌ aloꞌ bʌ i yalobil. Chʌꞌʌch ti ujti yicꞌot jini Sara como tiꞌ chꞌujbi chaꞌan Dios mi mejlel i tsꞌʌctisan bajcheꞌ tiꞌ wʌ alʌ mi quejel i yujtyel yicꞌot.

12 Jin chaꞌan, cheꞌ más ñoxix cheꞌ bajcheꞌ i tyʌlel chꞌujbi i tyʌlel i yalobil quixtyañu, tiꞌ chꞌocʌ i yalobil Abraham. Cheꞌ jini, loqꞌuem ti i yalobil ti tyʌli i yonlel i jiñʌjlel Abraham. Lajal cheꞌ bajcheꞌ mach chꞌujbi lac tsiqueꞌ jaypꞌej ecꞌ am bʌ ti chan chʌꞌʌch jeꞌel mach chꞌujbi lac tsiqueꞌ jiꞌ ti tiꞌ colem jaꞌ cheꞌ bajcheꞌ jini mach chꞌujbi lac tsiqueꞌ jaytiquil i jiñʌjlel loqꞌuem bʌ ti jini Abraham.

13 Ti pejtyelel jiñob tsaꞌ bʌ lac tyaja ti tꞌan xucꞌul chʌncol i chꞌujbin Dios cheꞌ ñac ti sajtiyob. Cheꞌ ñac ti sajtiyob max tyo baꞌan ti aqꞌuenti jini tsaꞌ bʌ i wʌ subentiyob mi quejel i yʌqꞌuentyelob. Pero cheꞌ bajcheꞌ ti ñajtyʌ ilʌyob yubil como tiꞌ chꞌujbi chaꞌan muꞌ tyo quejel i tyajob. Tijicñayob cheꞌ jini. Ti luꞌ alʌyob chaꞌan ñumel jach mucꞌob wʌꞌ ti mulawil. Mach yoque i lumalic mulawil ti yʌlʌyob.

14 Tsiquilʌch jini muꞌ bʌ i chaꞌlen tꞌan cheꞌ bajcheꞌ jini, chʌncol i pijtyañob chaꞌan cꞌoticob yaꞌ ti panchan.

15 Tsaꞌic i pensaliyob i lumal tsaꞌ bʌ i cʌyʌyob, tsaꞌix mejliyob i chaꞌ sujtyel.

16 Pero maꞌan tiꞌ mulʌyob i sujtyel. Chʌncol i sajcañob más wen bʌ i lumal, jiñʌch yaꞌ ti panchan. Jin chaꞌan Dios machꞌan mi quisnin cheꞌ mi pejcʌntyel ti i Diosob. Tsaꞌix i chajpʌbeyob jumpꞌej mali lum yaꞌ ti panchan.

17 Dios tiꞌ qꞌuelbe i pusicꞌal Abraham mi mux i yajñel ti xucꞌul aunque mi yʌqꞌuen i ñusan wocol. Pero Abraham tiꞌ wen chꞌujbi Dios. Ti subenti i tsʌnsan i yalobil Isaac bʌ i cꞌabaꞌ chaꞌan tsʌnsʌbil bʌ i majtyan Dios bajcheꞌ i tyʌlel ti yʌqꞌueyob tsʌnsʌbil bʌ alʌqꞌuil tyac chaꞌan i majtyan Dios ti ñoj oniyix. Chajpʌbilix i tsʌnsan Isaac, jiñʌch cojach bʌ i yalobil, aunque Dios tiꞌ wʌ sube jini Abraham:

18 Loqꞌuem ti Isaac mi quejel i tyʌlel i yonlel a jiñʌjlel. Cheꞌ ti subenti Abraham ti Dios.

19 Jini Abraham tiꞌ chꞌujbi ti pejtyelel i pusicꞌal chaꞌan Dios chꞌujbi i chaꞌ tyejchisan loqꞌuel baꞌan sajtyemoꞌ bʌ jini Isaac mi ti tsʌnsʌnti. Como chaꞌan yoque chajpʌbilix i tsʌnsan i yalobil cheꞌ bajcheꞌ sajtyemix yubil. Jin chaꞌan cheꞌ bajcheꞌ loqꞌuem baꞌan sajtyemoꞌ bʌ ti yubi como cuxulʌch tiꞌ chaꞌ pʌyʌ sujtyel ti yotyot.

20 Chaꞌan tiꞌ chꞌujbi Dios, Isaac ti yʌqꞌue i yutslel i tꞌan i yalobilob chaꞌan chʌ bʌ tyac yes mi quejel i yujtyel. Jini i yalobilob jiñʌch jini Jacob yicꞌot Esaú.

21 Chaꞌan tiꞌ chꞌujbi Dios, Jacob cheꞌ ñac yomox sajtyel ti yʌqꞌueyob i yutslel i tꞌan tiꞌ chaꞌticlel i yalobilob José. Tiꞌ chꞌujutisʌ Dios cheꞌ chʌncox i ñʌꞌ tyeꞌin i ñʌꞌtyeꞌ.

22 Jini José tiꞌ chꞌujbi Dios jeꞌel. Tiꞌ chꞌujbi chaꞌan mi cꞌotyel i yorojlel cheꞌ mi quejel i loqꞌuelob israelob ti Egipto cheꞌ bajcheꞌ ti wʌ alʌ Dios. Jin chaꞌan cheꞌ ñac lʌcꞌʌlix i yorojlel i sajtyel tiꞌ wʌ subeyob bajcheꞌ yom i cuch majlel i bʌquel tyac chaꞌan mi loqꞌuel majlel José jeꞌel i wentyʌlel.

23 Cheꞌ ñac ti chꞌocʌ Moisés i tyat i ñaꞌ wen cꞌotyajax tiꞌ qꞌuelelob. Chaꞌan tiꞌ chꞌujbiyob chaꞌan Dios chꞌujbi i cʌñʌtyan Moisés maꞌan tiꞌ bʌcꞌñʌyob i ñusʌben i xicꞌojel jini rey tsaꞌ bʌ i xiqꞌui ti tsʌnsʌntyel ti pejtyelel saj alobob. Tiꞌ poj mucuyob Moisés tres meses chaꞌan maꞌan mi tyajtyʌl.

24 I yixicpꞌeñal jini rey Faraón bʌ i cꞌabaꞌ tiꞌ cosʌ Moisés cheꞌ bajcheꞌ i yalobilʌch. Chaꞌan tiꞌ chꞌujbi Dios, cheꞌ ñac colem winiquix jini Moisés maꞌan ti yʌcꞌʌ i bʌ ti pejcʌntyel ti i yalobil jini yixicpꞌeñal Faraón.

25 Pero ti yajcʌ i ñusan i tyʌcꞌlentyel yicꞌot i chaꞌañoꞌ bʌ Dios. Maꞌan ti yajcʌ i chaꞌlen machꞌʌ wen muꞌ bʌ i poj aqꞌuen i tijicñʌyel i pusicꞌal ti jumucꞌ jach.

26 Jini Moisés tiꞌ ñaꞌtyʌ tiꞌ pusicꞌal chaꞌan más i cꞌʌjnibal i ñusan i tyʌcꞌlentyel chaꞌan ti caj Cristo muꞌ tyo bʌ i tyʌlel cheꞌ bajcheꞌ mi ti pejcʌnti ti i yalobil i yixicpꞌeñal jini yumʌl Faraón chaꞌan i tyajeꞌ ti pejtyelel i ricojlel baꞌan Egiptojob. Chʌꞌʌch ti yajcʌ i chaꞌlen Moisés como miꞌ bej pensalin bajcheꞌ mi yʌqꞌuentyel i tyojol ti Dios.

27 Chaꞌan tiꞌ chꞌujbi Dios, Moisés ti loqꞌui majlel ti Egipto. Maꞌan tiꞌ bʌcꞌñʌ i michꞌlel jini ñuc bʌ yumʌl. Ti ajni ti xucꞌul jini Moisés ti jini tsaꞌ bʌ i chaꞌle cheꞌ bajcheꞌ chʌncox i qꞌueleꞌ Dios machꞌʌ chꞌujbi laj qꞌuel.

28 Chaꞌan tiꞌ chꞌujbi Dios, Moisés tiꞌ xiqꞌui jini israelob i tsʌnsañob juncojt saj tiñʌmeꞌ ti jujumpꞌej otyot chaꞌan i tsijcan i chꞌichꞌel ti i tiꞌ i yotyot. Cheꞌ jini Dios tiꞌ xiqꞌui tyʌlel juntiquil ajtroñel i chaꞌan chꞌoyol bʌ ti panchan chaꞌan i yochel ti yotyotyel tyac i tsʌnsan yʌx alʌl bʌ alob ti jujumpꞌej otyot. Pero maꞌan ti ochi mi ti jumpꞌejlic otyot baꞌ tiꞌ chꞌujbibe i tꞌan Moisés i tsijcan i chꞌichꞌel saj tiñʌmeꞌ ti i tiꞌ otyot.

29 Chaꞌan tiꞌ chꞌujbiyob Dios, jini israelob ti cꞌaxiyob ti colem jaꞌ cheꞌ bajcheꞌ ti tyʌquin bʌ lum chaꞌan Dios tiꞌ tꞌoxbeyob jini jaꞌ. Pero cheꞌ ñac jini soldadojob i chaꞌan bʌ Egipto tiꞌ lolon jopꞌo i cꞌaxelob ti luꞌ sajtiyob ti jaꞌ Chʌchʌc Jaꞌ bʌ i cꞌaba.

30 Chaꞌan tiꞌ chꞌujbiyob Dios israelob, ti yajli tsꞌajc am bʌ ti joytyʌlel lum Jericó bʌ i cꞌabaꞌ cheꞌ ñac ti joy ñumiyob siete días, cheꞌ bajcheꞌ ti xijqꞌui ti Dios.

31 Yaꞌan juntiquil xꞌixic yaꞌ ti Jericó Rahab bʌ i cꞌabaꞌ. Jini Rahab ti wajali jiñʌch juntiquil xꞌixic i tsuculel bʌ miꞌ chaꞌlen muꞌ bʌ i chon i bʌ. Chaꞌan tiꞌ chꞌujbi Dios, maꞌan ti tsʌnsʌnti yicꞌot jini tsaꞌ bʌ i ñusʌbe i tꞌan Dios yaꞌ ti Jericó. Como Rahab tiꞌ cotyʌ israelob cheꞌ ñac ti cꞌotiyob i mucul qꞌuelob jini lum. Tiꞌ poj mucuyob ti yotyot.

32 Maꞌix chʌbʌꞌoch mic bej subeñetla yambʌ. Mach jasʌl i yorojlel chaꞌan mic subeñet bajcheꞌ tiꞌ chꞌujbiyob Dios jini Gedeón, Barac, Sansón, Jefté, David, Samuel mi jinic tsaꞌ bʌ i xiqꞌui i yʌleꞌ Dios.

33 Chaꞌan tiꞌ chꞌujbiyob Dios, tiꞌ ganariyob cheꞌ an guerra tiꞌ contra yumʌlob. Weñʌch tiꞌ chaꞌleyob i yeꞌtyel ti yumʌl. Ti aqꞌuentiyob jini tsaꞌ bʌ i wʌ alʌ Dios mi quejel i yʌqꞌuentyel. Dios tiꞌ cotyʌ chaꞌan tiꞌ mʌcbe i tiꞌ xchʌc bajlʌm tyac chaꞌan mach i cꞌuxeꞌ jini quixtyañu tsaꞌ bʌ chojqui ochel yaꞌ baꞌan xchʌc bajlʌm.

34 Chaꞌan tiꞌ chꞌujbiyob Dios maꞌan chʌ bʌ ti tyumbentiyob ti cꞌajc cheꞌ ñac ti chojqui ochel chaꞌan tsʌnsʌntic. Yicꞌot maꞌan ti tsʌnsʌntiyob ti espada. Aunque cꞌun i bʌcꞌtyal chaꞌan ti caj i wocol ti aqꞌuentiyob i pꞌʌtyʌlel i bʌcꞌtyal. Chꞌejlob ti guerra. Ti yajnisʌyob i contra tyʌlemoꞌ bʌ ti yambʌ pañimil tyac.

35 An xꞌixicob chaꞌan tiꞌ chꞌujbiyob Dios, Dios tiꞌ chaꞌ tyejchisʌ loqꞌuel i piꞌʌlob yaꞌ baꞌan sajtyemoꞌ bʌ. An yambʌ quixtyañujob aunque ti aqꞌuentiyob i cʌlʌx ñusan wocol, ti tyʌcꞌlʌnti cꞌʌlʌ ti sajti, maꞌan ti lolon alʌyob maꞌan miꞌ chꞌujbiñob Dios chaꞌan mi cojlel ti wocol. Como tiꞌ chꞌujbiyob chaꞌan mi ti sajtiyob, Dios mi quejel i chaꞌ tyech loqꞌuel yaꞌ baꞌan sajtyemoꞌ bʌ chaꞌan más wen mi quejel i yajñelob yaꞌ ti panchan baꞌan Dios.

36 An tsaꞌ bʌ i ñusʌyob wocol chaꞌan ti wajlentiyob, an tsaꞌ bʌ i jatsꞌʌyob ti pʌchij am bʌ yicꞌot tsucul tyaqꞌuin chaꞌan ñoj cꞌux. Jinic tyo an tsaꞌ bʌ i cʌjchʌyob tyac ti cadena yicꞌot ti otsʌntiyob ti cʌchol.

37 An tsaꞌ bʌ i tsʌnsʌyob ti tyun. An tsaꞌ bʌ i tyucꞌ tsepeyob ti xinil. An tsaꞌ bʌ tsʌnsʌntiyob ti machit. Cheꞌ ti pet ñumiyob majlel i pʌchʌlel jach tiñʌmeꞌ o i pʌchʌlel chibu lʌpʌlob i chaꞌan. Pꞌumpꞌuñob. Tiꞌ wen ñusʌyob wocol. Ti wen tyʌcꞌlʌntiyob.

38 Ti pet ñumiyob ti tyʌquin bʌ joch lum yicꞌot ti wits. Ti chumleyob ti lechꞌ tyun tyac yicꞌot ti joꞌñal lum. Mach saj wen jini yambʌ quixtyañujob chaꞌan i motin ajñelob yicꞌot jini tsaꞌ bʌ i chꞌujbiyob Dios.

39 Pero ti jujuntiquil jini quixtyañujob, aunque ti qꞌuejli ti wen ti Dios chaꞌan bajcheꞌ tiꞌ chꞌujbiyob Dios, maꞌan ti waꞌ aqꞌuentiyob jini tsaꞌ bʌ i wʌ alʌ Dios muꞌ tyo bʌ quejel i yʌqꞌuentyelob.

40 Dios tiꞌ chajpʌbeyonla jini más wen bʌ. Mach yom i wʌ aqꞌueñob i tyajeꞌ lac yumob ti ñoj oniyix cheꞌ max tyo lac tyaja joñonla. Jin chaꞌan ti yʌqꞌueyob i pijtyan jintyo ti tyʌli Cristo chaꞌan lac motin tyajeꞌ jini chʌncol bʌ lac pijtyan.