2 Anic bajcheꞌ chꞌujbi i junyajlel sʌc isʌntyel i pusicꞌal quixtyañu cheꞌ mi yʌqꞌueñob tsʌnsʌbil bʌ i majtyan Dios, cheꞌ jini machꞌan chʌ bʌ och miꞌ bej aqꞌuen yambʌ como machꞌanix i mul mi yubin.

3 Pero chaꞌan ti caj mi yʌqꞌuen tsʌnsʌbil tyac bʌ i majtyan Dios ti jujumpꞌej jab, tsiquilʌch an i chaꞌ cꞌajtisʌntyelob chaꞌan añʌch i mul.

4 Como mach saj chꞌujbi i locꞌsʌben i mul quixtyañujob i chꞌichꞌel tyat wacax mi i chꞌichꞌel chibu.

5 Jin chaꞌan cheꞌ ñac ti tsꞌʌctiyi i yorojlel cheꞌ ñac ti tyʌli Cristo wʌꞌ ti malawil tiꞌ sube Dios:

8 Cheꞌ ñac ti ujti i yʌleꞌ bajcheꞌ ujtyel c subeñetla, Cristo tiꞌ sube Dios: Mach a wom a wʌqꞌuentyel mi maꞌan ti a yoque mulʌ tsʌnsʌbil bʌ a majtyan tyac yicꞌot pulem bʌ a majtyan tyac yicꞌot a majtyan tyac tsaꞌ bʌ aqꞌuenti chaꞌan i ñusʌntyel i mul quixtyañu. Cheꞌ ti yʌlʌ Cristo aunque ti aqꞌuenti Dios ti pejtyelel ili majtyan tyac cheꞌ bajcheꞌ xiqꞌuil tiꞌ mandar Moisés.

9 Cheꞌ ti ujti i yʌleꞌ bajcheꞌ jini, Cristo ti yʌlʌ: C Dios, wʌꞌañon chaꞌan c meleꞌ bajcheꞌ yom a pusicꞌal, cheꞌen. Chʌꞌʌch ti ujti chaꞌan miꞌ pʌsꞌen isujm cheꞌ jilemix i cꞌʌjnibal tyac bajcheꞌ i tyʌlel ti yʌqꞌueyob i majtyan Dios chaꞌan i chꞌichꞌel Cristo ti ochi tiꞌ qꞌuexol yambʌ tsʌnsʌbil bʌ i majtyan tyac.

10 Chaꞌan tiꞌ chaꞌle Cristo bajcheꞌ yom i pusicꞌal Dios chaꞌan junyajlel ti yʌcꞌʌ i bʌ chaꞌan tsʌnsʌbil bʌ i majtyan Dios chaꞌan ti pejtyelelob, cheꞌ jini ñusʌbilix lac mul, sʌc isʌbilix lac pusicꞌal cheꞌ mi lac chꞌujbin.

11 Jini curajob wʌꞌ ti mulawil ti jujumpꞌej qꞌuin miꞌ bej aqꞌuen tsʌnsʌbil bʌ i majtyan Dios. An más ti junyajlel mi yʌqꞌuen junsujm jach bʌ i majtyan. Pero machꞌan i cꞌʌjnibal jini i majtyan tyac chaꞌan i locꞌsʌben i mul quixtyañujob.

12 Pero Jesucristo ti yʌcꞌʌ i bʌ ti sajtyel chaꞌan junchajp jach tsʌnsʌbil bʌ i majtyan Dios chaꞌan i xotꞌbeñonla lac mul chaꞌan ti beleꞌ ora. Cheꞌ jini, ti buchle ti i ñoj Dios yaꞌ ti panchan chaꞌan tsiquil mi qꞌuejlel ti ñuc ti Dios.

13 Yaꞌ tyo chʌncox i bej pijtyan jintyo Dios miꞌ jotben i pꞌʌtyʌlel i contra chaꞌan i yumiñob Jesús.

14 Como ti caj Cristo ti yʌcꞌʌ i bʌ chaꞌan ajnic ti junchajp jach tsʌnsʌbil bʌ i majtyan Dios. Cheꞌ bajcheꞌ jini tiꞌ cotyʌ quixtyañujob chaꞌan maꞌan chʌ bʌ saj yom jini sʌc isʌbilobix bʌ i pusicꞌal tsaꞌ bʌ i yajcʌyob chaꞌan mi yajñel ti i chaꞌañoꞌ bʌ Dios.

15 Jini Chꞌujul bʌ i Chꞌujlel Dios mi yʌleꞌ jeꞌel melelʌch como ti yʌlʌ:

17 Mi yʌleꞌ jeꞌel:

18 Cheꞌ jini, cheꞌ tsaꞌix ñusʌbentiyob i mul maꞌan chʌ bʌ och i chaꞌ aqꞌuen i majtyan Dios chaꞌan i ñusʌntyel i mul.

19 Jin chaꞌan, hermañujob, chaꞌan tiꞌ beque i chꞌichꞌel Cristo ti laj caj, wale chꞌujbi lac lʌqꞌueꞌ Dios baꞌical bʌ ora la com chaꞌan ti oración. Mach sajlic an lac bʌqꞌuen lac lʌqꞌueꞌ Dios.

20 Chaꞌan ti caj Cristo ti sajti chaꞌañonla cheꞌ bajcheꞌ tiꞌ jambentiyonla i bijlel panchan yubil. Cheꞌ jini chꞌujbi la cochel yaꞌ ti panchan baꞌan Dios. Jiñʌch tsijiꞌ bʌ lac bijlel yubil baꞌ mi la cʌqꞌuentyel laj cuxtyʌlel machꞌʌ yujil jilel.

21 Joñonla i yalobilonla Dios, an ñoj ñuc bʌ laj cura. Jiñʌch Jesús.

22 Jin chaꞌan yom mi lac lʌqꞌueꞌ Dios chaꞌan mi lac chꞌujutisan ti jumpꞌej lac pusicꞌal. Yom bej xucꞌul lac pusicꞌal ti jini chʌncol bʌ lac chꞌujbin. Chaꞌan Cristo ti beque i chꞌichꞌel chaꞌan i locꞌsʌbeñonla lac mul maꞌix bej an lac mul mi la cubin. Chaꞌan tsaꞌix lac chꞌʌmʌ jaꞌ cheꞌ bajcheꞌ sʌquix lac bʌcꞌtyal chaꞌan ti sʌc bʌ jaꞌ yubil.

23 Yom junyajlel xucꞌulonla mi lac pijtyan jini tsaꞌ bʌ i wʌ alʌ Dios mi quejel i yʌqꞌueñonla yaꞌ ti panchan la quicꞌot. Como xucꞌulʌch Dios. La cujil isujm mux i chaꞌlen bajcheꞌ ti wʌ alʌ.

24 Yom mi lac pensalin bajcheꞌ yom mi lac chaꞌlen chaꞌan mi lac pꞌuntyan lac bʌ yicꞌot chaꞌan mi lac chaꞌlen wen bʌ tiꞌ tyojlel lac piꞌʌlob.

25 Mach yom mi laj cʌy lac muchꞌquin lac bʌ ti culto tyac cheꞌ bajcheꞌ miꞌ cʌyob i bʌ chaꞌtiquil uxtiquil. Pero yom mi lac xicꞌ lac bʌ chaꞌan mi laj cꞌotyel. Más tyo yom mi lac xicꞌ lac bʌ cheꞌ mi lac ñaꞌtyan chʌncox i lʌcꞌtyʌlel i yorojlel mi quejel i chaꞌ tyʌlel lac Yum.

26 Pero mi ti lac wen chꞌʌmbe isujm chaꞌan ti sajti Cristo chaꞌan i xotꞌbeñonla lac mul pero mi chʌncol tyo lac bej chaꞌlen mulil chaꞌan la com jach, cheꞌ jini machꞌan yambʌ bajcheꞌ chꞌujbi i ñusʌbeñon lac mul. Como maꞌan yambʌ tsʌnsʌbil bʌ i majtyan Dios muꞌ bʌ i xotꞌbeñon lac mul.

27 Mi chʌꞌʌch mi lac lolon ñusan laj cotyʌntyel maꞌan yambʌ wen bʌ muꞌ bʌ lac pijtyan. Cheꞌ jach mi lac wen bʌcꞌñan lac mel lac bʌ baꞌan Dios yicꞌot i bʌcꞌñʌntyel jini cꞌajc muꞌ bʌ ti lejmel muꞌ bʌ i jisan jini tsaꞌ bʌ i contrajiyob Dios.

28 Cheꞌ an juntiquil tsaꞌ bʌ i ñusʌbe i mandar Moisés, mi an chaꞌtiquil uxtiquil tsaꞌ bʌ i yoque yilʌ miꞌ subeꞌ i mul, mi wersa tsʌnsʌntyel jini xñusa mandar. Maꞌix mi saj pꞌuntyʌntyel.

29 Mi chʌꞌʌch ti tsʌnsʌntiyob jini tsaꞌ bʌ i ñusʌbe i mandar Moisés yom i yʌqꞌuentyel i ñusan yoque más bʌqꞌuentic tyo bʌ xotꞌmulil jini muꞌ bʌ i pꞌajeꞌ i Yalobil Dios, muꞌ bʌ i chaꞌlen cheꞌ bajcheꞌ mach sajlic an i cꞌʌjnibal i chꞌichꞌel Cristo yicꞌot muꞌ bʌ i wajlen Chꞌujul bʌ i Chꞌujlel Dios chʌncol bʌ i pꞌuntyañob. Como jini i chꞌichꞌel Cristo machꞌʌ baꞌan i cꞌʌjnibal miꞌ lolon qꞌuelob, jiñʌch mismo bʌ i chꞌichꞌel tsaꞌ bʌ i cꞌʌñʌ Dios cheꞌ ñac tiꞌ xucꞌchoco tsijiꞌ bʌ trato bʌ tꞌan chaꞌan i ñusʌntyel i mul chaꞌan i sʌc isʌntyelob.

30 La cujil lac Yum ti yʌlʌ: An tic wenta chaꞌan mic qꞌuextyʌbeñob i simaronlel. Mux cʌqꞌueñob i xotꞌeꞌ i mul. Ti yʌlʌ jeꞌel: Lac Yum mi quejel i meleꞌ i chaꞌañoꞌ bʌ, cheꞌen.

31 Yoque bʌqꞌuentic mi quejel i ñusan jini muꞌ bʌ quejel i yʌqꞌuentyel i xotꞌeꞌ i mul ti jini cuxul bʌ Dios.

32 Pero cꞌajtisan bajcheꞌ añetla wajali cheꞌ ñaxan ti queji laꞌ chꞌujbin Cristo. Maꞌan chʌ bʌ ti laꞌ wʌlʌ cheꞌ ñac ti laꞌ wen ñusʌ wocol chaꞌan ti caj ti laꞌ chꞌujbi lac Yum.

33 Lamitaletla tiꞌ lolon wajlentiyetla yicꞌot ti tyʌcꞌlʌntiyetla tiꞌ cantyʌlel i wut quixtyañujob. Yañet bʌ la, maꞌan ti laꞌ bʌcꞌñʌ laꞌ jopꞌ laꞌ cotyan jini tsaꞌ bʌ i ñusʌyob wocol cheꞌ bajcheꞌ jini.

34 Ti laꞌ cotyʌ jini tsaꞌ bʌ otsʌntiyob ti cʌchol. Maꞌan chʌ bʌ ti laꞌ wʌlʌ pero bej tijicñʌyetla aunque tiꞌ chilbentiyetla chʌ bʌ an laꞌ chaꞌan como ti laꞌ ñaꞌtyʌ chaꞌan yaꞌ ti panchan añʌch más wen bʌ chʌ bʌ an laꞌ chaꞌan yubil, machꞌʌ baꞌan mi quejel laꞌ chilbentyel pero laꞌ chaꞌañʌch ti beleꞌ ora.

35 Jin chaꞌan mach yom mi laꞌ saj wʌcꞌtyan laꞌ bej xucꞌchocon laꞌ pusicꞌal ti lac Yum como mi machꞌan mi laꞌ cʌyeꞌ, tyal tyo i yorojlel an chʌ bʌ mi quejel laꞌ wʌqꞌuentyel ñoj cꞌotyajax bʌ ti lac Yum.

36 Mach yom mi laꞌ lujbꞌan laꞌ beleꞌ chaꞌlen ti pejtyelel bajcheꞌ yom Dios como mi chʌꞌʌch mi laꞌ beleꞌ chaꞌlen cheꞌ jini mi quejel laꞌ wʌqꞌuentyel jini tsaꞌ bʌ i wʌ alʌ Dios mi quejel i yʌqꞌueñetla.

37 Ti yambʌ tꞌan ti Tsꞌijbubil bʌ i Tꞌan Dios mi yʌleꞌ:

39 Pero joñonla mach yom ajniconla bajcheꞌ jini muꞌ bʌ i cʌyeꞌ i chꞌujbin Dios, muꞌ bʌ quejel i yʌqꞌuentyelob i xotꞌeꞌ i mul. Pero joñonla mi lac bej chꞌujbin Dios chaꞌan mi lac tyajeꞌ laj cotyʌntyel.