2 Jiñʌch bajcheꞌ mejlem jini pisil bʌ otyot. An chaꞌpꞌej i mal. Jini ñaxan bʌ mal mi pejcʌntyel ti Chꞌujul bʌ Ajnibʌl. Yaꞌan i yajnib vela yicꞌot mesa yicꞌot waj tsaꞌ bʌ aqꞌuenti Dios.

3 An chaꞌpꞌej colem jocꞌol bʌ pisil chaꞌan tꞌoxlec ti saj mal tyac jini pisil bʌ otyot. Ti jumpatlel jini chaꞌpꞌejlel bʌ pisil an jini chaꞌpꞌejlel bʌ saj mal muꞌ bʌ i pejcʌntyel ti Ñoj Chꞌujul bʌ Ajnibʌl.

4 Yaꞌ ti malil jini Ñoj Chꞌujul bʌ Ajnibʌl an jumpꞌej yajnib melel bʌ ti oro baꞌ mi pujlel pom. Yaꞌan jeꞌel i cajajlel jini trato bʌ tꞌan wox bʌcꞌʌl ti oro. Ti malil jini caja an ucꞌum i wentyʌlel melel bʌ ti oro am bʌ i bʌl i wentyʌlel waj tsaꞌ bʌ yajli jubel ti panchan maná bʌ i cꞌabaꞌ. An jeꞌel ti malil jini caja i ñʌꞌtyeꞌ Aarón tsaꞌ bʌ loqꞌui i ñich, yicꞌot yaꞌan jeꞌel jini tyun baꞌ tsꞌijbubilix trato bʌ tꞌan.

5 Yaꞌ ti pam jini caja an querubines bʌ i cꞌabaꞌ. Cꞌotyajax ti qꞌuelol. Lajal ti qꞌuelol cheꞌ bajcheꞌ ajtroñel i chaꞌan Dios chꞌoyol bʌ ti panchan. An i wichꞌ jini querubines. Pero melel jach ti oro. Jini querubines i cꞌajtisʌntyel chaꞌan yaꞌan Dios. Ti i wichꞌ miꞌ moseꞌ i wentyʌlel i yajnib baꞌ ti ajqꞌui tsʌnsʌnbil bʌ i majtyan Dios. Pero wale iliyi mach chꞌujbi lac más aleꞌ bajcheꞌ an yaꞌyaꞌi.

6 Chʌꞌʌch luꞌ chajpʌbil jini pisil bʌ otyot bajcheꞌ ti ujti cʌleꞌ. Jini curajob ti ochiyob ti jini ñaxan bʌ saj mal ti jujumpꞌej qꞌuin chaꞌan i chaꞌliben i yeꞌtyel Dios bajcheꞌ i tyʌlel tiꞌ chaꞌleyob.

7 Pero jumpꞌej jach qꞌuin ti jujumpꞌej jab jini ñoj ñuc bʌ cura i bajñel ti ochi ti jini chaꞌpꞌejlel bʌ saj mal. Cheꞌ ñac ti ochi tiꞌ wersa chꞌʌmʌ ochel i chꞌichꞌel alʌqꞌuil tyac chaꞌan i yʌqꞌueꞌ chaꞌan i bajñel i mul yicꞌot chaꞌan i mul yañoꞌ bʌ quixtyañujob tsaꞌ bʌ i chaꞌleyob chaꞌan maꞌan tiꞌ ñaꞌtyʌyob isujm.

8 Chʌꞌʌch bajcheꞌ jini, jini Chꞌujul bʌ i Chꞌujlel Dios miꞌ tsictisʌbeñonla chaꞌan cꞌʌlʌ cheꞌ ñac jini curajob ti bej ochiyob i chaꞌliben i troñel Dios ti jini Chꞌujul bʌ Ajnibʌl ti pisil bʌ otyot machꞌan ti aqꞌuenti quixtyañujob i ñaꞌtyan bajcheꞌ chꞌujbi i bajñel lʌcꞌob Dios ti oración.

9 Ti pejtyelel bajcheꞌ tiꞌ chaꞌleyob ti pisil bʌ otyot ti ñoj oniyix jiñʌch jumpꞌej lajoñel i wentyʌlel chaꞌañonla wale iliyi. Jini majtyan tyac yicꞌot tsʌnsʌbil bʌ i majtyan Dios tsaꞌ bʌ aqꞌuenti Dios machꞌan tiꞌ sʌc isʌbe i pusicꞌal jini quixtyañujob tsaꞌ bʌ i chꞌujutisayob Dios cheꞌ bajcheꞌ jini.

10 Jini mandar tyac ti ñoj oniyix tsaꞌ jach yʌlʌ chʌ bʌ yom i cꞌuxob, chʌ bʌ yom i japob yicꞌot bajcheꞌ yom i chaꞌleñob pocoñel. Pero ti pejtyel jini mandar tyac cheꞌ jach tiꞌ xiqꞌui bajcheꞌ yom chaꞌan i bʌcꞌtyal quixtyañujob. Maꞌan tiꞌ xiqꞌui bajcheꞌ yom chaꞌan i pusicꞌal. Cheꞌ jach an i cꞌʌjnibal jini mandar tyac jintyo Dios ti yʌqꞌue tsijiꞌ bʌ i qꞌuexol.

11 Pero wale tsaꞌix tyʌli Cristo. Tiꞌ otsʌnti ti ñoj ñuc bʌ cura chaꞌan jini wen tyac bʌ tsaꞌ bʌ ajli chaꞌan jiñʌch muꞌ tyo bʌ quejel i tyʌlel. Wale tsaꞌix juli. Jini pisil bʌ otyot i wentyʌlel yaꞌ ti panchan baꞌ miꞌ chaꞌlen i yeꞌtyel Cristo ti cura, más wen, más tsꞌʌcʌl bajcheꞌ jini tsaꞌ bʌ i cꞌʌñʌ curajob wʌꞌ ti mulawil ti ñoj oniyix. Como machꞌan melel ti quixtyañujob. Mach i chaꞌanic mulawil.

12 Cristo ti ochi yaꞌ ti Ñoj Chꞌujul bʌ Ajnibʌl yaꞌ ti panchan. Machꞌan tiꞌ chꞌʌmʌ ochel i chꞌichꞌel chibu yicꞌot saj wacax chaꞌan i yʌqꞌuen i majtyan Dios. Pero cheꞌ bajcheꞌ tiꞌ chꞌʌmʌ ochel i bajñel i chꞌichꞌel yubil como ti sajti. Junyajlel jach ti ochi chaꞌan ti lac pejtyelel. Ti i chꞌichꞌel tiꞌ mʌñʌyonla chaꞌan ti beleꞌ ora.

13 Como melelʌch jini quixtyañujob, bibiꞌob jax yubil, cheꞌ machꞌan tsꞌʌcʌl tiꞌ chꞌujbiyob mandar tyac chaꞌan bajcheꞌ i tyʌlel yom ajnicob ti sʌc isʌntiyob i bʌcꞌtyal jach. Ti sʌc isʌnti ti i chꞌichꞌel tyat wacax yicꞌot i chꞌichꞌel chibu yicꞌot i tyʌnil saj wacax tsaꞌ bʌ pulbenti ti yajnib i majtyan Dios muꞌ bʌ i tsijcʌntyel tiꞌ bʌcꞌtyal chaꞌan i ñusʌntyel jini tsaꞌ bʌ i chaꞌleyob.

14 Yoque más an i cꞌʌjnibal i chꞌichꞌel Cristo chaꞌan i cotyañonla cheꞌ bajcheꞌ i chꞌichꞌel baꞌical bʌ alʌqꞌuil. Como Cristo mach sajlic an i mul. Chaꞌan ti Chꞌujul bʌ i Chꞌujlel machꞌʌ yujil jilel ti yʌcꞌʌ i bʌ chaꞌan tsʌnsʌbil bʌ i majtyan Dios. Chaꞌan ti sajti Cristo chꞌujbi lac chaꞌliben i yeꞌtyel jini cuxul bʌ Dios. Como Cristo ti sʌc isʌyonla chaꞌan machꞌan mi lac chaꞌlen machꞌʌ wen bʌ muꞌ bʌ i bibiꞌtisañonla tiꞌ wut Dios.

15 Cristo mi yajñel ti la caj cotyaya chaꞌan jini tsijiꞌ bʌ trato bʌ tꞌan. Cheꞌ jini ti pejtyelelob jini pʌyʌbiloꞌ bʌ ti Dios chꞌujbi i yʌqꞌuentyel jini machꞌʌ saj yujil jilel tsaꞌ bʌ wʌ alʌ Dios mi quejel i yʌqꞌuentyel. Ti sajti Cristo chaꞌan i ñusʌntyel i mul quixtyañujob tsaꞌ bʌ i chaꞌleyob cheꞌ ñac chʌncol tyo i chꞌujbiñob i mandar tyac jini ñaxan bʌ trato bʌ tꞌan.

16 Cheꞌ an majch miꞌ tsꞌijbun ti jun bajcheꞌ yom i tꞌoxtyʌl chʌ bʌ an i chaꞌan cheꞌ mi sajtyel, machꞌan miꞌ chꞌujbin bajcheꞌ tsꞌijbubil ti jun jintyo mi sajtyel i yum jun.

17 Machꞌan i cꞌʌjnibal jun chaꞌan tꞌoxlec chʌ bʌ an i chaꞌan cheꞌ cuxul tyo jini i yum. Jini jach cheꞌ mi sajtyel i yum jun, cheꞌ jini muꞌ tyo quejel i tꞌoxtyʌl chʌ bʌ an i chaꞌan bajcheꞌ mi yʌleꞌ ti jun.

18 Jin chaꞌan ti bejqui i chꞌichꞌel alʌqꞌuil chaꞌan mi xucꞌtyʌl jini ñaxan bʌ trato bʌ tꞌan tsaꞌ bʌ aqꞌuentiyonla ti Moisés.

19 Cheꞌ ñac ti ujti Moisés i yʌqꞌueñob ti pejtyelel quixtyañujob ti pejtyelel mandar tyac tiꞌ chꞌʌmʌ i chꞌichꞌel i yal wacax yicꞌot i chꞌichꞌel chibu xʌctyubil yicꞌot jaꞌ. Cheꞌ jini ti cꞌʌñʌ chʌchʌc bʌ i tsutsel tiñʌmeꞌ yicꞌot i yopol pimel hisopo bʌ i cꞌabaꞌ chaꞌan i tsijcan i junilel mandar tyac yicꞌot quixtyañujob.

20 Cheꞌ jini Moisés tiꞌ sube quixtyañujob: Chaꞌan ti jini i chꞌichꞌel alʌqꞌuil tyac tsaꞌ bʌ c tsijcʌ mi xucꞌtyʌl jini trato bʌ tꞌan tsaꞌ bʌ i xiqꞌuiyetla Dios.

21 Cheꞌ jeꞌel, Moisés tiꞌ tsijcʌ ti chꞌichꞌ jini pisil bʌ otyot yicꞌot ti pejtyelel chʌ bʌ yes tyac tiꞌ cꞌʌñʌyob chaꞌan i chꞌujutisan Dios.

22 An jach tsꞌityaꞌ tyac machꞌʌ baꞌan mi sʌc isʌntyel ti chꞌichꞌ cheꞌ bajcheꞌ mi yʌleꞌ ti mandar sʌquix mi majlel. Machꞌan i ñusʌntyel mulil mi machꞌan mi bejquel i chꞌichꞌel i majtyan Dios.

23 Jin chaꞌan tiꞌ wersa tsijcʌyob i chꞌichꞌel alʌqꞌuil ti jini pisil bʌ otyot yicꞌot jini tsaꞌ bʌ i cꞌʌñʌyob chaꞌan i chꞌujutisañob Dios wʌꞌ ti mulawil chaꞌan i sʌc isʌntyel cheꞌ bajcheꞌ mi yʌleꞌ ti mandar tyac. Pero jini tsaꞌ bʌ i cꞌʌñʌyob wʌꞌ ti mulawil i yʌxñal jach yubil jini am bʌ ti panchan. Pero mach saj jasʌl i chꞌichꞌel alʌqꞌuil tyac chaꞌan i sʌc isʌbeñonla lac pusicꞌal chaꞌan mi lac lʌqꞌue Dios.

24 Como cheꞌ ñac ti sajti Cristo machꞌan ti ochi ti chꞌujul bʌ ajnibʌl ti jini pisil bʌ otyot tsaꞌ bʌ mejli ti quixtyañujob chaꞌan i yʌqꞌuen i chꞌichꞌel alʌqꞌuil tyac. Jini tsaꞌ bʌ mejli wʌꞌ ti mulawil i yʌxñal jach yubil jini yoque isujm bʌ Chꞌujul bʌ Ajnibʌl yaꞌ ti panchan. Pero chaꞌan Cristo tiꞌ beque i chꞌichꞌel ti ochi ti yoque panchan chaꞌan mi yajñel yaꞌ baꞌan Dios chaꞌan i pejcʌbeñonla Dios.

25 Chaꞌan cheꞌ bajcheꞌ tiꞌ chꞌujbiyob ti ñoj oniyix jini ñoj ñuc bʌ cura ti ochi ti Chꞌujul bʌ Ajnibʌl junyajlel ti jujumpꞌej jab chaꞌan mi yʌqꞌueꞌ i chꞌichꞌel alʌqꞌuil chaꞌan i ñusʌntyel i mul quixtyañujob. Pero mach cheꞌic Cristo. Machꞌan ti ochi ti Chꞌujul bʌ Ajnibʌl yaꞌ ti panchan chaꞌan mi yʌcꞌ i bʌ ti sajtyel chaꞌyaj uxyaj chaꞌan i xotꞌbeñonla lac mul.

26 Como cheꞌiqui, wersa ti cabʌl chaꞌ acꞌʌ i bʌ ti sajtyel Cristo cꞌʌlʌ ti tyejchibal mulawil cꞌʌlʌ wale iliyi. Pero mach cheꞌiqui. Como ti jim bʌ ora tsaꞌ bʌ i wʌ yajcʌ Dios chaꞌan mi sajtyel Cristo, ti tyʌli wʌꞌ ti mulawil chaꞌan junyajlel jach mi yʌcꞌ i bʌ ti sajtyel chaꞌan miꞌ xotꞌbeñonla lac mul.

27 I tyʌlel mi sajtyel quixtyañu. Pero junyajlel jach mi sajtyel. Ti wiꞌil tyo mi quejel i melob i bʌ tiꞌ tyojlel Dios.

28 Chʌꞌʌch Cristo jeꞌel, junyajlel jach ti yʌcꞌʌ i bʌ ti sajtyel chaꞌan i xotꞌbeñob i mul cabʌlob. Pero tyal i yorojlel mi quejel i chaꞌ tyʌlel, mach chaꞌan i xotꞌeꞌ mulil pero chaꞌan i cotyan jini chʌncol bʌ i pijtyan i tyʌlel Cristo.