Jesús la caj cotyayajʌch ti jini tsijiꞌ bʌ trato bʌ tꞌan
8
Jini más ñuc bʌ i sujmlel ti pejtyelel tsaꞌ bʌ lojon c subeyetla jiñʌch chaꞌan mi laꞌ chꞌʌmꞌen i sujmlel chaꞌan añʌch ñoj ñuc bʌ laj cura bajcheꞌ ujtyel c subeñetla. Jiñʌch Cristo. Yaꞌ buchul i chaꞌlen yumʌl baꞌ buchul Dios yaꞌ ti panchan. Buchul Cristo tiꞌ ñoj chaꞌan tsiquil mi qꞌuejlel ti ñuc.2 Ti jini pisil bʌ otyot melel bʌ tiꞌ cꞌʌb quixtyañu baꞌ tiꞌ chaꞌle i yeꞌtyel curajob ti ñoj oniyix wʌꞌ ti mulawil, an jumpꞌej i mal muꞌ bʌ i pejcʌntyel ti Ñoj Chꞌujul bʌ Ajnibʌl. Pero jini ñoj ñuc bʌ laj cura, jiñʌch Cristo. Miꞌ chaꞌlen i yeꞌtyel ti cura yaꞌ ti panchan baꞌ ñoj chꞌujul. Jiñʌch ajnibʌl melel bʌ ti lac Yum. Machꞌan ti mejli tiꞌ cꞌʌb quixtyañujob.
3 Como ti ñoj oniyix ti jujuntiquil ñuc bʌ cura ti aqꞌuentiyob i yeꞌtyel chaꞌan i yʌqꞌuen i majtyan tyac Dios yicꞌot tsʌnsʌbil bʌ i majtyan tyac. Jin chaꞌan wersa yom an chʌ bʌ an i chaꞌan Jesucristo jeꞌel chaꞌan mi yʌqꞌuen Dios.
4 Pero wʌꞌic an ti mulawil Jesucristo, maꞌan ti otsʌnti ti cura. Como an tyo curajob wʌꞌ ti mulawil muꞌ bʌ yʌqꞌueñob i majtyan tyac Dios bajcheꞌ mi yʌleꞌ ti i mandar Moisés.
5 Pero jini curajob wʌꞌ ti mulawil miꞌ chaꞌliben i yeꞌtyel cheꞌ bajcheꞌ i yʌxñal jach yubil jini yoque am bʌ i yeꞌtyel ti cura yaꞌ ti panchan. Tsiquil i yʌxñal jach como ti jim bʌ ora cheꞌ ñac Moisés ti queji i meleꞌ pisil bʌ i yotyot Dios, Dios tiꞌ sube: Wen qꞌuele bajcheꞌ yom chaꞌan maꞌ meleꞌ junlajal bajcheꞌ ti pʌsꞌentiyet yaꞌ ti wits. Cheꞌ ti yʌlʌ Dios.
6 Más wen bajcheꞌ chꞌujbi i cotyañonla jini ñoj ñuc bʌ laj cura cheꞌ bajcheꞌ ti mejli i cotyan quixtyañujob jini yañoꞌ bʌ curajob ti ñoj oniyix. Más wen jeꞌel jini tsijiꞌ bʌ trato bʌ tꞌan cheꞌ bajcheꞌ jini trato bʌ tꞌan tsaꞌ bʌ aqꞌuenti Moisés como an ti tsijiꞌ bʌ trato bʌ tꞌan más wen bʌ albil bʌ i chaꞌan Dios muꞌ bʌ i yʌqꞌueñonla. Jesucristo la cajcotyayajʌch ti jini tsijiꞌ bʌ trato bʌ tꞌan.
7 Como junyajlel tsꞌʌcʌlic jini ñaxan bʌ trato bʌ tꞌan, maꞌan chʌ bʌ och yom tsijiꞌ bʌ tꞌan tiꞌ qꞌuexol.
8 Pero Dios tiꞌ ñaꞌtyʌ chaꞌan maꞌan tyoj añob jini quixtyañujob ti ñoj oniyix chaꞌan i tyajob jini tsaꞌ bʌ wʌ ajli ti jini ñaxan bʌ trato bʌ tꞌan chaꞌan mi quej i yʌqꞌuentyelob. Como Dios tiꞌ tyaja ti tꞌan Tsꞌijbubil bʌ i Tꞌan Dios baꞌ ti yʌlʌ:
Lac Yum mi yʌl: Tyal i yorojlel
cheꞌ mi quejel c meleꞌ tsijiꞌ bʌ trato bʌ tꞌan yicꞌot israeloꞌ bʌ quixtyañujob yicꞌot jini judajoꞌ bʌ.
9 Mach junlajal jini tsijiꞌ bʌ trato bʌ tꞌan cheꞌ bajcheꞌ jini tsaꞌ bʌ c mele yicꞌot laꞌ yumob ti ñoj oniyix
cheꞌ ñac tij cotyʌyob loqꞌuel ti Egipto bʌ pañimil.
Pero maꞌan tsꞌʌcʌl tiꞌ chꞌujbiyob c tꞌan bajcheꞌ an ti trato bʌ c tꞌan.
Jin chaꞌan tij cʌyʌyob.
10 Jini tsijiꞌ bʌ trato bʌ c tꞌan muꞌ bʌ c waꞌchocon yicꞌot israelob cheꞌ ñumenix cabʌl qꞌuin mi yʌleꞌ bajcheꞌ jini:
Mi quejel cʌqꞌueñob chaꞌan wen cꞌajalob i chaꞌan jini c mandar tyac.
Mi quejel c tsꞌijbubeñob ti i pusicꞌalob yubil.
Cheꞌ jini mi quejel i Diosiñoñob.
Mi quejel i yochelob tic chaꞌañob.
11 Mach wersa an majch mi quejel i cʌntisañob mi junticlec i piꞌʌlob,
mi i piꞌʌlobic ti chumtyʌl mi i yermañujobic chaꞌan i chꞌujbiñob lac Yum
como ti pejtyelelob mi an i ñuclel mi maꞌix i ñuclel mi quejel i chꞌujbiñoñob.
12 Mi quejel c ñusʌbeñob jini machꞌʌ wen bʌ i chaꞌlibal.
Maꞌan baꞌ bʌ ora mi quejel c chaꞌ cꞌajtisan i mul.
Cheꞌ ti yʌlʌ lac Yum.
13 Cheꞌ Dios chʌncol i tyajeꞌ ti tꞌan jini tsijiꞌ bʌ trato bʌ tꞌan, tsiquil cheꞌ jini chaꞌan chʌncol i qꞌueleꞌ cheꞌ bajcheꞌ tsuculix jini ñaxan bʌ. Maꞌix jal mi quejel i jilel chʌ bʌ tyac jach chʌncol bʌ i tsuculiyel, chʌncol bʌ i jilel i cꞌʌjnibal.