2 abraham tiꞌ locꞌsʌ jumpꞌej loqꞌuem bʌ ti diez tyac ti pejtyelel tsaꞌ bʌ i ganari cheꞌ ñac tiꞌ chaꞌle querra yicꞌot ñuc bʌ yumʌlob. Ti yʌqꞌue Melquisedec. An i sujmlel i cꞌabaꞌ Melquisedec ti lac tꞌan. Yom i yʌleꞌ tyoj bʌ yumʌl. An i sujmlel Salem ti lac tꞌan jeꞌel. Yom i yʌleꞌ i ñʌchꞌtyʌlel. Cheꞌ jini, chaꞌan ti caj an ñuc bʌ yumʌl Melquisedec yaꞌ ti Salem an i sujmlel i cꞌabaꞌ ti ñuc bʌ yumʌl muꞌ bʌ ti ñʌchꞌchocoya.

3 Maꞌan baꞌ tsꞌijbubil ti jun i cꞌabaꞌ i tyat i ñaꞌ mi i yumobic ti ñoj oniyix jini Melquisedec. Maꞌan baꞌ tsꞌijbubil ti jun baqui bʌ qꞌuin tiꞌ chꞌocʌ yicꞌot maꞌan tsꞌijbubil mi ti sajti. Tsiquil cheꞌ jini, mach lajal bajcheꞌ yambʌ ñuc bʌ curajob. Cheꞌ bajcheꞌ maꞌix i tyejchibal mi i yujtibalic i yeꞌtyel ti ñuc bʌ cura yubil. Jin chaꞌan lajalʌch bajcheꞌ Yalobil Dios yubil am bʌ yeꞌtyel ti cura chaꞌan ti beleꞌ ora.

4 Cheꞌ jini pensalin bajcheꞌ an i ñuclel jini Melquisedec. Tsiquil an i ñuclel como Abraham, jiñʌch lac yum ti ñoj oniyix, ti yʌqꞌue Melquisedec jumpꞌej loqꞌuem bʌ ti diez tyac ti pejtyelel tsaꞌ bʌ i ganari cheꞌ ñac tiꞌ chaꞌle guerra tiꞌ contra ñuc bʌ yumʌlob.

5 An ti i mandar Moisés chaꞌan curajob loqꞌuem bʌ tiꞌ jiñʌjlel Leví miꞌ locꞌsʌbeñob jumpꞌej loqꞌuem bʌ ti diez tyac chʌ bʌ an i chaꞌan i piꞌʌlob aunque junlajal i jiñʌjlelob Abraham.

6 Pero jini Melquisedec aunque mach i jiñʌjlelic Leví tiꞌ chꞌʌmʌ jumpꞌej loqꞌuem bʌ ti diez tyac chʌ bʌ an i chaꞌan Abraham. Jini Abraham jiñʌch jini tsaꞌ bʌ aqꞌuenti wʌ albil bʌ tꞌan i chaꞌan Dios chaꞌan jini muꞌ tyo bʌ quej i yʌqꞌuentyel. Melquisedec ti yʌqꞌue Abraham i yutslel i tꞌan.

7 Luꞌ yujil isujm chaꞌan más an i ñuclel jini muꞌ bʌ i chaꞌlen aqꞌueya cheꞌ mi yʌqꞌuen i yutslel i tꞌan cheꞌ bajcheꞌ muꞌ bʌ quejel i yʌqꞌuentyel i yutslel i tꞌan.

8 I tyʌlel mi sajtyel quixtyañujob. Quixtyañujobʌch jini curajob muꞌ bʌ i chꞌʌmeꞌ jumpꞌej loqꞌuem bʌ ti diez tyac chʌ bʌ an i chaꞌan quixtyañujob. Pero jini Tsꞌijbubil bʌ i Tꞌan Dios miꞌ tyaj ti tꞌan Melquisedec cheꞌ bajcheꞌ juntiquil beleꞌ cuxul tyo bʌ.

9 Chꞌujbi la cʌleꞌ chaꞌan ti jim bʌ ora cheꞌ ñac Abraham ti yʌqꞌue Melquisedec jumpꞌej loqꞌuem bʌ ti diez tyac chʌ bʌ an i chaꞌan jini Leví yicꞌot i jiñʌjlel Leví ti yʌqꞌueyob Melquisedec jumpꞌej loqꞌuem bʌ ti diez tyac chʌ bʌ añob i chaꞌan jeꞌel i wentyʌlel aunque max tyo chꞌoquejem jini Leví.

10 Como Abraham i yumʌch Leví ti ñoj oniyix. Jin chaꞌan cheꞌ bajcheꞌ an tiꞌ bʌcꞌtyal Abraham jini Leví yubil como max tyo chꞌoca Leví cheꞌ ñac Melquisedec tiꞌ tyaja Abraham ti bij.

11 Dios tiꞌ cꞌʌñʌ i jiñʌjlel Aarón chaꞌan mi yajñel ti curajob chaꞌan miꞌ yʌqꞌueñob mandar tyac israelob. Jini curajob i jiñʌjlel Leví jeꞌel. Pero jini curajob i jiñʌjleloꞌ bʌ Leví mach chꞌujbi i ñusʌbeñob i mul quixtyañujob tsaꞌ bʌ i chꞌujbiyob mandar tyac chaꞌan mi yajñelob ti tyoj tiꞌ tyojlel Dios. Jin chaꞌan wersa ti tyʌli yambʌ cura machꞌʌ lajal yicꞌot jini cura i jiñʌjlel Aarón, pero lajalʌch yicꞌot Melquisedec jiñi Jesús.

12 Como cheꞌ mi qꞌuextiyel bajcheꞌ mi yajcan i yotsan ti yeꞌtyel yambʌ cura, wersa miꞌ qꞌuextyan mandar tyac jeꞌel.

13 Jini chʌncol bʌ i tyaj ti tꞌan jini Tsꞌijbubil bʌ i Tꞌan Dios, jiñʌch lac Yum Jesús. Loqꞌuem lac Yum ti yambʌ junmujchꞌ quixtyañu judajoꞌ bʌ i cꞌabaꞌ. Maꞌan baꞌ bʌ ora ti aqꞌuenti i yeꞌtyel ti cura jini loqꞌuem bʌ ti Judá.

14 Yoque tsiquilʌch cheꞌ loqꞌuem lac Yum ti jiñʌjlel Judá. Pero cheꞌ ñac tiꞌ tyaja ti tꞌan Moisés jini muꞌ bʌ i yochelob ti cura maꞌan tiꞌ tyaja ti tꞌan ili junmujchꞌ quixtyañujob.

15 Pero más tyo tsiquil chaꞌan wersa ti qꞌuextyʌnti jini mandar tyac chaꞌan bajcheꞌ mi yajcʌntyel curajob como lajalʌch bajcheꞌ Melquisedec jini tsijiꞌ bʌ cura tsaꞌ bʌ otsʌnti ti yeꞌtyel.

16 Como Cristo ti otsʌnti ti cura ti caj an i cuxtyʌlel machꞌʌ yujil jilel. Maꞌan ti otsʌnti chaꞌan ti caj loqꞌuem ti jini junmujch quixtyañu baꞌ mi yʌleꞌ ti mandar i chaꞌan jach bʌ mi yochelob.

17 Como Dios tiꞌ tyaja ti tꞌan Cristo cheꞌ ñac ti yʌlʌ:

18 Ti jili i cꞌʌjnibal jini mandar chaꞌan bajcheꞌ mi yochelob ti cura i jiñʌjlel Leví como maꞌix bej an i pꞌʌtyʌlel mandar. Maꞌix i cꞌʌjnibal.

19 Mach chꞌujbi i tyoj isʌben i pusicꞌal quixtyañu jini mandar tsaꞌ bʌ aqꞌuenti Moisés. Pero wale an más wen bʌ, jiñʌch Jesús. Chaꞌan ti Jesús chꞌujbi lac lʌqꞌueꞌ Dios.

20 Dios tiꞌ xucꞌchoco i tꞌan cheꞌ ñac ti yotsʌ Jesús ti cura.

21 Como yañoꞌ bʌ curajob cheꞌ jach ti otsʌntiyob ti cura. Pero cheꞌ ñac ti otsʌnti Jesús, Dios tiꞌ xucꞌchoco i tꞌan. Ti Tsꞌijbubil bʌ i Tꞌan Dios mi yʌl:

22 Jin chaꞌan, más wen jini tsijiꞌ bʌ trato bʌ tꞌan cheꞌ ti ochi Jesús ti cura. Como yaꞌan Jesús ti panchan chaꞌan i pejcʌbeñonla Dios. Mi yʌl chaꞌan mi quejel i yujtyel cheꞌ bajcheꞌ an ti jini trato bʌ tꞌan.

23 Cabʌl jini yañoꞌ bʌ curajob ti otsʌntiyob ti yeꞌtyel como mi sajtyelob. Jin chaꞌan mach chꞌujbi jalecob.

24 Pero Jesús maꞌan mi sajtyel. Jin chaꞌan maꞌan mi yochel yambʌ cura tiꞌ qꞌuexol Jesús.

25 Jin chaꞌan chꞌujbi i cotyan ti beleꞌ ora majchical jach miꞌ lʌqꞌueꞌ Dios chaꞌan tiꞌ chꞌujbi Jesús. Como bej cuxul Jesús chaꞌan i pejcʌbeñob Dios.

26 Bajcheꞌ an Jesús jiñʌch bajcheꞌ yoque yom chaꞌan ñuc bʌ laj cura. Como chꞌujulʌch. Maꞌix i simaronlel. Maꞌix i mul. Aunque ti ajni yicꞌot xmulilob wʌꞌ ti mulawil maꞌan tiꞌ saj chaꞌle machꞌʌ wen. An i ñuclel ti panchan yicꞌot Dios.

27 Como Jesús mach cheꞌic miꞌ chaꞌlen bajcheꞌ yañoꞌ bʌ curajob como ti jujumpꞌej qꞌuin miꞌ wersa tsʌnsʌben i majtyan Dios ñaxan chaꞌan i ñusʌntyel i bajñel i mul yicꞌot ti wiꞌil chaꞌan i ñusʌntyel i mul yambʌ quixtyañujob. Pero cheꞌ ñac ti yʌcꞌʌ i bʌ ti sajtyel Jesús jiñʌch junyajlel jach bʌ i majtyan Dios chaꞌan i ñusʌntyel i mul majchical jach miꞌ chꞌujbin.

28 Como yambʌ ñuc bʌ curajob tsaꞌ bʌ yajcʌnti bajcheꞌ mi yʌleꞌ ti i mandar Moisés yujil i chaꞌlen machꞌʌ wen como quixtyañujob jach. Jin chaꞌan mach chꞌujbi i junyajlel cotyañonla. Cheꞌ ñumenix cabʌl ora Dios tiꞌ xucꞌchoco i tꞌan chaꞌan mi yochel ti ñuc bʌ cura i Yalobil muꞌ bʌ i chaꞌlen yoque tyoj bʌ chaꞌan ti beleꞌ ora. Maꞌix chʌ bʌ tyo yambʌ yom chaꞌan i cotyañonla ti beleꞌ ora.