6
Laꞌ lac más cʌñeꞌ majlel yambʌ i sujmlel tyac am bʌ ti i tꞌan Dios chaꞌan wen xucꞌleconla. Laꞌ laj cʌy lac cʌleꞌ jini jach chaꞌchajp uxchajp bʌ i sujmlel tsaꞌ bʌ lac ñaxan chꞌujbi chaꞌan Cristo cheꞌ ñac ti lac ñaxan ubi i tꞌan Dios. Yom mi lac bej cʌn majlel i tꞌan Dios. Mach yom jini jach mi lac bej aleꞌ bajcheꞌ yom mi laj qꞌuextyan lac pensal chaꞌan laj cʌy lac tsʌclen jini muꞌ bʌ i yʌqꞌueñonla cotsan lac mul. Mach yom jini jach mi lac bej chaꞌ aleꞌ bajcheꞌ yom mi lac chꞌujbin Dios. 2 Mach yom jini jach mi lac bej chaꞌ ubin laj cʌntisa chaꞌan chꞌʌm jaꞌ mi chaꞌan i yʌcꞌol cꞌʌbʌl ti la col mi chaꞌan mi chaꞌ tyejchel sajtyemoꞌ bʌ mi chaꞌan xotꞌmulil machꞌʌ baꞌan mi jilel.
3 Mi cheꞌ yom Dios, mi quejel laj cʌn majlel yambʌ i sujmlel tyac.
4 Como mi an majch miꞌ chaꞌ cʌy Dios cheꞌ tsaꞌix i chꞌʌmbe i sujmlel i tꞌan Dios, cheꞌ tsaꞌix i tyaja i cotyʌntyel ti Cristo, cheꞌ tsaꞌix ochi Chꞌujul bʌ i Chꞌujlel Dios tiꞌ pusicꞌal,
5 cheꞌ tsaꞌix i mulʌ i yubin i cꞌotyajlel i tꞌan Dios, cheꞌ ti yilʌ bajcheꞌ tiꞌ pʌsʌ i pꞌʌtyʌlel Cristo wʌꞌ ti mulawil chaꞌan chꞌujbi i ñaꞌtyan más tyo cabʌl mi quejel i pʌseꞌ i pꞌʌtyʌlel ti panchan,
6 cheꞌ jini, mi tiꞌ cʌyʌ i chꞌujbin Dios, cheꞌ bajcheꞌ mach chꞌujbi i chaꞌ qꞌuextyan i pusicꞌal chaꞌan i chaꞌ chꞌujbin Dios yubil. Como ti caj ti yʌcꞌʌ ti wen tsʌts an i pusicꞌal cheꞌ bajcheꞌ chʌncol i chaꞌ yʌcꞌ ti jocꞌchocontyel ti cruz i Yalobil Dios yubil yicꞌot cheꞌ bajcheꞌ chʌncol i yʌcꞌ ti wajlentyel Cristo yubil.
7 Como jini muꞌ bʌ i chꞌujbin Cristo ti jumpꞌej i pusicꞌal mi quejel i cʌñʌtyʌntyel. Ti lajoñel añʌch cheꞌ bajcheꞌ lum muꞌ bʌ i wen acꞌ i wut. Como cheꞌ mi yubin jaꞌal mi cabʌl acꞌ i wut jini lum. Cheꞌ jini miꞌ wen cʌñʌtyʌntyel ti jini muꞌ tyo bʌ quejel i cꞌajben i wut.
8 Pero jini tsaꞌ bʌ i cʌyʌ i tꞌan Dios lajalob yubil cheꞌ bajcheꞌ lum baꞌ mi cabʌl colel chꞌix tyac aunque miꞌ wen ubin jaꞌal jeꞌel. Maꞌix sajlic chʌ bʌ i cꞌʌjnibal jini lum yubil. Quixtyañu mi quejel i yʌlob: Chʌchix ajni ili lum. Lolom jach mi lac chaꞌ pʌqꞌueꞌ. Cheꞌ mi quejel i yʌlob. Tyal i yorojlel mi quejel i pulel ti pejtyelel jini chꞌix tsaꞌ bʌ coli.
Jini muꞌ bʌ lac pijtyan mi yʌqꞌueñonla la cajñel ti xucꞌul
9 Pero pꞌuntyʌbilet bʌ la hermañujob, chʌꞌicʌch chʌncol c lojon subeñet, cujil lojon isujm mach cheꞌic añetla. Mi cʌl chʌncol laꞌ chaꞌlen bajcheꞌ yom cheꞌ cotyʌbiletla.
10 Beleꞌ tyojʌch Dios. Mach saj ñajayic ti i pusicꞌal bajcheꞌ ti laꞌ chaꞌlibe i troñel, yicꞌot bajcheꞌ ti a cotyʌ i chaꞌañoꞌ bʌ Dios chaꞌan ti caj maꞌ wen pꞌuntyan Dios. Chʌncol tyo a bej cotyañob.
11 Jini com bʌ, jiñʌch chaꞌan ti jujuntiquiletla mi laꞌ bej cotyan laꞌ piꞌʌlob ti i tijicñʌyel laꞌ pusicꞌal. Chʌꞌʌch yom mi laꞌ chaꞌlen cꞌʌlʌ jintyo mi laꞌ sajtyel. Cheꞌ jini, ti pejtyelel laꞌ pusicꞌal mi quejel laꞌ ñaꞌtyan chaꞌan an laꞌ cuxtyʌlel machꞌʌ yujil jilel.
12 Mach com lojon mi laꞌ tsꞌubꞌan. Pero yom ajniquetla bajcheꞌ mi yajñel jini chʌncol bʌ i chꞌujbiñob Dios ti xucꞌtyʌlel i pusicꞌal yicꞌot chʌncox i cuchob ti wen chʌ bʌ jach miꞌ cuchob como chʌncox i yʌqꞌuentyelob ti pejtyelel tsaꞌ bʌ i wʌ alʌ Dios mi quejel i yʌqꞌuen.
13 Como cheꞌ ñac Dios ti yʌqꞌue Abraham i tꞌan machꞌʌ yujil qꞌuextiyel chaꞌan bajcheꞌ mi quejel i cotyan, tiꞌ xucꞌchoco i tꞌan Dios tiꞌ bajñel bʌ i cꞌabaꞌ. Como maꞌan majch más ñuc bajcheꞌ Dios, baꞌ chꞌujbi i xucꞌchocon i tꞌan.
14 Dios tiꞌ sube Abraham: Melelʌch mucꞌʌch c beleꞌ aqꞌueñet chʌ bʌ wen. Mux cʌcꞌ ti wen ocꞌan a jiñʌjlel. Cheꞌ ti yʌlʌ Dios.
15 Abraham jal tiꞌ pijtyʌ. Machꞌan tiꞌ lujbꞌʌ i pijtyan. Cheꞌ jini ti aqꞌuenti jini tsaꞌ bʌ i wʌ alʌ Dios mi quejel i yʌqꞌuentyel Abraham.
16 Como cheꞌ miꞌ xucꞌchocon i tꞌan quixtyañujob miꞌ tyajob ti tꞌan i cꞌaba juntiquil más ñuc bʌ. Cheꞌ jini mach chꞌujbi i saj qꞌuextyan i tꞌan tsaꞌ bʌ ajli, como tsaꞌix i xucꞌchoco i tꞌan.
17 Dios yom i pʌs chaꞌan ñoj melelʌch i tꞌan bajcheꞌ tiꞌ ñaꞌtyʌ i chaꞌlen chaꞌan jini muꞌ tyo bʌ quejel i yʌqꞌueñob ti pejtyelel tsaꞌ bʌ i wʌ alʌ Dios mi quejel i yʌqꞌueñob. Jin chaꞌan tiꞌ xucꞌchoco i tꞌan. Tsiquil cheꞌ jini chaꞌan mach chꞌujbi i saj qꞌuextyan i tꞌan. Pero mi quejel i wersa tsꞌʌctisan Dios bajcheꞌ ti wʌ alʌ.
18 Dios mach chꞌujbi i saj chaꞌlen lot. An chaꞌchajp machꞌʌ saj yujil qꞌuextyʌyel. Jiñʌch i tꞌan tsaꞌ bʌ i xucꞌchoco Dios yicꞌot jini tsaꞌ bʌ i wʌ alʌ Dios mi quejel la cʌqꞌuentyel. Joñonla tsaꞌ bʌ la cʌcꞌʌ lac bʌ ti Dios chaꞌan i cʌñʌtyañonla, chaꞌan ti caj jini chaꞌchajp wen an i ñuc isʌntyel lac pusicꞌal chaꞌan mi lac chꞌujbin Dios ti jumpꞌej lac pusicꞌal.
19 Xnijca barcojob miꞌ cꞌʌñob colem tsucul tyaqꞌuin muꞌ bʌ i choc ochel ti jaꞌ chaꞌan maꞌan miꞌ bej nijcʌyel barco. Ti lajoñel cheꞌ mi lac bej pensalin laj cotyʌntyel miꞌ xucꞌchocontyel lac pusicꞌal chaꞌan maꞌan mi la cotsan lac mul yicꞌot chaꞌan maꞌan mi nijcʌyel lac pusicꞌal ti baꞌical bʌ pensal. Chꞌujbi lac xucꞌchocon lac pusicꞌal cheꞌ bajcheꞌ jini como la cujil isujm yaꞌan Jesús ti panchan baꞌ miꞌ pejcʌbeñonla Dios.
20 Yaꞌ ti majli ti panchan Jesús baꞌ chʌncox i pijtyañonla. Tiꞌ pʌsꞌeyonla majlel bij yubil. Ti otsʌnti Jesús ti ñuc bʌ cura yubil chaꞌan ti beleꞌ ora miꞌ pejcʌbeñonla Dios. An i yeꞌtyel ti ñuc bʌ cura cheꞌ bajcheꞌ Melquisedec ti ñoj oniyix.