5
Como jujuntiquil ñuc bʌ cura mi yajcʌntyel baꞌan quixtyañujob. Mi yʌqꞌuentyel i yeꞌtyel chaꞌan i pejcʌben Dios quixtyañujob. An tiꞌ wenta i yʌqꞌuen i majtyan Dios yicꞌot tsʌnsʌbil bʌ i majtyan chaꞌan i ñusʌntyel mulil.2 Jini ñuc bʌ curajob chꞌujbi i wen pꞌuntyañob jini tsaꞌ bʌ i ñusʌbe i tꞌan Dios chaꞌan ti caj maꞌan tiꞌ chꞌʌmbeyob isujm o mi tiꞌ chaꞌle machꞌʌ tyoj. Yujilob bajcheꞌ miꞌ ñusañob como an miꞌ jacꞌob i pʌyol ti mulil jeꞌel.
3 Jin chaꞌan wersa mi yʌqꞌuen i majtyan Dios chaꞌan i ñusʌntyel i bajñel i mul cheꞌ bajcheꞌ mi yʌqꞌuen Dios i majtyan chaꞌan i ñusʌntyel i mul yañoꞌ bʌ jeꞌel.
4 Maꞌan majch chꞌujbi i bajñel yajcan i bʌ chaꞌan i yochel ti ñuc bʌ cura. Pero wersa mi yajcʌntyel ti Dios chaꞌan mi yochel ti ili ñuc bʌ yeꞌtyel lajal cheꞌ bajcheꞌ ti yajcʌ Dios juntiquil Aarón bʌ i cꞌabaꞌ.
5 Chʌꞌʌch Cristo jeꞌel, maꞌan tiꞌ bajñel yajcʌ i bʌ chaꞌan mi yochel ti ñuc bʌ cura. Pero ti yajcʌnti ti Dios. Como Dios tiꞌ sube:
Calobiletyʌch.
Wale ti ili bʌ qꞌuin chʌncol c tsictisan chaꞌan calobiletyʌch.
Cheꞌ ti yʌlʌ Dios.
6 Tiꞌ tꞌan Dios an baꞌ Dios tiꞌ tyaja ti tꞌan Cristo. Ti yʌlʌ:
Jatyet ñuquet bʌ cura chaꞌan ti beleꞌ ora,
cheꞌ bajcheꞌ juntiquil am bʌ i yeꞌtyel ti ñuc bʌ cura Melquisedec bʌ i cꞌabaꞌ.
Cheꞌ mi yʌleꞌ.
7 Cheꞌ ñac wʌꞌ tyo an ti mulawil Cristo tiꞌ wen pejcʌ Dios ti oración. Tiꞌ chaꞌle uqꞌuel. Tiꞌ pejcʌ ti wocol tꞌan como an i pꞌʌtyʌlel Dios chaꞌan mi yom, chꞌujbiyʌch i cotyan chaꞌan maꞌan mi sajtyel. Chaꞌan yoque xucꞌul Cristo, Dios tiꞌ yubibe i yoración.
8 Cristo, aunque i Yalobilʌch Dios, tiꞌ pʌsꞌʌ bajcheꞌ tiꞌ wen chꞌujbibe i tꞌan i Tyat am bʌ ti panchan chaꞌan ti wocol tsaꞌ bʌ i ñusʌ.
9 Yoque tsꞌʌcʌl tiꞌ chꞌujbi Dios Cristo aunque tiꞌ wen ñusʌ wocol. Jin chaꞌan maꞌan chʌ bʌ saj yom yambʌ chaꞌan ochic ti ajcotyaya i chaꞌan majchical jach yom i wen chꞌujbin chaꞌan mi yʌqꞌuentyel i cuxtyʌlel machꞌʌ yujil jilel.
10 Cheꞌ jini Dios ti yajcʌ Cristo chaꞌan mi yochel ti ñuc bʌ cura cheꞌ bajcheꞌ am bʌ i yeꞌtyel ti ñuc bʌ cura jini juntiquil Melquisedec bʌ i cꞌabaꞌ.
Bʌqꞌuentic mi ti laj cʌyʌ Jesucristo
11 An tyo cabʌl com bʌ lojon c subeñetla chaꞌan i sujmlel jini ñuc bʌ cura. Pero wocol i tsictisʌntyel como cheꞌ bajcheꞌ mach chꞌujbi laꞌ chꞌʌmꞌen i sujmlel yubil.
12 Chaꞌan anix ora ti queji laꞌ wubin i tꞌan Dios, yomox ochiquetla ti ajcʌntisa tiꞌ tꞌan Dios i wentyʌlel. Pero mach cheꞌic añetla. Yom tyo juntiquil muꞌ bʌ i chaꞌ cʌntisañetla jini machꞌʌ baꞌan wocol bʌ i sujmlel tyac muꞌ bʌ lac ñaxan chꞌujbin cheꞌ mi la cochel tiꞌ tꞌan Dios. Chaꞌan maꞌ ti laꞌ xucꞌchoco laꞌ pusicꞌal tiꞌ tꞌan Dios cheꞌ bajcheꞌ ti chaꞌ sujtiyetla ti saj alpꞌeñalob yubil muꞌ tyo bʌ i chꞌʌmeꞌ i chuꞌ. Max tyo chꞌujbi laꞌ cꞌuxeꞌ waj yubil.
13 Como majchical jach chʌncol tyo bʌ i chꞌʌmeꞌ i chuꞌ yubil max tyo baꞌan miꞌ ñaꞌtyan bajcheꞌ yom i yajñel ti tyoj tiꞌ tꞌan Dios como alʌ tyo yubil.
14 Miꞌ cꞌuxob waj yubil jini tsaꞌix bʌ i tyajayob i colel. Jiñʌch jini muꞌ bʌ i beleꞌ pensalin tiꞌ pusicꞌal bajcheꞌ yom i chaꞌlen, como miꞌ ñaꞌtyan chʌ bʌ wen yicꞌot chʌ bʌ machꞌʌ wen.