2 Como tsaꞌix subentiyonla jini tꞌan chaꞌan laj cotyʌntyel jeꞌel cheꞌ bajcheꞌ ti subentiyob. Pero cheꞌ bajcheꞌ maꞌan i cꞌʌjnibal ti yubiyob. Maꞌan tiꞌ tyajayob i cotyʌntyel como maꞌan tiꞌ chꞌujbiyob jini tsaꞌ bʌ i yubiyob.

3 Pero joñonla tsaꞌ bʌ lac chꞌujbi Dios mi quejel la cochel ti cꞌaj oj yaꞌ ti panchan la quicꞌot Dios. Jiñʌch jini cꞌaj oj tsaꞌ bʌ i tyaja Dios tiꞌ tꞌan ti ñoj oniyix yaꞌ ti tyʌquin bʌ joch lum cheꞌ ñac tiꞌ sube Moisés:

4 Como an tiꞌ tꞌan Dios baꞌ miꞌ tyajeꞌ ti tꞌan i qꞌuinilel cꞌaj oj. Mi yʌleꞌ:

5 Ti jini mismo bʌ tꞌan tiꞌ tꞌan Dios an baꞌ ti yʌlʌ Dios:

6 Jini tsaꞌ bʌ i ñaxan ubiyob jini tꞌan chaꞌan laj cotyʌntyel ti ñoj oniyix maꞌan ti ochiyob ti cꞌaj oj yicꞌot Dios como tiꞌ ñusʌbeyob i tꞌan Dios. Pero muꞌ tyo quejel i yochel yañoꞌ bʌ.

7 Jin chaꞌan Dios ti yʌcꞌʌ yambʌ ora chaꞌan ochic ti cꞌaj oj quixtyañu. Jiñʌch wale iliyi ti ili bʌ qꞌuin. Como cheꞌ tsaꞌix ñumi cabʌl ora cheꞌ ujtyem i yubin ili tꞌan quixtyañujob tsaꞌ bʌ ñusʌbeyob i tꞌan ti ñoj oniyix, Dios tiꞌ poj cꞌʌmbe i tiꞌ juntiquil David bʌ i cꞌabaꞌ chaꞌan miꞌ chaꞌ aleꞌ bajcheꞌ ti ajli ti yambʌ ora. Ti yʌlʌ:

8 Lamital lac yumob ti ñoj oniyix ti pʌjyiyob ochel ti ñajt bʌ lum. Pero mach jiniqui jini cꞌaj oj tsaꞌ bʌ i yʌlʌ Dios mi quejel i yʌqꞌuentyelob. Como tsaꞌic i pʌyʌyob ochel Josué jini israelob yaꞌ baꞌ miꞌ cꞌajob i yoj, cheꞌ ñumenix yoque cabʌl ora maꞌix i cꞌʌjnibal chaꞌan Dios i chaꞌ tyajeꞌ ti tꞌan jini cꞌaj oj chaꞌan mi yʌleꞌ: Wale iliyi i yorojlelix cꞌaj oj, cheꞌen.

9 Jin chaꞌan Dios yom tyo i yʌqꞌuen i cꞌaj i yoj jini i chaꞌañoꞌ bʌ cheꞌ bajcheꞌ chʌncol i cꞌaj i yoj Dios chaꞌan ti ujti i meleꞌ mulawil yicꞌot i bʌl.

10 Como majchical jach mi yʌjqꞌuel ochel ti cꞌaj oj yaꞌ baꞌan Dios mi quejel i cꞌajeꞌ i yoj chaꞌan i troñel cheꞌ bajcheꞌ tiꞌ cꞌaja i yoj Dios chaꞌan i troñel jeꞌel.

11 Laꞌ lac wen chaꞌlen wersa, cheꞌ jini, chaꞌan ochiconla ti jini cꞌaj oj ame ujticonla cheꞌ bajcheꞌ ti ujti ti ñoj oniyix cheꞌ ñac jini israelob machꞌan ti aqꞌuentiyob i yochelob yaꞌ ti Canaán bʌ i cꞌabaꞌ bʌ lum. Como jini tsaꞌ bʌ i ñusʌbe ili tꞌan ti ñoj oniyix machꞌan ti aqꞌuentiyob i yochelob ti jini lum.

12 Wale iliyi lajalʌch cheꞌ bajcheꞌ ti ñoj oniyix yom mi la cꞌʌc ti lac pusicꞌal ili i tꞌan Dios. Cheꞌ bajcheꞌ cuxulʌch i tꞌan Dios yubil como ñoj pꞌʌtyʌl. I tꞌan Dios chꞌujbi i yochel ti lac pusicꞌal cheꞌ bajcheꞌ jay bʌ machit tiꞌ chaꞌwejlel i yej. Miꞌ jeqꞌueꞌ lac pusicꞌal. Jini i tꞌan Dios mi yʌqꞌueñonla lac wen ñaꞌtyan bajcheꞌ añonla mi wen o mi mach wen lac pensal yicꞌot mi yʌqꞌueñonla lac ñaꞌtyan mi wen jini muꞌ bʌ i mulan i chaꞌlen lac pusicꞌal.

13 Luꞌ i melbalʌch Dios ti pejtyelel chʌ bʌ yes an. Miꞌ luꞌ ñaꞌtyan Dios ti pejtyelel chʌ bʌ mi lac chaꞌlen yicꞌot chʌ bʌ mi lac pensalin. Mach saj chꞌujbi lac mucul chaꞌlen muꞌ bʌ lac chaꞌlen. Luꞌ tsiquil tiꞌ wut Dios. Mux lac wersa mel lac bʌ yaꞌ tiꞌ tyojlel Dios.

14 An ñoj ñuc bʌ laj cura yubil chaꞌan i pejcʌbeñonla Dios. Jiñʌch Jesús i Yalobil Dios. Tsaꞌix letsi majlel ti panchan Jesús cꞌʌlʌ yaꞌ baꞌan Dios. Jin chaꞌan laꞌ lac bej xucꞌchocon lac pusicꞌal ti pejtyelel i tꞌan Dios chʌncol bʌ lac chꞌujbin.

15 Como Jesús jiñʌch ñoj ñuc bʌ laj cura yujil i wen pꞌuntyañonla cheꞌ cꞌuñonla ti lac bajñel pusicꞌal. Como cheꞌ ñac wʌꞌ tyo an ti mulawil ti yubi wocol cheꞌ bajcheꞌ mi la cubin. An tiꞌ lolon jopꞌo i yʌqꞌuen i yotsan i mul xiba. Pero maꞌan tiꞌ chꞌujbi. Maꞌan ti saj yajli ti mulil.

16 Jin chaꞌan mach yom mi lac saj bʌcꞌñan lac pejcan ti oración Dios como jini miꞌ wen pꞌuntyañonla. Yaꞌ buchul ti colem bʌ i buchlib yaꞌ ti panchan. Chaꞌan ti caj yaꞌan Cristo i pejcʌbeñonla Dios , miꞌ wen cotyañonla Dios cheꞌ an lac wocol.