Más ñuc Jesús cheꞌ bajcheꞌ Moisés
3
Jin chaꞌan quermañujob i chaꞌañon bʌ la Dios chaꞌan Dios ti yajcʌyonla chaꞌan i yalobilonicla chaꞌan mi la cajñel yaꞌ ti panchan la quicꞌot, yom mi lac wen pensalin Cristo Jesús. Como Dios tiꞌ choco tyʌlel wʌꞌ ti mulawil Cristo Jesús chaꞌan i cotyañonla. Ti otsʌnti ti ñoj ñuc bʌ laj cura chaꞌan jini tꞌan chʌncol bʌ lac chꞌujbin como miꞌ pejcʌbeñonla Dios.2 Xucꞌul tiꞌ luꞌ chaꞌle ti pejtyelel i yeꞌtyel Jesús tsaꞌ bʌ aqꞌuenti. Dios ti yotsʌ ti ñoj ñuc bʌ cura. Moisés jeꞌel lajal xucꞌul tiꞌ chaꞌlibe i yeꞌtyel Dios baꞌan israelob. Dios tiꞌ qꞌuele jini israeloꞌ bʌ quixtyañujob cheꞌ bajcheꞌ i yalobil yaꞌ ti i yotyot. Moisés tiꞌ chaꞌle yumʌl.
3 Mi laj qꞌuel ti wen jini otyot tsaꞌ bʌ i mele quixtyañu pero mi laj qꞌueleꞌ ti más ñuc jini quixtyañu tsaꞌ bʌ i mele otyot. Cheꞌ bajcheꞌ jini, yom mi laj qꞌuel ti más ñuc Jesús cheꞌ bajcheꞌ Moisés.
4 Ti mejli ti Dios ti pejtyelel chʌ bʌ tyac mi cꞌʌjñel. Como Dios tiꞌ mele ti pejtyelel chʌ bʌ tyac jach an.
5 Jini Moisés xucꞌulʌch tiꞌ chaꞌle i yeꞌtyel tsaꞌ bʌ aqꞌuenti i chaꞌlen baꞌan i piꞌʌlob jini israelob. Ti aqꞌuenti ti Dios i wʌ subeꞌ jini muꞌ tyo bʌ quejel i subentyel ti tyal tyo bʌ ora. Jiñʌch tsaꞌ bʌ la cubi wale iliyi. Moisés xucꞌulʌch tiꞌ chaꞌlibe i troñel. Cheꞌ bajcheꞌ ajtroñel jach tiꞌ chaꞌle.
6 Pero Cristo jiñʌch yoque i yalobil Dios. Xucꞌul miꞌ chaꞌlen chʌ bʌ miꞌ chaꞌlen. Luꞌ an tiꞌ wenta ti pejtyelel quixtyañujob tsaꞌ bʌ yajcʌnti ti Dios. Cheꞌ ochemonla tiꞌ tꞌan Dios i quixtyañujonla Dios mi xucꞌulonla yicꞌot tijicñayonla mi lac bej pijtyan tsaꞌ bʌ subentiyonla ti Dios muꞌ tyo bʌ quejel i yujtyel, mi maꞌan mi la cʌqꞌuen i ñajatisan lac pusicꞌal cꞌʌlʌ ti jilibal jini chʌncol bʌ lac chꞌujbin.
Cꞌaj oj chaꞌan jini i chaꞌañoꞌ bʌ Dios
7 Yoque más ñuc Cristo bajcheꞌ majchical yambʌ. Jin chaꞌan Chꞌujul bʌ i Chꞌujlel Dios mi yʌleꞌ tiꞌ tꞌan Dios:
Mi wale iliyi ti ili bʌ qꞌuin mi ti i nijcʌbetla laꞌ pusicꞌal Dios,
8 mach yom mi laꞌ wʌcꞌ ti tsʌts an laꞌ pusicꞌal cheꞌ bajcheꞌ tiꞌ chaꞌleyob jini tsaꞌ bʌ letsʌyob i bʌ tiꞌ contra Dios yaꞌ ti tyʌquin bʌ joch lum.
Como tiꞌ wen pruebaliyon, cheꞌen Dios, chaꞌan i qꞌuelob mi an chʌ bʌ mic chaꞌlen tiꞌ contrajob.
9 Chʌꞌʌch tiꞌ bej chaꞌleyob cꞌʌlʌ cuarenta jabil
aunque tic pʌsꞌeyob c pꞌʌtyʌlel ti wen bʌ tsaꞌ bʌ c chaꞌle tiꞌ tyojlelob.
10 Pero chaꞌan cꞌʌlʌ cuarenta jabil chʌꞌʌch tiꞌ pruebaliyon, cheꞌ jini ti queji c michꞌqꞌuelob.
Ti cʌlʌ: ¿Bac an chʌncol i xucꞌchocon i pusicꞌal?
Mach saj yomob i chaꞌlen bajcheꞌ mic pʌsꞌeñob.
11 Jin chaꞌan ti michꞌʌyon quicꞌot ili quixtyañujob. Tic tꞌan machꞌʌ baꞌan mi quejel i saj qꞌuextyʌyel tic subeyob
chaꞌan maꞌan baꞌ bʌ ora mi quejel cʌqꞌueñob i yochel wʌꞌ baꞌ miꞌ cꞌajob i yoj quicꞌot.
Cheꞌ ti yʌlʌ Dios. Cheꞌ ti subenti lac yumob ti ñoj oniyix.
12 Hermañujob, wen qꞌuele laꞌ bʌ chaꞌan mach ochic ti laꞌ pusicꞌal mi junticlec, i simaronlel muꞌ bʌ i yʌqꞌueñetla laꞌ cʌy laꞌ chꞌujbin Dios chaꞌan mi laꞌ ñajatisan jini cuxul bʌ Dios.
13 Pero jini yom bʌ mi lac chaꞌlen jiñʌch chaꞌan mi laꞌ xicꞌ laꞌ bʌ ti utsꞌat ti jujumpꞌej qꞌuin cheꞌ an tyo i yorojlel chaꞌan mi lac subentyel. I yorojlelix wale iliyi chaꞌan lac chꞌujbin chaꞌan maꞌan majch miꞌ tsʌts an i pusicꞌal chaꞌan i cʌy i chꞌujbin Cristo, chaꞌan i chaꞌ chꞌujbin jini tsaꞌ bʌ i ñaxan chꞌujbi.
14 Como mi cꞌʌlʌ jintyo miꞌ chaꞌ tyʌlel Cristo mi lac beleꞌ xucꞌchocon lac bʌ ti jini tsaꞌ bʌ lac chꞌujbi cheꞌ ñac ti lac ñaxan ubi i tꞌan Dios, añonla ti Cristo cheꞌ jini, chaꞌan mi laj cajñel quicꞌot ti beleꞌ ora.
15 Cꞌajal laꞌ chaꞌan bajcheꞌ mi yʌleꞌ ili tꞌan:
Mi wale iliyi ti ili bʌ qꞌuin mi tiꞌ nijcʌbeyetla laꞌ pusicꞌal Dios
mach yom mi laꞌ wʌcꞌ ti tsʌts an laꞌ pusicꞌal cheꞌ bajcheꞌ tiꞌ chaꞌleyob jini tsaꞌ bʌ letsʌyob i bʌ tiꞌ contra Dios.
Cheꞌ mi yʌleꞌ ili tꞌan.
16 ¿Majchqui mi laꞌ wʌl jini tsaꞌ bʌ yubiyob i tꞌan Dios pero ti wiꞌil tiꞌ letsʌyob i bʌ tiꞌ contra Dios? Jiñobʌch tsaꞌ bʌ pʌyʌ loqꞌuel Moisés ti Egipto.
17 ¿Majchqui jini tsaꞌ bʌ i michꞌqꞌuele Dios cꞌʌlʌ cuarenta jabil? Mismo jiñobʌch tsaꞌ bʌ i chaꞌleyob mulil. Yaꞌ ti sajtiyob ti tyʌquin bʌ joch lum cheꞌ ñac chʌncol i pʌjyelob loqꞌuel ti Moisés.
18 ¿Majchqui mi laꞌ wʌl jini tsaꞌ bʌ subentiyob ti Dios ti i tꞌan machꞌʌ saj yujil qꞌuextyʌyel chaꞌan maꞌan mi quejel i yʌqꞌuentyel i yochel i cꞌajob i yoj yaꞌ baꞌan Dios? Jiñobʌch tsaꞌ bʌ i ñusʌbe i tꞌan.
19 Tsiquil cheꞌ jini, maꞌan ti aqꞌuentiyob i yochelob ti cꞌaj oj yaꞌ baꞌan Dios ti caj maꞌan tiꞌ chꞌujbiyob Dios.