2 Mach yom ñajayic ti lac pusicꞌal chaꞌan yom mi lac pʌy ochel ti la cotyot ñumel jach bʌ mucꞌob ochemoꞌ bʌ tiꞌ tꞌan Dios chꞌoyoloꞌ bʌ ti ñajt ame i yajtroñelic Dios chꞌoyoloꞌ bʌ ti panchan. Como an tsaꞌ bʌ yotsʌyob ti yotyot ti ñoj oniyix ajtroñelob i chaꞌan Dios chꞌoyol bʌ ti panchan aunque maꞌan tiꞌ ñaꞌtyʌyob.

3 Cꞌajtisan jini añoꞌ bʌ ti cʌchol cheꞌ bajcheꞌ mi yaꞌic cʌchʌlet yicꞌotyob yubil. Cꞌajtisan jini chʌncol bʌ i wen ñusan wocol ame tyal i yorojlel laꞌ wʌqꞌuentyel laꞌ ñusan lajal bʌ wocol jeꞌel.

4 Laꞌ i luꞌ ñaꞌtyañob ti pejtyelel quixtyañujob chaꞌan weñʌch cheꞌ an i yijñam winic. Yom i yajñelob ti xucꞌul jujuntiquil winic yicꞌot i bajñel yijñam bʌ. Como Dios mi quejel i yʌqꞌueñob i xotꞌeꞌ i mul majchical jach miꞌ chaꞌlen i tsuculel yicꞌot majchical jach miꞌ pejcʌben i yijñam i piꞌʌl.

5 Mach yom tyaqꞌuin jach mi laꞌ bej pensalin. Yom ajniquetla ti tijicña cheꞌ yicꞌot chʌ bʌ jach an laꞌ chaꞌan. Como Dios ti yʌlʌ: Maꞌix mi quejel c loqꞌuel yaꞌ baꞌañet. Maꞌix mi quejel j cʌyet. Cheꞌ ti yʌlʌ Dios.

6 Chaꞌan mi lac chꞌujbin chaꞌan mi quejel i chaꞌlen Dios bajcheꞌ mi yʌleꞌ chꞌujbiyʌch la cʌleꞌ:

7 Cꞌajtisan jini am bʌ i yeꞌtyel tiꞌ tꞌan Dios, jiñob tsaꞌ bʌ i subeyetla i tꞌan Dios. Yom mi laꞌ pensalin bajcheꞌ ti ajniyob ti wen wʌꞌ ti mulawil. Cꞌʌlʌ ti sajtiyob maꞌan ti yʌctyʌyob i chꞌujbin lac Yum. Chꞌujbinla Dios jeꞌel lajal bajcheꞌ tiꞌ chꞌujbiyob.

8 Maꞌan baꞌ bʌ ora mi quejel i saj qꞌuextiyel Jesucristo. Junlajalʌch bajcheꞌ acꞌbi, wale iliyi yicꞌot ti beleꞌ ora.

9 Jin chaꞌan mach yom mi laꞌ wʌcꞌ laꞌ bʌ ti sojquel ti caj chʌ bʌ jach yes yan tyac bʌ ti chajb ti chajb bʌ tꞌan. Pero jini más yom bʌ yi, jiñʌch chaꞌan mi xucꞌchocontyel lac pusicꞌal ti i pꞌuntyaya Dios. Mach ti chꞌujbintyel laꞌ xicꞌojel tyac chaꞌan chʌ bʌ jach yes mi laꞌ cꞌuxeꞌ. Como maꞌix i cotyʌntyel quixtyañu chaꞌan ti caj miꞌ chꞌujbiñob ili xicꞌojel tyac.

10 Jini curajob ti ñoj oniyix tiꞌ tsʌnsʌyob alʌqꞌuil chaꞌan tsʌnsʌbil bʌ i majtyan Dios. Ti aqꞌuentiyob i cꞌuxeꞌ i bʌcꞌtyal alʌqꞌuil jini curajob pero i seño jach chaꞌan chʌꞌʌch miꞌ lʌqꞌueꞌ Dios. Pero mach cheꞌic añonla wale iliyi. Dios ti yʌqꞌueyonla yambʌ bajcheꞌ chꞌujbi lac lʌqꞌueꞌ Dios. Jiñʌch chaꞌan ti lac Yum Jesucristo. Pero chaꞌan max tyo ti sajti Cristo jini curajob ti ñoj oniyix max tyo ti mejli i lʌqꞌueꞌ Dios chaꞌan ti Cristo.

11 Como cheꞌ bajcheꞌ i tyʌlel tiꞌ chaꞌleyob ti ñoj oniyix jini ñoj ñuc bʌ cura i chaꞌan bʌ israelob tiꞌ chꞌʌmʌ ochel i chꞌichꞌel alʌqꞌuil yaꞌ ti mal Ñoj Chꞌujul bʌ Ajnibʌl chaꞌan i majtyan Dios chaꞌan i ñusʌntyel mulil. Pero maꞌan ti aqꞌuentiyob i cꞌuxob i bʌcꞌtyal jini alʌqꞌuil como tiꞌ luꞌ puluyob i bʌcꞌtyal yaꞌ ti junxejlel i tiꞌ lum Jerusalén bʌ i cꞌabaꞌ. Chʌꞌʌch tiꞌ puluyob como cheꞌ bajcheꞌ tiꞌ xotꞌbe i mul quixtyañujob i wentyʌlel.

12 Cheꞌ ti tsʌnsʌnti Jesús jeꞌel yaꞌ ti junxejlel i tiꞌ jini lum chaꞌan mi sʌc isan quixtyañujob tiꞌ bajñel i chꞌichꞌel Jesús.

13 Yom mi lac tsʌclen majlel lac Yum. Yom mi laj cucheꞌ tsꞌaꞌqꞌuelol cheꞌ bajcheꞌ tiꞌ ñusʌ wocol Jesús chaꞌan chʌncox la cotsan lac bʌ yicꞌot.

14 Mach yoque lac lumalic machꞌʌ yujil jilel ili mulawil. Pero chʌncol lac sʌclan lac lumal muꞌ tyo bʌ quejel la cʌqꞌuentyel yaꞌ ti panchan.

15 Jin chaꞌan yom mi lac beleꞌ subeꞌ i ñuclel Dios yicꞌot yom mi lac suben wocox i yʌlʌ chaꞌan ti Jesucristo. Cheꞌ mi lac subeꞌ i ñuclel Dios jiñʌch cheꞌ bajcheꞌ tsʌnsʌbil bʌ i majtyan Dios muꞌ bʌ i wen mulan. Suben tyo la i ñuclel, cheꞌ jini.

16 Mach yom ñajayic ti lac pusicꞌal lac chaꞌlen wen bʌ yicꞌot lac tꞌox aqꞌuen chʌ bʌ an lac chaꞌan jini pꞌumpꞌuñoꞌ bʌ. Como jiñʌch cheꞌ bajcheꞌ tsʌnsʌbil bʌ i majtyan Dios muꞌ bʌ i qꞌueleꞌ ti wen.

17 Chꞌujbibenla i tꞌan jini am bʌ i yeꞌtyel tiꞌ tꞌan Dios. Chaꞌlenla bajcheꞌ miꞌ xiqꞌuetla laꞌ chaꞌlen como añʌch tiꞌ wenta i cʌñʌtyañetla. Wersa mi quejel i subob tiꞌ tyojlel Dios bajcheꞌ tiꞌ chaꞌleyob i yeꞌtyel. Jacꞌʌla bajcheꞌ yom chaꞌan tijicña miꞌ subob i bʌ baꞌan Dios jini am bʌ yeꞌtyel chaꞌan machꞌan chꞌʌjyemob. Mach chaꞌanic laꞌ wenlel cheꞌ chꞌʌjyemob como tsiquilʌch maꞌan ti laꞌ chꞌujbibeyob jini tsaꞌ bʌ i cʌntisʌyetla.

18 Yom mi laꞌ tyajon lojon ti oración. Como cujil lojon isujm maꞌan chʌ bʌ mi yʌleꞌ lojon c pusicꞌal. Com lojon cajñel ti wen ti chʌ bʌ jach mi lojon c chaꞌlen.

19 Jini ñoj com bʌ yi, jiñʌch chaꞌan mi laꞌ tyajon lojon ti oración chaꞌan mach ñoj jal mi lojon c chaꞌ tyʌlel yaꞌ baꞌ añetla.

20 Dios muꞌ bʌ i ñʌchꞌchocobeñonla lac pusicꞌal ti tyeche loqꞌuel lac Yum Jesucristo baꞌan sajtyemoꞌ bʌ. Jini Jesucristo jiñʌch ñoj ñuc bʌ ajcʌñʌtya tiñʌmeꞌ chaꞌañonla chaꞌan tiꞌ beque i chꞌichꞌel chaꞌan tiꞌ xucꞌchoco jini trato bʌ tꞌan.

21 Laꞌ i yʌqꞌueñetla ti pejtyelel chʌ bʌ yes jach yom chaꞌan chꞌujbi laꞌ chaꞌlen bajcheꞌ yom i pusicꞌal Dios. Chaꞌan ti Jesucristo laꞌ i cꞌʌñonla bajcheꞌ yom i cꞌʌñonla. Laꞌ tsictiyic i ñuclel Cristo ti beleꞌ ora. Amén.

22 A wocolic hermañujob, wen ñʌchꞌtyanla ili tꞌan como maꞌix on bʌ tꞌan tic tsꞌijbubetla.

23 Mic subeñetla jeꞌel chaꞌan tsaꞌix loqꞌui ti cʌchol la quermañu Timoteo. Mi maꞌan jal mi julel wʌꞌwʌꞌi muꞌ tyo lojon c motin tyʌlel c julaꞌ añetla.

24 Aqꞌueñob saludos ti pejtyelel añoꞌ bʌ i yeꞌtyel yaꞌ baꞌ añetla yicꞌot ti pejtyelelob ochemoꞌ bʌ tiꞌ tꞌan Dios. Mi yʌqꞌueñetla saludos jini chꞌoyoloꞌ bʌ ti Italia.

25 Laꞌ ajnic i yutslel i pusicꞌal Dios laꞌ wicꞌot ti laꞌ pejtyelel. Amén.