2 Cheꞌ ñac tiꞌ pʌyʌyob tyʌlel Pablo jini Tértulo ti queji i jopꞌben i mul. Pero ñaxan tiꞌ sube Félix: Ñuquet bʌ yumʌl Félix, com lojon c subeñet wocox a wʌlʌ como chaꞌan ti caj cabʌl a ñaꞌtyʌbal más wen añon lojon chaꞌan ti caj a weꞌtyel. Cꞌotyajax ñʌchꞌʌl wʌꞌ ti lac lumal.

3 Baꞌical an quixtyañujob mux lojon luꞌ cʌqꞌueñet cabʌl wocox a wʌlʌ chaꞌan pejtyel chʌncol bʌ a niqꞌui meleꞌ wen bʌ.

4 Mach com lojon c mʌctyʌbeñet cabʌl ora. Jini chaꞌan miꞌ cꞌajtibeñet ti wocol tꞌan chaꞌan maꞌ poj ñʌchꞌtyʌbeñon lojon c tꞌan jumucꞌ.

5 Com lojon c subeñet chaꞌan mach saj wen bajcheꞌ miꞌ chʌc chaꞌlen ili winic. Mi bej ñumel majlel ti yambʌ lum tyac baꞌ miꞌ chʌc tyech juꞌupojomiyel baꞌan israelob. Jiñʌch i yum junmujchꞌoꞌ bʌ winicob nazarenojoꞌ bʌ i cꞌabaꞌ.

6 Tiꞌ jopꞌo i bibiꞌtisan templo como tiꞌ pʌyʌ ochel mach bʌ israelob. Joñon lojon ti lojon c chucu. Com lojon c meleꞌ ti lojon cʌlʌ bajcheꞌ miꞌ xicꞌon ti lojon c mandar tyac.

7 Pero jini ñuc bʌ soldado Lisias bʌ i cꞌabaꞌ ti ochi yaꞌ baꞌañon lojon. Tiꞌ wersa chili loqꞌuel Pablo ti lojon j cꞌʌb.

8 Ti yʌlʌ chaꞌan jini muꞌ bʌ i sub i mul yom mi tyʌlel wʌꞌ baꞌañet. Jatyet chꞌujbiyʌch a cꞌajtiben pejtyel i sujmlel tyac chaꞌan maꞌ wen ñaꞌtyan chaꞌan yoque melelʌch pejtyelel tsaꞌ bʌ lojon c subet.

9 Jini israelob yaꞌ waꞌalob jeꞌel ti yotsʌyob i tꞌan chaꞌan melelʌch pejtyel jini.

10 Jini ñuc bʌ yumʌl tiꞌ chaꞌlibe i señʌjlel chaꞌan miꞌ chaꞌlen tꞌan Pablo. Cheꞌ jini Pablo ti yʌlʌ: Tijicñayon mic mel c bʌ baꞌañet como cujil isujm chaꞌan wajali ti ochiyet ti a weꞌtyel ti ili lac lumal.

11 Tsaꞌ jax tyo ñumi doce qꞌuin wale yaꞌ ti cꞌotiyon ti Jerusalén chaꞌan mic chꞌujutisan Dios. Pero jatyet chꞌujbi a cꞌajtiben yambʌ quixtyañujob chaꞌan maꞌ ñaꞌtyan mi yoque melelʌch c tꞌan.

12 Maꞌix baꞌ tiꞌ tyajayon c cʌlʌx pejcan quixtyañujob. Maꞌ baꞌ bʌ ora juꞌlapojlawon quicꞌot quixtyañujob yaꞌ ti jini colem templo yaꞌ ti Jerusalén mi yaꞌic ti yambʌ templo tyac, mi yaꞌic ti yambʌ parte tyac yaꞌ ti Jerusalén.

13 Pero ili quixtyañujob maꞌan bajcheꞌ chꞌujbi i pʌsob mi an c mul bajcheꞌ chʌncol i lolon jopꞌob.

14 Mux c subeñet cheꞌ melelʌch mic chꞌujbin jini Dios tsaꞌ bʌ i chꞌujbiyob jeꞌel lac yumob ti ñoj oniyix. Jeꞌel mic chꞌujbin tsijiꞌ bʌ cʌntisa. Pero an muꞌ bʌ i yʌlob mach wen. Mucꞌʌch c chꞌujbin jeꞌel pejtyel i mandar tyac Moisés yicꞌot pejtyel tsaꞌ bʌ i tsꞌijbu jini tsaꞌ bʌ i xiqꞌui i yʌleꞌ Dios.

15 Tijicñayon mic chꞌujbin Dios como cujil isujm pejtyel quixtyañujob mi quej i tyejchel loqꞌuel baꞌan sajtyemoꞌ bʌ. Ili quixtyañujob wʌꞌi miꞌ chꞌujbiñob jeꞌel chaꞌan mi quej i tyejchelob loqꞌuel baꞌan sajtyemoꞌ bʌ, jini weñoꞌ bʌ yicꞌot mach bʌ weñob.

16 Jini chaꞌan mic chʌc jopꞌ c chaꞌlen wen bʌ chaꞌan maꞌan chʌꞌ bʌ mi saj al c pusicꞌal chaꞌan mach wen tic chaꞌle tiꞌ wut quixtyañujob mi tiꞌ wut Dios.

17 Cabʌl jabil ti ñumiyon baꞌical ti yan tyac bʌ pañimil. Cheꞌ jini ti chaꞌ cꞌotiyon tic lumal chaꞌan mi cʌqꞌuen i majtyan tyaqꞌuin pꞌumpꞌuñoꞌ bʌ yicꞌot chaꞌan mi cʌqꞌuen i majtyan Dios.

18 Chʌꞌʌch chʌncol c chaꞌlen cheꞌ ñac ti cꞌoti i tyajoñob ti templo chaꞌtiquil uxtiquil israelob chꞌoyoloꞌ bʌ ti Asia. Poj ujtyel c chaꞌlen pejtyel bajcheꞌ i tyʌlel miꞌ chaꞌleñob chaꞌan tsiquil mi tsꞌʌctisan i tꞌan bajcheꞌ mi wʌ aleꞌ. Pero maꞌan cabʌl quixtyañujob. Maꞌan juꞌupojolob.

19 Jini israelob chꞌoyoloꞌ bʌ ti Asia yom tyʌlicob wʌ baꞌañet chaꞌan miꞌ sub c mul mi an chʌ bʌ tic tyumbeyob.

20 Laꞌ i yʌlob jini wʌꞌ bʌ añob chʌ bʌ yes c mul tiꞌ tyajayob cheꞌ ñac tiꞌ meleyon yaꞌ baꞌan jini Junta Suprema.

21 Maꞌan c mul tiꞌ tyajayob. Jin jach cheꞌ tic chaꞌle cꞌam bʌ tꞌan. Ti cʌlʌ: Wale chʌncol laꞌ melon chaꞌan mic chꞌujbin mi quej i tyejchel loqꞌuel quixtyañujob baꞌan sajtyemoꞌ bʌ. Cheꞌ ti yʌlʌ Pablo.

22 Wen yujil isujm Félix bajcheꞌ miꞌ chꞌujbiñob Jesús jini ochemoꞌ bʌ tiꞌ tꞌan Dios. Jin chaꞌan cheꞌ ñac ti yubi i tꞌan Pablo jini Félix ti yʌlʌ: Laꞌ lac poj cʌy lac meleꞌ. Yaꞌ bʌ mi tyʌlel jini ñuc bʌ soldado Lisias bʌ i cꞌabaꞌ mi quej c chaꞌ mel chaꞌan mux cujtisan c meleꞌ. Cheꞌ ti yʌlʌ Félix.

23 Cheꞌ jini Félix tiꞌ xiqꞌui capitán chaꞌan miꞌ cʌñʌtyan Pablo pero mi yʌqꞌuen i chaꞌlen bajcheꞌ yom i chaꞌlen. Ti yʌcꞌʌ ti ochel i julaꞌan uts bʌ yicꞌot, chaꞌan i yʌqꞌueñob chʌ bʌ yom.

24 Cheꞌ tsaꞌix ñumi chaꞌpꞌej uxpꞌej qꞌuin ti chaꞌ cꞌoti Félix yicꞌot yijñam Drusila bʌ i cꞌabaꞌ. Israel bʌ xꞌixic jini yijñam. Tiꞌ xiqꞌui ti pʌyol Pablo chaꞌan miꞌ más subeñob bajcheꞌ yom lac chꞌujbin Jesús.

25 Pablo tiꞌ wen subeyob chaꞌan miꞌ chʌc chaꞌlen wen bʌ yicꞌot bajcheꞌ yom miꞌ wen cʌñʌtyañob i bʌ chaꞌan machic i chaꞌleñob mach bʌ wen. Yicꞌot tiꞌ subeyob jeꞌel chaꞌan tyal i yorojlel Dios mi quej i yʌqꞌuen i mel i bʌ jujuntiquil quixtyañu. Dios mi quej i qꞌuel mi wen o mi mach wen tiꞌ chaꞌleyob. Cheꞌ jini tyoj bʌcꞌñʌjel ti yubi Félix. Ti yʌlʌ: Chaꞌ cucux yaꞌ baꞌ cʌñʌtyʌbilet. Cheꞌ ujt c chaꞌan muꞌ tyo c chaꞌ pʌyet. Cheꞌ ti yʌlʌ Félix.

26 Tiꞌ lolon ñaꞌtyʌ Félix mi quej i yʌqꞌuen tyaqꞌuin Pablo chaꞌan yom cojlic. Jin chaꞌan cabʌl tiꞌ xiqꞌui ti pʌyol Pablo i pejcan.

27 Chʌꞌʌch tiꞌ chʌc chaꞌle chaꞌpꞌej jab. Cheꞌ jini Félix ti loqꞌui ti yeꞌtyel. Ti ochi Porcio Festo tiꞌ qꞌuexol. Chaꞌan yom uts mi qꞌuejlel ti israelob jini Félix tiꞌ cʌyʌ ti cʌchol Pablo.