2 Pero jini muꞌ bʌ i yochel ti tiꞌ jiñʌch ajcʌñʌtya tiñʌmeꞌ.

3 Jini ajcʌñʌtya tiꞌ corral miꞌ jamben i tiꞌ chaꞌan mi yochel jini ajcʌñʌtya tiñʌmeꞌ. Jini tiñʌmeꞌ miꞌ cʌmben i tꞌan ajcʌñʌtya tiñʌmeꞌ. Miꞌ pejcan tiñʌmeꞌob ti i cꞌabaꞌ tyac. Miꞌ pʌyeꞌ loqꞌuel ti corral.

4 Cheꞌ tsaꞌix i pʌyʌ loqꞌuel tiñʌmeꞌ ti i corral ñaxan mi majlel ajcʌñʌtya tiñʌmeꞌ. Jini tiñʌmeꞌ miꞌ tsʌclen majlel como miꞌ cʌmben i tꞌan.

5 Pero machꞌan miꞌ tsʌclen majlel yambʌ winic machꞌʌ baꞌan miꞌ cʌmben i tꞌan. Miꞌ putsꞌejel majlel como mach i cʌñʌ.

6 Jesús tiꞌ subeyob jini lajoñel pero machꞌan tiꞌ chꞌʌmbeyob isujm tsaꞌ bʌ i subeyob.

7 Jesús tiꞌ chaꞌ subeyob: Melel mic subeñetla: Joñon i tiꞌon corral baꞌ mi yochel majlel tiñʌmeꞌ.

8 Jini tsaꞌ bʌ ñaxan tyʌliyob ajxujchꞌobʌch yicꞌot muꞌ bʌ i wersa chilben i chaꞌan yambʌ. Pero jini tiñʌmeꞌob machꞌan tiꞌ tsʌcleyob.

9 Joñon cheꞌ bajcheꞌ i tiꞌon corral. Jini muꞌ bʌ i yochel baꞌañon mi quejel i cotyʌntyel. Jini muꞌ bʌ cotyʌntyel chʌꞌʌch bajcheꞌ juncojt tiñʌmeꞌ muꞌ bʌ i yochel muꞌ bʌ i loqꞌuel ti corral. Miꞌ tyajeꞌ i bucꞌbal.

10 Mucꞌ jach i tyʌlel ajxujchꞌ chaꞌan i xujchꞌin, chaꞌan i tsʌnsañob, chaꞌan i jisañob. Pero joñon ti tyʌliyon chaꞌan miꞌ tyajob i cuxtyʌlel chaꞌan ñoj weñʌch mi yajñel.

11 Joñon wen bʌ ajcʌñʌtya tiñʌmeꞌ. Jini wen bʌ ajcʌñʌtya tiñʌmeꞌ mi yʌcꞌ i bʌ ti sajtyel chaꞌan tiñʌmeꞌob.

12 Pero jini muꞌ bʌ ti toñel ti cʌñʌtya tiñʌmeꞌ chaꞌan jach mi tyojtyʌl mi putsꞌejel cheꞌ mi yilan simaron bʌ animal. Miꞌ cʌyeꞌ jini tiñʌmeꞌ como mach yoque ajcʌñʌtya tiñʌmeꞌic. Mach i chaꞌan jini tiñʌmeꞌ. Jini simaron bʌ animal miꞌ chuc jini tiñʌmeꞌ. Mi pam pujquel tiñʌmeꞌ, cheꞌ jini.

13 Jini ajcʌñʌtya tiñʌmeꞌ mi putsꞌijel como mucꞌ jach ti toñel chaꞌan mi tyojtyʌl. Machꞌan miꞌ pꞌuntyan tiñʌmeꞌ.

14-15 Joñon jini wen bʌ ajcʌñʌtya tiñʌmeꞌ. Chʌꞌʌch bajcheꞌ c Tyat ti panchan miꞌ cʌñon mij cʌñeꞌ c Tyat. Chʌꞌʌch jeꞌel mij cʌñeꞌ c tiñʌmeꞌ. Miꞌ cʌñoñob jeꞌel. Mi cʌcꞌ c bʌ ti sajtyel chaꞌan jini tiñʌmeꞌ.

16 Añʌch yambʌ tiñʌmeꞌ jeꞌel max tyo bʌ ochem ti jini corral. Wersa mic pʌyob tyʌlel jeꞌel. Mi quejel i jacꞌbeñon c tꞌan. Mi quejel i yajñel ti junmujchꞌ baꞌan juntiquil jach ajcʌñʌtya tiñʌmeꞌ.

17 Jin chaꞌan c Tyat ti panchan miꞌ pꞌuntyañon. Como mi cʌcꞌ c bʌ ti sajtyel chaꞌan mic chaꞌ tyejchel loqꞌuel baꞌan sajtyemoꞌ bʌ.

18 Machꞌan majch chꞌujbi i tsʌnsañon mi mach cheꞌic com. Pero mic bajñel acꞌ c bʌ ti sajtyel chaꞌan chʌꞌʌch bajñel com. Añʌch c bajñel pꞌʌtyʌlel chaꞌan mi cʌcꞌ c bʌ ti sajtyel. Añʌch c bajñel pꞌʌtyʌlel chaꞌan mic chaꞌ tyejchel loqꞌuel baꞌan sajtyemoꞌ bʌ. Chʌꞌʌch ti aqꞌuentiyon c chaꞌlen tic Tyat ti panchan. Cheꞌ ti yʌlʌ Jesús.

19 Cheꞌ ñac ti yubiyob ili tꞌan tyac chaꞌchajp ti quejiyob ti tꞌan jini israelob.

20 Cabʌl ti yʌlʌyob: ¿Chucoch mi laꞌ chʌc chꞌujbin i tꞌan? An xiba tiꞌ pusicꞌal. Machꞌan miꞌ ñaꞌtyan pañimil, cheꞌob.

21 Pero yañoꞌ bʌ ti yʌlʌyob: Mach cheꞌic miꞌ chaꞌlen tꞌan winic am bʌ xiba tiꞌ pusicꞌal cheꞌ bajcheꞌ jini. ¿Chꞌujbi ba i jamben i wut mutsꞌul bʌ i wut am bʌ xiba tiꞌ pusicꞌal? cheꞌob.

22 Tiꞌ meleyob i cꞌajtisʌntyel qꞌuiñejel templo muꞌ bʌ i melob ti jajabil yaꞌ ti Jerusalén. I yorojlelix tsʌñal.

23 Jesús tiꞌ chaꞌle xʌmbal yaꞌ ti templo yaꞌ ti corredor Salomón bʌ i cꞌabaꞌ.

24 Jini israelob tiꞌ joy mʌctyʌyob Jesús. Tiꞌ subeyob: ¿Jaypꞌej tyo ora maꞌ wʌcꞌon lojon ti pensal? Mi Cristojetyʌch, jini yajcʌbil bʌ, subeñon lojon ti tsiquil bʌ tꞌan, cheꞌob.

25 Jesús tiꞌ jacꞌʌ: Tsaꞌix c subeyetla. Machꞌan ti laꞌ chꞌujbiyon. Jini muꞌ bʌ c chaꞌlen tsaꞌ bʌ i yʌcꞌon c chaꞌlen c Tyat ti panchan mi yʌcꞌon ti cʌjñel.

26 Pero jatyetla, machꞌan mi laꞌ chꞌujbiñon. Como mach c tiñʌmeꞌetla chʌꞌʌch bajcheꞌ tic wʌ subetla.

27 C tiñʌmeꞌob miꞌ cʌmbeñon c tꞌan. Mij cʌñob. Miꞌ tsʌcleñoñob majlel.

28 Mi cʌqꞌuen i cuxtyʌlel machꞌʌ yujil jilel. Machꞌan baꞌ bʌ ora mi quejel i sajtyel. Machꞌan majch mi quejel i chilben loqꞌuel tij cꞌʌb.

29 Machꞌan majch más ñuc bajcheꞌ c Tyat tsaꞌ bʌ i yʌcꞌon. Machꞌan majch chꞌujbi i locꞌben ti i cꞌʌb c Tyat jini c tiñʌmeꞌob.

30 Joñon juntiquilon jach quicꞌot c Tyat. Cheꞌ ti yʌlʌ Jesús.

31 Cheꞌ jini, israelob muꞌ bʌ i contrajiñob tiꞌ chaꞌ lotyoyob tyun chaꞌan i julob Jesús.

32 Jesús tiꞌ subeyob: Cabʌl wen tyac bʌ tic chaꞌle wʌꞌ baꞌ añetla chaꞌan ti i pꞌʌtyʌlel c Tyat ti panchan. ¿Jin chaꞌan baqui bʌ ti caj tsaꞌ bʌ c chaꞌle cheꞌ mi quejel laꞌ julon? cheꞌen.

33 Jini israelob tiꞌ jacꞌʌyob: Machꞌan mi quej lojon c julet chaꞌan ti caj wen bʌ tsaꞌ bʌ a chaꞌle pero chaꞌan maꞌ cuy a bʌ ti Dios. Aunque winiquet jach pero chʌncol a cuy a bʌ ti Dios, cheꞌob.

34 Cheꞌ jini, Jesús tiꞌ subeyob: Ti mandar laꞌ chaꞌan tsꞌijbubil chaꞌan Dios tiꞌ sube jini añoꞌ bʌ yeꞌtyel: Jatyetla diosetla, cheꞌen.

35 Ti ajli ti diosob jini añoꞌ bʌ yeꞌtyel ti ñoj oniyix chaꞌan ti caj tiꞌ cʌntisʌyob i piꞌʌlob bajcheꞌ tsꞌijbubil tiꞌ tꞌan Dios. Cheꞌ ti subentiyob ti Dios jini añoꞌ bʌ yeꞌtyel ti ñoj oniyix.

36 Dios ti yajcʌyon. Tiꞌ chocoyon tyʌlel wʌꞌ ti mulawil. ¿Bajcheꞌqui chꞌujbi laꞌ wʌleꞌ mi mucꞌ jach cuyeꞌ c bʌ ti Dios cheꞌ ti cʌlʌ i Yalobilon Dios?

37 Mi machꞌan mic chaꞌlen mucꞌ bʌ i chaꞌlen tyac c Tyat ti panchan, mach yom laꞌ chꞌujbin chaꞌan tiꞌ chocoyon tyʌlel Dios.

38 Pero cheꞌ mic chaꞌlen ñuc tyac bʌ aunque mach laꞌ wom laꞌ chꞌujbin muꞌ bʌ c subeñetla, pero chꞌujbin chaꞌan Dios ti yʌcꞌon c pꞌʌtyʌlel chaꞌan jini ñuc tyac bʌ tsaꞌ bʌ c chaꞌle chaꞌan mi laꞌ junyajlel ñoj ñaꞌtyan c Tyat an ti joñon yicꞌot joñon añon tic Tyat, cheꞌen.

39 Chaꞌ yomob i cʌchob Jesús jini israelob añoꞌ bʌ yeꞌtyel pero Jesús ti putsꞌi loqꞌuel yaꞌ baꞌañob.

40 Jesús ti sujti ti junxejlel colem jaꞌ Jordán bʌ i cꞌabaꞌ. Ti cʌyle yaꞌ baꞌ ti ñaxan acꞌʌ chꞌʌm jaꞌ Juan.

41 Cabʌl quixtyañu ti majli baꞌan Jesús. Ti yʌlʌyob: Aunque machꞌan tiꞌ pʌsʌ ñuc tyac bʌ i pꞌʌtyʌlel jini Juan pero melelʌch pejtyelel i tꞌan tsaꞌ bʌ i yʌlʌ chaꞌan ili winic, cheꞌob.

42 Cabʌlob tiꞌ chꞌujbi chaꞌan yajcʌbil i chaꞌan Dios jini Jesús yaꞌyaꞌi.