2 Jini ajcʌntꞌañob i chaꞌan Jesús tiꞌ cꞌajtibe: Maestro, ¿chucoch mutsꞌul i wut ti chꞌocʌ ili winic? ¿Chaꞌan ba ti i mul i tyat i ñaꞌ o chaꞌan ba ti i bajñel i mul? cheꞌob.

3 Jesús tiꞌ subeyob: Mach chaꞌanic ti caj i mul mi chaꞌanic ti caj i mul i tyat i ñaꞌ. Pero i tyʌlelʌch mutsꞌul i wut ti chꞌocʌ chaꞌan mi tsictiyel chʌ bʌ chꞌujbi i chaꞌlen Dios.

4 Cheꞌ qꞌuinil tyo mucꞌ tyo c wersa chaꞌliben i toñel jini tsaꞌ bʌ i chocoyon tyʌlel. Como tyal acꞌbʌlel yubil cheꞌ maꞌan majch chꞌujbi i chaꞌlen toñel.

5 Cheꞌ wʌꞌ tyo añon ti mulawil cheꞌ bajcheꞌ i sʌclelon chaꞌan jini añoꞌ bʌ ti mulawil, cheꞌen.

6 Cheꞌ ti ujti i yʌleꞌ jini tꞌan, Jesús tiꞌ tyujbʌ lum. Tiꞌ mele ocꞌol yicꞌot i tyujb. Ti yulbe tiꞌ wut jini mutsꞌul bʌ i wut.

7 Jesús tiꞌ sube: Cucu, poco a wut ti jaꞌ Siloé bʌ i cꞌabaꞌ, cheꞌen. Jini Siloé yom i yʌleꞌ chocol bʌ majlel. Ti majli jini mutsꞌul bʌ i wut. Tiꞌ poco i wut. Ti chaꞌ sujti tyʌlel. Chꞌujbiyix i qꞌueleꞌ pañimil.

8 Cheꞌ jini, i piꞌʌlob lʌcꞌʌl bʌ chumul yicꞌot tsaꞌ bʌ i yilʌyob cheꞌ ñac mutsꞌul tyo i wut ti yʌlʌyob: ¿Machꞌa jinic tsaꞌ bʌ i cꞌajti tyaqꞌuin baꞌ buchul? cheꞌob.

9 An tsaꞌ bʌ i yʌlʌyob: Jiñʌch jini, cheꞌob. Yañoꞌ bʌ ti yʌlʌyob: Mach jiniqui pero chʌꞌʌch yilal, cheꞌob. Pero jini winic i bajñel ti yʌlʌ: Joñoñʌch, cheꞌen.

10 Cheꞌ jini, tiꞌ cꞌajtibeyob: ¿Bajcheꞌqui isujm cheꞌ muqꞌuix a wilan pañimil wale iliyi? cheꞌob.

11 Jini winic tiꞌ jacꞌʌ: Jini winic Jesús bʌ i cꞌabaꞌ tiꞌ mele ocꞌol. Ti yulu ocꞌol tic wut. Cheꞌ jini, tiꞌ subon: Cucu yaꞌ ti jaꞌ Siloé bʌ i cꞌabaꞌ. Poco a wut, cheꞌ ti subon. Tsajniyon. Cheꞌ ujtyemix c poqueꞌ c wut chꞌujbix quilan pañimil, cheꞌen.

12 Cheꞌ jini, tiꞌ cꞌajtibeyob: ¿Baqui an jini winic wale iliyi? cheꞌob. Jini winic tiꞌ jacꞌʌ: Mach cujilic baqui an, cheꞌen.

13 Cheꞌ jini, tiꞌ pʌyʌyob majlel jini tsaꞌ bʌ jajmi i wut tiꞌ tyojlel fariseojob.

14 Pero i qꞌuinilel cꞌaj oj cheꞌ ñac Jesús tiꞌ mele ocꞌol, cheꞌ ñac ti jajmi i wut jini mutsꞌul bʌ i wut.

15 Jin chaꞌan fariseojob tiꞌ chaꞌ cꞌajtibeyob jeꞌel bajcheꞌ ti cꞌoti i wut. Jini winic tiꞌ subeyob: Tiꞌ yulbon ocꞌol tic wut. Tic poco c wut. Wale chꞌujbix j qꞌueleꞌ pañimil, cheꞌen.

16 Cheꞌ jini, chaꞌtiquil uxtiquil fariseo ti yʌlʌyob: Machꞌan chocol tyʌlel ti Dios jini winic tsaꞌ bʌ i jambe i wut como maꞌ miꞌ qꞌuel ti ñuc i qꞌuinilel cꞌaj oj, cheꞌob. Pero yañoꞌ bʌ ti yʌlʌyob: ¿Bajcheꞌqui isujm cheꞌ chꞌujbi i pʌs ñuc tyac bʌ i pꞌʌtyʌlel Jesús mi xmulil? cheꞌob. Chaꞌchajp tiꞌ chaꞌleyob tꞌan.

17 Tiꞌ chaꞌ cꞌajtibeyob jini tsaꞌ bʌ jajmi i wut: Jixcu jatyet, ¿majchqui maꞌ wʌl jini winic tsaꞌ bʌ jambeyet a wut? cheꞌob. Tiꞌ jacꞌʌ: Mi cʌl jiñʌch juntiquil tsaꞌ bʌ i xiqꞌui i yʌleꞌ Dios, cheꞌen.

18 Pero jini israelob mach yom i chꞌujbin mi jiñʌch jini mutsꞌul bʌ i wut ti yambʌ ora chʌncol bʌ i qꞌuel pañimil wale iliyi jintyo tiꞌ pʌyʌyob tyʌlel i tyat i ñaꞌ jini tsaꞌ bʌ jambenti i wut.

19 Tiꞌ cꞌajtibeyob: ¿Jim ba laꞌ walobil iliyi mutsꞌul bʌ i wut ti chꞌocʌ? ¿Bajcheꞌqui ti queji i qꞌueleꞌ pañimil, cheꞌ jini? cheꞌob.

20 I tyat i ñaꞌ tiꞌ jacꞌʌyob: Cujil lojon isujm jiñʌch lojon calobil mutsꞌul bʌ i wut ti chꞌocʌ.

21 Pero mach cujil lojon isujm bajcheꞌ ti queji i yilan pañimil. Mach cujil lojon isujm majchqui tiꞌ jambe i wut. Cꞌajtibenla. Winiquix. Chꞌujbi i bajñel sub, cheꞌob.

22 Chʌꞌʌch tiꞌ jacꞌʌyob i tyat i ñaꞌ como añob i bʌqꞌuen. Como tsaꞌix i lajayob i tꞌan israelob añoꞌ bʌ yeꞌtyel chaꞌan mi quejel i junyajlel choc loqꞌuel ti i templojob majchical jach mi quejel i sub mi jiñʌch yajcʌbil bʌ i chaꞌan Dios jini Jesús.

23 Jin chaꞌan i tyat i ñaꞌ ti yʌlʌyob: Cꞌajtibenla. Winiquix, cheꞌob.

24 Cheꞌ jini, israelob añoꞌ bʌ yeꞌtyel tiꞌ chaꞌ pʌyʌ jini tsaꞌ bʌ jambenti i wut. Tiꞌ subeyob: Subu ti melel bʌ a tꞌan como Dios miꞌ qꞌuelonla. Como cujil lojon isujm xmulilʌch jini Jesús, cheꞌob.

25 Cheꞌ jini, tiꞌ jacꞌʌ tsaꞌ bʌ jambenti i wut: Mach cujil isujm mi xmulil. Pero cujil isujm mutsꞌul c wut ti yambʌ ora. Wale iliyi mi quilan pañimil, cheꞌen.

26 Tiꞌ chaꞌ cꞌajtibeyob: ¿Chuqui tiꞌ tyumbet? ¿Bajcheꞌqui tiꞌ chaꞌle chaꞌan maꞌ wilan pañimil? cheꞌob.

27 Tiꞌ jacꞌʌ jini winic: Tsaꞌix c subeyetla. Machꞌan ti laꞌ chꞌujbi c tꞌan. ¿Chucoch laꞌ wom mic chaꞌ subeñetla? ¿Laꞌ wom ba laꞌ tsʌclen jeꞌel? cheꞌen.

28 Cheꞌ jini, tiꞌ wajleyob. Tiꞌ subeyob jini tsaꞌ bʌ jambenti i wut: Jatyet maꞌ tsʌclen jini winic pero joñon lojon mi lojon c tsʌclen Moisés.

29 Lojon cujil isujm Dios tiꞌ pejcʌ Moisés. Pero ili winic mach cujil lojon isujm baqui chꞌoyol, cheꞌob.

30 Jini tsaꞌ bʌ jambenti i wut tiꞌ jacꞌʌ: ¿Bajcheꞌqui isujm jini? Machꞌan mi laꞌ ñaꞌtyan baqui chꞌoyol. Pero ti yʌqꞌueyon j qꞌueleꞌ pañimil.

31 La cujil isujm Dios machꞌan miꞌ jacꞌben i tꞌan xmulil. Jin jach mi jacꞌbentyel jini muꞌ bʌ i chꞌujutisan Dios muꞌ bʌ i meleꞌ chʌ bʌ yom Dios.

32 Machꞌan baꞌ bʌ ora ti ubinti mi ti jambenti i wut i tyʌlel bʌ mutsꞌul i wut.

33 Machic ti tyʌli ti Dios jini winic mach chꞌujbi i pʌs ñuc tyac bʌ i pꞌʌtyʌlel. Cheꞌ tiꞌ yʌlʌ jini tsaꞌ bʌ jambenti i wut.

34 Cheꞌ jini, ti subenti: Jatyet an a mul ti chꞌocʌyet. ¿Muꞌ ba a cʌntisañon lojon jeꞌel, maꞌ wʌl? cheꞌob. Tiꞌ chocoyob loqꞌuel ti junyajlel ti i templo.

35 Jesús yujil isujm cheꞌ tiꞌ chocoyob loqꞌuel tiꞌ templojob jini tsaꞌ bʌ jambe i wut. Jesús ti cꞌoti i tyajeꞌ. Tiꞌ sube: ¿Muꞌ ba a chꞌujbin i Yalobil Dios? cheꞌen.

36 Jini winic tiꞌ jacꞌʌ: C Yum, subeñon majchqui chaꞌan mic chꞌujbin, cheꞌen.

37 Jesús tiꞌ jacꞌʌ: Tsaꞌix a wilʌ. Joñoñʌch i Yalobilon Dios muꞌ bʌ a pejcañon, cheꞌen.

38 Cheꞌ jini, jini tsaꞌ bʌ jambenti i wut tiꞌ ñocle ti yebal yoc Jesús. Tiꞌ chꞌujutisʌ. Tiꞌ sube: C Yum, mic chꞌujbiñet, cheꞌen.

39 Ti wiꞌil Jesús ti yʌlʌ: Ti tyʌliyon ti mulawil chaꞌan mi tsictiyel i mul quixtyañujob chaꞌan mi jambentyel i wut jini mutsꞌuloꞌ bʌ i wut. Chaꞌan jini muꞌ bʌ i qꞌuelob pañimil miꞌ ñaꞌtyan, mi yajñel cheꞌ bajcheꞌ mutsuloꞌ bʌ i wut, cheꞌen.

40 Cheꞌ jini, chaꞌtiquil uxtiquil fariseo yaꞌ bʌ añob yicꞌot Jesús cheꞌ ñac ti yubiyob ili tꞌan tiꞌ cꞌajtibeyob: ¿Mutsꞌul ba lojon c wut jeꞌel maꞌ wʌl? cheꞌob.

41 Jesús tiꞌ jacꞌʌ: Mutsꞌulic laꞌ wut maꞌix laꞌ mul. Pero chaꞌan mi laꞌ lolon al mi laꞌ wilan pañimil an tyo laꞌ mul, cheꞌen.