3 Cheꞌ jini, ajcʌntisajob chaꞌan mandar i chaꞌan israelob yicꞌot fariseojob tiꞌ pʌyʌ tyʌlel baꞌan Jesús juntiquil xꞌixic tsaꞌ bʌ i tyajayob chʌncol i chaꞌlen i tsuculel yicꞌot winic. Tiꞌ pʌyʌ tyʌlel ti xinil yaꞌ baꞌ añob.

4 Tiꞌ subeyob Jesús: Maestro, ti tyajle ili xꞌixic chʌncox i chaꞌlen i tsuculel, cheꞌob.

5 Ti mandar tsaꞌ bʌ i yʌcꞌonla Moisés miꞌ subeñonla lac tsʌnsan ti tyun muꞌ bʌ i chaꞌlen i tsuculel. Jixcu jatyet, ¿chuqui maꞌ wʌl? cheꞌob.

6 Cheꞌ ti yʌlʌyob chaꞌan jach yom i yilan bajcheꞌ yʌlʌ mi quejel i jacꞌ Jesús chaꞌan yom i tyajben i mul. Pero Jesús ti wutsle ti lum. Ti queji i tsꞌijbun lum tiꞌ yal cꞌʌb.

7 Pero cheꞌ ti queji i bej cꞌajtibeñob Jesús, cheꞌ jini, ti waꞌle. Tiꞌ subeyob: Majchical jach machꞌʌ baꞌan i mul laꞌ i ñaxan jul ti tyun ili xꞌixic, cheꞌen.

8 Ti chaꞌ wutsle Jesús. Tiꞌ bej tsꞌijbu lum.

9 Pero cheꞌ ñac ti yubiyob i tꞌan Jesús ti queji i bajñel ñaꞌtyañob i mul. Belecña ti queji i loqꞌuelob majlel. Ñaxan ti loqꞌui más ñoxobix bʌ. Cheꞌ ñac ti ujti i luꞌ loqꞌuelob ti bajñel cʌyle Jesús yicꞌot jini xꞌixic am bʌ i mul.

10 Cheꞌ jini, Jesús ti waꞌle. Machꞌanix majch yaꞌan ti yilʌ. Jini jachix yaꞌan jini xꞌixic. Jin chaꞌan tiꞌ sube: Xꞌixic, ¿baqui an tsaꞌ bʌ i subuyob a mul? ¿Machꞌa baꞌan tiꞌ juluyetyob? cheꞌen.

11 Jini xꞌixic tiꞌ jacꞌʌ: C Yum, machꞌanix. Mi junticlec tiꞌ juluyon, cheꞌen. Cheꞌ jini, Jesús ti queji i suben: Chʌꞌʌch joñon jeꞌel maꞌix mi cʌqꞌueñet a xotꞌ a mul. Cucux. Mach yom a chaꞌ chaꞌlen mulil, cheꞌen.

12 Jesús tiꞌ chaꞌ sube quixtyañujob: Joñon i sʌclelon mulawil. Jini muꞌ bʌ i tsʌcleñon anix i sʌclel muꞌ bʌ i yʌqꞌuen tsijiꞌ bʌ i cuxtyʌlel. Maꞌ baꞌ bʌ ora miꞌ chaꞌ chaꞌlen xʌmbal ti icꞌjowan bʌ pañimil yubil, cheꞌen.

13 Cheꞌ jini, fariseojob tiꞌ sube Jesús: Jatyet bʌ yi, chʌncol jach a bajñel sub a bʌ ti chocol tyʌlel ti Dios. Maꞌix i cꞌʌjnibal jini, cheꞌob.

14 Jesús tiꞌ jacꞌʌ: Muꞌ bʌ cʌl añʌch i cꞌʌjnibal aunque mic bajñel sub c bʌ como joñon cujil isujm baꞌ chꞌoyolon. Cujil baqui mi quejel c chaꞌ majlel. Pero jatyetla mach laꞌ wujil isujm baqui tyʌlemon mi jinic baqui mi quejel c majlel.

15 Jatyetla mi laꞌ chaꞌlen melojel cheꞌ bajcheꞌ miꞌ chaꞌlen pejtyel quixtyañu cheꞌ bajcheꞌ yilal mi laꞌ pensalin. Pero joñon maꞌ majch mic meleꞌ wale iliyi.

16 Pero muqꞌuic c chaꞌlen melojel, tyojʌch bʌ melojel mic chaꞌlen como mach c bajñel mic chaꞌlen melojel. Pero c Tyat ti panchan tsaꞌ bʌ i chocoyon tyʌlel miꞌ motin chaꞌlen melojel quicꞌot.

17 Tsꞌijbubil ti mandar tyac laꞌ chaꞌan mi yʌl mi an chaꞌtiquil tsaꞌ bʌ i yilʌ, yom chꞌujbintic i tꞌan, cheꞌ tsꞌijbubil.

18 Chʌꞌʌch jeꞌel, mic chaꞌlen tꞌan chaꞌan c sub c bʌ majchonqui. C Tyat miꞌ sub chaꞌan tiꞌ chocoyon tyʌlel. Cheꞌ ti yʌlʌ Jesús.

19 Tiꞌ cꞌajtibeyob cheꞌ jini: ¿Baqui an a Tyat? cheꞌob. Jesús tiꞌ jacꞌʌ: Maꞌ mi laꞌ cʌn majchonqui mi jinic majchqui jini c Tyat. Mi ti laꞌ cʌñʌyon mi laꞌ cʌn c Tyat jeꞌel, cheꞌen.

20 Jesús ti yʌlʌ tyac ili cheꞌ ñac tiꞌ chaꞌle cʌntisa yaꞌ ti colem templo i chaꞌan israelob yaꞌ baꞌan i yajnib tyac baꞌ mi yotsañob tyaqꞌuin. Pero machꞌan majch tiꞌ chucu como max tyo tsꞌʌctyay i yorojlel i wocol Jesús.

21 Jesús tiꞌ chaꞌ subeyob: Mi quejel c majlel. Mi quej laꞌ sajcañon pero mi quej laꞌ sajtyel ti laꞌ mul. Como yaꞌ baꞌ mi quej c majlel mach chꞌujbi majliquetla, cheꞌen.

22 Cheꞌ jini, an israelob tsaꞌ bʌ i subeyob i bʌ: ¿Muꞌ ba ti quejel i tsʌnsan i bʌ? ¿Jin ba chaꞌan mi yʌl mach chꞌujbi lac majlel baꞌ mi quejel i majlel? cheꞌob.

23 Cheꞌ jini, Jesús tiꞌ subeyob: Laꞌ lumalʌch ili mulawil. Joñon an c lumal ti panchan. Laꞌ wajnib ili mulawil pero joñon mach cajnibic ili mulawil.

24 Jin chaꞌan tic subeyetla mi quejel laꞌ sajtyel cheꞌ añet tyo la ti laꞌ mul. Como machꞌan mi laꞌ chꞌujbiñon cheꞌ mic subeñetla majchonqui. Jin chaꞌan mi quejel laꞌ sajtyel cheꞌ añet tyo la ti laꞌ mul, cheꞌen.

25 Cheꞌ jini, jini israelob tiꞌ cꞌajtibeyob: ¿Majchetqui cheꞌ jini? cheꞌob. Jesús tiꞌ jacꞌʌ: Cꞌʌlʌ ti tyejchibal tic subeyetla majchonqui, cheꞌen.

26 An tyo cabʌl chʌ bʌ com cʌl chaꞌañetla chaꞌan mic tsictisan machꞌʌ wen bʌ laꞌ chaꞌlibal. Pero jini tsaꞌ bʌ i chocoyon tyʌlel melelʌch i tꞌan. Jini muꞌ bʌ c subeñetla ti cubi ti yʌlʌ, cheꞌen.

27 Pero machꞌan tiꞌ chꞌʌmbeyob isujm tsaꞌ bʌ i subeyob chaꞌan i Tyat ti panchan.

28 Jin chaꞌan Jesús tiꞌ subeyob: Cheꞌ mi quejel laꞌ letsañon ti cruz Joñon i Piꞌʌlon bʌ Quixtyañujob mi quejel laꞌ cʌñon chaꞌan joñoñʌch jini yajcʌbil bʌ i chaꞌan Dios. Mi quejel laꞌ chꞌʌmꞌen isujm machꞌanix mic chaꞌlen chʌ bʌ yes bajñel com. Jin jach mic subeꞌ tsaꞌ bʌ i cʌntisʌyon c Tyat ti panchan.

29 Como tsaꞌ bʌ i chocoyon tyʌlel wʌꞌan quicꞌot. Machꞌan tiꞌ bajñel cʌyʌyon como mic beleꞌ chaꞌlen muꞌ bʌ i mulan c Tyat ti panchan. Cheꞌ ti yʌlʌ Jesús.

30 Cabʌlob tiꞌ chꞌujbi chaꞌan jiñʌch yajcʌbil bʌ i chaꞌan Dios Jesús cheꞌ ñac tiꞌ subu jini tꞌan.

31 Cheꞌ jini, Jesús tiꞌ sube jini israelob tsaꞌ bʌ i chꞌujbiyob: Mi xucꞌul mi laꞌ bej chꞌujbin majlel tsaꞌ bʌ c subeyetla mi quejel laꞌ wajñel ti yoque ajcʌntꞌan c chaꞌan.

32 Mi quejel laꞌ cʌñeꞌ cheꞌ melel jini tꞌan. Jini melel bʌ tꞌan mi quejel i yʌqꞌuetla ti cojlel, cheꞌ ti yʌlʌ Jesús.

33 Cheꞌ jini, tiꞌ jacꞌʌyob: I jiñʌjlelon lojon Abraham. Machꞌan baꞌ bʌ ora ti ajniyon lojon ti lolon ajtroñel jach. ¿Chucoch maꞌ wʌl mi quejel cʌjqꞌuel lojon ti cojlel? cheꞌob.

34 Jesús tiꞌ subeyob: Melel mic subeñetla, ti pejtyelel quixtyañu muꞌ bʌ i chaꞌlen mulil chuculob ti mulil cheꞌ bajcheꞌ lolon ajtroñelob jach i chaꞌan mulil.

35 Mach ti beleꞌ ora mi yajñel ti yotyot i yum jini lolon ajtroñel jach bʌ. Pero jini yalobilʌch bʌ mi yajñel tiꞌ yalobil i tyat ti beleꞌ ora, cheꞌen.

36 Jin chaꞌan mi ti cojliyetla tiꞌ Yalobil bʌ Dios yoque cojlemetla, cheꞌ jini.

37 Cujil isujm i jiñʌjleletla Abraham pero laꞌ wom laꞌ tsʌnsañon como machꞌan mi laꞌ chꞌujbin muꞌ bʌ c subeñetla.

38 Joñon mic subeñetla tsaꞌ bʌ i pʌsꞌon c Tyat. Jatyetla mi laꞌ chaꞌlen tsaꞌ bʌ i subetla laꞌ tyat, cheꞌ ti yʌlʌ Jesús.

39 Jini israelob tiꞌ jacꞌʌyob: Lojon c tyat Abraham, cheꞌob. Pero Jesús tiꞌ subeyob: Mi yoque melelʌch i jiñʌjleletyʌchla Abraham mi laꞌ chaꞌlen cheꞌ bajcheꞌ tiꞌ chaꞌle Abraham.

40 Pero chaꞌan tic subeyetla melel bʌ tꞌan tsaꞌ bʌ i cʌntisʌyon Dios, laꞌ wom laꞌ tsʌnsañon. Mach cheꞌic tiꞌ chaꞌle Abraham.

41 Miꞌ laꞌ chaꞌlen lajal bʌ bajcheꞌ miꞌ chaꞌlen laꞌ tyat. Cheꞌ ti yʌlʌ Jesús. Cheꞌ jini, tiꞌ jacꞌʌyob: Mach i yalobilon lojon quixtyañujob chaꞌan jach ti i tsuculel. An juntiquil jach lojon c tyat, jiñʌch Dios, cheꞌob.

42 Jesús tiꞌ subeyob: Laꞌ tyatic Dios mi laꞌ pꞌuntyañon. Como loqꞌuemon tyʌlel yaꞌ baꞌan Dios. Machꞌan ti tyʌliyon chaꞌan jach bajñel com c tyʌlel pero Dios tiꞌ chocoyon tyʌlel.

43 ¿Chuqui och mach chꞌujbi laꞌ chꞌʌmꞌen isujm muꞌ bʌ cʌleꞌ? Chaꞌan jach mach laꞌ wom laꞌ wubin c tꞌan, cheꞌ jini.

44 Laꞌ tyat jiñʌch xiba. I chaꞌañetla xiba. Laꞌ wom laꞌ chaꞌlen jini yom bʌ xiba. Ajtsʌnsajʌch jini xiba cꞌʌlʌ ti tyejchibal. Machꞌan baꞌ yʌlʌ melel bʌ tꞌan. Ajlotiyajʌch. Machꞌan melel bʌ tiꞌ pusicꞌal. Jiñʌch muꞌ bʌ i tyecheꞌ pejtyelel lot bʌ tꞌan.

45 Pero chaꞌan chʌncol c subeñetla melel bʌ tꞌan machꞌan mi laꞌ chꞌujbiñon.

46 ¿Am ba juntiquiletla chꞌujbi bʌ laꞌ sub mi an c mul? Mic subeñetla melel bʌ tꞌan. ¿Chucoch machꞌan mi laꞌ chꞌujbiñon?

47 Jini i chaꞌañoꞌ bʌ Dios miꞌ mulan i yubiben i tꞌan Dios. Pero mach i chaꞌañetla Dios. Jin chaꞌan mach laꞌ wom laꞌ ubin i tꞌan. Cheꞌ ti yʌlʌ Jesús.

48 Cheꞌ jini, israelob tiꞌ subeyob Jesús: An chʌ bʌ och ti lojon cʌlʌ chꞌoyolet ti pañimil Samaria bʌ i cꞌabaꞌ como an xiba ti a pusicꞌal, cheꞌob.

49 Jesús tiꞌ jacꞌʌ: Machꞌan xiba tic pusicꞌal. Jini muꞌ bʌ c chaꞌlen miꞌ tsictisan i ñuclel c Tyat. Jatyetla machꞌan mi laꞌ qꞌuelon ti ñuc.

50 Machꞌan tic sajcʌ c bajñel ñuclel pero an juntiquil yom bʌ chaꞌan qꞌuejlicon ti ñuc. Jini mi quej i meleꞌ jini muꞌ bʌ i tsꞌaꞌleñon.

51 Melel mic subeñetla jini muꞌ bʌ i jacꞌ muꞌ bʌ cʌl, machꞌan mi quejel i sajtyel, cheꞌen.

52 Che jini, israelob tsaꞌ bʌ i contrajiyob Jesús, tiꞌ jacꞌʌyob: Wale cujil lojon isujm an xiba ti a pusicꞌal. Abraham yicꞌot pejtyelel tsaꞌ bʌ i xiqꞌui i yʌleꞌ Dios ti ñoj oniyix ti luꞌ sajtiyob. Pero jatyet maꞌ wʌl: Jini muꞌ bʌ i jacꞌ muꞌ bʌ cʌl machꞌan mi quejel i sajtyel, cheꞌet ti a wʌlʌ, cheꞌob.

53 ¿Más ñuquet ba bajcheꞌ lac yum Abraham maꞌ lolon al? Ti sajti yicꞌot jeꞌel jini tsaꞌ bʌ i xiqꞌui i yʌleꞌ Dios ti ñoj oniyix. ¿Majchetqui maꞌ wʌl? cheꞌob.

54 Jesús tiꞌ jacꞌʌ: Mi c bajñel jach mic sub c ñuclel maꞌix i cꞌʌjnibal. Pero jini muꞌ bʌ i tsictisʌbeñon c ñuclel jiñʌch c Tyat ti panchan. Jiñʌch muꞌ bʌ laꞌ sub ti laꞌ Dios.

55 Pero machꞌan mi laꞌ cʌñeꞌ c Tyat. Muqꞌuic cʌl mach j cʌñʌ, lajal ajlotyon bajcheꞌetla. Pero melelʌch joñon mij cʌñeꞌ c Tyat. Mic jacꞌben i tꞌan.

56 Cꞌajacña i yoj Abraham laꞌ yum ti ñoj oniyix chaꞌan mi quejel i yilañon. Yujil isujm Abraham mi quejel c tyʌlel. Cheꞌʌch bajcheꞌ tsaꞌix i yilʌyon. Cꞌajacña i yoj ti yubi.

57 Cheꞌ jini, israelob tiꞌ subeyob Jesús: Max tyo baꞌan cincuenta a jabilel. ¿Tsaꞌix ba a wilʌ Abraham, maꞌ wʌl? cheꞌob.

58 Jesús tiꞌ jacꞌʌ: Melel mic subeñetla cheꞌ ñac max tyo i chꞌocʌ Abraham, añoñʌch, cheꞌen.

59 Cheꞌ jini, tiꞌ lotyoyob tyun chaꞌan i julob Jesús. Pero tiꞌ mujcu i bʌ. Ti loqꞌui majlel ti templo ti xiñilob.