Ja' li' yaloj ti i'ech' xchamel jun vinic ti ip ta leprae
8
Ti c'alal iyal tal ta yoc vits ti Jesuse, ep jchi'iltactic isnap'letaic ech'el. 2 Isnupic ta be jun jchi'iltic ta israelal ip ta lepra. Isquejan sba ta yichon ti Jesuse, ja'o isnijan sba ta balamil noxtoc.―Cajval, ac'anuc la avet'esbon li chamel x'elan ipon oe, yu'un jna'oj ti vo'ot xu' chavet'esbone ―xi ti vinique.
3 Ti Jesuse iyac' sc'ob ta sba ti jchamele.
―Ech'uc che'e ―xut.
Ora i'ech'.
4 ―Mu me much'u xavalbe ya'i ti vo'on laquet'esbot lachamele. Ja' no'ox ba ac'bo yil li palee. Ac'bo smoton Riox chac c'u cha'al yaloj ti Moisese yo' xilic o li jchi'iltactique ti lecot xae ―xut ech'el vinic ti Jesuse.
Ja' li' yaloj ti i'ech' xchamel smozo jun capitan solteroe
5-6 Ti c'alal i'och ta Capernaum ti Jesuse, tey ital jun capitan soltero.
―Cajval, mi mu xa'abulaj xavet'esbon xchamel li jmozoe yu'un ip. Puch'ul ta tem yu'un ch'abal yip jun yoc sc'ob. C'ux tajmec cha'i ―xi.
7 ―Chba jq'uel che'e. Chba quet'esbe ti xchamele ―x'utat yu'un ti Jesuse.
8 ―Cajval, mu tsotsuc cabtel ti vo'ot chabat ta jnae. Xu' ja' no'ox alo jp'eluc ti ac'u ech'uc xchamel li jmozoe. 9 Li vo'one mantal no'ox ta jch'un ti ta jpas ta mantal li solteroetique. “Batan”, mi xcut li june, chbat. “La' to”, mi xcut li june, chtal. “Paso chac li'i”, mi xcut li jmozoe, tspas ―xi ti capitan solteroe.
10 Ti c'alal iya'i ti Jesuse, xch'ayet xa yo'on.
―Ta melel chacalbeic, muc bu jtaoj yech junuc jchi'iltic ta israelal ti ta xch'un chac c'u cha'al ta xch'un li vinic li'i. 11 Chacalbeic noxtoc. Ta sta yora ti chtal ep crixchanoetic ta sjunlej balamil ti ma'uc jchi'iltic ta israelale. Ta x'ochic yo' bu tspas mantal ti Rioxe. Ja' chtal xchi'inic ti jmuc'tatotic ti ta más vo'nee, ja' ti Abraame, xchi'uc ti Isaaque, xchi'uc ti Jacove. 12 Ti much'utic sc'oplal ox ch-ochic yo' bu tspas mantal ti Rioxe, mu x'ochic yu'un mu xich'ic ta muc' ti Rioxe. Ta x'aq'ueic ech'el ta ic' osil. Tey x'oq'ueletic, xc'uxuxet o yeic yu'un tsots castico chich'ic ―x'utatic yu'un Jesús ti much'utic nap'ajtic ech'el ta spate.
13 ―Xu' xa chabat yu'un ic'ot xa li c'usi ach'unoje ―x'utat yu'un Jesús ti capitan solteroe.
Ora i'ech' xchamel ti smozoe.
Ja' li' yaloj ti itup' sc'ac'al sni'me'el ti Pedroe
14 Ti Jesuse ibat ta sna Pedro. Iyil ti tey puch'ul ta stem ti sni'me'el Pedroe yu'un tilem. 15 Ti Jesuse istsacbe sc'ob. Ora itup' sc'ac'al, lic mac'linvanuc.
16 Ti c'alal i'och ac'ubale, iyiq'uic tal ep ti much'utic ochem pucuj ta yo'onique. Ti Jesuse ta jp'el no'ox c'op isloq'ues ti pucujetique. Icol yu'un scotol jchameletic ti italic uque. 17 Ja' ic'ot ti c'usi iyal ti Isaías ti ta vo'nee. “Ja' ch-ech' o cu'untic chamel, c'usuc no'ox chamelal ipotic o”, xi onox ti Isaíase.
Ja' li' yaloj ti much'utic tsc'an chba xchi'inic ti Jesuse
18 C'alal iyil ti Jesuse ti joyletabil ta crixchanoetique ―Batic ta jech nab ―xut li yajchanc'optaque.
19 Tey ic'ot jun ti much'utic ta xchanubtasvanic yilel ta smantaltac Rioxe.
―Cajval, chajchi'in ech'el ti butic chabate ―xi.
20 ―Li vete oy xch'en, li mute oy stso'op. Vo'on ti co'ol crixchanootique ch'abal jna. Nopo lec mi chachi'inon ech'ele ―x'utat yu'un ti Jesuse.
21 Tey ic'ot jun ti much'utic tey onox xchi'uquic sjil c'ac'al ti Jesuse.
―Cajval, ac'on to ech'el. Ja'to chtal jchi'inot ti c'alal xcham li jtote ―xut.
22 ―Batic, chi'inon ech'el. Ti much'utic mu xiyich'ic ta muq'ue, chamemic ya'el. Tey ac'u smuc sba stuquic ―xi ti Jesuse.
Ja' li' yaloj ti ispajes ic', ivaxi yu'un nab ti Jesuse
23 I'och ta canova xchi'uc yajchanc'optac ti Jesuse, ijelavic ta jech nab. 24 C'alal chanavic ta ba nabe, ilic tsots ic', xyuc'yon xa tajmec li nabe. Ep i'och vo' ta yut canova, chmuc xa'ox yalel. Ti Jesuse tey vayem ta yut.
25 Li yajchanc'optaque istijic ti Jesuse.
―Cajval, coltaoticotic yu'un chimucotic xa yalel ―xutic.
26 ―¿Mi mu to bu ach'unojic ya'el ti vo'on tsots jyu'ele? ¿C'u yu'un ti chaxi'ique? ―x'utatic yu'un ti Jesuse.
Ilic ti Jesuse, ispajes li iq'ue, ivaxi yu'un li nabe. 27 Xch'ayet xa o yo'onic li yajchanc'optaque.
―¿C'usi vinical li'i ti jliquel ispajes li iq'ue, ti ivaxi yu'un li nabe? ―xiic.
Ja' li' yaloj ti iloq'uesbat pucuj ta yo'onic cha'vo' jgadarae
28 Ti Jesuse xchi'uc li yajchanc'optaque ic'otic ta jech nab ta slumal jgadaraetic. C'alal iloc' ta canova ti Jesuse, ital cha'vo' vinic ochem pucuj ta yo'onic. Ta muquenal iloq'uic tal yu'un ja' snainojic li ch'ojbil tonetique ti yo' bu chich'ic tiq'uel ti ánimaetique. Mu xa much'u sc'an x'ech' tey ta bee yu'un oy xi'elalic.
29 I'avanic:
―¿C'usi acuentaoticotic o li vo'ote, Jesús, Xch'amal Riox? Mu to sta yora ti chavac'boticotic casticoe ―xiic.
30 Ja'o tey xlamet ep chitometic.
31 ―Mi chaloq'uesoticotic ta yo'onic li viniquetic li'i, abulajan alo ac'op ti chi'ochoticotic ta chitometique ―xi ti pucujetique.
32 ―Ba ochanic ―x'utatic yu'un ti Jesuse.
Ti pucujetique iloq'uic ta yo'onic ti cha'vo' vinique, i'ochic ta chitometic. Ti chitometique stusus xa yalel scotol, ip'ajic ta nab, ijic'av scotol.