Ja' li' yaloj ti iloq'uesbat pucujetic ta yo'on jun jgadarae
5
Ic'otic la ta jech nab ta steclumal jgadaraetic. 2 Ti c'alal iloq'uic ta canovae, ital la jun vinic, ochem la pucuj ta yo'on. Ta muquenal la iloc' tal. 3 Ja' xa la snainoj li ch'ojbil tonetic yo' bu chich'ic tiq'uel ti ánimaetique. Mu la much'u xchuc yu'un, mi ja'uc la ta carina. 4 Ep la ta ech'el ichucbat yoc sc'ob ta carina pero ituch' la yu'un. Mu la much'u stsac yu'un. 5 Ta c'ac'al ac'ubal tey la x'avet ta vitstic xchi'uc ta muquenal. Ta la stam ton, tsyayijes o la sba. 6 Ti vinique nomnom to'ox la iyil ti Jesuse, anil la ital, yul la squejan sba ta yichon. 7 I'avan la.―¿C'usi acuentaon o li vo'ote? Jesús, Xch'amal Riox ta vinajel. Mu me xavac'bon castico. Ti Rioxe ya'yoj ti x'elan chacalbee ―xi la.
8 Ti x'elan iyale, yu'un la iyal xa'ox ti Jesuse ti ac'u loc'uc ti pucuj ta yo'one.
9 ―¿C'usi abi? ―x'utat la yu'un Jesús ti vinique.
―Lejion. Yu'un oy jaymil li' ochemoticotic ta yo'on li vinique. 10 Abulajan, mu xatacoticotic loq'uel li' ta slumal jgadaraetique ―xutic la Jesús ti pucujetique.
11 Ja'o la tey xlamet ep chitometic ta ch'ut vits.
12 ―Abulajan alo ac'op ti chi'ochoticotic ta chitometique ―xi la ti pucujetique.
13 Ti Jesuse iyac' la permiso. Ti pucujetique iloc' la ta yo'on ti vinique, i'ochic la ta chitometic. Ti chitometique oy la cha'miluc. Stusus xa la yalel scotol, ip'ajic la ta nab, ijic'av la scotol.
14 Ti jchabichitometique ixi'ic la. Ba la yalic ta jteclum, ba la yalbeic ti much'utic tey nopol nacajtic uque. Ti crixchanoetique tal la sq'uelic. 15 Ti c'alal ic'otic yo' bu ti Jesuse, iyilic la ti tey xa chotol ti vinique ti ochem to'ox ep pucujetic ta yo'one. Oy xa la sc'u', lec xa la. Ixi'ic o la. 16 Ti much'utic iyilic ti c'u x'elan ilecub ti vinic ochem to'ox pucujetic ta yo'one, xchi'uc ti c'u x'elan icham ti chitometique, iyalbeic la ti much'utic tey laj c'otuque. 17 Scotol ti crixchanoetique ja' la yech lic yalbeic ti Jesuse:
―Abulajan loc'an ech'el li'toe ―xutic la.
18 Ti c'alal i'och ta canova ti Jesuse ―Chajchi'in ech'el ―xi la tajmec ti much'u ochem to'ox pucujetic ta yo'one.
19 ―I'i. Batan ta ana, ba albo lachi'iltaque ti lasc'uxubin xa ti Rioxe, ti iloc' xa ti pucujetic ta avo'one ―x'utat la yu'un ti Jesuse.
20 Ibat la ti vinique, ba la yal a'yuc ta Decapolis yo' bu lajuneb jteclumetique ti iloq'uesbat pucujetic ta yo'on yu'un ti Jesuse. Ti c'alal iya'iic ti crixchanoetique, xch'ayet xa la yo'onic.
Ja' li' yaloj ti icha'cuxi ti stseb Jairoe xchi'uc imac xchamel jun ants ti sc'u' no'ox ipicbat ti Jesuse
21 Ti c'alal isut noxtoc ta jech nab ti Jesuse, ep la tajmec jchi'iltac istsob sbaic ta ti'nab yo' bu ic'ote. 22 Tey la ic'ot jun jmeltsanejc'op ta templo teyo'e, Jairo la sbi. Ti Jairoe, c'alal iyil ti Jesuse, isquejan la sba ta yichon, ja'o la isnijan sba ta balamil noxtoc.
23 ―Ta xcham xa jtseb. Abulajan ba ac'o ac'ob ta sba yo' xcuxi oe ―xi la.
24 Ti Jesuse ibat la xchi'uc. Tey la nap'alic ech'el slajchava'alic xchi'uc epal crixchanoetic, snet'net' xa la sbaic ech'el. 25 Oy la jun ants, slajchebal xa la jabil ti mu xmac xchamele. 26 Ep la isa' jpoxtavanej, muc la xq'uele lec, muc la xmac o ti chamele. Más la i'ipaj o. Ilaj la scotol ti staq'uine. 27 Iya'i la ti chet'es chamel ti Jesuse, nap'al la ibat ta spat ti epal crixchanoetique. Ispits' la sba jelavel, ista la ta picbel spimilc'u' ti Jesuse. 28 “Ac'u mi spimilc'u' no'ox jpicbe, ta xmac o li jchamele”, xi la ta yo'on ti antse. 29 Ora la imac ti xchamele, iya'i la ti lec xae. 30 Ti Jesuse iya'i la ti oy much'u i'ech' xa xchamel ta syu'ele. Ijoyij la, isq'uel la ti crixchanoetique.
―¿Much'u taj lispicbe jc'u'e? ―xi la.
31 ―Tol chnet'van chavil li crixchanoetique. ¿C'u yu'un ti chajac' ti much'u laspique? ―xiic la li lajchavo'e.
32 Ti Jesuse isq'uel la ta jujot xocon ti much'u ipicbon ti spimilc'u'e. 33 Ti antse xt'elt'on xa la ta xi'el yu'un la sna'oj ti ja' ilecub oe. Isquejan la sba ta yichon ti Jesuse, ja'o la isnijan sba ta balamil noxtoc. Jamal la iyalbe ti ta scoj chamel ti ispicbe spimilc'u'e, ti ja' ilecub o ti c'alal ispique.
34 ―Ants, yu'un ach'un ti oy jyu'ele, yech'o ti lecot xae. Mu c'u xal avo'on, batan ―x'utat la.
35 Ti c'alal yolel chlo'ilaj ti Jesuse, ja'o la ital jayvo' ti much'utic teyic ta sna ti Jairoe.
―Icham xa latsebe. Yech xa no'ox chba yac' svocol li Jchanubtasvaneje ―xutic la yulel ti Jairoe.
36 Ti Jesuse, c'alal iya'i ti c'usi i'albat ti jmeltsanejc'ope ―Mu xavat avo'on. Ja' no'ox ch'uno ti oy jyu'ele ―x'utat la.
37 Ti Jesuse mu la sc'an xchi'in ech'el ep crixchanoetic. Ja' no la iyic' ech'el li Pedroe, xchi'uc li Jacoboe, xchi'uc yits'in, ja' li Juane. 38 Ti c'alal ic'ot ta sna jmeltsanejc'op ti Jesuse, iyil la ti xnechetique, ti tol ch-oc' ch-avanique. 39 Ti Jesuse i'och la ta yut na.
―¿C'u yu'un ti xanechetique, ti tol cha'oq'uique? Li tsebe muc bu chamem, ta xvay no'ox ―x'utatic la yu'un ti Jesuse.
40 Tse'ej la xa'i scotolic ti x'elan iyale yu'un la sna'ojic ti ichame. Ti Jesuse istac la loq'uel scotol ti much'utic teyique. Ja' no'ox la teyic ti stot sme' tsebe xchi'uc li oxvo'e. I'ochic la ech'el yo' bu telel ti ánimae. 41 Ti Jesuse istsacbe la sc'ob ti tsebe.
―Talita cumi ―xut. Li talita cumie, “tseb, chacalbe lican”, xi smelol.