Ja' lo'il scuenta jvajtrigo
4
Ibat la ta ti'nab ti Jesuse. Tey la ichanubtasvan noxtoc. Ep la tajmec jchi'iltac ta israelal istsob sbaic. Ti Jesuse i'och la chotluc ta yut canova, tey la xcajet ta ba vo'. Ti crixchanoetique tey la lamal ta ti'nab. 2 Ti c'alal ichanubtasvan ti Jesuse, ep la c'usi iyal ta lo'il.3 ―A'yic me li c'usi chcale. Caltic no'ox ya'el ti oy jun vinic ba svaj strigoe. 4 Ti c'alal isvaje, oy jlom ta be ic'ot. Ital mutetic, istam. 5 Oy jlom ta tontic ic'ot, ti bu ch'abal lec slumale. Ora ivoc' yu'un muc bu pim slumal. 6 C'alal iq'uepe, ic'anub, itaquij yu'un ch'abal lec yisim. 7 Oy jlom ta ch'ixtic ic'ot. Ti c'alal ich'i li ch'ixe, iyolontaj li trigoe, ja' ich'ajub o, muc bu ibeq'uin. 8 Oy jlom ta lequil balamil ic'ot, ibeq'uin. Oy iyac' lajuneb xcha'vinic (30), oy iyac' oxvinic (60), oy iyac' cien. 9 Vo'oxuc ti ava'iic ti c'usi icale, nopbeic smelol ―x'utatic la yu'un ti Jesuse.
10 Li lajchavo'e xchi'uc ti much'utic ichi'invan sjil c'ac'ale, ti c'alal stuquic xa'ox tey xchi'uquic ti Jesuse, isjac'beic la c'usi smelol ti lo'il iyale.
11 ―Li vo'oxuque jamal lacalbeic c'u x'elan tspas ta mantal crixchanoetic ti Rioxe. Li yantique ta lo'il no'ox chcalbeic. 12 Ep ta ech'el iyilic ti oy jlequilal jyu'elale, pero co'ol xchi'uc muc xilic. Ep ta ech'el iya'iic ti c'usi icale, pero muc xa'ibeic smelol yu'un stoyoj sbaic. Ja' ti mu xictaic spasel li c'usitic chopole, yech'o ti mu x'ac'batic pertonal yu'un li smulique.
13 ’Ti mi muc xava'ibeic smelol li lo'ile, ja' no'ox yech mu xava'ibeic smelol li yan lo'il ti ta to xcale. 14 Li jvajtrigoe ja' seña ti much'u chal li sc'op Rioxe. 15 Li bec' trigo ti ic'ot ta bee, ja' seña ti much'utic ya'yojic xa li sc'op Rioxe, pero mu xch'unic. Ta xtal ta ora ti pucuje, chtal ch'aybatuc ta sjolic li sc'op Rioxe. 16 Li bec' trigo ti ic'ot ta tontique, ja' seña ti much'utic c'alal cha'iic li sc'op Rioxe, ora ta xch'unic, jun xa yo'onic yilel. 17 Pero mu sjunuluc yo'on ta xch'unic. Ti c'alal x'ilbajinatique, ora chicta sbaic. 18-19 Li bec' trigo ti ic'ot ta ch'ixtique, ja' seña ti much'utic ya'yojic xa li sc'op Rioxe pero ja' no'ox ta yo'onic li c'usitic oy ta sba balamile. Ja' chlo'loatic o. C'usuc no'ox chpich' o yo'onic. Ja' yolontabil chcom ya'el li sc'op Rioxe yu'un mu j'ech'eluc ta xch'unic. 20 Li bec' trigo ti ic'ot ta lequil balamile, ti iyac' lajuneb xcha'vinique (30), ti iyac' oxvinique (60), ti iyac' ciene, ja' seña ti much'utic j'ech'el ta xch'unic li sc'op Rioxe. Co'ol xchi'uc chbeq'uin ya'el yu'un chalic a'yuc li sc'op Rioxe. Ac'u mi ch-ilbajinatic, mu xicta o sbaic ―x'utatic la yu'un ti Jesuse.
Ja' li' yaloj ti tsc'an chcaltic a'yuc li sc'op Rioxe
21 Ti Jesuse ja' la yech lic yal noxtoc:
―Muc much'u ta stsan scas ti ja'o tsmac ta almule, ti ja'o tstic' ta yolon teme. Toyol onox chac'. 22 Li c'usitic lacalbeique, jamal me xavalic ti c'usi orae, mu me avo'onicuc no'ox sna'. 23 Vo'oxuc ti ava'iic ti c'usi icale, nopbeic smelol ―x'utatic la yu'un ti Jesuse.
24 I'albatic la noxtoc:
―A'ibeic me lec smelol li c'usi chacalbeique. Ti jayp'el chach'unic li c'usi chacalbeique, más to chasp'ijubtasic ti Rioxe. 25 Ti much'utic sjunul yo'on ta xch'unique, más ta xp'ijubtasatic yu'un ti Rioxe yo' xch'unic o leque, yu'un tsc'an ta xch'unic. Yan ti much'utic mu sjunuluc yo'on ta xch'unique, ti jayp'el sna'ique ta xpojbatic ta jmoj ―x'utatic la yu'un ti Jesuse.
Ja' lo'il scuenta trigo ti sna'oj ta xch'i stuque
26 Ti Jesuse ja' la yech lic yal noxtoc:
―Ti Rioxe tey sna'oj stuc c'u x'elan tspas ta mantal crixchanoetic. Co'ol xchi'uc trigo ti isvaj ta yosil jun vinique. 27 Li vinique jun yo'on chvay. C'alal sacube, chlic. Ja' no'ox chil ti ivoc' xa li strigoe pero mu sna' c'u x'elan ivoc'. 28 Yu'un sna'oj ta xch'i stuc. Ba'yi chloc' yanal, ts'acal to chlic beq'uinuc, ts'acal to chyijub. 29 Ti c'alal xyijube, chba sloc' yu'un yora xa ta loq'uel ―xi la ti Jesuse.
Ja' lo'il scuenta bec' mustisya
30 Ti Jesuse ja' la yech lic yal noxtoc:
―Chacalbe ava'iic c'u x'elan tspasvan ta mantal ti Rioxe. 31 Ac'u mi muc bu ep lavie, pero ta to xp'ol. Co'ol xchi'uc bec' mustisya ti biq'uit tajmeque. 32 Pero c'alal xch'ie, más toyol chbat. Ja' mu sta yech li yan ts'unubiletic ti biq'uitic sbeq'ue. Li mustisyae yijic sc'obtac. Chtal mutetic, tey tspas stso'opic ta sc'obc'obtac yu'un oy lec squevual ―xi la ti Jesuse.
Ja' li' yaloj c'u yu'un ti naca ta lo'il iyalbe crixchanoetic ti Jesuse
33 Ti c'u x'elan tspas mantal ti Rioxe, naca la ta lo'il iyal ti Jesuse yo' la mu xicta o sbaic ta ya'yel li jchi'iltac ta israelale. 34 Ti c'usitic iyale, naca la ta lo'il. Li lajchavo'e c'alal stuquic xa xchi'uquic ti Jesuse, i'albatic la c'usi smelol ti lo'iletique.
Ja' li' yaloj ti ispajes ic', ivaxi yu'un nab ti Jesuse
35 Ti c'alal i'ic'ub osile ―Batic ta jech nab ―x'utatic la yu'un Jesús li lajchavo'e.
36 Isc'oponic la comel ti crixchanoetic tey lamalic ta ti'nabe, ja'o la i'ochic ech'el ta canova ti tiq'uil o onox ti Jesuse. Tey la ibat yan canovaetic uc. 37 Ja'o la ilic tsots ic', xyuc'yon xa la tajmec li nabe. Ep la i'och vo' ta yut canova, chmuc xa'ox la yalel. 38 Ti Jesuse tey la vayem ta chac canova, yac'oj la xonjol. Istijic la.
―Jchanubtasvanej, ¿mi muc ta alel avu'un ti chimucotic xa yalele? ―xutic la.
39 Ilic la ti Jesuse, ispajes la li iq'ue, ivaxi la yu'un li nabe.
40 ―¿C'u yu'un ti chaxi'ique? ¿Mi mu to bu ach'unojic ya'el ti vo'on tsots jyu'ele? ―x'utatic la.
41 Más to la ixi'ic. Xalxalbe xa la sbaic:
―¿Much'u li vinic li'i ti jliquel ispajes li iq'ue, ti ivaxi yu'un li nabe? ―xut xa la sbaic.